Yoosoma 4

Moota Muniir’anyu Mwiixutte Sikina Sa Muluku

Munoowerya wiixutta sa Yehova mmusomaka Biibiliya. Khalai, Muluku aahaathanla apinaatamu akina wira alepe miyuupuwelelo Sawe. Soolempwa iyo siniihaniwa Biibiliya. Olelo va, ninnixutta sa Muluku nimusomaka Biibiliya. Voneyaka wi Biibiliya orina nuulumo aahiiso mitthaka sa Yehova, ola onnihaniwa-tho Nuulumo na Muluku. Nihaana okupali ele Biibiliya enihimy’awe, okhala wira Yehova khonootha. ‘Mwaha wa yowo Muluku ohinweryawe wotha.’ (aHéberi 6:18) Nuulumo na Muluku nrina ekeekhai.—Yohani 17:17.

Biibiliya orii yoovaha emosa yoowalamelexa yeeyo Muluku onivanh’awe. Orii ntoko ewarakha ya tiithi oowaaphenta an’awe. Oninleela sa natiri a Muluku sa okhaliha elapo nipuro nooreera okhala, eparayiisu. Oninleela saapankaawe khalai, simpakaawe ninano-va ni sinrowawe opaka muhoolo wa an’awe oororomeleya. Oninikhaliherya olokiherya mixankiho sahu ni ophwanya ohakalala.—2 Timótheyo 3:16, 17.

Anamoona a Yehova arii apatthani a Muluku; ala animookhaliheryani wiwexexa ele Biibiliya enixuttih’awe. Mwaleelaru wira mumphavela omwiixutta Biibiliya. Khanoovekelani musurukhu wooliva. (Mateyo 10:8) Ohiya vo, munoorowaka mmithukumanoni seekristau. Siniiriwa mmapuroni ookokhorela muniitthaniwa Isalau sa Omwene. Mwettaka mmithukumanoni seekristau, voohipisa munimuncererya omusuwela Muluku.

Nyuwo munoowerya wiixutta sikina sa Muluku orweela mwa seiye sipankaawe. Mwa ntakiheryo, Biibiliya onihimya wira: “Muluku opattunxe erimu ni elapo ya vathí.” (Maphattuwelo 1:1) Vaavo Yehova vaapattunxaawe “erimu”, aahipaka Nsuwa. Vanonto, ennileela exeeni eyo voohimya sa Yehova Muluku? Ennileela wi owo ookhalana ikuruu sinceene. Paahi owo taawerya opaka etthu yoowerya ntoko Nsuwa. Ennileela-tho wi Yehova orii musuweli, okhala wira vaatthuneleya miruku wira opake Nsuwa, ninnivaha oviha ni omwaleya, ni khinnikhala-khala nimalaka.

Yoopattuxiwa ya Yehova enooniherya wi owo onniniphenta. Muupuwelele mihokorokho sotheene siri valaponi. Yehova anwerya opaka muthinto mmosaa paahi wa muhokorokho—aahiiso ohipaka. Ohiya vo, Yehova oonivaha mithinto sinceene sa mihokorokho, ni ovirikana wulupale wa ikhalelo, iyiinnuwelo, malepa ni isivelo. Eyo enooniherya wira Yehova orii Muluku ohiya paahi oophenta, masi-tho oovahexa, ookhapelela ni ooreera murima.—Esalimo 104:24.