Mukupaliki Wira Munimoopowa Okathi Olumwenku Ola Onirowa Aya Opwetexiwa

Opixa murima wa Yehova ni olumwenku ola wootakhala moohipisa onoomala. Wanipacerya etiini yoowootha enrowa opwetexiwa; Nuumala-vo atthu a maloko manceene anoorowa waatuphela atthu a Muluku; Nto Yehova onrowa waapwetexa atthu awo ootakhala okathi wa ekhotto ya Harmagedoni. Nto arumeyi a Yehova annilipelela wiiraneya wa itthu iyo soohakalaliha.

Ekeekhai wira hiyo khaninsuwela itthu sootheene sinrowa wiiraneya okathi wa maxakha maalupale. Mwa ntakiheryo hiyo khaninsuwela okathi maxakha awo anrowa aya opacerya. Khaninsuwela etthu enrowa owiiriha anamalamulela a epoliitika opwetexa itiini. Nave khaninsuwela okathi mukavi onrowa ovira maloko awo yaatuphelaka atthu a Muluku ni moota anrowa aya opaka eyo. Nave khaninsuwela moota Yehova onrowa awe waapwetexa atakhali awo okathi wa Harmagedoni.

Biibiliya onninivaha malakiheryo ootheene anrowa onikhaliherya okhala oolipa murima ni okupali wira nnimoopowa muhoolo. Mwa ntakiheryo, hiyo ninnisuwela wira ninkhala wanikisa wa “mahiku ookiserya”. (2 Ti 3:1) Ninnisuwela wira “anoovukuliwa” mahiku sinrowa aya opwetexiwa itiini soowootha wira etiini yeekeekhai ehipwetexiwe. (Mat 24:22) Ninnisuwela wira Yehova onoowoopola arumeyi awe. (2 Pe 2:9) Nave ninnikupali wira ole Yehova omuthanlale awe wira aapwetexe atthu ootakhala ni owoopole atthu a muttitthi muulupale okathi wa Harmagedoni ti a xariya ni toowerya. — Wiis 19:11, 15, 16.

Mwaha wa itthu sinrowa wiiraneya muhoolo, atthu “anrowa okhwa woova”. Masi eyo kheniwiiraneela atthu a Muluku. Okhala wira ninnisuwela wira Yehova orumeelaka owerya wawe aahiwoopola arumeyi awe a khalai. Osoma soowiiraneya iyo ni wuupuwelela sinoonikhaliherya ‘weemela oratteene ni weemexa muru’, niroromelaka wira woopoliwa wahu ori vakhiviru. — Luk 21:26, 28.