იესო ქრისტე — დუნაპირებ მესია

მესიაშ გიშაჩინებას ქიმმეხვარესკონ თიშენ, იეჰოვა ღორონთიქ მუშ ბრელ წინასწარმარაგადეს წმინდა წერილეფშა ინაჭარაფუ წინასწარნარაგადუეფი, ნამუთ დუნაპირებ მარსხებელიშ დაბადებას, მსახურებას დო ღურას ოხუ. ბიბლიაშ არძა თე წინასწარნარაგადაქ ზუსტას დო კონკრეტულო იესო ქრისტეშა შესრულუ. მაგალთო, ქობძირათ მუსხირენ წინასწარნარაგადა, ნამუთ მესიაშ დაბადებას დო ბაღანობას ოხუ.

ესაიაქ წინასწარ თქუ, ნამდა მესია დავით მეფეშ გამნარყ იჸუაფუდ (ესაია 9:7). იესოქ დასურო დავითიშ გამნარყშე გიშართ (მათე 1:1, 6—17).

მიქაქ, ღორონთიშ წინასწარმარაგადექ, წინასწარ თქუ, ნამდა იესო „ეფრათაშ ბეთლემს“ დებადებუდუ დო ბოლოს მართველ იჸუაფუდუ (მიქა 5:2). იესოშ დაბადებაშ დროს ისრაელს ჟირ ქალაქის ჯოხოდ ბეთლემი. ართ ქალაქ ჩრდილოეთით ნაზარეთწკუმა რდუ ხოლოს, მაჟია — იუდეას, იერუსალიმწკუმა. იერუსალიმწკუმა რდუ თი ბეთლემს დუდშე ეფრათა ჯოხოდ. მუჭოთ წინასწარნარაგადა რდუნ, იესოქ ზუსტას თე ქალაქის დებად! (მათე 2:1).

ბიბლიაშ შხვა წინასწარნარაგადას ღორონთი იჩიებ: „ეგვიპტეშე გეგშეპჸონი ჩქიმ სქუა“. ჭიჭე იესო დიდა დო მუმაქ ეგვიპტეშა იჸონეს. ჰეროდეშ ღურაშ უკულ თინეფქ კინ უკახლე დირთეს დო თეშნერო შესრულინ წინასწარნარაგადაქ (ოსია 11:1; მათე 2:15).

ქოძირით გეძინელ თემეფი „იესო ქრისტე — დუნაპირებ მესია“ დო თექ მოჩამილ ცხრილიშ „მესიას ოხუნ ფერ წინასწარნარაგადუეფი“ გრაფა „წინასწარნარაგადა“, სოდეთ მოჸუნაფილ რე მესიას ოხუნ ფერ ბიბლიურ მუხლეფი. შეადარი თინეფ თი მუხლეფს, ნამუთ მოჩამილ რე „შესრულება“-ს. თენა უმოსო გაიმანგარენს თიშ რწმენას, ნამდა ღორონთის სიტყვა ჭეშმარიტ რე.

თე მუხლეფიშ კითხირიშ დროს რშუდას, ნამდა თე წინასწარნარაგადუეფქ ქრისტეშ დაბადებაშახ ოშობით წანათ ადრე იჭარუ. იესოქ თქუ: „ირფელ, მუთ მოსეშ კანონს, წინასწარმარაგადეეფიშ წიგნეფს დო ფსალმუნეფს ჩქიმ გურშენ ჭარუნ, ოკო შესრულას“ (ლუკა 24:44). შეილებ სქან ბიბლიას გეგნამოწმე დო ქოძირე, ნამდა ირფელქ ზუსტაშე შესრულ!