ეზრა ღორონთიშ კანონს ოგურუანს

ისრაელეფიშ იერუსალიმშა დორთაშე 70 წანა რდჷ მიკულირ, მარა ნამთინე დიო ხოლო სპარსეთიშ იმპერიას შხვადოშხვა კუნთხუს ცხოვრენდჷ. თეცალ კათაშ შქას რდჷ მღვდელ ეზრა. თინა ხალხის იეჰოვაშ კანონს ოგურუანდჷ. ეზრაქ ქიგეგ, ნამდა იერუსალიმს ხალხ ვემეჸუნდჷ ღორონთიშ კანონს. ათეშენ თის ოკოდ, თინეფიშ მახვარებშა მიდურთუმუდუკო. სპარსეთიშ მეფექ, არტაქსერქსექ, თის უწუ: ღორონთიქ თიცალ სიბრძნე ქიმერჩჷ, ნამდა შეილებ ხალხის თიშ კანონ ოგურუე. ათეშენ მეუ დო მიდეჸუნ, მით გოკო. ეზრაქ დოგორ თინეფ, მიდგას იერუსალიმშა დორთა ოკოდეს. თინეფქ ულაშახ იეჰოვას თხუეს, ნამდა მშვიდობიანო გენორთესკო იერუსალიმშა, მუშენდა გინძე შარა გეუძუდეს.

ოთხ თუთაშ უკულ, თინეფქ გენორთეს იერუსალიმშა. მთავარეფქ ეზრას უწუეს, ისრაელეფქ ვედემორჩილეს იეჰოვას დო ოსურეფო ტყურაღორონთეფიშ თაყვანიშმცემელეფ ქიმიჸუნესია. მუჭო მიქცუ ეზრაქ თეშ მორჩქილაფაშ უკულ? თიქ ხალხიშ წოხოლე ბირგულეფს ქეშანთხჷ დო ილოც, იეჰოვა, სი ქიანაშ მუდგარენ გაფჷ ჩქინო ნაკეთებ, მარა ჩქი სქან წოხოლე შეფცოდითია. მართალ რე, ხალხიქ ინარღჷ დაშებულ, მარა ირფელ სწორას გაკეთესკონ, მოხვარა ოსაჭირუდეს. ათეშენ, ეზრაქ უხუცესეფ დო მსაჯულეფ ქიგიორინუ, ნამდა ქიმკაჯინესკო თე ამბეს. თაშ ნამდა, უკულიან სუმ თუთას, არძას, მით ვამსახურუდ იეჰოვას, გინახორუანდეს.

გემკორთჷ ვითოჟირ წანაქ. ეშობას იერუსალიმიშ კიდალეფ გეიაშენეს. ეზრაქ ხალხ გეკოშაყარუ, ნამდა ღორონთიშ კანონ წუკითხუკო თინეფს. კანონიშ წიგნ გეგნოფაჩუნ, ხალხიქ გემწოდირთჷ. ეზრაქ განადიდ იეჰოვა, ხალხიქ თანხმობაშ ნიშანო ხელეფს გეუკინ. უკულ ეზრაქ კანონ წუკითხჷ დო გეუნწყჷ თინეფს. ხალხ მთელ ყურადღებათ ურჩქილედ თის. თინეფქ აღიარეს, ნამდა კინ ურთინუეს ოჭიშ იეჰოვას დო ნგარაქ გეუოლეს. მაჟია დღას ეზრაქ კანონიშ წიგნშე უმოს წუკითხ თინეფს. ხალხიქ ქიგეგ, ნამდა მალას კარავეფიშ დღახუ ოკო იზეიმესკო. ათეშენ, ხეთეშე ქიდიჭყეს თე დღახუშო მომზადება.

კარავეფიშ დღახუ შქვით დღას მიშჷ, ხალხის ხიოლ უღუდ დო უმარდუდეს იეჰოვას ჯგირ მოსავალიშ გურშენ. იესო ნავეშ სქუაშ დროშე მოჸუნაფილ კარავეფიშ დღახუ თეცალო დღას ვა უზეიმებუნა. დღახუშ უკულ ხალხიქ გეკიშაყარ დო ილოცეს: იეჰოვა, სი მონობაშე დამირსხით, უდაბნოს მოდიარუანდით დო თე სქვამ ქიანას დუმოხორეთ. მარა ჩქი ბრელშა გირთინეთ ოჭიშ. სი წინასწარმეტყველეფიშ საშვალებათ მაფრთხილენდით, მარა ჩქი ვა ურჩქილედით თინეფს. ირფელიშ უმკუჯინუო, სი იშენით მითვინენდით. ვეგნოირთაფ აბრაამშა მეჩამილ პირობაშა. ასე პირობას გარზენთ, ნამდა დეგემორჩილებუთ. თინეფქ მუნეფიშ პირობა დოჭარეს დო მთავარეფქ, ლევიანეფქ დო მღვდელეფქ ბეჭედ ქიგიაშქვეს თის.