ღორონთიქ გაჭყჷ ცა დო დედამიწა

იეჰოვა ღორონთ ჩქინ გუმაჭყაფალ რე. თიქ გაჭყჷ ირფელ, მუდგას ვორწყეთ დო მუდგას ვა ვორწყეთ. ღორონთიქ დიო ქიანაშ ანგელოზ გაჭყჷ დო უკულ თი ირფელ, მუდგას ვორწყეთ. ქოიჩქუნო, მი რენა ანგელოზეფ? ანგელოზეფ რენა იეჰოვაშ მსახურეფ დო თის მოგენა. ჩქი ვართ ღორონთიშ ძირაფა შემლებუნა დო ვართ ანგელოზეფიშ. პირველ ანგელოზიქ, ნამუთ იეჰოვაქ გაჭყჷ, მუშ მოხვარეთ გინირთჷ. თინა ოხვარუდ ღორონთის მურიცხეფიშ, პლანეტეფიშ დო შხვა ირფელიშ გოჭყაფას. თე პლანეტეფშე ართ-ართ რე დედამიწა, ნამუთ ჩქინ სქვამ ჸუდე რე.

უკულ იეჰოვაქ დედამიწა ცხოველეფიშ დო ადამიანეფიშ ოცხოვრებელო მამზად. თიქ დედამიწა ბჟაშ სინთეთ გოსინთუ. თეშ უკულ გაჭყჷ გვალეფ, ოკეანეეფ დო მალწყარეფ.

ქოიჩქუნო, მუქ მოხვად თეშ უკულ? იეჰოვაქ თქუ: გუვოჭყანქ მინდორიას, მცენარეეფს დო ჯალეფს. ქოთ თაშ ქუმოხვად – ბრელნერ ხილქ, ბოსტნეულქ დო ყვავილქ ქიდიჭყჷ ეფალუა. უკულ იეჰოვაქ გაჭყჷ ცხოველეფ, ფრინველეფ, ჩხომეფ დო გილახოხუნან ფერ არსებეფ. მაგალთო, თიშ გუნაჭყეფუეფ შქას რე ჭიჭე კურდღელეფ დო ქიანაშმადიდა სპილოეფ. სი ნამ ცხოველ გიჸორს არძაშ უმოსო?

უკულ იეჰოვაქ პირველ ანგელოზის უწუ: „მორთ გუვოჭყათ ადამიან“. ადამიანეფ ცხოველეფშე განსხვავებულეფ იჸუაფუდეს. თინეფს შეიალებედეს ახალ მუდგარენეფიშ გიმოგონება, რაგად, ძიცა დო ლოცვა. თეს გეძინელ, ოკო მიკულუესკო ცხოველეფს დო დედამიწას. ქოიჩქუნო, მი რდჷ პირველ ადამიან? მორთ ქიგებგათ.