Matthavi oovirikana yaarumeeliwa para ototha ihopa

Atthu anceene animusoma Biibiliya, annisuwela wiira awiixutti akina a Yesu yaari atothi a ihopa. (Mar. 1:​16-20) Okathi yaatotha aya ihopa ephareya ya oGalileya, awo yaarumeela matthavi.

Matthavi yaarumeeliwa para otothiwa ihopa, yaapakiwa erumeeliwaka mikhoi sa eliinyu seiyo saatthaviwa sihiiwaka iphaka saamukhaani. Akhala wiira yaarowa ototha ihopa saamukhaani, awo yaarumeela matthavi yaarina iphaka saamukhaani. Masi akhala wiira yaarowa ototha ihopa suulupale, awo yaarumeela matthavi yaarina iphaka suulupale. Matthavi macikhaani, ikwaha sinceene yaaheliwa itthu soolemela sa exumpu aahiiso maluku, wiira silemeliheke ntthavi vathi. Masi matthavi maalupale yaawo yaapuruliwa, ikwaha sinceene vathi yaaheliwa itthu soolemela. Nave osulu yaatthukweleliwa itthu saaphempa sa matera aahiiso cortiça.

Matthavi awo, yaakhala a musurukhu munceene. Ikwaha sikina, matthavi awo yaanihononeya mwaha wa maluku vathi okathi yaapuruliwa aya aahiiso akhala wiira yaavara ihopa sinceene. (Luka 5:6) Biibiliya onihimya wiira Yakobo ni Yohani yaalokiha “matthavi aya”, amurumeelaka akwilya ni mukhoi wa eliinyu. (Math. 4:21) Vanikhala wiira okhala wene, alipa-oototha ihopa, yaanilokiherya matthavi aya nuumala orumeela. Nave Luka, onnaalavula alipa-oototha “arapihaka matthavi aya” wiira avenxe ikokhola. (Luka 5:2) Nuumala-vo, alipa-oototha yaanaaneya matthavi aya wiira ahintte. — Ezek. 47:10.

Yesu aahaalattula alopwana yaalimalenle ototha ihopa wiira akhale “atothi a atthu.” — Mar. 1:17.