WIISUUPULULA

1 Ala moolumo a itthu Yesu Kristu oonihenrye* awe okathi ola. Yesu aahivahiwa itthu iyo ni Muluku,+ wiira owooniherye arumeyi a Muluku+ itthu saarowa wiiraneya voohipisa. Yesu owo aahiruma nlaikha nawe orowa wa Yohani,+ yoowo ori murumeyi a Muluku,* wiira namuleele etthu enithoonyerya aya itthu sinrowa wiiraneya. 2 Yohani owo aahikhalela onamoona nuulumo na Muluku ni aahimukhalela onamoona Yesu Kristu. Tthiri, owo aahikhalela onamoona itthu sootheene aawenhe awe. 3 Oohakalala tuule onisoma moolumo ala voowiiwanyeya ni ale aniiwa moolumo a eprofesia ela ni aneettela itthu sootheene silempwale muumu,+ okhala wiira okathi othanliwe, ohaattamela.

4 Miyo, Yohani, kinnilepela miloko 7+ siri eprovinsia ya wAsia:

Oreera murima wuulupale ni murettele wa “Muluku, yoowo onikhala vano ni aakhanle ni onirwa”+ ni wa ikuru soowaarya 7+ siri ohoolo wa ehice awe, 5 ni wa Yesu Kristu, “Namoona Oororomeleya”,+ “yoowo opacenrye ohihimuxiwa mookhwaani”,+ ni ori “Namalamulela a mamwene a mulaponi”,+ okhale ni nyuwo.

Ole onniphenta+ ni onooponle itampi sahu ni ephome awe,+ 6 ni onikhalinhe mamwene+ ni anamukuttho+ a Muluku awe ni Tiithi awe, ti yoowo oniphwanela ovuwihiwa ni ovahiwa owerya mahiku ootheene. Amen.

7 Mwiiwe! Owo onimoorwa ni meeku,+ nave atthu ootheene anonweha, hata ale yaamuhomme. Mahimo ootheene a mulaponi anrowa wiimana vapeeto,* ariipiwe ene murima mwaha wa yoowo.+ Aayo, eyo enimwiiraneya tthiri. Amen.

8 Yehova* Muluku, onihimya wiira: “Miyo ka Oopacerya ni Ookiserya.*+ Miyo ti yoole onikhala vano ni aakhanle ni onirwa. Miyo ka Muluku Oowerya Sootheene”.+

9 Miyo, Yohani, munninyu ni ole onihaawa vamosa+ ni nyuwo ni onrowa olamulelaka+ ni nyuwo moomweneni+ ni onivilela mwaha woomutthara Yesu,+ kaari esisiro* eniihaniwa Patmo, mwaha wa omulaleya Muluku ni olavula ekeekhai ya Yesu. 10 Ikuru soowaarya saahikooniherya itthu saarowa wiiraneya nihiku na Apwiya. Nto, kaahimwiiwa mutthu aakhuwela ottuli waka ni nsu naalikana ni nlope, 11 oriki: “Mulepe murooluni itthu muniweha anyu, muroihe eroolu eyo wa miloko iya 7: wEefeso,+ wEsimirna,+ oPeergamo,+ oTiyatira,+ oSardi,+ oFiladelfia+ ni oLawodiseya”.+

12 Vano, kaahirukunuwa wiira kinwehe ole aakilavuliha, nto nuumala orukunuwa, kaahiweha mithuko* 7 sa eweero.+ 13 Eriyari ya mithuko,* kaahinweha mutthu aalikana ni mwaana a mutthu,+ owanre ene nlaya naaphiya munawuni mwawe ni aahiitthukwelela vapeeto* vawe ni ekuwo ya eweero. 14 Nave-tho, ikharari sa mmuru mwawe, saari sootteela vanceene ni otteela waya waari ntoko eneevi. Maitho awe, yaalikana ni mooro onivarela.+ 15 Inawu sawe, saanaarya ntoko ekoopiri+ enitotoxiwa vaikho ni nsu nawe naalikana ni onyakula wa maasi manceene anivira. 16 Ntata nawe noolopwana, aahikuxa itheneeri 7,+ nave mwaano mwawe yaanikhuma espaata* yoowiitha,+ yoorakama ni enithikila ninno-ninno. Owiitho wawe, waalikana ni nsuwa nnaarya vanceenexa.+ 17 Nuumala onweha, kaahimorela vamettoni vawe, kinakhala ntoko kaarimookhwa.

Nto aahikiixaatherya ntata nawe noolopwana, onahimya wiira: “Muhoove. Miyo ka Oopacerya+ ni Ookiserya,+ 18 ni ti yoomi kinikhala.+ Miyo kaahikhwa,+ masi vano kinnikhala mahiku ootheene.+ Nave kookhalana ixaavi sa wookhwaani ni sa Mahiye.*+ 19 Vano, mulepe itthu moonale anyu, ni itthu siniiraneya vano, ni iye sinrowa wiiraneya nuumala itthu iya. 20 Itheneeri 7 moonale anyu ntata naka noolopwana ni mithuko* 7 sa eweero, ti esiiri ya Muluku. Esiiri eyo tiila: Itheneeri 7, sinithoonyerya anamitthaka* a miloko 7, nave mithuko* 7 sinithoonyerya miloko 7.+

2 “Mmulepele namitthaka*+ a muloko a wEefeso,+ wiira: Onihimya itthu iya tuule ovarenle itheneeri 7 ntata nawe noolopwana ni oneetta eriyari ya mithuko* 7 sa eweero:+ 2 ‘Kinnisuwela soowiira sanyu ni muteko woolipa onivara anyu ni ovilela wanyu. Nave, kinnisuwela wiira khamunaavilela atthu ootakhala ni munniweehererya ale aniihimya okhala arummwa,+ masi ahikhanle arummwa. Nyuwo muhoona wiira awo anawoothe. 3 Nave-tho, nyuwo munnooniherya ovilela ni khamooceyale mwaha wa nsina naka+ ni khamukhulumunwe.+ 4 Nto, kinnoopwapwelani mwaha wa etthu ela: Nyuwo moohiya ophenta mwaarina anyu woopaceryani.

5 “‘Tivonto, muupuwele opuro mmonre anyu ni murukunuxe murima anyu+ ni nvareke miteko mwaavara anyu woopaceryani. Mwaahirukunuxe murima,+ miyo kinimoorwa, kinookumiha muthuko anyu+ opuro ori aya. 6 Masi yookhala etthu yooreera murina anyu: Nyuwo munninyokha soowiira sa etiini ya Nikolawo,+ seiyo-tho miyo kininyokha aka. 7 Ole orina maaru oowiiwa, iiweke etthu ikuru soowaarya sinihimeerya aya miloko:+ Ole onrowa oxintta,+ miyo kinoomweemererya olya mihokorokho sa mwiri wa okumi,+ yoowo ori mparayiisu mwa Muluku’.

8 “Mmulepele namitthaka* a muloko a wEsimirna, wiira: Onihimya itthu iya tuule ori ‘Oopacerya ni Ookiserya’,+ yoowo aakhwiiye, khutthikela-tho okhala mukumi:+ 9 ‘Kinnisuwela ohaaxiwa wanyu ni othoiwa wanyu, masi nyuwo moothaaciri.+ Nave-tho, kinnaasuwela atthu aniihimya okhala ayuda ni anooveehaani. Masi awo khahiyo ayuda. Atthu awo ti esinagoga* ya Satana.+ 10 Muhooveke itthu munrowa anyu ohaawa.+ Mwiiwe! Diabo onimwaarihela akina a nyuwo mukhatteya wiira mweehereriwe voomalela, nave nyuwo munoolupatthiwa mahiku 10. Vano, muroromeleyeke mpakha okhwa, nto miyo kinrowa woovahani etthuvo* ya okumi.+ 11 Ole orina maaru oowiiwa, iiweke+ etthu ikuru soowaarya sinihimeerya aya miloko: Ole onrowa oxintta,+ khonikhala-khala ophwanyiwaka ni okhwa wa nenli’.+

12 “Mmulepele namitthaka* a muloko wa oPeergamo, wiira: Onihimya itthu iya tuule orina espaata yoowiitha, yoorakama ni enithikila* ninno-ninno:*+ 13 ‘Miyo koosuwela nipuro ninkhala anyu, eyo piiyo, weiwo eri aya ehice ya Satana. Hata vari siiso, nyuwo munnithipelela ovarexexa nsina naka+ ni khamuhiyale okaamini,+ hata mahiku a Antipa, namoona aka oororomeleya,+ yoowo iiviwe+ epooma anyu, nipuro ninkhala awe Satana.

14 “‘Masi, miyo kinnoopwapwelani mwaha wa itthu vakhaani: Eriyari anyu aakhala atthu anitthara soowiixuttiha sa Balaamu,+ yoowo aamwiixuttinhe Balaki+ moota woowaatthekiha aisarayeli, wiira alye itthu saavahereriwa amuluku eethiru ni wiira arupihaneke voohiloka.*+ 15 Siiso-tho, aakhala atthu akina a nyuwo anitthara soowiixuttiha sa etiini ya Nikolawo.+ 16 Tivo, murukunuxe murima. Mwaahiire siiso, miyo kinnoorwa voohipisa, nave kinoowana naawo kirumeelaka espaata enikhuma mwaano mwaka.+

17 “‘Ole orina maaru oowiiwa, iiweke etthu ikuru soowaarya sinihimeerya aya miloko:+ Ole onrowa oxintta,+ kinonvaha emana yiipithihiwe,+ ni kinonvaha nluku naamukhaani nootteela, nlempwale nsina nsya nihinsuweliwa ni mutthu mukina, ohikhanle ole aakhenle nluku nlo’.

18 “Mmulepele namitthaka* a muloko wa oTiyatira,+ wiira: Onihimya itthu iya ti Mwaana a Muluku, yoowo orina maitho anilikana ni mooro onivarela,+ ni inawu sawe sinlikana ni ekoopiri yooreera:+ 19 ‘Kinnisuwela soowiira sanyu, ni ophenta wanyu ni waamini wanyu ni muteko muninvarela anyu Muluku ni ovilela wanyu. Nave kinnisuwela wiira miteko munivara anyu vano, ti soowaatta ovikana iye mwaavara anyu woopaceryani.

20 “‘Nto, kinnoopwapwelani mwaha wa etthu ela: Nyuwo munnimuhiya muthiyana Yezabeli,+ yoowo oniihimya okhala profeta, owiixuttihaka ni aahapuxaka arumeyi aka, wiira arupihaneke voohiloka*+ ni alyeeke itthu sinivahiwa amuluku eethiru. 21 Miyo kaahinvaha okathi muthiyana owo wiira orukunuxe murima awe, masi owo khaaphavenle ohiya orupihana wawe woohiloka.* 22 Mwiiwe! Miyo kinoomwiiriha owereiwa vahiniweryaawe-tho ovenya, nave ale aniraruwa nuuwo, kinoowiiriha olupatthiwa vaalupale, yaahirukunuxe murima. 23 Kinoowiiva anaawe ni ekwerere yootakhala. Siiso, miloko sootheene sinoosuwela wiira ti miyo kinitokosa miyuupuwelo* ni mirima, wiira kimulive khula mutthu kittharihelaka miteko sawe.+

24 “‘Vano, kinnaahimeerya akina a nyuwo anikhala oTiyatira, yaawo ahinitthara mwiixuttiho ola, ni ahisuwenle ele enihimmwa okhala “itthu soowiixerya sa Satana”,+ wiira: Miyo nkinooreyani muritti mukina. 25 Nto, nvarexexe saana ele erina anyu, mpakha okathi onirwa aka.+ 26 Ole onixintta ni oneettela miteko saka mpakha wookiseryani, kinonvaha owerya wa olamulela maloko,+ 27 nave owo onimwaakukhula atthu ni ekopo ya eyuuma+ wiira aapwexakase ntoko miyaapu sa oloko, siisaale miyo kivahiwe aka owerya ni Tiithi aka. 28 Nave, kinonvaha etheneeri ya voosiisu.+ 29 Ole orina maaru oowiiwa, iiweke etthu ikuru soowaarya onihimeerya aya miloko’.

3 “Mmulepele namitthaka* a muloko wa oSardi, wiira: Onihimya itthu iya tuule orina ikuru soowaarya 7 sa Muluku+ ni orina itheneeri 7:+ ‘Kinnisuwela soowiira sanyu, nyuwo munikhala ntoko mwa akumi, masi muri ene ookhwa ene.+ 2 Nwehaweheke saana,+ nave mulipihe itthu sihanle, seiyo saahala okhwa, maana kihoona wiira miteko sanyu khasivariwe voomalela ohoolo wa Muluku aka. 3 Tivo, muupuweleke itthu mwaakhenle anyu ni mwiiwale anyu, nave mweetteleke seiyo ni murukunuxe murima.+ Mweekeekhai, mwaahiwehaweheke, miyo kinimoorwa ntoko latarau,+ nave khamunrowa osuwela ewoora kinirwa aka.+

4 “‘Vano, aakhala atthu vakhaani* oSardi, yaawo ahinanarinhe malaya aya+ ni anrowa weetta ni miyo awanre ene malaya ootteela,+ okhala wiira anniphwanelela. 5 Nto, ole onrowa oxintta+ onoowara malaya ootteela,+ nave nkinrowa-tho ottipiha nsina nawe muliivuruni mwa okumi.+ Masi, kinoohimya ohoolo wa Atiithi ni wa malaikha aya wiira kinnisuwela nsina nawe.+ 6 Ole orina maaru oowiiwa, iiweke etthu ikuru soowaarya sinihimeerya aya miloko’.

7 “Mmulepele namitthaka* a muloko wa oFiladelfia, wiira: Onihimya itthu iya tuule oowaarya,+ yoowo ori eekeekhai,+ orina ixaavi sa Davidi,+ onihula mukhora wiira mutthu mukina ohiwale ni oniwala mukhora wiira mutthu mukina ohihule: 8 ‘Kinnisuwela soowiira sanyu. Moone! Koohula mukhora ohoolo wanyu,+ yoowo ohiniwerya owaliwa ni mutthu mukina. Nave, koosuwela wiira murina ikuru vakhaani ni moosuka nuulumo naka ni muhooniherya ororomeleya wa miyo.* 9 Mwiiwe! Ale a esinagoga* ya Satana, anootha ahimyaka wiira ayuda, masi ahikhanle ayuda,+ kinoowiiriha orwa ni wuurama* ohoolo wanyu ni kinimwaasuweliha wiira kinnoophentani. 10 Okhala wiira muheettela ele mwiiwale anyu sa ovilela waka,*+ kinimoosukani ewoora yooweehereriwa,+ weiwo onrowa wiiraneya elapo yootheene, wiira yeehereriwe atthu ootheene anikhala mulaponi. 11 Miyo kinnoorwa voohipisa.+ Nvarexexeke saana ele murina anyu, wiira ohikhale mutthu onrowa owaakhani etthuvo* anyu.+

12 “‘Ole onrowa oxintta, kinoomukhaliha ntoko epilaari ya mutemplo mwa Muluku aka, nto khonrowa-tho okhumela ota. Nave, kinoomulepa nsina na Muluku aka+ ni nsina na epooma ya Muluku aka, eyo piiyo, Yerusalemu a Niinaano,+ yoowo onikhuruwa wiirimu, okhumaka wa Muluku aka ni kinoomulepa nsina naka na niinaano.+ 13 Ole orina maaru oowiiwa, iiweke etthu ikuru soowaarya sinihimeerya aya miloko’.

14 “Mmulepele namitthaka* a muloko wa oLawodiseya,+ wiira: Onihimya itthu iya ti Amen,+ namoona+ oororomeleya ni eekeekhai,+ yoopattuxiwa yoopaceryexa ya Muluku:+ 15 ‘Kinnisuwela soowiira sanyu, wiira nyuwo khamuhiyo ooriirya nnakhala ooviha. Kaaniphavela muri ene ooriirya aahiiso ooviha. 16 Masi okhala wiira munlikana ni maasi ookhuttihiwa,+ eyo piiyo, khamuhiyo ooriirya nnakhala ooviha,+ kinrowa owuumulani mwaano mwaka. 17 Nyuwo munihimya wiira: “Miyo koothaaciri,+ kookhalana mihakhu sinceene ni khiivo etthu enikithowa”. Masi, khamunisuwela wiira mwa mutthu ohinihakalala, oomoriha ikharari, oohaawa, ohinoona ni ohiwanre etthu. 18 Tivo, kinnoovahani miruku wiira, muthume ni miyo eweero ereerihiwe ni mooro, wiira muthaaciri. Muthume ni miyo malaya ootteela, wiira nware etthu ni muhuuliwe muru mwaha woohiwara etthu.+ Nave, muthume ni miyo murette wa maitho wiira muttikitthele mmaithoni mwanyu,+ nto nweryeke woona saana.+

19 “‘Ootheene ale kinaaphenta aka, kinniwooniherya vatthenke aya ni kinnaattaruxa.+ Tivonto, mukhalaneke nthiti ni murukunuxe murima.+ 20 Moone! Miyo kiheemela vamukhora, kinamana. Akhala mutthu onrowa wiiwa nsu naka, nto onahula mukhora, miyo kinookela mpaani mwawe, nave nnimoolya hoothe yoolya ya ohiyu. 21 Ole onrowa oxintta,+ kinoomweemererya okilaathi ni miyo veehiceni vaka,+ siisaale miyo kixinttale aka kikilaathi+ ni Tiithi aka, veehiceni vawe. 22 Ole orina maaru oowiiwa, iiweke etthu ikuru soowaarya sinihimeerya aya miloko’”.

4 Nuumala itthu iya, kaahiweha mukhora woohuleya wiirimu. Nsu noopacerya kaiwale aka nikilavulihaka, naalikana ni nlope, nihimyaka wiira: “Nwele-va, miyo kinoowooniheryani itthu sinrowa wiiraneya nuumala itthu iya”. 2 Nuumala-vo, miyo kaahaakhela ikuru soowaarya, nto kaahiweha ehice epwehiwe ene nipuro naya wiirimu. Nave kaahimoona mutthu okilanthi ene veehiceni-vo.+ 3 Ole aakilanthi veehiceni, mukhalelo awe waalikana ni nluku nniihaniwa xaspe+ ni sartio.* Nave ehice yootheene yaahirukureriwa ni ekhweyi, yaalikana ni esmeralta.*+

4 Ehice ele, yaahirukureriwa ni ihice 24 ni kaahiwoona axitokweene 24+ akilaathenle ene ihice iyo, ewanre ene malaya ootteela, nave yaahiwara vamuru ikhara sa eweero. 5 Veehiceni-vo, waanikhuma overunya,+ okukutteya ni yaanikhuma masu.+ Nave saahikhala mithuko 7, seiyo saapatta ohoolo wa ehice. Mithuko iyo, sinithoonyerya ikuru soowaarya 7 sa Muluku.+ 6 Ohoolo wa ehice ele, naahikhala ntthiya na maasi,+ naalikana ni eviituru aahiiso ekiristaale.*

Mukerekhere mwa ehice, khula mpantta saahikhala soopattuxiwa sikumi ixexe,+ saasareiye maitho, ohoolo ni ottuli. 7 Yoopattuxiwa ekumi yoopacerya, yaalikana ni kharamu,+ yoopattuxiwa ekumi ya nenli, yaalikana ni epooyi yaamukhaani,+ yoopattuxiwa ekumi ya neeraru,+ owiitho waya waalikana ni owiitho wa mutthu, nave yoopattuxiwa ekumi ya neexexe,+ yaalikana ni murumaasi onivava.+ 8 Vano, soopattuxiwa sikumi ixexe, khula yoopattuxiwa ekumi yaahikhalana mapupha 6, yaawo yaasareiye maitho.+ Othana ni ohiyu, voohihiyererya, saanihimya wiira: “Oowaarya, oowaarya, oowaarya ti Yehova*+ Muluku Oowerya Sootheene, yoowo aakhanle, onikhala ni onirwa”.+

9 Khula okathi soopattuxiwa sikumi ixexe sininvuwiha aya ni omuttittimiha ni omuxukhurela Ole okilanthi veehiceni, yoowo onikhala mahiku ootheene,+ 10 nto axitokweene 24+ annikhoroma ohoolo wa Ole okilanthi veehiceni, anamukokhorela yoowo onikhala mahiku ootheene ni annipweha ikhara saya ohoolo wa ehice, anahimya wiira: 11 “Yehova,* Muluku ahu oowerya,+ nyuwo munniphwanelela waakhela ovuwa+ ni nttittimiho,+ okhala wiira moopattuxa itthu sootheene,+ nave itthu sootheene sinnikhala, mwaha woowi ti siiso mphavenle anyu”.

5 Nave, kaahinweha Ole aakilanthi veehiceni+ okunxe ene eroolu ntata nawe noolopwana. Eroolu eyo yaahilempwa ninno-ninno* ni yaahiwaliwa oratteene ni ikanyeryo 7. 2 Nto kaahoona nlaikha na ikuru, nikohaka ni nsu noowiiwanyeya, nriki: “Ti pani oniphwanelela otaphula ikanyeryo sa eroolu ni ohula eroolu eyo?” 3 Masi khuuvo mutthu wiirimu, wala elapo ya vathi, nnakhala vathi va elapo, aawerya ohula eroolu eyo, aahiiso oweha etthu yaalempwale. 4 Vano, kaahinla vanceene okhala wiira khuuvo aaphwanelela ohula eroolu eyo, aahiiso oweha etthu yaalempwale. 5 Masi mutokweene mmosa aahikileela wiira: “Mmaale wunla. Mwiiwe! Kharamu a nihimo na Yuda,+ a emusi+ ya Davidi,+ ooxintta+ ni onniphwanelela ohula eroolu ni ikanyeryo saya 7”.

6 Nto eriyari ya ehice ni ya soopattuxiwa sikumi ixexe ni eriyari ya axitokweene,+ kaahinweha mwaapwittipwitthi+ eemenle ene, okhalaka ntoko aarimwiiviwa,+ aarina manyaka 7 ni maitho 7. Maitho awo anithoonyerya ikuru soowaarya 7 sa Muluku,+ seiyo oroihale awe mulaponi mootheene. 7 Moowaakuveya, mwaapwittipwitthi owo aahivenya, khikuxa eroolu yaari ntata noolopwana na Ole aakilanthi veehiceni.+ 8 Nuumala okuxa eroolu, soopattuxiwa sikumi ixexe ni axitokweene 24+ yaahikokhora ohoolo wa Mwaapwittipwitthi ni khula mmosa aahimukuxa viola* ni mihasa sa eweero, saasanrye nsenso.* (Nsenso, ninthoonyerya mavekelo a atthu oororomeleya.*)+ 9 Nave yaaniipa nsipo na niinaano,+ yiiraka: “Nyuwo munniphwanelela okuxa eroolu ni okumiha ikanyeryo saya, okhala wiira mwaahiiviwa. Nave-tho, ni ephome anyu, moomuthumela Muluku atthu a mahimo ootheene,+ a mattaava ootheene, a iraasa sootheene* ni a maloko ootheene.+ 10 Nyuwo muhaakhaliha mamwene+ ni anamukuttho a Muluku ahu+ ni anrowa okhala mamwene+ wiira elamuleleke elapo”.

11 Vano, kaahiweha malaikha manceene yaarukurenrye ehice ni soopattuxiwa sikumi ni axitokweene, nave kaahiiwa masu aya. Mwaattelo aya, khiwaakontareya ni yaari ikonto ikonto sene.+ 12 Awo yaanihimya ni nsu noowiiwanyeya wiira: “Mwaapwittipwitthi, yoowo iiviwe,+ onniphwanelela waakhela owerya, mihakhu, ankhili, ikuru, nttittimiho, ovuwa ni ottottopeliwa”.+

13 Nave, kaahiiwa soopattuxiwa sootheene sa wiirimu ni sa elapo ya vathi ni sa vathi va elapo,+ sa mphareya ni itthu sootheene sinikhala mapuro awo, sihimyaka wiira: “Ole okilanthi veehiceni+ ni Mwaapwittipwitthi,+ attottopeliwe, attittimihiwe,+ avuwihiwe ni ovahiwe owerya mahiku ootheene”.+ 14 Nto soopatuxiwa sikumi ixexe, saanihimya wiira: “Amen!” Nave axitokweene yaanikhoroma, anamukokhorela Muluku.

6 Nto, kaahinweha Mwaapwittipwitthi+ okathi aahula awe ekanyeryo yoopacerya ya ikanyeryo iye 7.+ Nave kaahiiwa yoopattuxiwa ekumi emosa eriyari ya soopattuxiwa sikumi iye ixexe,+ ehimyaka ni nsu naalikana ni okukutteya, yiiraka: “Murwe!” 2 Vano, kaahiweha ekhavalo yootteela.+ Ole aakilanthi vakhavaloni-vo, aahikuxa muura, nave aahivahiwa ekhara.+ Owo aahivenya wiira axintteke ni amalelihe oxintta wawe.+

3 Okathi aahunle awe ekanyeryo ya nenli, kaahiiwa yoopattuxiwa ekumi ya nenli+ ehimyaka wiira: “Murwe!” 4 Kaahiweha ekhavalo ekina yooxeerya, ole aakilanthi vakhavaloni-vo, aahirummwa okumiha murettele mulaponi, siiso atthu yaarowa wiivananaka yaawo-ru. Nave, owo aahivahiwa espaata yuulupale.*+

5 Okathi aahunle awe ekanyeryo ya neeraru,+ kaahiiwa yoopattuxiwa ekumi ya neeraru+ ehimyaka wiira: “Murwe!” Nto, kaahiweha ekhavalo yooriipa, nave ole aakilanthi vakhavaloni-vo, aahikuxa epalansa mmatatani. 6 Eriyari ya soopattuxiwa sikumi ixexe, kaahiiwa etthu yaalikana ni nsu, ehimyaka wiira: “Ekiilu* emosa ya etiriku, enikhala etenaario* emosa,+ nave ikiilu* tthaaru sa esevaata, sinikhala etenaario* emosa. Nto, muhihonone makhura, nnakhala eviinyu”.+

7 Okathi aahunle awe ekanyeryo ya neexexe, kaahiiwa nsu na yoopattuxiwa ekumi ya neexexe,+ ehimyaka wiira: “Murwe!” 8 Nto, kaahiweha ekhavalo ekoore aya yahooneya saana,* nave ole aakilanthi vakhavaloni-vo, aihaniwa Okhwa. Vano Mahiye* yaanimutthara vakhiviru. Nave aahivahiwa owerya wooweettiha epantta ya neexexe ya elapo, wiira owiivakase atthu ni espaata yoorakama ni etala+ ni eretta yootakhala ni orumeelaka inama sa mutakhwani.+

9 Okathi aahunle awe eroolu ya neethanu, kaahiweha vathi va altaari+ ephome ya*+ ale yaiviwe mwaha wa nuulumo na Muluku ni mwaha wa onamoona yaavanhe aya.+ 10 Awo yaanikhuwela ni nsu noowiiwanyeya ariki: “Pwiya Muulupalexa, Muluku oowaarya ni eekeekhai,+ munrowa olipelela mpakha silini? Nave munrowa waaphukela silini ale anikhala mulaponi ni owunlela ikuhu mwaha wa ephome ahu?”+ 11 Nto, Pwiya aahinvaha khula mmosa a yaawo+ nlaya nootteela ni noorakama ni yaahileeliwa wiira alipelele vakhaani mpakha omalela nummeru na arumeyi akhwaaya ni axinnaya, yaawo yaahala vakhaani wiiviwa, ntoko awo yiiviwe aya.+

12 Vano, kaahiweha okathi aahula awe ekanyeryo ya neethanu namosa. Nto yaahikhumelela etetere yuulupale. Nsuwa naahiriipa ntoko ekuwo* yooriipa, nave mweeri waahixeerya ntoko ephome.+ 13 Nave-tho, itheneeri sa wiirimu saahimorela vathi, siisaale ntoko mwiri wa ifiiku onimoroxa aya ifiiku saya soohittokottha, waaxekexiwaka ni epheyo yuulupale. 14 Erimu yaahikhuneya ntoko eroolu ni yaahirimeela.*+ Nave, miyaako sootheene ni isisiro* sootheene saahikumihiwa opuro saari aya.+ 15 Siiso, mamwene a mulaponi, makhulupale a mulaponi, makumantanti a atoropa, athaaciri, atthu oowerya, ipottha sootheene ni atthu ootheene ootaphuwa, yaahiipitha mukhukuni ni eriyari ya maluku a miyaako.+ 16 Nto yaanihimeerya miyaako ni myala, wiira: “Munimorele+ ni muniipithihe vamaithoni va Ole okilanthi veehiceni+ ni muniipithihe mwaha wa oviruwa wa Mwaapwittipwitthi,+ 17 okhala wiira nihiku nuulupale na oviruwa waya noophiya.+ Nto, ti pani onrowa owerya woopowa?”+

7 Nuumala-vo, kaahiweha malaikha maxexe yeemenle ene ipantte ixexe sa elapo, evarenle ene oratteene ipheyo ixexe sa elapo, wiira ehikhale epheyo yaarowa woopela elapo, ephareya aahiiso mwiri. 2 Kaahiweha-tho nlaikha nikina nikhumaka onikhuma nsuwa, nivarenle ene etthu yaakhenle aya wa Muluku wiira yaaheleke ekanyeryo atthu. Vano, nlaikha nlo naahikhuwelela malaikha ale maxexe ni nsu noorunya, yaawo yeemereriwe ohonona elapo ni ephareya, 3 niiraka: “Muhihonone elapo, nnakhala ephareya nnakhala miri, mpakha hiyo omaliha waahela ekanyeryo+ arumeyi a Muluku vayuuci vaya”.+

4 Nave, kaahiiwa nummeru naya ale yaaheliwe ekanyeryo. Awo yaari 144.000,+ yaakumihiwe eriyari ya mahimo a Isarayeli:+

9 Nuumala-vo, kaahiweha muttitthi muulupale wa atthu, yaawo ahaakhanle mutthu aawerya waakontari. Atthu awo yaakhuma maloko ootheene, mahimo ootheene, yaari a iraasa sootheene* ni mattaava ootheene.+ Awo yiira yeemenle ene ohoolo wa ehice ni ohoolo wa Mwaapwittipwitthi, ewanre ene malaya ootteela+ ni ekunxe ene mmatatani mwaya makukhu a mikole.+ 10 Awo yaanithipelela okhuwela ni nsu noorunya, yiiraka: “Woopowa onikhuma wa Muluku ahu, yoowo okilanthi veehiceni+ ni onikhuma wa Mwaapwittipwitthi”.+

11 Nto, malaikha ootheene yaarukurenrye ehice ni axitokweene+ ni soopattuxiwa sikumi ixexe, yaahikhoroma ohoolo wa ehice, enamukokhorela Muluku, 12 ahimyaka wiira: “Amen! Muluku ahu a ankhili ni oowerya ni a ikuru, ottottopeliwe, ovuwihiwe, ottittimihiwe ni oxukhureliwe mahiku ootheene.+ Amen”.

13 Vano, mutokweene mmosa aahikikoha wiira: “Tani ala awanre malaya ootteela,+ nave anikhuma woowi?” 14 Miyo kaahaakhula moohipisa, kiiraka: “Pwiya aka, ti nyuwo munisuwela”. Nto aahikihimeerya wiira: “Ala ti yaale anikhuma mmaxakhani maalupale.+ Nave, aarapiha malaya aya ni aatteeliha mphomeni mwa Mwaapwittipwitthi.+ 15 Tivonto awo yeemenle aya ohoolo wa ehice ya Muluku ni aninvarela aya muteko othana ni ohiyu mutemplo mwawe. Nto, Ole okilanthi veehiceni+ onrowa waakhapelela.*+ 16 Khanrowa-tho ovoliwa etala nnakhala ntthona, hata nsuwa khaninrowa waapaha, aahiiso khanrowa woona oviha,+ 17 okhala wiira Mwaapwittipwitthi,+ yoowo ori eriyari ya ehice, onrowa waakukhula+ ni waaroiha mapuro aniphattuwa maasi a okumi.+ Nave, Muluku onrowa opuputtha maithori aya ootheene”.+

8 Okathi+ aahunle awe ekanyeryo ya neethanu nenli,+ wiirimu waahimaaleleya etthu yoowiiraka minuutu 30. 2 Nave kaahiweha malaikha 7+ yeemenle ene ohoolo wa Muluku. Nto Muluku aahivaha malaikha awo malope 7.

3 Naahirwa nlaikha nikina, nikunxe ene muhasa wa eweero waapahiwa nsenso,* neemela ohoolo wa altaari.+ Nlaikha nlo, naahivahiwa nsenso ninceene+ wiira napahe valtaari a eweero,+ yoowo aari ohoolo wa ehice. Okathi omosa-ru yaaniwiriyaniwa mavekelo a ale oororomeleya.* 4 Vano, mwiixi wa nsenso nlaikha naapanhe aya, vamosa ni mavekelo+ a ale oororomeleya,* saahiwela wa Muluku. 5 Nuumala-vo, nlaikha nlo naahikuxa muhasa wa eweero, naahisariha mooro waari valtaari, khurihela mulaponi. Niinaano-ru, waahikhumelela overunya,+ okukutteya, etari ni etetere. 6 Nto, malaikha 7, yaawo yaarina malope 7,+ yaahiilokiherya wiira yoope malope aya.

7 Nlaikha noopacerya naahoopa nlope naya. Nuumala-vo, mulaponi yaahimorela maralala ni waahimorela mooro waatakaaheriwe ni ephome.+ Nto, waahipahiwa mpantta wa neeraru wa elapo, khupahiwa-tho mpantta wa neeraru wa miri. Nave malaxi ootheene yaahipahiwa.+

8 Nlaikha na nenli naahoopa nlope naya. Etthu yaalikana ni mwaako muulupale waapatta mooro, yaahiriheliwa mphareya.+ Nto mpantta wa neeraru wa ephareya, waahithatuwa ephome.+ 9 Nave, mpantta wa neeraru wa soopattuxiwa sikumi sa mphareya saahikhwa.+ Nave-tho, mpantta wa neeraru wa apakiti yaahihononeya.

10 Nlaikha na neeraru naahoopa nlope naya. Vano, etheneeri yuulupale yaapatta ntoko muthuko, yaahimora wiirimu, khumorela mpantta wa neeraru wa miro ni mapuro aniphattuwa maasi.+ 11 Nsina na etheneeri eyo ti Owaawa.* Nave mpantta wa neeraru wa maasi yaahikhala oowaawa. Nto atthu anceene yaahikhwa mwaha wa maasi awo, okhala wiira maasi awo yaahikhalihiwa oowaawa.+

12 Nlaikha na neexexe naahoopa nlope naya. Nto waahimaniwa mpantta wa neeraru wa nsuwa+ ni mpantta wa neeraru wa mweeri. Nave-tho, waahimaniwa mpantta wa neeraru wa itheneeri, wiira mpantta wa neeraru wa itthu iyo okhale wooriipela+ ni ohikhale okokola mpantta wa neeraru wa othana ni mpantta wa neeraru wa ohiyu.

13 Nto kaahinweha ni kaahimwiiwa murumaasi aavava osulu-sulu, okhuwelaka ni nsu noowiiwanyeya, oriki: “Aatakhaliwa! Aatakhaliwa! Aatakhaliwa+ ale anikhala mulaponi, mwaha wa malope anihala oruma, yaawo ahanle vakhaani woopiwa ni malaikha mararu!”+

9 Vano, nlaikha na neethanu naahoopa nlope naya.+ Nto kaahiweha etheneeri emosa yaakhuma wiirimu emorelaka vathi. Muluku aahivaha etheneeri eyo exaavi ya nlitti noowiixa.+ 2 Eyo yaahihula nlitti noowiixa, nto mulittini-mmo waahikhuma mwiixi waalikana ni mwiixi wa efornu yuulupale. Nave nsuwa vamosa ni epheyo saahiriipihiwa+ ni mwiixi wa mulittini-mmo. 3 Mmwiixini-mmo saahikhumelela isoope, khumwareela mulaponi.+ Isoope iyo, saahivahiwa owerya waalikana ni owerya wa awalisi* a mulaponi. 4 Iyo saahileeliwa wiira sihihonone malaxi a mulaponi, nnakhala miri sikithi ni miri sikina. Masi saarummwale waahonona paahi ale yahaarina ekanyeryo ya Muluku vayuuci vaya.+

5 Nave, isoope iyo saahivahiwa owerya wiira saahaaxe atthu awo miyeeri mithanu, ohiya owiiva. Nave, ohaaxa waya waalikana ni owereya mutthu onoona awe alummwa ni walisi.*+ 6 Mahiku awo, atthu anrowa ophavelaka okhwa, masi khanrowa owerya. Nave, anrowa wunlelaka okhwa, masi okhwa iwo onrowa waatthyawaka.

7 Mukhalelo wa isoope iyo, waalikana ni ikhavalo silokiheriwe orowa okhottoni.+ Vamuru vaya, saahikhala itthu saakhala ntoko ikhara sa eweero. Nave owiitho waya, waalikana ni owiitho wa mutthu. 8 Masi ikharari saya, saalikana ni ikharari sa athiyana. Maino aya, yaalikana ni maino a kharamu.+ 9 Nave yaahiwara vapeeto,* etthu yaalikana ni yoowara ya eyuuma enikhapelela epeeto.* Onyakula wa mapupha aya, waalikana ni onyakula wa ikaaro sinipuruliwa ni ikhavalo, sinitthimakela okhottoni.+ 10 Nave-tho, iyo sookhalana miila sirina etthu eniluma ntoko awalisi.* Miila iyo, soovahiwa owerya wa waahaaxa atthu miyeeri mithanu.+ 11 Iyo sookhalana mwene, eyo piiyo, nlaikha na nlitti noowiixa.+ Nsina nawe na eheeperi ti Abadoni.* Masi nsina nawe na ekereku ti Apoliyoni.*

12 Yootakhala emosa yoovira. Mwiiwe! Nuumala itthu iya, sinookhumelela-tho sootakhala sikina piili.+

13 Nlaikha na neethanu namosa+ naahoopa nlope naya.+ Nto kaahiiwa nsu nikhumaka mmanyakani mwa altaari a eweero,+ yoowo ori ohoolo wa Muluku. 14 Nsu nno naahihimeerya nlaikha na neethanu namosa, nenlo naarina nlope, wiira: “Mutaphule malaikha maxexe atthukweliwe muro muulupale, Eufrate”.+ 15 Vano yaahitaphuliwa malaikha ale maxexe, yaawo yaalipelela ewoora, nihiku, mweeri ni eyaakha, wiira yiive mpantta wa neeraru wa atthu.

16 Miyo kaahiiwa nummeru naya. Nummeru na atoropa yeettiha ikhavalo iyo, naari imilyau 200. 17 Enamuna kaawenhe aka ikhavalo iyo ni anakhavalo aya, tiila: Anakhavalo awo yaahiwara yoowara ya eyuuma enikhapelela epeeto,* yooxeerya ntoko mooro, yooripelela* ni ya ncano.* Miru sa ikhavalo iyo, saalikana ni miru sa akharamu.+ Nave mwaano mwaya, waanikhuma mooro ni mwiixi ni enxoofere. 18 Mpantta wa neeraru wa atthu, waahiiviwa ni ihasara iye tthaaru, saakhuma mwaano mwa ikhavalo iyo. Ihasara sene tiiya: mooro, mwiixi ni enxoofere. 19 Owerya wa ikhavalo iyo, ori mwaano mwaya ni mmiilani mwaya, maana miila saya sinlikana ni inowa, nave sookhalana miru. Nto ni miila seiyo, sinniwooniha owereya atthu.

20 Masi atthu akina yaahanle, yaawo yahiiviwe ni ihasara iye, khiyaattharunwe miteko saya. Awo khiyaahiyale okokhorela malaikha ootakhala ni ilatarato sa eweero, sa eparatha, sa ekoopiri, sa maluku ni sa miri, seiyo sihinwerya woona, nnakhala wiiwa, hata weetta.+ 21 Atthu awo, khiyaattharunwe owiiva akhwaaya, khiyaahiyale okhwiri, orupihana woohiloka* ni wiiya.

10 Nto kaahoona nlaikha na ikuru nikhuruwaka wiirimu, niwanre ene meeku. Vamuru vaya, yaahikhala ekhweyi, nave owiitho waya waalikana ni nsuwa.+ Metto* saya, saalikana ni ipilaari sa mooro. 2 Nave naahikuxa mmatatani mwaya, eroolu yaamukhaani yahaahuliwe. Nnawu naya noolopwana naahinyakela mphareya, masi nnawu naya noothiyana naahinyakela vatthayani. 3 Nlaikha nlo, naahikhuwela ni nsu noowiiwanyeya, siisaale ntoko kharamu onoopa murukulu.+ Okathi naalavunle aya, kaahiiwa nsu na okukutteya 7.+

4 Okathi okukutteya 7 waalavunle aya, kaahala vakhaani olepa itthu yaahimya aya. Masi kaahiiwa nsu nikhumaka wiirimu,+ nihimyaka wiira: “Musuke itthu okukutteya 7 sihimmye aya ni muhilepe itthu iyo”. 5 Nlaikha kaawenhe aka neemenle ene mphareya ni vatthayani, naahiteexerya wiirimu ntata naya noolopwana, 6 khulapha mwa nsina na Muluku, yoowo onikhala mahiku ootheene,+ yoowo-tho opattunxe erimu ni itthu sinikhala weiwo ni elapo ni itthu sinikhala memmo ni ephareya ni itthu sinikhala memmo, nihimyaka wiira:+ “Okathi woolipelela woomala. 7 Ohalaka okathi vakhaani wiira nlaikha na neethanu nenli+ noope nlope naya,+ esiiri ya Muluku enoomaliheriwa. Esiiri eyo,+ ti ihapari sooreera, seiyo Muluku aahimenrye awe arumeyi awe, maprofeta”.+

8 Vano kaahiiwa nsu naakhuma wiirimu+ nikilavulihaka-tho, niiraka: “Murowe, mwakuxe eroolu yoohuliwa eri mmatatani mwa nlaikha neemenle mphareya ni vatthayani”.+ 9 Kaahirowa vaari nlaikha nle, kihimeerya wiira nikivahe eroolu ele yaamukhaani. Nlaikha nlo, naahikileela wiira: “Mukuxeke eroolu ela, mukhuureke.+ Nto, mmirimani mwanyu munrowa woonaka owaawa, masi mwaano mwanyu enrowa onayaka* ntoko oravo”.* 10 Kaahikuxa eroolu ele yaamukhaani mmatatani mwa nlaikha, kikhuura.+ Vano, mwaano mwaka yaaninaya* ntoko oravo,*+ masi nuumala okhuura, mmirimani mwaahikiwaawa. 11 Nto kaahiiwa moolumo yaahimya wiira: “Muhaana olaleya-tho eprofesia enilavula sa atthu a iraasa sinceene,* maloko, mattaava ni mamwene manceene”.

11 Nave, kaahivahiwa mutathi waalikana ni ekopo yuulupale,*+ kinahimeeriwa wiira: “Nvenye, mwaphime etemplo ya Muluku ni mwaaphime altaari vamosa ni ale anikokhorela memmo. 2 Masi, muhiphime nivate na mpantta wa ota wa etemplo, muhiye siiso, okhala wiira noovahiwa atthu ahikhanle ayuda. Awo anrowa onyakela epooma yoowaarya,+ miyeeri 42.+ 3 Kinimwaaruma anamoona aka anli, ewanre ene esaakho, wiira yalaleye eprofesia, mahiku 1.260”. 4 Awo anlikanyihiwa ni miri miili+ sa olivera ni mithuko* miili.+ Nave aaheemela ohoolo wa Pwiya a elapo ya vathi.+

5 Akhala mutthu onrowa owooniha owereya, onookhuma mooro mwaano mwaya wiira waapahe awanani aya. Akhala mutthu onrowa ophavela owooniha owereya, mutthu owo onrowa wiiviwa siiso. 6 Awo aakhalana owerya wa owala osulu*+ wiira ehirupe epula,+ mahiku anrowa aya olaleyaka eprofesia. Nave aakhalana owerya wa otatuxa maasi wiira ekhale ephome.+ Nave-tho aakhalana owerya wa okumiherya mulaponi itthu sootakhala sa khula enamuna, khula okathi aniphavela aya.

7 Yamaliha olaleya, enama yoowali, yeeyo enikhuma mulittini moowiixa, enrowa owana ekhotto naawo. Eyo enimwaaxintta ni enoowiiva.+ 8 Nto mirutthu saya sinrowa waataleliwa ephiro yuulupale ya epooma yuulupale, weiwo-tho atthu yaamwiivale aya Pwiya aya vamwirini. Sodoma ni Exiitu sinithoonyerya epooma eyo. 9 Vano, atthu a iraasa soovirikana,* a mahimo, mattaava ni maloko, anrowa owehaka mirutthu saya mahiku mararu nnimeya.+ Nave khanrowa weemererya wiira mirutthu iyo sivithiwe mmahiye. 10 Atthu anikhala mulaponi anrowa otteeliwa murima ni otthapa mwaha wa yeeyo. Nave anrowa ovahanaka itthu, okhala wiira yaanoopopihiwa ni maprofeta ale manli.

11 Nuumala mahiku ale mararu nnimeya, Muluku aahiwiiseelela iphumu sa okumi maprofeta ale manli,+ nto awo yaahitthikela okhala akumi, yeemela. Vano, atthu ale yaawoona, yaahoova vanceene. 12 Nto maprofeta awo manli yaahiiwa nsu noorunya naakhuma wiirimu, naahimeeryaka wiira: “Nwele-nno”. Awo yaahiwela wiirimu aviraka mmeekuni, nave awanani aya yaahaaweha.* 13 Ewoora ene yeele, yaahikhumelela etetere yuulupale ni mpantta wa namuloko wa epooma, waahimora. Atthu 7.000 yaahiiviwa ni etetere ele, nave ale yaahanle yaahoova, ananvuwiha Muluku a wiirimu.

14 Otakhaliwa wa nenli woovira.+ Mwiiwe! Otakhaliwa wa neeraru onnoorwa moowaakuveya.

15 Nlaikha na neethanu nenli naahoopa nlope naya.+ Yaahiiwanyeya masu oorunya wiirimu, ahimyaka wiira: “Omwene wa Muluku ahu+ ni wa Kristu awe,+ onnaalamulela apinaatamu. Nave, owo onrowa olamulelaka ntoko mwene mahiku ootheene”.+

16 Nave axitokweene 24,+ yaawo yaakilanthi veehiceni vaya, ohoolo wa Muluku, yaahikhoroma, anamukokhorela Muluku, 17 ahimyaka wiira: “Ninnooxukhuruni Yehova,* Muluku Oowerya Sootheene, yoowo onikhala+ ni aakhanle, maana mookuxa owerya wanyu wuulupale ni moopacerya olamulela ntoko mwene.+ 18 Masi maloko aaviruwa ni nyuwo muhooniherya oviruwa wanyu. Nave woophiya okathi othanliwe wiira aphukeliwe alipa-ookhwa ni atthuveliwe+ maprofeta,+ yaawo anoorumeelani, vamosa ni ale oororomeleya* ni ale anoova nsina nanyu, ni atthu acikhaani ni aalupale. Nave woophiya okathi woowaapwetexa ale anihonona elapo”.+

19 Vano, wiirimu, etemplo ya Muluku yaahihuliwa, nto naahooneya Nivuku nawe na Nivarihano, niri ene mutemplo mwawe.+ Waahikhumelela overunya, yaahiiwanyeya masu ni okukutteya, yaahikhumelela etetere ni maralala maalupale.

12 Nuumala-vo, yaahikhumelela ethoonyeryo emosa yuulupale wiirimu: Aahikhala muthiyana mmosa+ aawanre nsuwa, nave mweeri waari vathi va inawu sawe. Vamuru vawe aahiwara ekhara yaarina itheneeri 12. 2 Nave muthiyana owo aahirupala. Owo aaninla vanceene okhala wiira aanoona owereya, maana aahala vakhaani oyara.

3 Yaahikhumelela-tho ethoonyeryo ekina wiirimu: Yaari enowa yuulupale, yooxeerya ntoko mooro,+ yaarina miru 7 ni manyaka 10. Khula muru waahikhalana ekhara* emosa. 4 Mwiila aya, waahipurula mpantta wa neeraru wa itheneeri+ sa wiirimu, khurihela vathi.+ Enowa eyo yuulupale yaahithipelela weemela ohoolo wa muthiyana ole+ aahala vakhaani oyara, wiira omalaka-ru oyara, emmirye mwanawe.

5 Muthiyana owo aahimuyara mwaana mmosa+ mwaamulopwana, yoowo onrowa waakukhula atthu a maloko ootheene ni ekopo ya eyuuma.+ Nto mwaana owo aahikuxiwa* moowaakuveya, onaroihiwa wa Muluku, yoowo aakilanthi veehiceni vawe. 6 Nave muthiyana ole aahitthyawela moothakoni, memmo Muluku aamulokihenrye awe opuro ni aarowa awe ovahiwaka yoolya, mahiku 1.260.+

7 Vano yaahikhumelela ekhotto wiirimu: Mikhayeli*+ vamosa ni malaikha awe, yaahiwana ni enowa yuulupale. Nave enowa eyo yuulupale ni malaikha aya yaahiwana, 8 masi awo yaahixinttiwa, nave khiyaarina-tho opuro wiirimu. 9 Siiso, enowa ele yuulupale,+ yeele ya khalai, yaahiriheliwa vathi. Ti yeeyo eniihaniwa Diabo+ ni Satana,+ ni enaahapuxa atthu anikhala elapo yootheene ya vathi.+ Eyo yaahiriheliwa vathi,+ nave-tho, malaikha aya yaahiriheliwa vathi vamosa ni eyo. 10 Nto kaahiiwa nsu noorunya nikhumaka wiirimu, niiraka:

“Vano wookhumelela woopowa+ ni owerya ni Omwene wa Muluku ahu+ ni okhulupale wa Kristu awe, okhala wiira ooriheliwa vathi ole onaahimyana axinnihu itthu soowoothiwa, yoowo oniwootherya othana ni ohiyu, ohoolo wa Muluku ahu!+ 11 Awo aaxintta enowa eyo yuulupale+ mwaha wa ephome ya Mwaapwittipwitthi+ ni mwaha wa ihapari yaalaleya aya.+ Nave khiyaaphentale okumi aya+ ni khiyoovale okhwa. 12 Tivo, erimu ni ale anikhala weiwo, etteeliweke murima! Vano, mootakhaliwa nyuwo elapo ya vathi ni ephareya,+ okhala wiira Diabo ookhuruwela wa nyuwo, onanariwe ene vanceene, maana oosuwela wiira orina okathi vakhaani paahi”.+

13 Nuumala enowa yuulupale oweha wiira yaahiriheliwa elapo ya vathi,+ yaahimulupattha muthiyana+ yoole aamuyanre mwaana mwaamulopwana. 14 Masi Muluku aahinvaha muthiyana ole mapupha a murumaasi muulupale,+ wiira ovavele opuro awe moothakoni, memmo aarowa awe ovahiwaka yoolya mwa okathi omosa ni okathi miili ni nimeya na okathi omosa,*+ ori ene ottaiwene wa enowa.+

15 Nave, enowa ele yaahuumula maasi mwaano mwaya, yaawo yaakhala ntoko muro, emuumulelaka muthiyana ole, wiira omireye mmuro-mme. 16 Masi etthaya yaahirwa omukhaliherya muthiyana ole. Nto yaahihula eyano aya, emirya muro ole wuumuliwe ni enowa yuulupale. 17 Siiso, enowa eyo yuulupale yaahinviruwela muthiyana owo, enarowa owana ekhotto ni osuulu awe waahanle,+ yoowo oneettela sooruma sa Muluku ni orina muteko wa omukhalela onamoona Yesu.+

13 Nto eyo* yaaheemela vamihaavani sa ophareya.

Nave kaahiweha enama yoowali+ ekhumaka mphareya,+ yeeyo yaarina manyaka 10 ni miru 7. Khula nnyaka naahikhalana ekhara* emosa. Masi khula muru waahikhalana nsina nanveeha Muluku. 2 Vano, enama yoowali yaawenhe aka yaalikana ni havara. Masi metto saya saalikana ni mwaamunama oniihaniwa ursu, eyano aya yaalikana ni eyano ya kharamu. Nto enowa yuulupale,+ yaahivaha enama eyo yoowali owerya waya, ehice aya ni okhulupale aya.+

3 Vano, kaahoona wiira muru aya mmosa waahivulalihiwa vanceene. Nnaamwi naari nikhwatta naakhanle oowiiva, naahivola.+ Nto atthu a elapo yootheene yaanitthara enama eyo yoowali, atikinihiwe ene. 4 Atthu awo yaanikokhorela enowa yuulupale, okhala wiira eyo yaahivaha okhulupale enama yoowali. Nave, yaanikokhorela enama yoowali ni moolumo ala: “Ti pani onlikana ni enama yoowali? Ti pani oniwerya owana ni eyo?” 5 Enama yoowali yaahaakhela owerya wiira yiittottopeke ni elavuleke itthu sootakhala sininveeha Muluku. Nave yaahaakhela owerya wiira epakeke etthu eniphavela aya, mpakha miyeeri 42.+ 6 Vano, yaahihula eyano aya enanveeha+ Muluku ni enaveeha nsina nawe ni opuro onikhala awe. Nave yaanaaveeha ale anikhala wiirimu.+ 7 Enama eyo yaaheemereriwa owana ekhotto ni ale oororomeleya* ni waaxintta.+ Nave yaahivahiwa owerya wa olamulela mahimo ootheene, iraasa sootheene,* mattaava ootheene ni maloko ootheene. 8 Atthu ootheene anikhala elapo ya vathi, anrowa okokhorela enama eyo. Okhuma okathi opattuxiwa aya olumwenku,* atthu awo masina aya khalempwale murooluni mwa okumi+ ya Mwaapwittipwitthi, yoowo iiviwe.+

9 Ole orina maaru oowiiwa, iiweke.+ 10 Akhala wiira mutthu ohaana otthukweliwa mukhatteya, weeso onootthukweliwa mukhatteya. Akhala wiira mutthu onrowa wiiva ni espaata,*+ weeso onimwiiviwa ni espaata. Tivo, ale oororomeleya*+ ahaana ovilela+ ni okhalana waamini.+

11 Nuumala-vo, kaahiweha enama yoowali ekhumaka mulaponi. Eyo yaahikhalana manyaka manli yaalikana ni manyaka a mwaapwittipwitthi. Masi yaahipacerya olavula ntoko enowa yuulupale.+ 12 Enama eyo yoowali, ennooniherya owerya waya wootheene ohoolo wa enama ele yoowali yoopacerya.+ Nave enniiriha elapo ni atthu anikhala mulaponi okokhorela enama yoowali yoopacerya, yeeyo yaavolihiwe nikhwatta naya naakhanle oowiiva.+ 13 Nave, ennipaka ithoonyeryo suulupale ni enniiriha mooro okhuma wiirimu okhuruwelaka vathi, wooniwaka ni atthu.

14 Enama eyo yoowali ennaahapuxa ale anikhala mulaponi, mwaha wa ithoonyeryo yeemereriwe aya opaka ni enama yoowali yoopacerya. Nave, ennaahimeerya ale anikhala mulaponi wiira apake elatarato+ ya enama yoowali yoopacerya, yeeyo yaavulalihiwe ni espaata, masi nikhwatta naya nivola.+ 15 Enama yoowali ya nenli, yaahivahiwa owerya wa ovaha okumi* elatarato ya enama yoowali yoopacerya. Nto, elatarato ya enama ele yoowali, yaaniwerya olavula ni oruma wiiviwa ootheene ale yahaakokhorela enama eyo yoowali.

16 Enama eyo yoowali, ennaakhanyereriha atthu ootheene, acikhaani ni aalupale, athaaciri ni amasikhini, ale ootaphuwa ni ipottha, wiira eheliwe ekanyeryo ntata naya noolopwana aahiiso vayuuci vaya,+ 17 ni wiira ohikhale mutthu oniwerya othuma aahiiso otumiha etthu, ohikhanle yoole oheliwe ekanyeryo, eyo piiyo, nsina+ na enama yoowali aahiiso nummeru ninthoonyerya nsina naya.+ 18 Ole orina ankhili, iirele ikontha nummeru na enama yoowali, okhala wiira nummeru nlo ti na pinaatamu. Nummeru nene ti 666.+ Ale paahi arina ankhili, tanrowa wiiwexexa etthu ela.

14 Nuumala-vo, miyo kaahinweha Mwaapwittipwitthi+ eemenle ene vamwaako Siyoni.+ Yaahikhala ni yoowo atthu 144.000,+ yaawo alempwale nsina nawe ni nsina na Tiithi awe+ vayuuci vaya. 2 Nto, kaahiiwa nsu naakhuma wiirimu, nenlo naalikana ni oruma wa maasi manceene ni okukutteya wuulupale. Nave, nsu nlo kaiwale aka, naalikana ni alipa-oowiipa, aniipa attharihelaka ni aviola* aya. 3 Awo yaaniipa nsipo, nenlo naakhala ntoko nsipo na niinaano,+ ohoolo wa ehice ni wa soopattuxiwa sikumi ixexe,+ ni wa axitokweene.+ Khuuvo aawerya wiixutta nsipo nlo, ahikhanle atthu ale 144.000,+ yaawo Muluku aathumme awe elapo ya vathi. 4 Awo khainanarinhe ni athiyana. Veekeekhai, khatonko orupa ni athiyana.+ Awo ti yaale ahinihiya omutthara Mwaapwittipwitthi, khula opuro onirowa awe.+ Muluku ohaathuma+ eriyari ya apinaatamu, ntoko milipu+ sinivahiwa Muluku ni Mwaapwittipwitthi. 5 Mwaano mwaya, khophwanyiwe wootha. Awo kharina nthowa.+

6 Nave, kaahiweha nlaikha nikina naavava osulu-sulu, nenlo naarina ihapari sooreera sihinimala, wiira naalaleerye atthu anikhala mulaponi, atthu a maloko ootheene, a mahimo ootheene, a mattaava ootheene ni a iraasa sootheene.*+ 7 Nlo naanihimya ni nsu noorunya, niiraka: “Mmooveke Muluku ni munvuwiheke yoowo, okhala wiira yoophiya ewoora ya ophukela wawe.+ Tivo, mmukokhoreleke Ole opattunxe erimu, elapo, ephareya+ ni mapuro aniphattuwa maasi”.

8 Nuumala-vo, naahikhumelela nlaikha na nenli, nnahimya wiira: “Oomora! Babiloonia Muulupale+ oomora,+ yoowo owiirinhe atthu a maloko ootheene, owurya eviinyu ya ophavela wawe vanceene orupihana woohiloka!”*+

9 Naahikhumelela nlaikha na neeraru, nnalavula ni nsu noorunya, niiraka: “Akhala mutthu onrowa okokhorela enama yoowali+ ni elatarato aya ni oheliwa ekanyeryo vayuuci vawe aahiiso ntata nawe,+ 10 mutthu owo onoowurya eviinyu ya Muluku, eyo piiyo, oviruwa wawe. Eyo ti eviinyu yoohitakaaheriwa etthu, yeeyo Muluku onihela awe mukaalisini mwa oviruwa wawe.+ Nave, mutthu owo onoohaaxiwa ni mooro ni enxoofere,+ ohoolo wa malaikha oowaarya ni wa Mwaapwittipwitthi. 11 Mwiixi wa ohaaxiwa* waya, onrowa owelaka osulu mahiku ootheene.+ Nave, ale anikokhorela enama yoowali ni elatarato aya ni aheliwe ekanyeryo ya nsina naya, khanrowa ophumuryaka othana ni ohiyu.+ 12 Tivo, ale oororomeleya,*+ yaawo aneettela sooruma sa Muluku ni ahinihiya omwaamini+ Yesu, ahaana ovilela”.

13 Nave, kaahiiwa nsu naakhuma wiirimu, nihimyaka wiira: “Mulepe moolumo ala: Okhuma okathi ola orowa ohoolo, awiixutti a Pwiya* anikhwa,+ anrowa okhala oohakalala. Aayo, ikuru soowaarya sinihimya wiira awo ahaana ophumurya miteko saya soolipa, okhala wiira itthu apanke aya sinimwaatthara”.

14 Vano kaahiweha neeku nootteela, nto vaneekuni-vo, aahikilaathi mutthu aalikana ni mwaana a mutthu,+ yoowo aawanre ekhara ya eweero vamuru vawe ni aakunxe mmatatani mwawe ecampeya* yoowiitha.

15 Nlaikha nikina naahikhuma mutemplo,* nimwiihanaka ni nsu noorunya ole aakilanthi vaneekuni, niiraka: “Muhephe ipyo sa mulaponi ni ecampeya* anyu, okhala wiira soottokottha saana. Nave woophiya okathi aya woohemphwa”.+ 16 Nto ole aakilanthi vaneekuni, aahihepha ipyo sa mulaponi ni ecampeya* awe.

17 Nave-tho, naahikhuma nlaikha nikina mutemplo* ya wiirimu. Nlo naahikuxa-tho ecampeya* yoowiitha.

18 Naahikhuma-tho nlaikha nikina valtaari, nenlo naarina owerya wa weettiherya mooro. Naahimwiihana ni nsu noorunya ole aakunxe ecampeya* yoowiitha, niiraka: “Mpacerye orumeela ecampeya* anyu yoowiitha, wiira muhephe maphara a ewuuva ya mulaponi, okhala wiira ewuuva eyo yoottokottha”.+ 19 Vano nlaikha nle naahipacerya orumeela ecampeya* aya valaponi, naahihepha ewuuva ya mulaponi. Nave naahirihela ewuuva eyo nipuro nuulupale naanyakattiwa ewuuva ya onanariwa wa Muluku.+ 20 Ewuuva eyo yaanyakattiwe ota wa epooma. Nto opuro yaanyakattiwa aya, yaahikhuma ephome. Orakamela waya musulu waahiphiya mpakha iyano sa ikhavalo. Nto orakamelana waya waari etthu yoowiiraka ikiloomo 296.*

15 Miyo kaahiweha-tho ethoonyeryo ekina wiirimu, yuulupale ni yootikiniha, nave kaahiweha malaikha 7,+ ekunxe ene ihasara 7. Ihasara iya ti sookiserya, okhala wiira savira seiya, onanariwa wa Muluku onoomala.+

2 Vano, kaahiweha etthu yaalikana ni ntthiya na eviituru,+ nootakaaheriwa mooro. Nave ale yaaxinttale+ enama yoowali ni elatarato aya+ ni nummeru ninthoonyerya nsina naya,+ yaaheemela ohoolo wa ntthiya nle na eviituru, yaavarenle ene aviola* a Muluku. 3 Awo yaaniipa nsipo na Moise,+ murumeyi a Muluku ni nsipo na Mwaapwittipwitthi,+ yiiraka:

“Yehova,* Muluku Oowerya Sootheene,+ miteko sanyu ti suulupale ni sootikiniha.+ Mwene a mahiku ootheene,+ iphiro sanyu ti sa xariya ni seekeekhai.+ 4 Ti pani tthiri ohinrowa owoovani, nyuwo Yehova* ni ovuwiha nsina nanyu, okhala wiira nyuwo paahi ti muri Muluku oororomeleya?+ Mweekeekhai, atthu a maloko ootheene animoorwa wookokhorelani ohoolo wanyu,+ maana awo annoona wiira munniphukela mwa xariya”.

5 Nuumala-vo, kaahiweha nipuro noowaarya* na etenta* ya nivarihano,*+ nihuleiye ene wiirimu.+ 6 Nave-tho, kaahiweha malaikha 7 akunxe ene ihasara 7,+ akhumaka nipuro nlo noowaarya.* Awo yaawanre malaya ooreera ni oowaarya, atthunkwe ene vapeeto* vaya ni ekuwo ya eweero. 7 Vano, mmosa a soopattuxiwa sikumi ixexe, aahivahererya malaikha ale 7 mihasa 7 sa eweero, seiyo saasareiye onanariwa wa Muluku,+ yoowo onikhala mahiku ootheene. 8 Nave nipuro nlo noowaarya* naahisareya mwiixi mwaha wa ovuwa wa Muluku+ ni mwaha wa owerya wawe. Nto khuuvo aawerya okela nipuro nno noowaarya,* mpakha ovira ihasara 7+ sa malaikha 7.

16 Nave, kaahiiwa nsu noorunya nikhumaka nipuro noowaarya,*+ nihimeeryaka malaikha 7, wiira: “Murowe, mwamwarexele mulaponi itthu siri mmihasani 7 sa onanariwa wa Muluku”.+

2 Nlaikha noopacerya naahirowa, khumwarexela mulaponi etthu yaari mmuhasani mwaya.+ Vano, makhwatta oowereya ni ootakhala,+ yaahaakhumelela atthu yaale yaarina ekanyeryo ya enama yoowali+ ni yaakokhorela elatarato ya enama eyo.+

3 Nlaikha na nenli naahimwarexela mphareya etthu yaari mmuhasani mwaya.+ Vano ephareya yaahithatuwa ephome,+ ntoko ephome ya mutthu iiviwe. Nto soopattuxiwa sootheene sikumi sa mphareya,+ saahikhwa.

4 Nlaikha na neeraru naahimwarexela mmuro ni mapuro aniphattuwa maasi etthu yaari mmuhasani mwaya.+ Nto iyo saahithatuwa ephome.+ 5 Kaahiiwa nlaikha naarina owerya wa weettiha maasi, nihimyaka wiira: “Nyuwo mwa Muluku oororomeleya,+ yoowo onikhala ni aakhanle.+ Nyuwo ti mwa xariya, tivo moolamula wiira itthu iya siiraneye.+ 6 Awo aamwarexa ephome ya ale oororomeleya* ni ya maprofeta,+ tivo, nyuwo muhaawuriha ephome.+ Tthiri awo anniphwanela”.+ 7 Vano, kaahiiwa nsu nikhumaka valtaari, nihimyaka wiira: “Aayo Yehova,* Muluku Oowerya Sootheene,+ ophukela wanyu ti weekeekhai ni ti wa xariya”.+

8 Nlaikha na neexexe naahimwarexela vansuwani etthu yaari mmuhasani mwaya,+ nto nsuwa naahivahiwa owerya wa waapaha atthu ni mooro. 9 Vano, atthu yaahipahiwa ni oviha wuulupale, masi khiyaattharunwe ni khiyanvuwinhe Muluku. Ohiya-vo, yaahiveeha nsina na Muluku, yoowo orina owerya wa okumiherya ihasara iyo.

10 Nlaikha na neethanu, naahimwarexela veehiceni va enama yoowali, etthu yaari mmuhasani mwaya. Nto yaahikhumelela ewiriphi moomweneni+ mwa enama eyo yoowali. Nave atthu yaahipacerya oluma malumi aya mwaha wa woona owereya. 11 Masi awo khiyaattharunwe miteko saya sootakhala. Ohiya-vo, yaahinveeha Muluku a wiirimu mwaha wa woona owereya ni mwaha wa makhwatta aya.

12 Vano, nlaikha na neethanu namosa, naahimwarexela muro muulupale Eufrate etthu yaari mmuhasani mwaya.+ Nto, muro owo waahuuma+ wiira waatthukulele ephiro mamwene+ yaarwa onikhuma nsuwa.

13 Nave-tho, kaahiweha moolumo mararu oonanara,* yaawo yaalikana ni anaphulu, akhumaka mwaano mwa enowa yuulupale+ ni mwaano mwa enama yoowali ni mwaano mwa profeta oowootha. 14 Moolumo awo anikhuma wa malaikha ootakhala, nave mamwene a mulaponi mootheene ahiiwa.+ Moolumo awo, annipaka miiriirya wiira yaathukumanye mamwene, wiira yawane ekhotto+ ya nihiku nuulupale na Muluku Oowerya Sootheene.+

15 “Mwiiwe! Miyo kinrwa ntoko latarau.+ Oohakalala tuule onikhala oowehaweha+ ni ohinaakhiwa ikuwo sawe, wiira oheetteke ohiwanre etthu ni wiira ohuuliwe muru, owehiwaka ni atthu”.+

16 Moolumo awo oonanara, yaahaathukumanya mamwene nipuro nniihaniwa Harmagedoni* ni nttaava na eheeperi.+

17 Nlaikha na neethanu nenli naahimwarexela osulu etthu yaari mmuhasani mwaya. Nuumala-vo, naahiiwanyeya nsu nikhumaka nipuro noowaarya,*+ veehiceni, nihimyaka wiira: “Yoovira!” 18 Nave, waahikhumelela overunya ni yaahiiwanyeya masu ni okukutteya. Yaahikhumelela-tho etetere yuulupale ni yoowerya, ehitonko okhumelela okhuma okathi opattuxiwe awe pinaatamu elapo ela ya vathi.+ 19 Epooma yuulupale+ yaahikawanyeya, ekhala ipantta tthaaru, nave ipooma sa maloko saahimora. Vano, Muluku aahimuupuwela Babiloonia Muulupale,+ wiira onwurihe ekaalisi ya eviinyu ya oviruwa wawe wuulupale.+ 20 Nave-tho, isisiro* sootheene saahitthyawa ni miyaako saahilakaseya.+ 21 Nto yaahimora maralala maalupale akhumaka wiirimu, yaamorelaka atthu.+ Olemela wa khula nluku na maralala awo, waattamela etalento* emosa. Nave, atthu yaahinveeha Muluku, mwaha wa ehasara ya maralala,+ maana ehasara eyo yaari yuulupalexa.

17 Vano, nlaikha nimosa wa ale 7 yaakunxe mihasa 7,+ naahirwa nnakihimeerya wiira: “Murwe kiwooniheryeni ehukhumu enrowa awe ovahiwa muthiyana namararuwa* muulupale, yoowo okilanthi vasulu va maasi manceene.+ 2 Mamwene a mulaponi aarupihana voohiloka*+ nuuwo, nave atthu anikhala mulaponi aahapalihiwa ni eviinyu awe, yeeyo enithoonyerya orupihana wawe woohiloka”.*+

3 Nlaikha nlo naahikikuxa ni owerya wa ikuru soowaarya, nikiroiha moothakoni. Nto kaahinweha muthiyana okilaathenle ene enama yoowali yooxeerya, yaasareiye masina yanveeha Muluku ni yaarina miru 7 ni manyaka 10. 4 Muthiyana owo, aahiwara nlaya na ekoore violeeta na musurukhu munceene ni nlaya nooxeerya.+ Nave-tho, aahiiphwaneliha ni eweero ni maluku oowaarya ni ipeerola.*+ Owo aahikuxa ekaalisi ya eweero mmatatani mwawe, yeeyo yaasanrye itthu soohiirya ni soonanara sa orupihana wawe woohiloka.* 5 Vayuuci vawe, vaahilempwa nsina nootikiniha, naahimya wiira: “Babiloonia Muulupale, maama a anamararuwa*+ ni a itthu soohiirya sa mulaponi”.+ 6 Nave, kaahiweha wiira muthiyana ole aahihapaliwa ni ephome ya ale oororomeleya* ni ephome ya anamoona a Yesu.+

Nto, okathi kanwehale aka, kaahitikinihiwa vanceene. 7 Vano, nlaikha nle naahikikoha wiira: “Xeeni mwaatikinihiwe anyu? Kinimooleelani esiiri ya muthiyana ola+ ni ya enama yoowali okilaathenle awe, yeeyo erina miru 7 ni manyaka 10:+ 8 Enama yoowali nwenhe anyu, yaahikhala khalai. Nuumala-vo, yaahihiya okhala. Masi, voohipisa enrowa okhuma mulittini moowiixa+ ni enrowa opwetexiwa. Atthu anikhala mulaponi, yaawo masina aya ahilempwale murooluni mwa okumi,+ okhuma okathi opattuxiwa aya olumwenku,* anrowa otikinihiwa nuumala oweha enama yoowali, yeeyo yaakhanle khalai, nuumala-vo khuhiya okhala, masi vano etthikenle okhala.

9 “Mutthu ohaana okhalana ankhili wiira iiwexexe etthu ela: Miru 7,+ sinithoonyerya miyaako 7, seiyo muthiyana ole okilanthi awe vasulu vaya. 10 Nave sinithoonyerya mamwene 7: Mamwene mathanu aavira, mwene mukina onnikhala vano, nave mwene mukina khonatthi ophiya. Masi aphiya vale, onrowa okhala okathi vakhaani. 11 Enama yoowali yaakhanle, masi khuhiya okhala,+ enithoonyerya mwene a neethanu neeraru, yoowo onikhuma wa mamwene 7 ni onrowa opwetexiwa.

12 “Manyaka 10 nwenhe anyu, anithoonyerya mamwene 10, yaawo nlelo ahinatthi waakhela omwene, masi anrowa waakhela owerya wiira alamuleleke ntoko mamwene vamosa ni enama yoowali, ewoora emosa. 13 Mamwene awo arina muupuwelo mmosa-ru, tivonto, annivaha enama yoowali owerya waya ni okhulupale aya. 14 Nto awo anrowa owana ni Mwaapwittipwitthi.+ Masi okhala wiira Mwaapwittipwitthi owo ti Pwiya a mapwiya ni Mwene a mamwene,+ onrowa waaxintta. Nave-tho, ale Muluku owiihanne awe, aathanlale awe ni ari oororomeleya wa yena,+ yaawo ari ni Mwaapwittipwitthi, anrowa-tho oxintta”.+

15 Vano, nlaikha naahikileela wiira: “Maasi nwenhe anyu, yaawo muthiyana namararuwa* okilanthi awe vasulu vaya, anithoonyerya iraasa,* mittitthi sa atthu, maloko ni mattaava.+ 16 Manyaka 10+ ni enama yoowali moonale anyu,+ sinrowa omunyokha muthiyana namararuwa.+ Iyo sinoomwaakha itthu sawe sootheene ni sinrowa omuhiya ohiwanre etthu. Nave, sinookhuura erutthu awe ni sinrowa ompaha voomalela ni mooro.+ 17 Tthiri, Muluku oohela vamurimani vaya ophavela opaka etthu onuupuwela awe,+ eyo piiyo, opaka etthu emosa-ru ootheene aya anuupuwela aya, owiirihaka ovaha enama yoowali omwene aya,+ mpakha omaliheriwa moolumo a Muluku. 18 Nave, muthiyana+ mmoonale anyu, onithoonyerya epooma yuulupale, yeeyo enaalamulela mamwene a mulaponi”.

18 Nuumala-vo, kaahiweha nlaikha nikina naarina owerya wuulupale nikhuruwaka wiirimu. Nave, waarya waya waahimwaleela elapo ya vathi. 2 Nlaikha nlo naahikhuwela ni nsu noorunya, niiraka: “Oomora! Babiloonia Muulupale oomora,+ nave oothatuwa nipuro ninkhala malaikha ootakhala, nenno malaikha ootheene ootakhala* ni axipalame ootheene oonanara ni oothanyeya anikhala aya!+ 3 Mweekeekhai, oowiiriha atthu a maloko ootheene ohapaliwa ni eviinyu+ ya ophavela wawe vanceene orupihana woohiloka.* Nave, mamwene a mulaponi aarupihana voohiloka nuuwo+ ni alipa a nakoso* a mulaponi aathaaciri mwaha wa itthu sinceene sa efaita, seiyo ohinuuleliwa awe muru wiithukumanyerya”.

4 Kaahiiwa nsu nikina nikhumaka wiirimu, niiraka: “Nyuwo atthu aka, mukhume-mmo,+ mwaahiphaveleke okhalana nthowa na itampi sawe, nave mwaahiphaveleke ohaawa ehasara emosa-ru nuuwo.+ 5 Itampi sawe khasinkontareya,+ nave Muluku onrowa omphukela mwaha wa itthu sootakhala opanke awe.+ 6 Mmwiirihe etthu ewiirinhe awe akina.+ Mmwiirihe vanli etthu iirale awe.+ Ekaalisi+ olokihenrye awe yoowurya, mmulokiherye ikwaha piili.+ 7 Okhala wiira owo onniittottopa vanceene ni onniithukumanyerya mihakhu ohuuliwaka muru, weeso ohaana ohaawa ni wunla. Owo onnithipelela ohimya vamurimani vawe wiira: ‘Miyo kinnilamulela ntoko pwiyamwene, nkihiyo naamukhweli, nave nkinikhala-khala kinlaka’.+ 8 Tivo, nihiku nimosa paahi, sinimoorwa ihasara sawe: Okhwa, wunla ni etala. Nave, Muluku onompaha ni mooro,+ okhala wiira Yehova* Muluku, yoowo omphukenle, ta ikuru.+

9 “Nave mamwene a mulaponi, yaawo yaarupihana voohiloka* nuuwo ni yaakawana nuuwo itthu sa efaita aithukumanyerya awe ohuuliwaka muru, anrowa wunla ni wiimana vapeeto* yooniheryaka oriipiwa murima mwaha wa yoowo, okathi anrowa aya woonaka mwiixi wa opahiwa wawe. 10 Awo anrowa weemela ottaiwene, yoovaka ohaaxiwa wawe ni anrowa ohimyaka wiira: ‘Maai, maai nyuwo Babiloonia, epooma yuulupale+ ni yoolipa, okhala wiira ophukeliwa wanyu ohoorwa niinaano-ru!’

11 “Nave-tho, alipa a nakoso* a mulaponi, anninla ni wiikhupanyerya mwaha wa yoowo, okhala wiira khuuvo-tho onrowa othuma marotta aya ootheene. 12 Marotta ootheene a eweero, eparatha, maluku oowaarya, ipeerola,* eliinyu yooreera, ikuwo sa ekoore violeeta, ikuwo soothererya ni ikuwo sooxeerya. Nave-tho, itthu sootheene saapakiwa ni matera oowunkhela ni itthu sootheene saapakiwa ni maino a etthepo, matera a efaita yuulupale, ekoopiri, eyuuma ni nluku nniihaniwa maarmore. 13 Nave-tho marotta a ekanela,* ni itthu sa wIndia sininkheliha eyoolya, nsenso,* makhura oowunkhela, nsenso nootteela, eviinyu, makhura, otthu wooreera,* etiriku, ipooyi, ipwittipwitthi, ikhavalo, ikaaro sinipuruliwa ni ikhavalo, ipottha ni atthu. 14 Tthiri, itthu sootheene sooreera sihoohiyani, nave soolya soosivexa ni itthu soolokexa sootheene sihoorimeelani, khamunrowa-tho ophwanya.

15 “Alipa a nakoso* yaatumiha itthu iya, yaawo yaathaacinri mwaha wa Babiloonia owo, anrowa weemela ottaiwene, yoovaka ohaaxiwa wawe ni anrowa wunlaka ni wiikhupanyerya. 16 Awo yaahimya wiira: ‘Maai, maai nyuwo epooma yuulupale, nwanre ikuwo sa eliinyu yooreera ni sa ekoore violeeta ni sooxeerya ni mwiireerinhe vanceene ni eweero, maluku oowaarya ni ipeerola,*+ 17 okhala wiira mihakhu iyo sinceene soohononiwa niinaano-ru!’

“Khula kapitau onimweettiha pakiti ni khula mutthu onikuxiwa mpakitini-mmo ni ale aneettiha ikalawa, ni ootheene ale anivara muteko mphareya, animweemela ottaiwene. 18 Awo anrowa owehaka mwiixi wa opahiwa wawe ni ekhuweleke, ahimyaka wiira: ‘Khiivo epooma enlikana ni epooma ele yuulupale!’ 19 Awo anrowa oyiiherya ntthupi mmuru mwaya ni anookhuwela yinlaka ni wiikhupanyerya, ariki: ‘Maai, maai nyuwo epooma yuulupale, yeeyo ootheene ale yaarina apakiti mphareya yaaphwanya aya muhakhu mwaha wa yeeyo, okhala wiira yoopwetexiwa niinaano-ru!’+

20 “Nto mutteeliweke murima nyuwo munikhala wiirimu+ vamosa ni ale oororomeleya*+ ni arummwa ni maprofeta, maana Muluku omphukela yoowo, mwaha wa itthu owiirenlyaaweni!”+

21 Vano, nlaikha na ikuru naahikuxa nluku nuulupale ntoko nxilo nuulupale khurihela mphareya, niiraka: “Siisa, Babiloonia muttetthe muulupale, onrowa oriheliwa vathi moowaakuveya, nave khonrowa-tho ophwanyiwa.+ 22 Nave mwa nyuwo Babiloonia, khuuvo onrowa omwiiwa mutthu iipaka ni omoopaka viola,* aahiiso omwiiwa mutthu orumihaka muusika wala oopaka ephivi,* nnakhala nlope. Khuuvo mutthu onisuwela ovara khula etthu onrowa-tho ophwanyaneyaka mwa nyuwo, nnakhala khivanrowa-tho wiiwanyeya mwa nyuwo oruma wa nxilo. 23 Mwa nyuwo, khonrowa-tho wooneya waarya wa muthuko. Mwa nyuwo, khaninrowa-tho wiiwanyeya nsu na mulopwana onithela,* ni nsu na muthiyana onitheliwa.* Tthiri, alipa a nakoso* anyu, yaari akhulupale a mulaponi. Nave-tho, muhoototha+ maloko ootheene ni okhwiri anyu. 24 Mweekeekhai, mwa nyuwo, yoophwanyiwa ephome ya maprofeta ni ale oororomeleya*+ ni ootheene ale yiiviwe mulaponi”.+

19 Nuumala-vo, kaahiiwa wiirimu etthu yaalikana ni nsu noorunya na muttitthi muulupale wa atthu. Awo yaahimya wiira: “Mmuttottopele Yah!*+ Muluku ahu onniwoopola apinaatamu ni ookhalana owerya ni ovuwa, 2 okhala wiira ophukela wawe ti weekeekhai ni wa xariya.+ Owo omphukela muthiyana namararuwa muulupale, yoowo ohononne elapo mwaha wa orupihana wawe woohiloka.* Nave Muluku ohinlela ikuhu ephome ya arumeyi awe, yeeyo namararuwa owo omwarenxe awe ni matata awe”.*+ 3 Okathi ene yoowo, kaahiwiiwa-tho ekwaha ya nenli, yiiraka: “Mmuttottopele Yah!*+ Nave mwiixi wa opahiwa wa namararuwa owo, onniwela osulu mahiku ootheene”.+

4 Nto axitokweene 24+ ni soopattuxiwa sikumi ixexe,+ yaahikhoroma anamukokhorela Muluku, yoowo okilanthi veehiceni, ahimyaka wiira: “Amen! Mmuttottopele Yah!*”+

5 Vano, naahiiwanyeya nsu nikhumaka veehiceni, niiraka: “Mmuttottopeleke Muluku ahu, nyuwo arumeyi awe ootheene,+ munimoova yoowo, aalupale ni acikhaani”.+

6 Kaahiiwa-tho etthu yaaruma ntoko nsu na muttitthi muulupale wa atthu ni yaalikana ni oruma wa maasi manceene ni yaakhala ntoko okukutteya wuulupale. Awo yaahimya wiira: “Mmuttottopele Yah,*+ okhala wiira Yehova,* Muluku ahu Oowerya Sootheene,+ oopacerya olamulela ntoko mwene!+ 7 Vano, nitteeliweke murima vanceene ni ninvuwiheke Muluku, okhala wiira ekasamento ya Mwaapwittipwitthi yoophiya, nave mwaarawe ohiilokiherya. 8 Mwaarawe mwaapwittipwitthi oovahiwa ekuwo ya eliinyu yooreera, yoowaarya ni yoohinanara, wiira oware. Eliinyu yooreera enithoonyerya miteko sa xariya sa ale oororomeleya”.*+

9 Nave nlaikha naahikihimeerya wiira: “Mulepe moolumo ala: Oohakalala taale alattuliwe orowa olya yoolya ya ekasamento ya Mwaapwittipwitthi”.+ Naahikihimeerya-tho wiira: “Ala moolumo eekeekhai a Muluku”. 10 Nto miyo kaahikhoroma ohoolo wa nlaikha nlo wiira kikokhorele. Masi naahikileela wiira: “Nnaari, muhiire siiso!+ Miyo ka murumeyi mukhwiinyu paahi ni ka murumeyi a axinninyu, yaawo animukhalela onamoona Yesu.+ Tivo, mmukokhoreleke Muluku paahi,+ okhala wiira yoolakela ya iprofesia, ti olaleya ekeekhai enimuhimya Yesu”.+

11 Vano, kaahoona erimu ehuleiye ene, nto yaahikhumelela ekhavalo yootteela.+ Ole aakilanthi vakhavaloni-vo, oniihaniwa Oororomeleya+ ni Eekeekhai.+ Nave ophukela wawe ti wa xariya ni ekhotto oniwana awe ti ya xariya.+ 12 Maitho awe anlikana ni mooro onivarela+ ni ookhalana ikhara sinceene vamuru vawe. Nave oolempwa nsina nihinsuweliwa ni mutthu mukina, masi onisuwela mwaneene yoowo paahi. 13 Owo oowara nlaya na ota nitatheliwe ephome. Nsina nawe ti Nuulumo+ na Muluku. 14 Nave-tho, anakhotto a wiirimu yaanimutthara ewenle ene ikhavalo sootteela. Awo yaawanre ikuwo sa eliinyu yooreera, yootteela ni yoohinanara. 15 Mwaano mwawe, yaanikhuma espaata yoowiitha ni yoorakama,*+ onrowa awe orumeela wiira opwetexe maloko. Onrowa okukhula maloko awo ni ekopo ya eyuuma.+ Nave-tho, onninyakela ewuuva nipuro naanyakattiwa ewuuva ya oviruwa wuulupale wa Muluku Oowerya Sootheene.+ 16 Vanlayani vawe na ota ni vatarani vawe, voolempwa nsina nni: Mwene a mamwene ni Pwiya a mapwiya.+

17 Kaahiweha-tho nlaikha neemenle ene vansuwani, nikhuwelaka ni nsu noorunya, naahimeeryaka axipalame ootheene anivava osulu-sulu, wiira: “Murwe nno, muthukumanele eyoolya yuulupale ya Muluku,+ 18 wiira mukhuure mirutthu sa mamwene, mirutthu sa makumantanti a atoropa, mirutthu sa atthu oowerya,+ mirutthu sa ikhavalo ni sa atthu awenle seiyo.+ Nave, mukhuure mirutthu sa atthu ootheene, ale ootaphuwa vamosa ni ipottha, ale acikhaani ni aalupale”.

19 Kaahiweha-tho enama yoowali ni mamwene a mulaponi vamosa ni anakhotto aya, athukumanne ene wiira yawane ekhotto ni ole okilanthi vakhavaloni vamosa ni anakhotto awe.+ 20 Ole aakilanthi vakhavaloni, aahivara enama ele yoowali ni profeta oowootha,+ yoowo aapaka miiriirya ohoolo wa enama eyo, wiira owootothe ale yaaheliwe ekanyeryo ya enama yoowali,+ ni ale anikokhorela elatarato ya enama eyo.+ Enama ele yoowali ni profeta oowootha nlelo ari ene akumi, nakhavalo ole aahaarihela vantthiyani na mooro, nenno nimpaha ni enxoofere.+ 21 Masi akina yaahanle yaahiiviwa ni espaata yoorakama yaakhuma mwaano mwa ole aakilanthi vakhavaloni.+ Nto axipalame ootheene yaahikhuura mirutthu sa atthu awo, khuvona.+

20 Nave kaahiweha nlaikha nikhuruwaka wiirimu, nikunxe ene exaavi ya nlitti noowiixa+ ni ekwirinti yuulupale mmatatani mwaya. 2 Nlaikha nlo naahivara enowa ele yuulupale,+ yeele ya khalai, eyo piiyo, Diabo+ ni Satana.+ Nlaikha nno naahitthukwa enowa eyo mwa iyaakha 1.000. 3 Nlo naahirihela enowa ele mulittini moowiixa,+ nitthukwela memmo, khuhela ekanyeryo vasulu vaya, wiira ehaahapuxe-tho atthu, mpakha omala iyaakha 1.000. Nuuvira iyaakha iyo, ehaana otaphuliwa okathi vakhaani.+

4 Kaahiweha-tho ihice, nto ale yaakilaathenle ihice iyo yaahivahiwa owerya wiira aphukeleke. Kaahaaweha ale yaiviwe* mwaha wa omukhalela onamoona Yesu ni olavula itthu sa Muluku. Kaahaaweha-tho ale yahaakokhorenle enama yoowali aahiiso elatarato ya enama eyo ni yahaaheliwe ekanyeryo vayuuci vaya, nnakhala vantatani vaya.+ Awo anootthikela okhala akumi, wiira yalamuleleke ni Kristu+ ntoko mamwene, iyaakha 1.000. 5 (Atthu akina akhwiiye+ khanitthikela okhala akumi mpakha omala iyaakha 1.000.) Nno ohihimuxiwa woopacerya.+ 6 Ale anrowa opacerya otthikela okhala akumi,+ toohakalala ni toowaarya, okhala wiira okhwa wa nenli+ khonaawerya.+ Awo anrowa okhala anamukuttho+ a Muluku ni a Kristu. Nave anrowa olamulelaka ni Kristu ntoko mamwene, iyaakha 1.000.+

7 Vano, simalaka-ru iyaakha 1.000, Satana onootaphuliwa opuro otthukweliwe awe. 8 Nave, onrowa okhuma wiira aahapuxeke atthu a maloko ari ipantte ixexe sa elapo ya vathi, eyo piiyo, Kooki ni Makooki, wiira aathukumanye wiira yawane ekhotto. Mwaattelo aya, onlikana ni mihaava sa mphareya. 9 Awo yaahimwareela mulaponi mootheene ni yaahirukurerya muttetthe wa ale oororomeleya,* ni yaahirukurerya epooma eniphentiwa ni Muluku. Masi waahikhuma mooro wiirimu, khwaapaha atthu awo.+ 10 Nave Diabo, yoowo aahapuxa atthu awo, aahiriheliwa vantthiyani na mooro ni enxoofere, vaavo-tho vaariheliwe aya enama yoowali+ ni profeta oowootha.+ Awo anrowa ohaaxiwaka,* othana ni ohiyu, mahiku ootheene.

11 Kaahiweha ehice yuulupale yootteela ni kaahinweha Ole aakilanthi veehiceni-vo.+ Elapo ni erimu saahitthyawa ohoolo wawe,+ khuhiphwanyaneya-tho. 12 Kaahaaweha-tho alipa-ookhwa, aalupale ni acikhaani, yeemenle ene ohoolo wa ehice, nave saahihuliwa iroolu. Vano, yaahihuliwa eroolu ekina. Eyo ti eroolu ya okumi.+ Nto, alipa-ookhwa yaahiphukeliwa sitthariheliwaka miteko yaavanre aya, ntoko saalempwale aya murooluni-mmo.+ 13 Ephareya yaahaattikiha atthu yaakhwenle memmo. Okhwa ni Mahiye* yaahaavahererya alipa-ookhwa yaarina aya. Nto khula mmosa aahiphukeliwa sitthariheliwaka miteko saavanre awe.+ 14 Okhwa ni Mahiye* yaahiriheliwa vantthiyani na mooro.+ Ntthiya na mooro,+ ninthoonyerya okhwa wa nenli.+ 15 Nave-tho, ootheene ale masina aya yahaalempwale muliivuruni mwa okumi,+ yaahiriheliwa vantthiyani na mooro.+

21 Nto kaahiweha erimu esya ni elapo esya.+ Erimu ya khalai ni elapo ya khalai saahivira,+ nave ephareya+ khiyaakhanle-tho. 2 Nave-tho, kaahiweha epooma yoowaarya, eyo piiyo, Yerusalemu a Niinaano, okhuruwaka wiirimu, okhumaka wa Muluku.+ Owo aahiiphwaneliha wiira omwaakhele iyawe.+ 3 Nto kaahiiwa nsu noorunya nikhumaka veehiceni, nihimyaka wiira: “Moone! Etenta* ya Muluku eri ni apinaatamu. Nave owo onrowa okhala naawo, nto awo anrowa okhala atthu awe. Vano, Muluku mwaneene, onrowa okhalaka naawo.+ 4 Muluku onoopuputtha maithori aya ootheene,+ khonrowa-tho okhala okhwa,+ nnakhala oriipiwa murima, wala wunla, hata woona owereya.+ Itthu sa khalai soovira”.

5 Nto, Ole aakilanthi veehiceni+ aahihimya wiira: “Moone! Miyo kinnipaka itthu sootheene isya”.+ Aahihimya-tho wiira: “Mulepe, okhala wiira moolumo ala toororomeleya ni teekeekhai”. 6 Nave, aahikileela wiira: “Moolumo ala ahiiraneya! Miyo ka Oopacerya ni Ookiserya.*+ Ole orina ntthona, miyo kinrowa onvaha mahala ene* maasi a opuro oniphattuwa maasi a okumi.+ 7 Ole onrowa oxintta onimwaakhela itthu iya. Nave miyo kinrowa okhala Muluku awe, nto owo onrowa okhala mwanaka. 8 Masi ale oowoova, ale ahinaamini,+ ale oohiloka ni anivara itthu soohiirya, anawiive,+ ale anrupihana voohiloka,*+ anookhwiri, ale anaakokhorela amuluku eethiru ni anawoothe ootheene,+ anrowa oriheliwa vantthiyani nimpatta mooro ni enxoofere.+ Eyo enithoonyerya okhwa wa nenli”.+

9 Nlaikha nimosa wa malaikha ale 7, yaale yaarina mihasa 7 saasareiye ihasara 7 sookiserya,+ naahirwa, nikileela wiira: “Murwe, kiwooniheryeni muthiyana onitheliwa,* eyo piiyo, mwaarawe Mwaapwittipwitthi”.+ 10 Nlaikha nlo naahikikuxa ni owerya wa ikuru soowaarya, nikiroiha mwaako muulupale ni woorakama. Weiwo naahikooniherya epooma yoowaarya, eyo piiyo, Yerusalemu, okhuruwaka wiirimu wa Muluku,+ 11 yoowo aarya ni ovuwa wa Muluku.+ Waarya wawe waalikana ni nluku nootepexa waarya, ntoko nluku nniihaniwa xaspe nnaarya ntoko ekiristaale.*+ 12 Epooma eyo, yaahikhalana exiri yuulupale ni yoorakama ni yaahikhalana mikhora 12. Nave khula mukhora naahikhala nlaikha nimosa. Mikhora iyo, saahilempwa masina a mahimo 12 a Isarayeli. 13 Mpantta onikhuma nsuwa, saahikhala mikhora miraru. Onorti* saahikhala mikhora miraru. Nave osuuli* saahikhala mikhora miraru. Mpantta onikela nsuwa saahikhala mikhora miraru.+ 14 Nave, exiri yaarukurenrye epooma eyo, yaahikhalana maluku 12 vaalisensoni vaya, vaavo vaalempwale aya masina 12 a arummwa 12+ a Mwaapwittipwitthi.

15 Ole aalavula ni miyo aahivarela ekopo ya eweero wiira ophime epooma eyo ni mikhora saya ni exiri aya.+ 16 Epooma eyo, yaahikhalana ipantte ixexe soolikana, erakamelo aya ni ekhuveelo aya yaamulikana. Vano, nlaikha nlo naahiphima epooma eyo ni ekopo, khuphwanya etthu yoowiiraka ikiloomo 2.220.* Orakama waya, okhuveya waya ni orakamela waya osulu, waamulikana. 17 Nlaikha nlo, naahiphima exiri ya epooma eyo, khuphwanya imeeturu 64,* sitthariheliwaka miphimo sa apinaatamu ni miphimo sa malaikha. 18 Exiri eyo yaapakiwe ni nluku nniihaniwa xaspe+ ni epooma eyo yaari ya eweero yooreerexa, ntoko eviituru yoowooneela. 19 Alisenso a exiri ya epooma eyo, yaahireerihiwa ni maluku oowaarya oovirikana: alisenso oopacerya aari a xaspe, a nenli aari a safira, a neeraru aari a kalsetonia, a neexexe aari a esmeralta, 20 a neethanu aari a sartoonika, a neethanu namosa aari a sartio, a neethanu nenli aari a krisoolito, a neethanu neeraru aari a periilio, a neethanu neexexe aari a topaasio, a namuloko aari a krisoopraso, a namuloko namosa aari a xasinto, a namuloko nenli aari a ametista. 21 Nave, mikhora iye 12 saari sa ipeerola* 12. Khula mukhora waapakiwe ni epeerola* emosa. Ephiro yuulupale ya epooma eyo, yaari ya eweero yooreerexa, ntoko eviituru yoowooneela.

22 Miyo nkaawenhe etemplo epooma eyo, okhala wiira Yehova,* Muluku Oowerya Sootheene,+ vamosa ni Mwaapwittipwitthi, tari etemplo ya epooma eyo. 23 Epooma eyo khemphavela omwaleeliwa ni nsuwa, nnakhala ni mweeri, okhala wiira ennimwaleeliwa ni waarya wa Muluku,+ nave Mwaapwittipwitthi tori muthuko aya.+ 24 Maloko anrowa weettaka emwaleeliwaka ni muthuko+ wa epooma eyo. Nave mamwene a mulaponi anooruuha mpooma-mme waarya waya. 25 Mikhora saya khasinikhala-khala siwaliwaka, maana enrowa okhalaka othana paahi. Epooma eyo khenrowa wiilaka.+ 26 Atthu anrowa oruuha mpooma-mme nttittimiho ni ovuwa wa maloko.+ 27 Masi khiivo etthu yoonanara, nnakhala khuuvo mutthu onipaka itthu soohiirya, hata nawoothe khonrowa okela epooma eyo.+ Ale paahi masina aya alempwale murooluni ya okumi ya Mwaapwittipwitthi, tanrowa okela.+

22 Nlaikha naahikooniherya muro wa maasi a okumi,+ woowooneela ntoko ekiristaale,* okhumaka veehiceni ya Muluku ni ya Mwaapwittipwitthi,+ 2 orowaka eriyari ya ephiro yuulupale ya epooma eyo. Ipantte soopiili sa muro owo, saahikhala miri sa okumi, seiyo siima mihokorokho ikwaha 12 khula mwaakha. Khula mweeri, saaniima ekwaha emosa. Makukhu a miri iyo, yaanaapenuxa atthu a maloko ootheene.+

3 Nave, Muluku khonrowa otakhaliha epooma eyo. Masi ehice ya Muluku ni ya Mwaapwittipwitthi+ enrowa okhala epooma eyo ni arumeyi awe anrowa onvarelaka muteko Muluku. 4 Awo anooweha owiitho wa Muluku,+ nave nsina nawe nnoolempwa vayuuci vaya.+ 5 Nave-tho, epooma eyo khenrowa wiilaka+ ni atthu awo khanrowa ophavelaka omwaleeliwa ni muthuko aahiiso ni nsuwa, okhala wiira Yehova* Muluku, tonrowa waamwaleelaka.+ Nave, awo anrowa olamulelaka ntoko mamwene mahiku ootheene.+

6 Nlaikha naahikileela wiira: “Moolumo ala toororomeleya ni teekeekhai.+ Tthiri, Yehova* Muluku, yoowo onilavula aarumeelaka maprofeta,+ ooruma nlaikha nawe wiira niwooniherye arumeyi awe itthu sinrowa wiiraneya voohipisa. 7 Mwiiwe! Miyo kinnoorwa voohipisa.+ Oohakalala tuule oniiwelela moolumo a eprofesia ya eroolu ela”.+

8 Miyo Yohani, kaaniiwa ni kaaniweha itthu iya. Okathi kaiwa aka ni kaaweha aka itthu iya, kaahikhoroma wiira kikokhorele nlaikha nle naakoonihenrye itthu iye. 9 Masi nlaikha nne naahikileela wiira: “Nnaari, muhiire siiso! Miyo ka murumeyi mukhwiinyu paahi ni ka murumeyi a axinninyu, yaawo ari maprofeta ni aniiwelela moolumo a eroolu ela. Tivo, mmukokhoreleke Muluku paahi”.+

10 Nlaikha naahikileela-tho wiira: “Muhivithe moolumo a eprofesia ya eroolu ela, okhala wiira okathi othanliwe ohaattamela. 11 Ole ootakhala murima, nlelo eetteleke otakhala wawe murima. Ole oohiloka, nlelo eetteleke ohiloka wawe. Masi naxariya, nlelo eetteleke exariya, nave ole ooreera vamaithoni va Muluku, nlelo otepeke oreera vamaithoni va Muluku.

12 “‘Mwiiwe! Miyo kinnoorwa voohipisa. Kinrowa omutthuvela khula mutthu kittharihelaka miteko sawe.+ 13 Miyo ka Oopacerya ni Ookiserya,*+ ephattuwelo ni emalelo. 14 Oohakalala taale anikattha malaya aya,+ wiira awerye olya mihokorokho sa miri sa okumi+ ni wiira awerye okela mpooma, aviraka mikhora sa epooma eyo.+ 15 Ota wa epooma eyo, aakhala alapwa,* anookhwiri, ale anrupihana voohiloka,* anawiive, ale anaakokhorela amuluku eethiru, ootheene ale onaasivela wootha ni opakelela itthu soowoothiwa’.+

16 “‘Miyo Yesu, kooruma nlaikha naka wiira nookhaleleni onamoona itthu iya, wiira siphwanyihe mureerelo miloko. Miyo ka mutathaari ni osuulu wa Davidi+ ni ka etheneeri enaarya voosiisu’”.+

17 Nave, ikuru soowaarya ni muthiyana onitheliwa,*+ annithipelela ohimya wiira: “Murwe!” Nto ole oniiwa, ohimyeke wiira: “Murwe!” Nave ole ovoliwe ntthona, orweeke.+ Ole oniphavela, owuryeke maasi a okumi mahala ene.+

18 “Kinnaaleela ootheene ale aniiwa moolumo a eprofesia ya eroolu ela, wiira: Akhala mutthu onrowa wuncererya etthu wa itthu iya silempwale,+ Muluku onrowa omuruuhela ihasara silempwale murooluni-mu.+ 19 Nave, akhala mutthu onrowa okumiha etthu wa moolumo ari murooluni ya eprofesia ela, Muluku khonrowa omweemererya waakhela itthu sooreera sinihimmwa murooluni-mu. Eyo enitaphulela wiira khonrowa omweemererya mutthu owo olya mihokorokho sa miri sa okumi.+ Nave khonrowa omweemererya okela epooma yoowaarya.+

20 “Ole onihimya wiira itthu iya sootheene ti seekeekhai, onniira: ‘Aayo, kinnoorwa voohipisa’”.+

“Amen! Murweeke, Pwiya Yesu”.

21 Oreera murima wuulupale wa Pwiya Yesu, okhale ni ale oororomeleya.*