მეფე დავით ცოდენს

საულიშ ღურაშ უკულ, დავითიქ გინირთჷ მეფეთ. თინა თე დროს 30 წანერ რდჷ. მეფეთ გინორთაშე მუსხირენ წანაშ უკულ, ართ სერს, დავით სასახლეშ ჟინ სართულს რდჷ დო სქვამ ოსურს ქუმუკინდუ თოლ. დავითიქ ქიგეგ, ნამდა თის ბათშება ჯოხოდ დო თიშ ქომონჯ ჯარიშკოჩ ურია რდჷ. თიქ ბათშება მუშ სასახლეშა ქუმაჸუნებაფუ. თინეფს სქესობრივ კავშირ უღუდეს. შედეგო, ბათშებაქ დეორსულ. დავითიქ ეცად, დოფულუკო მუშ საქციელ. თიქ ჯარიშ მეთაურს დავალ, ნამდა ურია ბრძოლას წოხოლე ქიგიორინუესკო დო ხვალე ქუდუტებუდესკო. ურიაშ ჸვილუაშ უკულ დავითიქ ბათშება ოსურო ქიმიჸუნ.

მარა იეჰოვას ვემკოსქილად დავითიშ გლახა საქციელ. მუს გაკეთენდ თინა? იეჰოვაქ დავითშა წინასწარმეტყველ ნათან მიდაშქვჷ. ნათანქ დავითის უწუ: ართ ქონებიერ კოჩის ბრელ შხურ ჸუნდჷ. უღონო კოჩის ხვალე ართ კაკალია კირიბ, ნამუთ მანგარო უჸორდჷ. ქონებიერქ უღონოს თე ართ კაკალია კირიბ მიდუღ. დავითიქ თენა ქიმირჩქილუნ, გერისხჷ დო თქუ: თე ქონებიერ კოჩ ღურაშ ღირს რე! უკულ ნათანქ დავითის უწუ: სი რექჷ თე ქონებიერ კოჩ! დავითის თეშ მორჩქილაფაქ გურ გამკუჸოთ. თიქ ნათანს უწუ: შეფცოდ ღორონთიშ წოხოლე! თე ცოდაქ დავითის დო მუშ ოჯახის ბრელ გლახა ქუმუკინდუ. იეჰოვაქ დასაჯ დავით, მარა ვა უჸვილ თინა, მუშენდა თანდაბალ დო ალალ კოჩ რდჷ.

დავითის მანგარო ოკოდ, იეჰოვაშ ტაძარ აშენუკო, მარა იეჰოვას თე საქმეშო დავითიშ ქომოლსქუა, სოლომონ, აფუდ გიშაგორილ. დავითიქ ირფელიშ გახაზირებას ქეშუდირთჷ, ნამდა სოლომონქ ტაძარიშ შენება ქიდიჭყუკო. თიქ თქუ: იეჰოვაშ ტაძარ დიდებულ ოკო რდასჷ! სოლომონ დიო ხოლო ახალგაზრდა რე, მარა მა ქიმვეხვარებუქ დო ირფელს გაუხაზირენქ. ტაძარიშ მშენებლობაშ ხუჯიშდაკინებელო დავითიქ ბრელ ფარა ახარჯჷ. თეს გეძინელ, თიქ დოგორ ჯგირ მაშენებელეფ, დოშაყარუ ოქრო–ვარჩხილ დო ტვიროსშე დო სიდონშე კედარიშ ჯალეფ ქიმიღ. ღურაშახ, დავითიქ სოლომონს ტაძარიშ მშენებლობაშ გეგმა ხოლო ქიმეჩ დო უწუ: იეჰოვაქ მოჭარაფუ თე ირფელ სქანო. ვა გაშქურინას, თინა ქიმგეხვარებ. გემანგარ დო საქმეს ხე ქიმეთხჷ.