ქოიღუნო რწმენა?

იეჰოვას გურ გუხარათინ, რწმენა ოკო მიღუდან. მარა ბიბლია მირაგადუნა, ნამდა „არძას ვა უღჷ რწმენა“ (2 თეს. 3:2). პავლექ თე სიტყვეფ თი უბადო ადამიანეფიშ გურშენ თქუ, მით თის თხოზუდ დო მიდგაშეთ დუდიშ დარსხება ოსაჭირუდ. მარა, მუთ პავლექ რწმენაშ გურშენ თქუ, შხვა ადამიანეფს ხოლო მეურე. მაგალთო, ნამთინეს ვა წანსჷ გუმაჭყაფალიშ არსებობაშ, თიშ უმკუჯინუო, ნამდა თეშ არგამა მტკიცებულებეფ არსებენს (რომ. 1:20). შხვეფ იჩიებუნა, ნამდა წანა ღორონთიშ, მარა ხვალე თეცალ რწმენა ვა რე დასაბაღ, ნამდა ასიამოვნან იეჰოვას.

ჩქი ოკო პწანდან, ნამდა „ღორონთ არსებენს დო აჯილდოვენს თინეფს, მით მთელ გურით გორუნს თის“ (ებრ. 11:6). რწმენა წმინდა შურიშ ნაყოფიშ ართ-ართ თვისება რე. წმინდა შურ მიბღათინ, იეჰოვას ლოცვას ოკო ფთხუათ, ქომუჩან თინა (ლუკ. 11:9, 10, 13). თიშ მიოღებელო ხოლო ართ მნიშვნელოვან საშვალება რე ბიბლიაშ კითხირ, ნამუთ იეჰოვაქ წმინდა შურიშ საშვალებათ ოჭარაფუ ადამიანეფს. კითხირიშ უკულ საჭირო რე, დეფიფქრათ დო ცხოვრებას გეგმიბრინუათ თექ ინოჭარილ. იეჰოვაშ წმინდა შურს შეულებ იმოქმედას ჩქინ ცხოვრებაშა დო ქიმმეხვარან, მიღუდან თიცალ რწმენა, ნამდგათ გურს გუხარენთ თის.