Nin’ya Owerya Dhai Otepa Odhuwela ‘Ohudhiha Saana’?

1. Seeni nintthuneya nhu odhuwela ohudhiha saana, ni mwaha wa seeni? (2 Timootheyo 4:2) (Moone-tho efootu.)

YEESU aahaaruma atthareli-ye airaka: ‘Mwaapake ahudheri . . . , mwaahudhihaka weettela itthu dhootheene koorummaakani.’ (Math. 28:19, 20) Yooruma ela, enoonihera wiira Makristau ootheene aakhalana nritti wa waahudhiha atthu akina. Ekhweeli wiira Yehova tonaathanla atthu arina ‘nrima wooreera,’ ni malaikha anninikhalihera wiira naaphwanye atthu awo. (Mit. 13:48; Yohani 6:44; Wiis. 14:6) Masi hata eri dhiidho, nihaana opaka mphantta nhu. Nirowe nithokorerye ntakihero na nrummwa Paaulu ni Barnabe. Biibiliya onlotta wiira okathi awo yaalaleerya awa nsinakooka Wiikooniyu, ‘yaahilotta mwa enamuna yiirinhe nttitthi muulupale wa ayuuda ni akereku waamini.’ (Mit. 14:1) Ndho elo enoonihera wiira Paaulu ni Barnabe yaanidhuwela ‘ohudhiha saana.’ (Munsome 2 Timootheyo 4:2.) Nitho Makristau ootheene ahaana wiilipihera odhuwela ohudhiha saana.

2. Seeni atthu akina anuupuwela awa wiira khanwerya ohudhiha saana?

² Atthu akina anuupuwela wiira khanwerya ohudhiha saana okhala wiira khasomme vawaatta, aahiidho anuupuwela wiira khandhuwela ohudhiha. Nitho arumeyi akina anromoliwa mbiibiliyani, yaaidhoona dhiidho. (Okhu. 4:10; Yer. 1:6) Ni atthu akina annooceya ni moopora anhudhiha awa okhala wiira khankhumela saana nteko woolaleerya nkhama atthu akina. Ekhweeli wiira kahi wiira atthu ootheene ninaalaleerya nhu anawaakhulela onsoma Biibiliya. Ni kahi wiira okhumela wihu saana nteko woolaleerya onlipa ni wiilipihera wihu pahi. Nkhama noonne nhu, wiira naaphwanye atthu arina nrima wooreera nintthuneya okhaliheriwa ni Yehova vamodha ni malaikha. Masi hata eri dhiidho, nintthuna wiilipihera wiira naalaleerye atthu mwa enamuna en’ya waaphara nrima. Wiira niwerye opaka elo, yoosoma ela enoolotta itthu tthaaru dhin’ya onikhalihera wiira nitepe odhuwela ohudhiha saana.

MOONIHERE WIIRA MUNNATHOKORERYA SAANA ATTHU AKINA

3. Eseeni yaankhalihera Yeesu owerya ophara mirima dha atthu?

³ Biibiliya onlotta wiira Yeesu aanidhuwela ‘makhalelo a atthu.’ (Yohani 2:25) Elo enoonihera wiira Yeesu aanidhuwela miyuupuwelo dha atthu awo ni etthu yaawiiriha wuupuwela dhiidho. Owo aaniwerya ophara mirima dha atthu okhala wiira aanidhuwela itthu dhaaxankiha. Yeesu aaniwoona awo nkhama atthu yaahaarina malakihero, nimaaliho ni yaarina nritti woolemela mwaha wa dhoolema ni malamulo a ahooleli a itiini. (Math. 9:36; 23:4) Ndho okathi Yeesu aalontte iye Mwaha Vamwaako, owo aahihudhiha itthu dhawaatta dhaaya waakhalihera atthu awo okhalana ekumi yooreera. Atthu awaatta waanaadhivela onwiriyana Yeesu okathi aalotta iye okhala wiira itthu aalotta iye dhaari dhootepa otthuneya wa veena.

4. Eseeni en’ya onikhalihera waathokorerya saana atthu akina? (Moone-tho ifootu.)

⁴ Etthu en’ya onikhalihera waathokorerya saana atthu akina, ori odhuwela itthu inaaxankiha. Atthu ootheene ninaalaleerya nhu, anniviriha mixankiho dha olumwinku ola wa Satana. Ndho wuupuwelela elo, onooniiriha owoonela othunku atthu a nttetthe nhu. Mwa ntakihero, niire ehiiraneya etthu nttetthe nnyu yeelo yaaxankinhe atthu awaatta? Niire anaan’yari annixankiheya ni moopora wa waakhalihera anaya wiira ekhale oophareleleya oskola? Niire opuro ninkhala nhu onnilipa ophwanya nteko? Ndho muupuwelele moopora atthu awo anoonela awa ‘okathi ola wooxankiha’ ehidhuwelaka nlipelelo Biibiliya onnivaha iye.—2 Tim. 3:1; Yes. 65:13, 14.

5. Yeesu oonihenre dhai wiira aari oovirikana ni Afaresi? (Matheyo 11:28-30)

⁵ Yeesu aanaacali atthu ootheene, ni atthu awo yaaniwerya woona elo oreela wa moopora aathokorerya iye. Yeesu aari oovirikana ni Afaresi, okhala wiira awo yaaniidhoona okhala otthuneya waaxira atthu akina ni ivaara dhawaatta yaanaahadhula atthu. (Math. 23:13; Yohani 7:49) Moovirikana ni Afaresi, Yeesu aanaathokorerya atthu mooreera nrima ni mwa nttittimiho. Owo aari ‘oomaala ni awiiyeviha,’ ndho mikhalelo idho dhaahimwiiriha owo okhala namahudhiha ooloka. (Munsome Matheyo 11:28-30.) Nintakihaka Yeesu, nihaana waathokorerya atthu akina mooreera nrima ni mwa nttittimiho.

6. Nin’ya woonihera dhai wiira ninnaareerela nrima ni waattittimiha ale ankhootta wiiwa aahiidho annyokha nhupi ninlaleya nhu?

⁶ Atthu akina annikhootta wiiwa aahiidho anninyokha nhupi ninlaleya nhu. Ndho eseeni ninreerela nhu opaka vaavo eniiraneya awa elo? Ohiya pahi ovilela onyokhiwa, Yeesu oolotta etthu ekina ninreerela nhu opaka. Owo olontte wiira: ‘Nwiirele itthu dhooreera ale anoonyokhani, mwaareelihe ale anootthunelani itthu dhootakhala, ni mwaavekelele ale anooruwanani.’ (Luka 6:27, 28) Onookhala wookhweya opaka elo akhala wiira ninawuupuwelela wiira ntthu owo onithokorenrye moohiloka, ookhalana mathowa amwiirinhe ohitthuna oniwiriyana. Ekhweeli wiira atthu akina ampaka elo ni yoolakela ya onihiiha olaleerya, masi atthu akina kahi wiira arina yoolakela emodharu. Woonawene pooti wiira ntthu owo khaniwiriyanne okhala wiira onviriha nxankiho wa mweemudhini aahiidho yookhala etthu eninxankiha. Aahiidho woonawene niphin’ye okathi woohireerela. Moohixikha mathowa amwiirinhe ntthu owo, hiyo nihaana otthara miruku iri aKolosi 4:6 dheidho dhinlotta wiira: ‘Okathi wootheene, moolumo nnyu ekhale ooreera, oolukiwa ni maakha wiira ndhuwele moopora woomwaakhula khula ntthu.’ Akhala wiira ninniwoonela othunku atthu akina, ni wiilipihera odhuwela itthu inaaxankiha, ninookhala atthu oolipa onanariwa ni okhala anamahudhiha ooreera.

NRUMEELE NUULUMO NA MULUKU OKATHI MUNHUDHIHA NNYU

7. Yeesu oonihenre dhai wiira aaniroromela Nulumo na Muluku okathi aahudhiha iye? (Yohani 7:14-16)

⁷ Yeesu khaahudhiha itthu dha mmuru mmwe. Vaavo owo aahudhiha iye, aarumeela Nuulumo na Muluku ni aaniwoonihera atthu mwa enamuna yookhweya wiiwasasa moopora woovarihela nteko itthu idho mweekumini-mwa. Biibiliya onlotta wiira itthu Yeesu aahudhiha iye ‘dhaakhuma wa Muluku, ohiya nkhama alipa oohudhiha nlamulo.’ Tivondho ‘atthu yaanitikiniheya vawaatta.’ (Mar. 1:22 ) Alipa oohudhiha nlamulo a okathi wa Yeesu, vaavo yaahudhiha awa yaaromola itthu dhaalottiwe khalai ni ahooleli a itiini oottittimihiwa, masi Yeesu aaromola Dhawaatikhiwa. Nnaamwi Yeesu aatanke okhala wiirimu nkhama Mwaana a Muluku, owo khaarumeenle odhuwela-we wiira aaxankihe atthu, aahiidho owiiriha awo ohiidhoonela vatthu. Ohiya-vo, owo aanihudhiha yootthuna ya Muluku arumeelaka Dhawaatikhiwa. (Munsome Yohani 7:14-16.) Ndho Yeesu ohaahiyera atthareli-ye ntakihero nooreera.

8. Pheeduru aatthanre dhai ntakihero na Yeesu?

⁸ Nitho ahudheri a Yeesu vaavo yaahudhiha awa yaarumeela Nuulumo na Muluku. Mwa ntakihero, muupuwele mwaha nrummwa Pheeduru aalontte iye nihiku na Pentekoosti mwaakha wa 33. Pheeduru khaasomme iskola dhuulupale. Masi hata eri dhiidho, owo aahiwerya ophara mirima dha atthu vaavo aatthokihera iye moopora Yeesu aakhwanihenre iye iprofesiiya. (Mit. 2:14, 37) Ndho eseeni yaakhumelenle? ‘Ootheene yaale yaakhenle ni nrima wootheene moolumo a Pheeduru, yaahipatisiwa. Ndho nihiku nne, atthu yaaphiyera 3.000 yaahitakaihana ni ahudheri.’—Mit. 2:41.

9. Seeni nintthuneya nhu onrumeela Biibiliya vaavo ninhudhiha nhu?

⁹ Etthu en’ya onikhalihera ophara mirima dha atthu anniwiriyana, ori orumeela Nuulumo na Muluku. (aHeb. 4:12) Tivondho nihaana onrumeela Biibiliya. Hiyo nintthuna “olaleya nuulumo” na Muluku, ohiya muupuwelo nhu. (2 Tim. 4:2) Miruku 2:6 onlotta wiira: ‘Mweekhweeli Yehova tonaavaha atthu akhili, mwaano-mwe annikhumamo moolumo a odhuwela ni a miruku.’ Ndho vaavo nimmurumeela nhu Biibiliya, ninnimuhiya Yehova alottaka ni atthu awo. (Mal. 2:7) Nintthuna waakhalihera atthu awo odhuwela wiira miruku Biibiliya onvaha iye ti dhootepa otthuneya, oxira miruku dha apinaatamu. Biibiliya uupuseriwe ni Muluku ni onninihudhiha etthu ninreerela nhu opaka wiira ninhakalalihe Mpattusa nhu ni okhalana ekumi yoohakalaliha.—2 Tim. 3:16, 17.

10. Mun’ya onkhalihera dhai naskola nnyu woona wiira ele onhudhera iye enkhuma mbiibiliyani?

¹⁰ Vaavo nniikocihera nnyu wiira mwairihe yoosoma ya Biibiliya, muupuwelele moopora mun’ya nnyu onkhalihera ntthu owo, wiiwasasa ele Biibiliya onhudhiha iye. Nnaamwi nirumeelaka ifootu ni iviidiyu, naskola nhu a Biibiliya ohaana wiiwasasa wiira ele onhudhera iye enkhuma mbiibiliyani. Mun’ya owerya dhai opaka elo? Vaavo nninsomiha nnyu Biibiliya naskola nnyu, nsome dhawaatikhiwa dhin’ya onkhalihera wiiwasasa epontu enttittimiheriwa. Nuumala-vo, mmukhalihere owo wuupuwelela etthu onhudhera iye ni dhawaatikhiwa idho. Vaavo munrumeela nnyu ifootu ni iviidiyu, mmukhalihere naskola nnyu woona ikhweeli seeni dha mbiibiliyani onhudhera iye. Masi elo khentaphulela wiira nhaana olotta vawaatta, aahiidho osoma dhawaatikhiwa dhawaatta. Ohiya-vo, mmuvahe okathi naskola nnyu wiira uupuwelele ni wiiwasasa khuta yawaatikhiwa munsoma nnyu, aahiidho ntthikele osoma yawaatikhiwa elo vaareerelaka. Ndho napaka elo, nin’ya nikairiha yoosoma ya Biibiliya, ohiya yoosoma ya eliivuru, ifootu aahiidho iviidiyu.—1 aKor. 2:13.

11-12. (a) Nin’ya woonihera dhai wiira ninnaapisera nrima anaskola nhu a Biibiliya? (Miteko 17:1-4) (Moone-tho efootu.) (b) Itthu seeni atthu akina ahindhuwela awa voohima dha Biibiliya, ni nin’ya waakhalihera dhai?

¹¹ Akhala wiira naskola nnyu a Biibiliya onninliperya okhupali ele onhundhera iye, nhiliyale ‘olaleya nuulumo na Muluku . . . mwaapiseraka nrima vawaatta [atthu].’ Oya vahoolo wa naskola mmodha a Biibiliya, onnivirikana ni wa akina. Anaskola akina pooti oviriha okathi wawaatta wiira yiiwasase ikhweeli dha mbiibiliyani, dheidho hiyo nniiwasasa nhu mwawaakuveya. Nihaana otthara ntakihero na nrummwa Paaulu, okhala wiira vaavo aalaleerya iye ayuuda a Otesaloonika aatthunen’ye weeheererya waakhalihera wiiwasasa dhawaatikhiwa ivaara dhawaatta wiira yiiwasase itthu aahudhiha iye.—Nsome Miteko 17:1-4.

¹² Enamuna ekina yawoonihera waapisera nrima anaskola nhu a Biibiliya, ori waapakela makoho ni waavaha okathi wiira yaakhule. Ndho vaavo anaakhula awa mwaawiriyane ni ephoole ni mwiilipihere wiiwasasa nthowa ninwiiriha wuupuwela dhiidho. Nuumala-vo, nsome ni nvaanele nuuwo voohima dha yawaatikhiwa en’ya onkhalihera odhuwela ele Muluku onuupuwela iye voohima dha mwaha owo. Ni nhiliyale wiira atthu akina khatanke omoona Biibiliya, ni khandhuwela ele onlotta iye. Ndho akhala wiira ti dhiidho, mmoonihe naskola nnyu Biibiliya awimpirimiriwa. Nyuwo-tho pooti orumeela mphantta oni: “Masu Oopacerya a Nuulumo na Muluku,” ori Biibiliya a Elapo Esya, wiira mmukhalihere woona wiira itthu Biibiliya onlotta iye ti dhootepa otthuneya. Nuumala-vo, mmoonihere moopora Biibiliya on’ya iye onkhalihera okhalana ekumi yoohakalaliha, nsomaka vamodha nuuwo yawaatikhiwa emodha aahiidho piili iri nikoho 15. Omoonihera naskola nhu a Biibiliya owerya Nuulumo na Muluku nraawana, enamuna emodha ya odhuwela waahudhiha saana atthu akina.

MMUKHALIHERE NASKOLA NNYU ONDHUWELA SAANA YEHOVA

13. Vaavo ninaahudhiha nhu atthu, taani ninreerela nhu onvuwiha? Nvahe ntakihero.

¹³ Yoolakela nhu yuulupale ori waakhalihera atthu ale anniwiriyana ondhuwela Yehova ni okhalana waataana woolipa nuuwo. (Yak. 4:8) Nteko nhu woolaleerya, onoolikana ni ntthu onimmwaleya ntthu nkina onaadhya etthu veepiphini. Ndho wiira ntthu owo ommwaleiwa aphwanye etthu onaadhya iye, ntthu onimmwaleya khaniirukunsela lanteerna wiira aimwaleye mwaneene. Ohiya-vo, owo onnimmwaleya ntthu nkina wiira akawerya woona opuro ori iye. Mwa enamuna emodharu, vaavo ninaahudhiha nhu atthu, nixake wiivuwiha niwiirihaka woona wiira ninnidhuwela itthu dhawaatta. Masi naakhalihere onvuwiha Yehova.

14. Eseeni ninreerela nhu opaka wiira ninkhalihere naskola nhu otthuna onhakalaliha Yehova?

¹⁴ Vaavo muniiriha nnyu yoosoma ya Biibiliya, mmukhalihere naskola nnyu wunnuwihera yoolakela-ye ya otthuna onhakalaliha Yehova. (Mir. 27:11) Yoolakela nhu kahi omwiiriha naskola nhu waakhwanihera eliista ya malamulo, nkhama eniiraneya awa ni ntthu ontthuna ovolowa ekiipa ya poola. Ohiya-vo, yoolakela nhu okhale onkhalihera owo opaka marukunuso mwaha wa otthuna onhakalaliha Yehova. Mwa ntakihero, vakhala wiira naskola nnyu onninvila ottharuwa yoolema yoonanara, mumpakele makoho ala anttharelana: “Seeni Yehova onnyokha iye yoolema ela? Seeni Yehova onoovekelaiyeni ottharuwa yoolema enoodhivelani? Yooruma ela enoonihera dhai wiira Yehova onnoophetani?” Ndho vaavo muninkhalihera nnyu naskola owo ondhuwela saana Yehova vamodha ni mikhalelo-dhe, elo enoomwiiriha okhupali wiira Yehova onnimpheta. Nitho elo enoomwiiriha naskola nnyu otthuna onhakalaliha Yehova.

NHIHIYE WIILIPIHERA WIIRA NTEPE ODHUWELA OHUDHIHA SAANA

15. Eseeni munreerela nnyu opaka wiira ntepe odhuwela ohudhiha saana?

¹⁵ Wiira ntepe odhuwela ohudhiha saana, nhaana onvekela Yehova wiira ookhalihereni woona etthu munreerela nnyu opaka. (1 Yoh. 5:14) Nuumala-vo, nihaana opaka itthu moovarihana ni mavekelo nhu. Enamuna emodha nikhanle nhu opaka elo, ori ovaha ephoole vaavo Yehova onnihudhiha iye mmithukumanoni ni ovarihela nteko itthu ninhudha nhu. Nitho nihaana waavekela anna ni arokora andhuwela ohudhiha saana wiira enihoole vaavo nin’ya nhu wiiriha yoosoma ya Biibiliya ni waavekela wiira enileele etthu ninreerela nhu opaka wiira nitepe odhuwela ohudhiha saana. Ohiya-vo, nhiliyale wiira itthu mun’ya nnyu onsomiha naskola nnyu dhin’ya okhala ipheya wa veene. Tivondho mwiilipihere odhuwela moopora onuupuwela iye ni onoonela iye mwaha owo. Ni munkhalihere naskola nnyu woona efaita iraawana itthu onhudha iye. Odhuwela itthu idho inoonkhalihera okhalana waataana ni Yehova ni okhalana ekumi yoohakalaliha.—Esal. 1:1-3.

16. Seeni ori awa vooreera wiilipihera otepa odhuwela ohudhiha saana?

¹⁶ Waahudhiha atthu akina voohima dha Yehova etthu ennihakalaliha vawaatta. Nitho nteko owo ninoovikaniha ovara elapo epheya. Tivondho nintthuna woonihera wiira ninnaathokorerya saana atthu akina, orumeela nuulumo na Muluku ni onvaha ovuwa wootheene Yehova vaavo ninlaleya nhu ihapari dhooreera. Ndho napaka elo, ninootepa odhuwela ohudhiha saana.