კითხვა დო პასუხი

მუს ნიშნენს ლევიანეფიშ 19:16-ის მოჩამილ მითითება: „შხვაშ სიცოცხლე საფრთხეს ვენაჸათა“ დო მუს ბგურაფლენთ თავრეშე?

იეჰოვაქ ისრაელეფს უწუ, ნამდა წმინდეფ ჸოფედესკო. სიწმინდეშ დაცვებელო ღორონთიქ თეცალ მითითება მეჩჷ თინეფს: „ვეგლართა სქან ხალხ შქას თიშ გურშენ, ნამდა თინეფშე მიდგაინს ტყურა ქეკაწამე. სქან მოძმეშ სიცოცხლე საფრთხეს ვენაჸათა. მა ვორექ იეჰოვა“ (ლევ. 19:2, 16).

ებრაულ ტექსტის მოჩამილ ფრაზა „საფრთხეს ვენაჸათა“, სიტყვასიტყვით თაშ იკითხირუაფ: „ვეგშართა სქან მოყვასიშ ზისხირიშ წინააღმდეგ“. მუს ნიშნენს თე ფრაზა? ართ ებრაულ ნაშრომ, ნამუთ წიგნ „ლევიანეფს“ ოხუ, რაგადანს: „მუხლიშ თე ნაწილ . . . ძნელ გაგებელ რე, მუშენდა ზუსტას მითინს ვა უჩქჷ, მუ აზრ ინოძ [თაქ გიმორნაფილ] ებრაულ იდიომას“.

ნამთინე მარკვიებელ თე ფრაზას მა-15 მუხლწკუმა აკავშირენს, სოდეთ ბკითხულენთ: „მითინს ვეგშუღა განაჩენ უსამართლოთ. ვეგმირჩქინა გიშაკერძაფა — ვართ ღარიბიშ მხარეს გედირთა დო ვართ მდიდარიშ. სამართლიანო გასამართლ სქან მოძმე“ (ლევ. 19:15). თეშ მიხედვით ქიმსჯელენთ-და, მა-16 მუხლის მოჩამილ მითითება, „შხვაშ სიცოცხლე საფრთხეს ვენაჸათა“, ნიშნენდას იჸი, ნამდა ღორონთიშ ხალხიქ შხვაშ საზიანოთ ვა მიქცუკო სასამართლოს, საქმიან ურთიერთობეფიშ დროს ვარდა ოჯახის. თეს გეძინელ, ისრაელეფქ უპატიოსნოთ ვა მიქცისკო სარგებელიშ მეღებაშ გურშენ. მართალ რე, ჩქი თე მუდგარენეფ ოკო ვა ვაკეთათ, მარა მა-16 მუხლის მოჩამილ ფრაზას შხვა უმოს ლოგიკურ ენწყუმა ხოლო უღჷ.

დეფიფქრათ თე მუხლიშ დაჭყაფ ნაწილშე. ღორონთიქ მუშ ხალხის მითითება მეჩჷ, ნამდა ტყურა ვეკაწამესკო ართიანს. ვაგგოჭყორდან, ნამდა ტყურაშ ეკოწამება უბრალო ჭორიკნობა ვა რე, მარა ჭორიკნობას ხოლო შილებე პრობლემეფქ ქუმაჸუნას (იგავ. 10:19; ეკლ. 10:12—14; 1 ტიმ. 5:11—15; იაკ. 3:6). ტყურაშ ეკოწამება უმენტაშო სიტყვეფით გიმიხანტუაფ დო თიშ მიზან რე მიდგაინიშ რეპუტაციაშ გილალუაფა. ტყურაშ ეკმაწამებელქ შილებე ტყურა მოწმეთ ქიგედირთას თიმწკუმა ხოლო, მუჟამსით თენა შხვაშ სიცოცხლეს ინაჸათანს საფრთხეს. ქიგიშინით, ნამდა ტყურა მოწმეეფიშ ნარაგადიშ შედეგო ნაბოთ უსამართლოთ დოჸვილეს (1 მეფ. 21:8-13). თაშ ნამდა, ტყურაშ ეკმაწამებელ შხვაშ სიცოცხლეს საფრთხეს ენაჸათანს, მუჭოთ თენა ლევიანეფიშ 19:16-იშ მაჟია ნაწილშე იძირე.

თეს გეძინელ, მიდგარენ შილებე თიშენ ეკაწამენდას შხვას ტყურას, ნამდა ჯოგჷ თე პიროვნება. 1 იოანეშ 3:15-ის ბკითხულენთ: „მიდგას მუშ ჯიმა ჯოგჷ, მაჸვილარ რე, მარა თქვა გიჩქუნა, ნამდა ნამთინ მაჸვილარ ვემიღენს მარადიულ სიცოცხლეს“. თიშ უკულ მუთ ღორონთიქ თქუ, „სქან მოძმეშ სიცოცხლე საფრთხეს ვენაჸათა“, გეუძინ: „ვეგიჯოგუა სქან ჯიმა“ (ლევ. 19:17).

თაშ ნამდა, ლევიანეფიშ 19:16-ის ენოჭარილ თე საინტერესო ფრაზა ქრისტიანეფს სერიოზულ გაფრთხილებას არზენს. ჩქი დუდ ოკო ეუჩილითუათ არძანერ გლახა აზრის დო დღას ვეკვაწამათ ტყურა მითინს. მუჟამსით შხვაშ სიცოცხლეს საფრთხეს ენვოჸოთანთ ტყურაშ ეკოწამებათ თიშენ, ნამდა ვა მობწონა ვარდა მონჯარნა თიშ, შილებე თენა თის ოძირანდას, ნამდა ბჯოგნა თე პიროვნება. ქრისტიანეფქ ირნერო ოკო ეუჩილითუან თეს დუდ (მათ. 12:36, 37).