ჩხომიშ ოჭოფალ ბადეეფ ბიბლიურ დროს

მუჭოთ მიჩქუნა, იესოშ ნამთინე მოწაფე მეჩხომე რდჷ (მარ. 1:16–20). თინეფ გალილეაშ ზღვას ჩხომენდეს დო თეშო ბადეეფს ირინუანდეს.

ოჩხომებელ ბადეეფს ორთუდეს ჭიფე თოკშე ვარდა სელიშ ძაფშე, ნამდგას ჯვარედინო გინოსქუნდეს. თის ნასქვ დო ნასქვ შქას რხვილეფ უღუდ. თიშ სიდიდა თიშა რდჷ დამოკიდებულ, მუ ზომაშ ჩხომიშ ჭოფუა ოკოდ მეჩხომეს, ჭიჭეშ დოვარ დიდიშ. ჭიჭე ბადეეფს კვარკვალია ფორმა უღუდ დო თის ტყვიას ვარდა ქუას მუბუნუანდეს, ნამდა ჯგირო დინწყუკო. დიდ ზომაშ ბადეეფს თუდონ მხარეს წონას მუბუნუანდეს დო ჟი ჯაშ ვარდა კორპიშ ტივტივეფს გიამარგენდეს. მეჩხომეეფს თე ბადე წყარს რდუნ თეშ მეუზინდუდეს დო თეშნერო ჭოფუნდეს ჩხომეფს.

ბადეეფ ძვირ ღირუდ. თიქ შილებე ზღვაშ ქვინჯის ქუალეფს ქიმკაბუნკო ვარდა ბრელ ჩხომიშ წონაშა ვა გარზინუკო დო გოხორცქუკო (ლუკ. 5:6). ბიბლიას იოანეშ დო იაკობიშ გურშენ ჭარჷ, ნამდა თინეფ „ბადეეფს ელაჭანდეს“, მუჭოთ იძირენ, თეშო სელიშ ძაფის დო ლიშის ირინუანდეს (მათ. 4:21). შილებე ბადეეფიშ ელაჭალაქ ირ ჩხომუაშ უკულ იჸუკო საჭიროქ. ლუკა მუშ სახარებას თის ხოლო იჩიებ, ნამდა მეჩხომეეფ ბადეეფს რჩხუნდეს. თეს თიშენ ორთუდეს, ნამდა ბადეს ლეკეფ ჩუთხინუესკო (ლუკ. 5:2). თეშ უკულ თინეფ ბადეეფს ოსქირაფუს გინაბუნუანდეს. მუჭოთ იძირენ, თეს თიშენ ორთუდეს, ნამდა შოლირ ბადეეფქ ვა ჸორდუკო (ეზეკ. 47:10).

იესოქ მეჩხომეეფს ელუჩ, ნამდა ქეკაჸუნესკო თის დო ჩხომიშ ჭოფუაშ მანგიორო „ადამიანეფიშ ჩხომუა“, შხვანერო ქოფთქუათინ, ქადაგება ქიდიჭყესკო.