ქიცხოვრ ქრისტიანულ პრინციპეფით
„პავლექ ღორონც მადლობა უწუ დო გურშა ელაკინ“
მუჟამსით რომიშ კრებაქ ქიგეგ პავლე მიშუნ, მუსხირენ ჯიმაქ 64 კილომეტრ გემკორთჷ, ნამდა ქეშეხვადეკო თის. მუჭო იმოქმედ პავლეწკუმა თინეფიშ დუდგინოდვალირ ჸოროფაქ? „თინეფ ქოძირუნ, პავლექ ღორონც მადლობა უწუ დო გურშა ელაკინ“ (საქ. 28:15). მართალ რე, პავლე იშო ელუკინანდჷ გურშა თი კრებას, სოდეთ მიშჷ, მარა თე შემთხვევას, მუჟამსით თინა პატიმარ რდუნ, აშო ელუკინეს გურშა (2 კორ. 13:10).
ამდღა რაიონულ ზედამხედველეფ კრებაშე კრებაშა გილულა, ნამდა გურშა ელუკინან და დო ჯიმალეფს. ღორონთიშ შხვა მსახურეფცალო, მინშა თინეფ ხოლო გინაფლენა შულადას, გურგოტახილობას დო გურ აფნა შეწუხებულ. მუშ კეთება შეილებ, ნამდა გურშა ელუკინე რაიონულ ზედამხედველ დო მუშ მეუღლეს, მუჟამსით თინეფ სქან კრებას იძირუანა? (რომ. 1:11, 12).
ქიდესწრ სამქადაგებლო მსახურებაშ შეხვალამეფს. რაიონულ ზედამხედველს გურშა ელუკინანს, მუჟამსით მაქადაგებელეფ მსხვერპლშა მეულა, ნამდა სრულაშე მიღან სარგებელ თი მარაშ სპეციალურ განრიგშე (1 თეს. 1:2, 3; 2:20). ქიფიქრ რაიონულ მონახულებაშ თუთას დამხმარე პიონერო მსახურებაშე. შეილებნო იმსახურე რაიონულ ზედამხედველ დო თიშ მეუღლეწკუმა ვარდა მიდეჸონე თიშა, მიდგას ბიბლიას ოგურუანქ? თინეფს ოხიოლნა შხვადოშხვა და დო ჯიმაწკუმა მსახურება — თინეფწკუმა მით ახალ მაუწყებელ რე დო თინეფწკუმა ხოლო მით ფიქრნეს, ნამდა ვართ ფერ ჯგირო ქადაგენს.
გეგმირჩქინ სტუმარიშ პატიცემა. შეილებნო სქან ჸუდეს გაჩერე თინეფ ვარდა ოჭკუმალ გუკეთე? თეთ რაიონულ ზედამხედველ დო თიშ მეუღლეს ჸოროფას ოძირანქ. თინეფ მუთუნ განსაკუთრებულს ველნა (ლუკ. 10:38—42).
ქიმირჩქილე დო გეგმირინე ხემძღვანელობა ვარდა რჩევა. რაიონულ ზედამხედველ ჸოროფათ მოხვარნა თიშ ძირაფას, მუჭო შემლებნა უჯგუშო ვემსახურათ იეჰოვას. მინშა თიქ შილებე პირდაპირ მუჩან რჩევა (1 კორ. 5:1—5). რაიონულ ზედამხედველს ოხიოლ, მუჟამსით გამგონეფ დო მორჩილეფ ვორეთ (ებრ. 13:17).
გეგმოხანტ მარდულობა. ქოუწი რაიონულ ზედამხედველს დო თიშ ოსურს, მუ ჯგირობუა მოიღ თინეფიშ ხანდაქ. შილებე თენა პირადო ქუწუათ ვარდა ჭიჭე წერილ ქიმეჭარათ (კოლ. 3:15).