ქოიჩქუდესო?

მუშენ გაფულენდეს ჯვეშო ისრაელეფ ურვადის?

ბიბლიურ დროს მოჭყუდუშ ოჯახის არზენდეს ურვადის, მუდგაშა მიშეშ ძვირფას ნივთეფ, ცხოველეფ ვარდა ფარა. მარა მინშა თეს მუნეფიშ ფიზიკურ ხანდათ ხოლო გაფულენდეს. მაგალთო, იაკობიქ რახელიშ მუმას შქვით წანას ემსახურ, ნამდა თიქ რახელ ოსურო მიდაჸუნუკო (დაბ. 29:17, 18, 20). მუ რდჷ თე წესიშ მიზან?

ბიბლიაშ მარკვიებელ კეროლ მეიერს იჩიებ: „ურვად შილებე ჸოფედკო თიშ მანგიორ, მუდგას მოჭყუდუშ ოჯახ ოდინუანდჷ. თენა რდჷ მუნეფიშ სქუაშ ხანდა. თენა განსაკუთრებულო მნიშვნელოვან რდჷ თიცალ ოჯახეფს, სოდეთ მოსავალ მოჸუნდეს“. თეწკუმა ართო, ურვად ოხვარუდ ახალ დამოჯგირებულ ოჯახეფს, უმოს მეგობრულ ურთიერთობა უღდესკო ართიან შქას. თე ოჯახეფ რთულ სიტუაციას ხოლო ელურდეს ართიანს. თეს გეძინელ, ურვად ამტკიცენდჷ, ნამდა ძღაბ დანიშნულ რდჷ დო მალას მუმა ვარინ, ქომონჯ იზრუნენდჷ თიშე.

ურვადიშ გაფა თის ვა ნიშნენდჷ, ნამდა ოსურკოჩიშ გიმოჩამა დო ჸიდირ შილებედ. წიგნის „ჯვეშ ისრაელ დო საზოგადოება“ ჭარჷ: „ძღაბიშ ოჯახშა გარკვეულ ფარაშ ვარდა თიშ საფასურიშ გაფაშ ვალდებულება, ისრაელეფიშ ქორწინებას გიშაჸიდირს უგურუანდჷ. მარა [ურვად] იზმათ ვა რდჷ ძღაბიშ გიშაჸიდირალ, მუზმათ თინა რდჷ კომპენსაცია, ნამუთ მიაჩამუდ ძღაბიშ ოჯახის“.

ნამთინე ქიანას ამდღა ხოლო არსებენს ურვადიშ გინოგაფაშ წეს. მუჟამსით ქრისტიან მშობლეფ ურვადიშ გინოგაფას ითხინა, არძას ოძირანა მუნეფიშ გონიერებას დო ვეთხინა ზომაშე მეტის (ფილ. 4:5; 1 კორ. 10:32, 33). თეშნერო თინეფ ოძირანა, ნამდა ვა რენა ფარაშ მოჸოროფეეფ დო ჰარამეფ (2 ტიმ. 3:2). თეს გეძინელ, მუჟამსით ქრისტიან მშობლეფ დიდ ურვადის ვემითხინა, საქომონჯოს ქორწილ ბრელ ხანით ვაჸი გინადვალარ დო ვართ პიონერო მსახურება აჸი მიოტებელ, ნამდა დასაბაღ ოგაფურ დოშაყარუას.

ნამთინე ქიანას ურვადის კანონ არეგულირენს. თეცალ ქიანას ქოცხოვრენან-და, ქრისტიან მშობლეფ ომორჩილნა თე კანონეფს. მუშენდა ღორონთიშ სიტყვა ქრისტიანეფშე ითხინს, დემორჩილან ხელისუფლებას დო თიცალ კანონეფს, ნამუთ ღორონთიშ კანონეფს ვაწინააღმდეგ (რომ. 13:1; საქ. 5:29).