აბღნიშნათო ოკო დღახუეფი?

ამდღა ბრელ ქიანას აღნიშნენა პოპულარულ რელიგიურ დო რელიგიურ ვა რენ ფერ დღახუეფს, ნამუსით ვა უღუ ბიბლიურ საფუძველი. სოვრე მოურს თე დღახუეფი? ქეშქალებენ-და, ჯგირ იჸუაფ ქოძირე, მუ ჭარ ენციკლოპედიას ვარდა შხვა ცნობარეფს სქან მხარეს გავრცელებულ დღახუეფიშ გურშენ. ქიმიპჸონათ მუსხირენ მაგალითი.

თანაფა. «„ახალ აღთქმას“ მუთუნ ვა ჭარ თანაფაშ აღნიშნებაშ გურშენ», — ინოჭარუ ენციკლოპედია „ბრიტანიკას“. სოვრეშე მოურს თანაფაშ აღნიშნება? თინა წარმართალაშე მოურს. მართალ რე, ამდღა ხალხი თის იესოშ გათელებას უკავშირენს, მარა თანაფა ქრისტიანულ დღახუ ვა რე. მაგალთო, „კათოლიკურ ენიციკლოპედიას“ ინოჭარ: „გაზარხულიშ მოულაშ აღნიშნებელო ბრელ წარმართულ ადათ-წესი თანაფას დუკავშირეს. მაგალთო, კვერცხი ბუნებაშ გოკურცხინაფაშ სიმბოლოთ ითვალუდ“.

ახალ წანა. მთელ მსოფლიოს ახალ წანას შხვადოშხვა დროს დო შხვადოშხვანერო ზეიმენა. ახალ წანაშ გურშენ ენიკლოპედია „უორლდ ბუკის“ ინოჭარ: „რომიშ მართველ იულიუს კეისარქ ჯვ. წ. 46 წანაშ 1 იანარ ახალ წანაშ დღათ დაწესუ. რომაელეფი თე დღას იანუსის — ჭიშკარიშ, მინაულარ-გიმაულარიშ დო ირფელიშ დაჭყაფუშ ღორონთიერებას — უძღვინენდეს. წანაშ პირველ თუთას იანუსიშ საპატიცემოთ იანარი გიოდვეს. იანუსის ჟირ სახე უღუდ, ართ წოხლე იჯინედ დო მაჟია უკახალე“. თაშ ნამდა, ახალ წანაშ ზეიმი წარმართალაშე მოურს.

ჭეჭეთობა. „ჭეჭეთობას“ (ჭიაკოკონობა) წარმართალაშე უღუ დაჭყაფუ. სამარგალოს ჭეჭეთობას მარაშნაშ წოხლენ სერს ზეიმენა. ხალხის წანდ, ნამდა „ჭეჭეთობა“ სერს თი ადგილეფი, სოდეთ დაჩხერს დარზანდესინ, მაზაკვალეფშე იწიმინდუდ. ათეშგურშენ „ოზეს ბარბანჩია დაჩხერს ორზანდეს, ახალგაზრდეფი თის გართუდეს, გასხაპანდეს დო ჟი ხოლო გინმოსხაპუნდეს“ (საქორთუოშ საბჭოთა ენციკლოპედია). თეგვარ ტრადიცია მოდვალირ რდუ საქორთუოშ შხვა კუნთხუეფს ხოლო.

შხვა დღახუეფი. ძალამს მოკოდანინ ხოლო, ვეშმალებენა არძა დღახუშ გურშენ ქიფჩუათ, ნამუსით მთელ მსოფლიოს აღნიშნენა. მარა იეჰოვას ჯოგუ თი დღახუეფი, ნამუთ კოჩის ვარდა ორგანიზაციეფს განადიდენს (იერემია 17:5—7; საქმეები 10:25, 26). თიქ ხოლო ვაგმოჭყრდან ოკო, ღორონთი ქიწონუანს დო ვარ შხვადოშხვა დღახუეფსინ თინა დამოკიდებულ რე თიშა, სოვრეშე უღუ თინეფს დაჭყაფუ (ესაია 52:11; გამოცხადება 18:4). თე წიგნიშ მა-16 დუდის მოჩამილ ბიბლიურ პრინციპეფშე ქოძირუნქ, მუჭო უჯინე ღორონთი რელიგიურ ვა რენ ფერ დღახუეფს მონაწილებას.