ქიცხოვრ ქრისტიანულ პრინციპეფით
ქადაგება თიცალ ტერიტორიას, სოდეთ შხვადოშხვა ნინაშა რაგადანა
ხალხ სახიოლო ამბეს უმოსო თიმწკუმა ირჩქილუანს, მუჟამსით მშობლიურ ნინაშა უქადაგენა. შილებე ზუსტას თეშენ გინოჭყვიდ იეჰოვაქ ახ. წ. 33 წანაშ ჟარნეჩდომავითა დღაშ დღახუს, ნამდა იერუსალიმს რდესინ თი „ღორონთიშმოშიშ იუდეველეფქ“ სახიოლო ამბე მუნეფიშ ნინაშა მირჩქილუესკო, თიშ უმკუჯინუო, ნამდა შილებე თინეფს ებრაულ ვარდა ბერძნულ უჩქუდესკო (საქ. 2:5, 8). თიცალ ტერიტორიას, სოდეთ შხვადოშხვა ნინაშა მორაგადე ხალხ ცხოვრენს, კრებეფს, ნამუთ თექ იტარებუნ, შილებე საერთო ტერიტორია უღდან. მუჭო შეულებნა მაქადაგებელეფს ითანამშრომლან დო საერთო ტერიტორიას ქადაგებაშ დროს ვა გაღიზიანან მობინადრეეფ?
ართიანწკუმა ქიმირაგადეთ (იგავ. 15:22): სამსახურებრივ ზედამხედველეფქ ოკო ითანამშრომლან ართიანწკუმა, ნამდა გინოჭყვიდან, მუჭო დამუშენა თიცალ ტერიტორიას, სოდეთ შხვადოშხვა ნინაშა იჩიებნა. ტერიტორია დიდ ვარენ-და, კრებეფს, ნამუთ შხვა კრებაშ ტერიტორიას ქადაგენა, შილებე უსხუნდან, მუნეფიშ ნინაშა იჩიებნან ფერ მობინადრეეფშა შხვეფქ ვემერთან. ნამთინე შემთხვევას, შილებე უცხო ნინაშა იტარებუნ თი კრებეფ, ვაგანჭუდან მუნეფიშ ტერიტორიას. თე დროს, შილებე შხვა კრებას ქოთხუან, ნამდა არძა მობინადრეშა ქიმერთან დო მუნეფიშ ნინაშა მორაგადე პიროვნებაქ დეინტერეს-და, ქუგაგებაფუან თინეფს (od 93 ¶37). ვარდა შილებე თინეფქ ქორთხუან, ქიმეხვარათ თი კათაშ გორუას, მით მუნეფიშ ნინაშა რაგადანა დო გეგნოჩათ თინეფიშ მისამართ (km 7/12 ჩარჩო მა-5 გვერდის). რშუდან, ნამდა ნამთინე შემთხვევას ართ ოჯახის შილებე მუსხირენ ნინაშა იჩიებდან. თიცალ ტერიტორიას ქადაგებაშ დროს, სოდეთ შხვა ნინაშა მორაგადე ხალხ ცხოვრენს, ოკო დევემორჩილათ თი კანონეფს, ნამუთ შილებე თინეფიშ პირად მონაცემეფიშ დაცვას ითვალისწინენდას.
ითანამშრომლით (ეფეს. 4:16): ზუსტას მიაჸუნ თი მითითებას, მუდგას სამსახურებრივ ზედამხედველ მერჩანს. ხომ ვაგურუანქ ბიბლიას თიცალ პიროვნებას, მიდგაშო მშობლიურ ვა რე თი ნინა, ნამდგაშა სქან კრება იტარებ? ბიბლიაშ მაგურაფალქ შილებე უმოს მალას მირდას სულიერო, მუჟამსით თი კრებაშ ვარდა ჯგუფიშ წევრწკუმა დაკავშირენქ, ნამუთ თიშ ნინაშა რაგადანს.
მომზადება (იგავ. 15:28; 16:1): თიმწკუმა ხოლო, მუჟამსით შხვა ნინაშა მორაგადე პიროვნებაშ შეხვადუქ, ირფელ გაკეთ, ნამდა სახიოლო ამბე გეგნოჩე. შილებე წინასწარ ქიფიქრე ნამ ნინაშა მორაგადე კოჩიქ შილებე შერხვადას დო გეგნოჭარე ბიბლია დო ვიდეოეფ თე ნინეფშა. თეს გეძინელ, შეილებ გეგმირინუე აპლიკაცია „JW ნინეფი“ დო ქიდიგურუე მისალმება მუსხირენ ნინაშა.