“MUHANA WIKHALIHA ATTHU A NANANO MMIRUKUNI MWANYU NI MUROHONI MWANYU”

7. Marukunuxo xeeni a omutthu ahu ninreerela ahu opaka?

⁷ Niireke vanniweryaneya orukunuxa muupuwelo ni omutthu ahu? Aayo. Biibiliya onihimya so: “Muhana wikhaliha atthu a nanano mmirukuni mwanyu ni murohoni mwanyu, n’unwara mutthu musyá, opattuxiwe alikanyihiwaka ni Muluku, okhalihiwe naxariya, orerihiwe murima n’ikekhai”. (aÉf. 4:23, 24) Tthiri vanniweryaneya orukunuxa omutthu ahu, masi khivanikhweya. Nihaana wiimananiha ohiya paahi osyaka soophavela soohiloka aahiiso ohiya opaka itthu sihimmusivela Yehova. Wira nipake eyo, nihaana orukunuxa ‘miruku sahu’ wala muupuwelo ahu. Eyo enihela muhina oturuka soophavela sahu, mweettelo ahu ni etthu enniiriha opaka etthu eyo. Wira nipake marukunuxo awo maalupale, nihaana wiimananiha vanceene.

8-9. Yowiiraneya ya munna mmosa, enooniherya sai otthuneya waya oturuka omutthu ahu?

⁸ Nkawehani ntakiheryo na munna mmosa. Ohinatthi wiixutta ekeekhai, owo aari oowali ni aari namuhapaliwa. Okathi aapacenrye awe omusoma Biibiliya, aahipaka marukunuxo mpakha ophwanelela obatiziwa. Marukunuxo awo yaahaavaha onamoona atthu a muttetthe aakhala awe. Masi ohiyu omosa, ohivinre okathi munceene nuumala obatiziwa, munna ole aaheehereriwa vanceene. Ohiyu ole namuhapaliwa mmosa aaphavela ommana. Wanipacerya, munna ole aahiwerya wiikasoopa. Masi okathi mulopwana ole aapacenrye awe oveeha nsina na Yehova, munna ole aahinanariwa vanceene mpakha ohiwerya wiikasoopa. Nto munna ole aahipacerya ommana namuhapaliwa ole. Munniwerya woona etthu yaamwiirinhe munna ole opaka eyo? Omusoma Biibiliya waahimukhaliherya munna ole okasoopa owali awe. Masi nlelo ahaana orukunuxa muupuwelo awe, eyo piiyo, aahaana orukunuxa omutthu awe.

⁹ Hata vaari siiso, munna ole khaakhulumunwe. (Mir. 24:16) Okhaliheriwaka ni axitokweene, aahivikaniha okela vahoolo momunepani. Nto muhoolo mwaya khukhala mutokweene. Vano ohiyu omosa, waattamela Empa ya Omwene, munna ole aahikumana yooweeha emosaru aakumanne awe iyaakha vakhaani saavinre. Namuhapaliwa mmosa aphavela ommana mutokweene mukina. Munna ole aapanke exeeni? Moowiiyeviha ni moomaaleleya, aahimmaaliha namuhapaliwa ole ni aahimukhaliherya orowa owannyawe. Vano exeeni yaamukhalihenrye? Munna ole, aahirukunuxa muupuwelo awe, niire so, omutthu awe. Vano munna ole aari mutthu oowiiyeviha ni a murettele. Tthiri eyo yaahinvuwiha Yehova!

10. Nihaana opaka exeeni wira nituruke omutthu ahu?

¹⁰ Khivanikhweya opaka marukunuxo ntoko awo. Hiyo nihaana ‘ophavela n’ikuru sahu sothene’ opaka marukunuxo awo hata siviraka iyaakha sinceene. (2 Ped. 1:5) Marukunuxo awo, khanrowa okhumelela mwaha woowi “niixuntte ekeekhai” khalai. Ohiya-vo, nihaana ovikaniha wiimananiha wira nituruke omutthu ahu. Exeeni enrowa onikhaliherya? Nrowe nthokorerye itthu vakhaani.

ITTHU SINROWA ONIKHALIHERYA OTURUKA MUUPUWELO AHU

11. Nivekelo ninrowa onikhaliherya sai oturuka muupuwelo ahu?

¹¹ Etthu yoopacerya nikhanle ahu oopaka ori ovekela. Nihaana ovekela ntoko nasalimo aavekenle awe oriki: “Muluku! Kivaheni murima woloka: mukiruhele-tho eroho y’ekeekhai”. (Esal. 51:12) Osuwela wira muupuwelo ahu ohaana wuuluuliwa onoonikhaliherya onvekela nikhaliheryo Yehova. Niireke tthiri Yehova onoonikhaliherya opaka marukunuxo? Aayo, onoonikhaliherya! Mwa ntakiheryo, okathi wa profeta Ezekiyeli, aYuda yaari oopisa wiiwa. Masi Yehova aahaaleiherya wira: “Miyo kinimwavaha murima musyá: kinohela mmurimani mwaya eroho esyá. . . . Kinimwavaha murima wa mutthu”. (Ezek. 11:19) Yehova aaniphavela waakhaliherya aIsarayeli orukunuxa murima aya. Nave owo onniphavela onikhaliherya.

12-13. (a) Moovarihana ni Esalimo 119:59, etthu xeeni ninreerela ahu wuupuwelela? (b) Makoho xeeni ninreerela ahu wiikoha?

¹² Etthu ya nenli nikhanle ahu oopaka, ori wuupuwelela. Okathi munimusoma anyu Biibiliya khula nihiku, muhaana waavya okathi wira muupuwelele moota ele musomme anyu enrowa aya wookhaliheryani oturuka moonelo ni muupuwelo anyu. (Musome Esalimo 119:59; aHéb. 4:12; Yak. 1:25) Nwehe akhala wira murima anyu ni muupuwelo anyu khohapuxiwe ni muupuwelo wa mulaponi. Nave mweemereryeke soovonya sanyu ni mwiimananiheke opaka marukunuxo.

¹³ Mwa ntakiheryo, nyuwo pooti wiikoha so: ‘Kiireke okisivela owaapa atthu akina aahiiso ka nanrima?’ (1 Ped. 2:1) ‘Kiireke kinoona wira kookhalana efaita waavikana atthu akina mwaha wa elapo kiyariwe aka, osoma waka aahiiso musurukhu kirina aka?’ (Mir. 16:5) ‘Kiireke kinnaavaha efaita atthu ahirina itthu kirina aka aahiiso a elapo ekina?’ (Yak. 2:2-4) ‘Kiireke okisivela itthu sa olumwenku ola wa Satana?’(1 Yoh. 2:15-17) ‘Kiireke okisivela oweha ifilme sa ikhotto wala sa orupihana woohiloka?’ (Esal. 97:10; 101:3; Am. 5:15) Vaavo munrowa anyu waakhulaka makoho ala munooweha etthu mukhanle anyu oolokiherya. Ekeekhai wira opaka marukunuxo awo pooti okhalaka ntoko wira ‘nimpwanyula’ itthu soolipexa. Nto opaka eyo ennimuhakalaliha Tiithi ihu a wiirimu.​—Esal. 19:15.

14. Xeeni vanireerela aya waathanla apatthani ooloka?

¹⁴ Etthu ya neeraru mukhanle anyu oopaka ori waathanla apatthani ooloka. Okathi mukina pooti woonaka wira apatthani ahu anninihapuxa. (Mir. 13:20) Tthiri oxikola ni omutekoni, ninkhala ni atthu ahinnikhaliherya okhalana muupuwelo oneemereriwa ni Muluku. Masi hata vari siiso, nnoowerya waaphwanya apatthani ooloka mmulokoni. Awo anoonikhaliherya “ophenta n’uvara miteko sorera”.​—aHéb. 10:24, 25.