მუ რე სასამართლოშ დღა?

მუჭო გაფუ წარმოდგენილ სასამართლოშ დღა? ბრელს წარმოდგენილ აფუ მილიარდობით ხალხი, ნამუთ სათითაოთ მეურს ღორონთიშ ტახტშა დო ისამართლებუ: ღორონთი ნამთინეს ზეციერ სამოთხეს აცხოვრენს, ნამთინეს მარადიულ წამებაშ განჩენს გიმუღანს. მარა ღორონთიშ სიტყვა თე დღას გვალო შხვანერო ემჭარნა დო თიშა შურო ვა რე ოშქურანჯი. ბიბლიაშე იძირე, ნამდა სასამართლოშ დღა იმენდიშ მუმაჩამალ დო ირფელიშ გაახალებაშ პერიოდ რე.

გამოცხადებაშ 20:11, 12-ს მოციქულ იოანე სასამართლოშ დღას ათეშნერო ეჭარუნს: „ქობძირ დიდ ჩე ტახტი დო თინა, მით თის ხედუნ. თიშე მინტებუდ ცა დო დედამიწა დო ვა რდუ ადგილ თინეფშო. ქობძირ ღურელეფი, დიდეფ დო ჭიჭელეფი, ნამუთ ტახტიშ წოხლე გერდეს, დო გოფაჩილ რდუ გვარგვაზელ ხეშნაჭარეფი. გოფაჩილ რდუ შხვა გვარგვაზელ ხეშნაჭარეფ ხოლო — სიცოცხლეშ გვარგვაზელ ხეშნაჭარეფი. ღურელეფქ თე გვარგვაზელ ხეშნაჭარეფს ინოჭარილით გესამართლეს მუნეფიშ საქმეეფით“. მი რე თაქ მოშინაფილ მოსამართლე?

იეჰოვა ღორონთი კაცობრიობაშ უზენაეს მოსამართლე რე. მარა ხალხი გასამართლასინ თიშენ, თის წარმომადგენელ ჸუნს. საქმეეფიშ 17:31-ის მოციქულ პავლე იჩიებ, ნამდა ღორონთიქ „დანიშნუ დღა, მუჟამსით განზრახულ აფუ სამართლიანო გასამართლას ქიანა მუშ დორინაფილ კოჩიშ ხეთ“. თე დორინაფილ მოსამართლე გათელებულ იესო ქრისტე რე (იოანე 5:22). მუჟამ დიჭყაფუ სასამართლოშ დღა დო მუსხი ხანს გეგრძელებუ თინა?

წიგნი „გამოცხადებაშე“ იძირე, ნამდა სასამართლოშ დღა დიჭყაფუ არმაგედონიშ უკულ, მუჟამსით სატანაშ სისტემა მისპუa (გამოცხადება 16:14, 16; 19:19—20:3). არმაგედონიშ უკულ სატანა დო მუშ დემონეფ ანთას წანას უმოქმედო მდგომარეობას იჸუაფნა. თე პერიოდის ქრისტეშ 144 000 თანამემკვიდრეს მიაჩამუ გასამართლებაშ უფლება დო თინეფ „ქრისტეწკუმა ართო ანთას წანას“ იმეფენა (გამოცხადება 14:1—3; 20:1—4; რომაელები 8:17). სასამართლოშ დღა პირდაპირ გაგებათ 24-საათიან მოვლენა ვეჸუაფუ, თინა ანთას წანას გეგრძელებუ.

ანთას წანაშ დინახლე იესო ქრისტე გასამართლენს „ცოცხალეფს დო ღურელეფს“ (2 ტიმოთე 4:1). „ცოცხალეფ“ შქას იჸუაფნა თინეფ, მით არმეგედონს გინოსკიდნა. „გამოცხადებას“ თინეფ „ანაყუ ხალხო“ რენა მოშინაფილი (გამოცხადება 7:9—17). მოციქულ იოანექ ღურელეფი ხოლო ძირუ, ნამუთ „ტახტიშ წოხლე გერდეს“. იესოშ დუნაპირებუთ, „მით ონთხორუეს რენან, თიშ [ქრისტეშ] ხონარს ქიგეგონენა დო კილელენა“, ანუ გეცოცხლებნა (იოანე 5:28, 29; საქმეები 24:15). მუჭო გესამართლებნა თინეფი?

იოანექ ძირუ, ნამდა „გოფაჩილ რდუ გვარგვაზელ ხეშნაჭარეფი“ დო „ღურელეფქ თექ ინოჭარილით, მუნეფიშ საქმეეფით გესამართლეს“ (გამოცხადება 20:12). ინოჭარნო თე ხეშნაჭარეფს თინეფიშ ულირ საქმეეფი? ვარ. თინეფ ვეგესამართლებნა ღურაშახ ნაკეთებ საქმეეფით. სოვრეშე მიჩქუნა თენა? ბიბლია იჩიებ: „მიდგაქ დოღურუნ თის, ცოდაქ მანწყუ“ (რომაელები 6:7). თეგვარო, გაცოცხლებულეფს არძა ულირ ცოდა ეპატიებნა. ლოგიკურ რე იფიფქრათ, ნამდა თე ხეშნაჭარეფს თი მოთხოვნეფ რე მოჩამილ, ნამუთ მომავალს იჸუაფუ. მარადიულო ქიცხოვრანინ თიშენ, არმაგედონს გინოსკილადირეფქ დო გაცოცხლებულეფქ ოკო დემორჩილან ღორონთიშ მოთხოვნეფს დო თიწკუმა ართო თი ახალ მითითებეფს ხოლო, ნამუქით შილებე მიაჩან იეჰოვაშე ანთას წანაშ დინახლე. თაშ ნამდა, ხალხი გესამართლებუ თი საქმეეფით, მუდგას სასამართლოშ დღაშ დინახალე აკეთენა.

სასამართლოშ დღას მილიარდობით ხალხის პირველო მიაჩამუ საშვალება, ქიგეგან ღორონთიშ ნება დო იცხოვრან თიშ მოსაწონო. თენა თის ნიშნენს, ნამდა თე დროს იჸუაფუ ფართომაშტაბიან გურაფა. თეს თინა მაჸუნუ, ნამდა „სამართლიანობას დიგურუანა თი ქიანაშ კვიდრეფი“ (ესაია 26:9). მარა არძა ვეკორინუანს ღორონთიშ მოსაწონო ცხოვრებას. ესაიაშ 26:10-ის ინოჭარ: „უბადოშ მაკეთებელს, ჭყოლოფუა ძირასინ ხოლო, სიმართლე იშენით ვა დაგურე. სამართლიან ქიანას უსამართლოთ მიქციებუ დო ვა ძირუნს იეჰოვაშ დიდებას“. თეცალ უბადოშ მაკეთებელ ხალხი სასამართლოშ დღაშ დინახალე ართ დო სამუდამოთ მისპუნა (ესაია 65:20).

სასამართლოშ დღაშ ბოლოს გინოსკილადირეფ სრულაშე „გეცოცხლებნა“ თი გაგებათ, ნამდა გესრულყოფილებნა (გამოცხადება 20:5). თეგვარო, სასამართლოშ დღაშ დინახალე კაცობრიობა დირთინუანს დუდშეიან სრულყოფილებას (1 კორინთელები 15:24—28). თეშ უკულ იჸუაფუ საბოლა გიმოცადუა. სატანა გენთავისუფლებუ დო ხოლო ართშა მიაჩამუ ხალხი მიოჩილითუასინ თიშ საშვალება, მარა თენა ბოლო იჸუაფუ (გამოცხადება 20:3, 7—10). თე გიმოცადუას გინიღანსინ თინა, მუშ თოლით ქოძირუნს, მუჭო ისრულებ ბიბლიას ინოჭარილ სიტყვეფი: „მართალეფი დემკვიდრენა დედამიწას დო მარადიულო იცხოვრენა თექ“ (ფსალმუნი 37:29). სასამართლოშ დღა, ნამდვილო ჯგირობუას მოუღანს არძა ართგურ ხალხის!