1 ENOOKI
Owo aahimuroromela Muluku
ENOOKI aanisuwela oratteene ele enitaphulela aya omeekha. Itthu aapanke awe, saahivirikana ni sa atthu ootheene a okathi ole. Enooki mekhawe paahi toniromoliwa mbiibiliyani ni moolumo ala ani: “Enooki khaahiyale weetta ni Muluku eekeekhai.” Enooki aawenrye sai weetta ni Muluku variki aari pinaatamu? Niire so: Aawenrye sai omuroromela Muluku? Ntakiheryo nawe na olipa murima ninniixuttiha exeeni?
Enooki aaheetta ni Muluku eekeekhai inamuna iya piili. Enamuna yoopacerya: owo aahikhootta mweettelo wootakhala, yaarina aya atthu a okathi ole. Makhalelo yaari sai? Enooki aari a exerasawu ya neethanu nenli, okhuma okathi wa Adamu ni Eva. Okathi ole, Adamu iira uuluvanle ene vanceene. (Nwehe ekaraafiku eni: “Okhuma okathi wa amuhavinre, mpakha mahiku a alipa-oophuka milattu.”) Okathi ole, atthu yaari oohiiwelela ntoko siisaale Adamu ni Eva. Tivonto olumwenku waahisareya otakhala. Otakhala iwo, waapacenrye nuumala mwaana oopacerya a Adamu ni Eva aitthaniwa Kayini, omwiiva muhima awe aitthaniwa Abeli. Abeli aari mutthu oopacerya oonihenrye omwaamini Yehova. Atthu akina a osuulu wa Kayini yaari ootepa otakhala ntoko yena aahiiso onvikana. (Maph. 4:23, 24) Nnaamwi atthu yaari ootakhala murima vanceene, Enooki khaatthara mweettelo aya. Enooki khaahiyale okhala ooreera murima ni a murettele. Nto eyo yaanimuhakalaliha Muluku.
Iyaakha sinceene Enooki ohinatthi oyariwa, “atthu ti yaapacenrye aya oromola nsina na Yehova.” (Maph. 4:26) Niireke awo yaaromola mwaha wa omwaamini Muluku? Nnaari. Vanikhala wiira atthu a okathi ole, yaarumeela nsina na Muluku mwa enamuna yoohiloka. Masi Enooki khaatakiha atthu awo, owo aanimphenta vanceene Yehova ni aanittittimiha nsina noowaarya na Muluku. Tivonto, owo aahivirikana ni atthu a okathi ole.
Okathi atthu yaananariwa aya ni Enooki mwaha wa ihapari aalaleya awe, Yehova aahimukhapelela
Enamuna ya nenli Enooki eettale awe ni Muluku, okhala wiira owo aanipaka ele aavekeliwa awe ni Yehova. Masi wiira opake eyo, owo aahaana olipa murima. Yehova aaphavela wiira Enooki okhale profeta ni aalopoleke atthu ale ootheene ootakhala murima. Ihapari Enooki aalaleya awe saahimya so: “Moone! Yehova ohoorwa ni malaikha awe ahinkontareya, wiira aaphukele atthu ootheene ni aalamule atthu ootheene ootakhala murima, mwaha wa itthu sootheene sootakhala yiirale aya, ahimwiiwelelaka Muluku ni itthu soohiirya anatampi yaalavunle aya anveehaka yoowo.”
Moolumo ala a Enooki yaari eekeekhai, mwaha woowi nuulumo noowi ohoorwa, nnooniherya etthu yiiraneyale, nto vaakhala ntoko wiira ophukela wa Yehova waahiiraneya. Nave yooniherya wiira eprofesia ya Enooki yaamwiiraneya. Tthiri Yehova aamwaaphukela atthu ootakhala murima, eyo piiyo, atthu ahinimwiiwelela Muluku. Tivonto, Enooki aarumenle awe ikwaha soovirikana nuulumo noowi otakhala, eversiikulu ela. Moohaanyiherya, moolumo ale yaahaananara vanceene atthu ale yanwiriyana Enooki olaleyaka. Hata vari siiso, Enooki aahilipa murima ni aahilavula moolumo ale, yaawo Yehova aaphavela awe wiira atthu awiriyane.
Atthu ale yoonenle sai nuumala wiiwa? Biibiliya khonihimya, masi onnooniherya wiira waahiphiya okathi atthu ale yaaphavela aya omwiiva Enooki. Ninsuwela sai? Biibiliya onihimya so: “Khuuvo-tho anwenhe, okhala wiira Muluku aahimukuxa.” Mwaha wa xeeni? Mwaha woowi atthu ale yaanimunyokha vanceene Enooki ni woonasa wene yaanimulupattha. Ohiya oweemererya atthu ale omuhaaxa, moophenta Yehova aahimukuxa mpatthani awe ole, eyo piiyo, aaheemererya okhwa wiira ohihaaxiwe. Tthiri khuuvo mutthu aarowa omukumiherya mixankiho Enooki. Moohaanyiherya, nnoophiya nihiku Yehova onrowa awe omuhihimuxa.
Masi ohinatthi okhwa, Yehova aahinvaha Enooki etthu ya efaita yuulupale. Biibiliya onihimya so: “Masi, ohinatthi othaamihiwa, Muluku aahimukhalela onamoona wiira aahimusiveliha.” Woonasa wene, Yehova aahimooniherya Enooki makhalelo ooloka aarowa awe okhalana muhoolo, okumi wa murettele mparayiisu valaponi! Ohinatthi okhwa, Enooki aanikupali ni murima awe wootheene wiira Yehova aanimphenta ni aanisiveliwa ni yena, mwaha wa waamini wawe ni olipa wawe murima wuulupale!
Musome yoowiiraneya ela mbiibiliyani, soolepa sinittharelana:
Nikoho para ovaanela:
Enooki oonihenrye sai olipa murima?
Mutokose itthu sikina
1. Woonasa wene, atthu yaapacenrye sai “oromola nsina na Yehova?” (Maph. 4:26; Owehaweha 15/09/2001 epaax. 29 etti. 3)
2. Enooki aari profeta oopacerya ororomeleya. Etthu xeeni aapanke awe? Aawenrye sai ovara muteko aarummwale awe? (Owehaweha 15/09/2001 epaax. 31 etti. 5)
3. Hata Enooki ohinatthi olaleya eprofesia awe, woonasa wene aasuwenle sai wiira olipa wawe murima waamweehereriwa? (Owehaweha 01/10/2006 epaax. 19 itti. 13-14) A
Eteseenyu A
4. Munrowa waatthokiherya sai atthu akina wiira Enooki khoronwe wiirimu, ntoko atthu akina anikupali aya? (Yoh. 3:13; Ahep. 11:5, 13)
Muupuwelele itthu mwiixuntte anyu
Okathi xeeni nimpirisari ahu olipa murima wiira nilaleerye? Ntakiheryo na Enooki ninrowa onikhaliherya sai? B
Efootu B
Yehova onoonela sai okathi nimmuroromela ahu moolipa murima? (Mir. 27:11; Ahep. 11:5)
Munrowa otakiha sai olipa murima wa Enooki?
Muupuwele yoowiiraneya yootheene
Yoowiiraneya ela enikiixuttiha exeeni sa Yehova?
Yoowiiraneya ela enivarihana sai ni yoolakela ya Yehova?
Etthu xeeni kiniphavela aka omukoha Enooki nuumala ohihimuxiwa?
Mwiixutte itthu sikina
Ntakiheryo na Enooki ninrowa wookhaliheryani sai ovilela otakhala murima wa apinaatamu? Nwehe eviitiyu eni:
Mwaatakiheke atthu oowaamini, ohiya oohaamini — Enooki, ohiya Lameki (2:53)
Nwehe etthu yaamukhalihenrye Enooki okhalana waamini.
“Neetteke ni Muluku mahiku ala ootakhala” (Owehaweha 01/09/2005 ipaax. 13-17)