ხვალე მეჯინათ ხომ ვაფასენთ კოც?

იეჰოვაშ მოწმე დონი, ნამუთ კანადას ცხოვრენს, ირნერო ოცად, ქუჩას ცხოვრენან ფერ კათას ქუდურაგადუას. დონი ართ თეცალ პიროვნებაშენ იჩიებ: „პეტრეცალ წიმდამ მითინ ვეშეფხვალამ ჩქიმ ცხოვრებას. თის სასწაულ შურ განთხანდ დო მითინს ვემკინჭანდ. თინა ირიათო ვარიას იჩიებუდ ირნერ მოხვარაშენ“. დონი 14 წანაშე მეტ ხანს ოცადუდ, ჯგირო მექცუკო თე კოც, ნამუსით ჸუდე ვა უღუდ დო ქუჩას ცხოვრენდ.

არჩა პეტრექ დონის კითხ: „არძა ჩქიმდე მინტებ დო სი მუშენ ვამოთხუქ? მუშენ ზრუნენქ ჩქიმდე?“. პეტრეშ გურს ქეშეხუკონ თიშენ, დონიქ თის ბიბლიაშე სუმ მუხლი წუკითხუ. დიო თიქ პეტრეს კითხუ, ქოუჩქუდ დო ვარ, ნამდა ღორონც სახელი უღუდ დო უკულ წაკითხირაფუ ფსალმუნები 83:18. თეშ უკულ ქაძირუ რომაელები 10:13, 14, ნამდა ქუგაგებაფუკო, მუშენ ზრუნენდ თიშო. თე მუხლის ჭარ: „არძა მით, იეჰოვაშ სახელს შინანსინ, გინოსკიდუ“. ბოლოს დონიქ პეტრეს წუკითხუ მათეშ 9:36 დო ქოთხუ, მუს ხოლო წუკითხირუდკო თე მუხლი, სოდეთ ჭარ: „ხალხის ორწყედუნ, [იესოს] გურს ონტუდ თინეფიშ გურშენ, მუშენდა უჭყიშო შხურეფცალო რდეს ძალა გიშალიებურ დო თევრე თავრე მიკოცუმილ“. პეტრექ ჩილამურეფით ეფშა თოლეფით კითხუ დონის: „Amმა ვორექო თი შხურეფშე ართ-ართ?“.

ჭიჭე-ჭიჭეთ პეტრექ დითირ. თიქ გიბონ, ბჟაკე გიხოკ დო დონიშ მუნაჩემ ბარგი ქიმკიქუნ. თეშ უკულ პეტრე ირო სუფთას გილეშ.

პეტრე ჩანაწერეფს ორთუდ. ჩანაწერეფიშ პირველ გვერდეფს მუშ ცხოვრებაშ გლახა მომენტეფი აფუდ ეჭარილ, მარა თი გვერდეფი, სოდეთ დონიშ გურშენ ჭარუნდუნ, შხვანერ რდუ. ართ-ართ გვერდის ჭარუდ: „ამდღა ქიგებგი, მუ ჯოხო ღორონც. ასე, მუჟამსით ბლოცულენქინ, იეჰოვას ვეჩიებუქ. მუშმაჯგირა რე, თიშ სახელიშ რჩქინა. დონი იჩიებ, ნამდა შილებე იეჰოვაქ ჩქიმ პირად მეგობარქ ქიჸუას, ნამუთ ირიათო მირჩქილე, ვა უღუ მნიშვნელობა მუჟამ დო მუ თემაშენ ვეჩიებუქ“.

პეტრექ თე დღიურს ბოლო სიტყვეფით მუშ და დო ჯიმას მეჭარ:

„ამდღა ჯგირო ვაბგინაფლენქ დუც. მა ფიფქრენქ, წანეფ მუშის ორთუ. მარა თენა ჩქიმ ბოლო დღა რდასინ ხოლო, მიჩქუ, მა კინ ბძირუნქ ჩქიმ მეგობარს [დონის] სამოთხეს. თე წერილს ქოკითხულენთ-და, ესეიგ ცოცხალ ვა ვორექ. მარა ჩქიმ დასაფლებას უჩინებ კოჩი ქოძირით-და, ქუდურაგადეთ თის დო ქორთხინთ, წეკითხათ თე ჭიჭე წიგნი [თინა გულისხმენდ ბიბლიაშ ოგურაფალ დამხმარე წიგნის „მარადიულ სიცოცხლეშა მიმაჸუნაფალ ჭეშმარიტება“, ნამუთ თის წანეფიშ წოხოლე მეჩეს].a თექ ჭარ, ნამდა მა კინ ქობძირუნქ ჩქიმ მეგობარს სამოთხეს. თენა მთელ გურით ბჯერს. დიდ ჸოროფათ თქვან ჯიმა პეტრე“.

დასაფლებაშ უკულ, პეტრეშ და უმიქ თქუ: „სოდგარენ ჟირ წანაშ წოხოლე პეტრექ დემეკავშირ. თესხი წანაშ უკულ, პირველო ბძირ თინა ბედნერ; პეტრე იძიცანდ“. უმიქ დონს უწუ: „მა წებკითხენქ თე წიგნის, მუშენდა ჩქიმ ჯიმაშ გურს შეხუნ თინა, მუდგარენ განსაკუთრებულ ოკო რდას“. უმიქ თინა ხოლო მიკორინუ, ნამდა ართ იეჰოვაშ მოწმეწკუმა ქუდუჭყაფუდკო ბიბლიაშ გურაფა წიგნით „მუს მოგურუანა ბიბლია სინამდვილეს?“.

ჩქი ხოლო შემლებნა ხვალე მეჯინათ ვეშვაფასათ პიროვნება, გეგმიფრჩქინათ ნამდვილ ჸოროფა დო მუთვინათ არძანერ ხალხის (1 ტიმ. 2:3, 4). თაშ ქიმიბქციებუთ-და, შემლებნა ქიმვეხვარათ პეტრეცალ ხალხის, მიდგას შხვეფ მეჯინათ აფასენა, მარა გურ ჯგირ უღნა. შემლებნა დარწმუნებულ ვორდათ, ღორონთ, ნამუთ „გურს ორწყე“, ბიბლიურ ჭეშმარიტებას გაგებაფუანს არძას, მიდგას მთელ გურით ოინტერეს თინა (1 სამ. 16:7; იოან. 6:44).