მუჭო ვულუანთ სამეფო დარბაზეფს?

იეჰოვაშ მოწმეეფიშ თითოულ სამეფო დარბაზი ღორონთიშ წმინდა სახელს განადიდენს. ათეშგურშენ ჩქინო დიდ პატი რე სამეფო დარბაზეფიშ დონწყუალა, დოკვანწუა დო მუთუნქ გილელ-და თიშ კეთება. თენა წმინდა თაყვანიშმცემლობაშ მნიშვნელოვან ნაწილ ხოლო რე. სამეფო დარბაზეფიშ მიკოჯინა კრებაშ თითოულ წევრის შეულებ.

ირ კრებაშ შეხვალამაშ უკულ და დო ჯიმალეფი დარბაზის ონწყუნა. ირ კრებაშ შეხვალამაშ უკულ, დარბაზიქ სუფთაქ ქიჸუასინ თიშენ და დო ჯიმალეფი ხიოლით ასუფთენა დო ონწყუნა თის. სამეფო დარბაზის მარაშე ართშა დუდშე ბოლოშა წიმინდანა. თე საქმეს ხენჯღვერანს უხუცესი ვარდა მომსახურე, ნამდგას წინასწარ აფუ მოფიქრებულ მუ საქვარქ იკეთინასი. მოხალისეეფი, საჭირო ქორენ-და, პროლს გიმოხუშუნა დო გიმოჯირქუნა, ვარდა ტვერიშ ოწიმინდალ მანქანათ ასუფთენა; ტვერს გინოწიმინდანა, სკამეფს მუშ-უშ ადგილს ონწყუნა, ტვალეტეფს დეზინფექციას ორთუნა, აკოშკეფს დო სარკეეფს წიმინდანა, გვამი გიმუღნა, დარბაზიშ ოზეს მოწკანტილო დო სქვამაშე იტენა. წანმოწანაშე ართშა დარბაზის გენერალურო ასუფთენა დო ონწყუნა. მუჟამს ვარენო ბაღანეფს ხოლო ვოკეთებაფუანთ შხვადოშხვა საქმესინ, ჩქინ თაყვანიშმცემლობაშ ადგილიშ პატიცემას ვოგურუანთ (ეკლესიასტე 5:1).

სამეფო დარბაზის მუთუნქ გილელ-და, და დო ჯიმალეფი აკეთენა. ირ წანას სამეფო დარბაზეფს გურგედვალირო ილენა გალე დო დინახალე. თეშ უკულ საჭირო ქორენ-და, იჭყანა სარემონტო საქმეეფიშ კეთებას. სამეფო დარბაზეფიშ ირიათო მიკოჯინა თიშენ რე ჯგირ, ნამდა ორგანიზაციას ზედმეტ ხარჯეფი ვაღვენუ (2 მატიანე 24:13; 34:10). სუფთა დო ჯგირო მუკოლუაფირ სამეფო დარბაზი მართალო ოსკვებურ ადგილ რე ჩქინ ღორონთიშ თაყვანიშოცემელო. მუჟამს თე საქმეს ვორთუთინ, ვოძირანთ, ნამდა მიჸორა ღორონთი დო ვაფასენთ ჩქინ თაყვანიშოცემებელ ადგილს (ფსალმუნი 122:1). ჩქინ სქვამი დო მოწკანტილ სამეფო დარბაზი თოლშა მალაფარ რე ირ კოჩშო (2 კორინთელები 6:3).

• მუშენ ოკო ვემვუარკათ ყურადღება ჩქინ თაყვანიშოცემებელ ადგილს?

• მუჭო ონწყუნა სამეფო დარბაზის ორგანიზებულო?