Malakiheryo aniroiheliwa atthu amurwenle konkereesu

ANAMATHOONYERYA Muteko aya anamathoonyerya, wookhaliheryani. Xontte, mukhweeherye muteko aya, muttharaka oratteene malakiheryo aya anivarihana ni opuro woopweha ikaaro, anivira atthu, osuka opuro wookilaathi ni itthu sikina.

OPATISO Ale anrowa opatisiwa ahaana okilaathi opuro asukeriwa aya ohoolo wa epalku, vahikhanle wiira ninrowa othanliwa nipuro nikina. Awo ahaana okilaathi opuro owo ohinatthi opacerya mwaha wa opatiso, onrowa olavuliwa Saabadu voosiisu. Khula mutthu onrowa opatisiwa, ohaana oruuha etuwalya ni ikuwo sooreerela owara okathi wa opatiso.

SOOVAHA Woorumeeliwa musurukhu munceene wiira okhale opuro wookilaathi, mikrofooni, ikaruma sa iviitiyu ni miteko sikina seiyo sinnikhaliherya omwaattamela Yehova. Nto, soovaha sanyu ni murima wootheene, sinookhaliherya oliveriwa itthu iyo ni sinnikhaliherya muteko woolaleerya olumwenku wootheene. Wiira nookhweeheryeni okhaliherya, mapuro ala sookhala ikaaxa mukhanle anyu oovaha musurukhu anyu. Nave nyuwo pooti orumeela esaiti ahu mpantta oni donate jw.org, wiira nvahe musurukhu anyu. Sinnixukhureliwa vanceene soovaha sanyu sootheene. Nikhuuru Noolamulela ninnooxukhurelani vanceene mwaha wa okhaliherya wanyu miteko sa Omwene.

ETEPARTAMENTO ANIKHALIHERIWA ARETTA Xontte, muhiliyaleke wiira etepartamento ela enikhaliherya iretta sootutuxerya paahi.

ETEPARTAMENTO YA SOORIMEELA NI SOOTTOTTIWA Itthu sootheene sinittottiwa, sihaana oroihiwa etepartamento ya soorimeela ni soottottiwa. Akhala wiira moorimeeliwa etthu, murowe etepartamento yeela wiira mwawehe etthu yoorimenleni. Anamwane arimenle ahaana oroihiwa etepartamento ela. Masi, etepartamento ela khahiyo nipuro ninkhapeleliwa anamwane. Xontte, mwaakhapeleleke aniinyu ni akhaleke ni nyuwo.

OPURO WOOKILAATHI Xontte mwaattittimiheke atthu akina. Yoowuupuxerya: Mwaasukeryeke opuro atthu yaale murwanne anyu hoothe, amusi anyu, ale munikhalana anyu etthoko emosa aahiiso anaxikola anyu a Biibiliya paahi. Noovara metto, muhipweheke mirupa sanyu mapuro yaarowa aya okilaathi atthu akina.

MUTEKO WOOWIIVAHERERYA Mwaaphavelaka okhaliherya miteko sinivarihana ni konkereesu ola, xontte mulavule ni anna a etepartamento ya soohimmwa ni muteko woowiivahererya.

Olokiheriwe ni Nikhuuru Noolamulela na Anamoona a Yehova