დარწმუნებულ რდათ, ნამდა აღსასრულიშ დროს იეჰოვა დამცვენა

მალას იეჰოვა მეტო ვა მუთვინენს თე უბადო ქვეყნიერებას. მუჟამსით ტყურა რელიგიეფიშ განადგურებაშ უკულ ერეფიშ კოალიცია ღორონთიშ ხალხიშ წინააღმდეგ მოლურს, იეჰოვა განადგურენს უბადოეფს არმაგედონიშ ომს. ღორონთიშ მსახურეფ მთელ გურით ველუთ, მუჟამ მოხვადუ თე ირფელ.

ჩქი ვა მიჩქნა არძა დეტალ დიდ გასაჭირიშ გურშენ. მაგალთო, ზუსტას ვა მიჩქნა, მუჟამ დიჭყაფუ. ვართ თინა მიჩქნა, მუთ გამართლენა პოლიტიკურ ძალეფ რელიგიეფშა გენთხაფას. თეს გეძინელ, ვა მიჩქნა, ზუსტას მუ საშვალებეფს გიმირინუანს იეჰოვა არმაგედონიშ ომს უბადოეფიშ განადგურებელო.

მარა ბიბლია მოგებაფუანა ირფელს, მუთ მოსაჭირნა, ნამდა გაბედულო შეფხვადათ მომავალს დო ბჯერდან, იეჰოვა დამცვენა. მაგალთო, მიჩქნა, ნამდა „ბოლო დღალეფს“ ფცხოვრენთ (2 ტიმ. 3:1). თინა ხოლო მიჩქნა, რელიგიეფშა გენთხაფა ბრელ ხანს ვეგეგრძელებუნ, მუშენდა თინეფწკუმა ართო ჭეშმარიტ თაყვანიშმცემლობაქ ხოლო ვემისპას (მათ. 24:22). ხოლო ართ, მუთ მიჩქნა თინა რე, ნამდა იეჰოვა დეცვენს მუშ ხალხის (2 პეტ. 2:9). თეს გეძინელ, ბიბლია მარწმუნენა, ნამდა ღორონთიშ გიშაგორილ მეფე, ნამუთ არმაგედონს უბადოეფს განადგურენს დო ანაყუ ხალხის ირსხენს, სამართლიან დო ძალიერ რე (გამოცხ. 19:11, 15, 16).

მომავალ მოვლენეფ თიცალ ოშქურანჯ იჸუაფ, „ხალხის გურ მიდალე“. მარა, მუჟამსით ბკითხულენთ დო ფიფქრენთ, მუჭო ირსხენდჷ იეჰოვა მუშ ხალხის ულირს დო მუნერ მომავალ მელნა წოხოლე, თენა მოხვარნა, თამამას ქეუკინათ დუდის თიშა დარწმუნებულეფქ, ნამდა ხოლოს რე ჩქინ რსხება! (ლუკ. 21:26, 28).