EPAPHELO YA YUDA

1 Miyo Yuda, murumeyi a Yesu Kristu, masi munnawe Yakobo,+ kinaalepela ale Muluku Tiithi aathanlale awe+ ni onaaphenta awe, wiira yakhale vamosa ni Yesu Kristu:+

2 Muluku owuncereryeni murettele, ophenta ni omoriwa ikharari.

3 Anna oophentiwa, kaaniphavela vanceene woolepelani kooleelakani moota Muluku onrowa awe onoopola.+ Masi vano kinoona wiira kihaana woolepelani wiira kootumereryeni wiilipiha owanela waamini wanyu,+ ovahiwe ale oororomeleya,* ekwaha emosa paahi. 4 Nthowa nene tinla: Aakhala atthu akenle mmulokoni. Awo khanimuttittimiha Muluku ni anitthara mweettelo woohiloka onooniherya ohuuliwa muru,*+ yoothereryaka oreera murima wuulupale wa Muluku. Nave annimukhootta Pwiya ahu mmosa onithumme, Yesu Kristu.+ Soolempwa saahihimya wiira atthu siisa anrowa ophukeliwa.

5 Nnaamwi musuwelaka oratteene itthu iya sootheene, nto kimphavela owuupuxeryani wiira, nuumala Yehova* owoopola atthu awe wExiitu,+ aahaapwetexa ale yahoonihenrye waamini.+ 6 Nave, malaikha yahaathokorenrye okhulupale aya, khuhiya opuro aya,+ Muluku ootthukwa mweepiphini mooriipela ni mikhoyi sihintaphuliwa-tho, asukeryaka nihiku nuulupale anrowa aya ophukeliwa.+ 7 Vamosa-ru, atthu a oSodoma ni a oGomora ni a mittetthe saattamenle weiwo, yaahiivahererya wiira arupihaneke woohiloka* ni yiireke itthu soohikhala sa ephattu, seiyo siniphavela aya erutthu aya.+ Atthu awo ari ntoko ntakiheryo ninnilopola. Nto anrowa ohukhummwa ni mooro ohinimala.+

8 Hata vari siiso, atthu awo animakela wuupuwela itthu sootakhala,* onanariha erutthu aya, ohaattittimiha makhulupale ni waaruwana ale oowaarya.+ 9 Masi okathi nlaikha nuulupale+ Mikhayeli+ naavaanyihana aya ni Diabo, awanelaka murutthu wa Moise,+ khinaaphavenle omphukela Diabo owo ni moolumo ooruwana.+ Ohiya-vo, naahimmye so: “Yehova* oohukhumuni”.+ 10 Vano, atthu awo anniveeha itthu ahinsuwela aya saana.+ Nto itthu sootheene anisuwela aya, awo annipaka ntoko inama+ sihinuupuwela ni annitepa wiinanariha.

11 Aatakhaliwa awo, okhala wiira aatthara ephiro ya Kayini+ ni aatthimakela ephiro yoohiloka ya Balaamu+ wiira aphwanye etthuvo. Nave aapweteya mwaha wa otthara miruku sootakhala+ sa Kora!+ 12 Awo ari ntoko myala siri mmaasini, okathi anilya aya ifesta saya sa ophentana+ vamosa ni nyuwo. Awo ti amakampusi anilya ahoovaka etthu.+ Anlikana ni meeku ahirina maasi anikuxiwa ni epheyo.+ Nave ari ntoko miri sihiniima mihokorokho okathi aya, seiyo sikhwiiye vanli* ni sipheliwe. 13 Awo ari ntoko mawimpi a mphareya anikumiha nipheru na itthu saya soonanara.+ Anilikana ni itheneeri sirimeeliwe ephiro aya. Awo aasukeriwa epiphi yooriipela ehinimala.+

14 Enooki,+ muhavinre* a neethanu nenli okhuma opattuxiwe awe Adamu, aahilavula-tho khalai ene aahimyaka atthu awo, oriki: “Moone! Yehova* ohoorwa ni malaikha awe ahinkontareya,+ 15 wiira aaphukele atthu ootheene+ ni aalamule atthu ootheene ootakhala murima, mwaha wa itthu sootheene sootakhala yiirale aya ahimwiiwelelaka Muluku ni itthu soohiirya* anatampi yaalavunle aya anveehaka yoowo”.+

16 Atthu ala toowaapa,+ anninlaseya mwaha wa makhalelo aya, annitthara itthu soonanara aniphavela aya,+ annilavula yiixinnuwihaka. Nave anniweepesa atthu,* aphavelaka mureerelo aya.+

17 Nto nyuwo, anna oophentiwa, muupuweleke itthu saahimmwale khalai ene ni arummwa a Pwiya ahu Yesu Kristu. 18 Awo yaanihimya wiira: “Mahiku ookiserya anookhumelela atthu anaanyohola akhwaaya, yeettelaka makhalelo aya ootakhala”.+ 19 Awo annikumiherya ohiiwanana,+ anikhala ntoko inama ni kharina ikuru soowaarya sa Muluku. 20 Masi nyuwo, anna oophentiwa, mulipihe waamini wanyu wootepa waarya, nvekelaka ni owerya wa ikuru soowaarya,+ 21 wiira mutepeke ophentiwa ni Muluku,+ mulipelelaka omoreliwa ikharari ni Pwiya ahu Yesu Kristu, wiira mphwanye okumi woohimala.+ 22 Nave, muhihiye waamorela ikharari+ ale anihoverya.+ 23 Nwoopole+ nwaakihaka wiira ahiiviwe.* Masi mwaamoreleke ikharari akina, mwiipasoopaka, musyakaka malaya aya ananarihiwe ni itthu sootakhala anivara aya.+

24 Vano Muluku oniwerya owaakihani wiira muhimore ni wookhaliheryani wiira mweemele ohoolo wawe woowaarya, muhirina etampi,+ musareyale ene ohakalala, 25 Muluku mmosa-ru yoowo, Moopoli ahu, mwa Yesu Kristu Pwiya ahu, okhalane ovuwa, wunnuwa, owerya ni okhulupale, okhuma khalai mpakha vano, orowa mahiku ootheene. Amen.