EPAPHELO YA NENLI YA YOHANI

1 Kinoolepelani ti miyo, mutokweene anyu,* koolepelakani nyuwo, muthiyana othanliwe ni Muluku, vamosa ni aniinyu. Kinnoophentani ni murima wootheene, ohiya miyo paahi, masi atthu ootheene ansuwela ekeekhai, annoophentani-tho. 2 Hiyo ninnoophentani mwaha wa ekeekhai eri vamurimani vahu ni enrowa okhalaka ni hiyo mahiku ootheene. 3 Muluku, Tiithi ihu a wiirimu, vamosa ni Yesu Kristu, Mwanawe, anoonivaha ophenta ni soowiixuttiha iyo sa ekeekhai. Awosa anrowa onooniherya oreera murima wuulupale, onimorela ikharari ni onivaha murettele.

4 Kootteeliwa murima waaphwanya aniinyu akina yeettelaka ekeekhai,+ ntoko nirummwale ahu ni Tiithi. 5 Vano, kinoolepelani nyuwo, muthiyana, koovekelakani wiira mphentaneke mukina ni mukhwaawe. Yooruma ela khahiyo esya, masi ti yeele naakhenle ahu okhuma woopaceryani.+ 6 Nave ophenta onitaphulela ohihiya weettela sooruma sa Tiithi.+ Yooruma ene, yeeyo munisuwela anyu okhuma woopaceryani, tiila: Mweetteke moophentani. 7 Tthiri aakhumelela mulaponi anawoothe anceene,+ yaawo ahinikupali wiira Yesu Kristu aahirwa ntoko mutthu.+ Nto ole onipaka eyo, nawoothe ni nwanani a Kristu.+

8 Tivo, mwiipasoopeke wiira muhipwetexe miteko sahu, seiyo nivanre ahu ni wiilipiha. Ohiya-vo, mphwanye otthuveliwa woomalela.+ 9 Ole ohinitthara soowiixuttiha sa Kristu, onaixuttiha itthu sikina, khoneemereriwa ni Muluku.+ Ole ohinihiya otthara soowiixuttiha sa Kristu, onneemereriwa ni Tiithi ni Mwaana.+ 10 Akhala mutthu onrwa okumana ni nyuwo, ohinaixuttiha itthu sinivarihana ni ele Kristu iixuttihale awe, muhimwaakhele vatthokoni vanyu,+ nnakhala omukoha ihaali. 11 Okhala wiira ole onimukoha ihaali, onnikhaliherya miteko sawe sootakhala.

12 Kaahikhalana itthu sinceene soowoolepelani, masi nkiniphavela woolepelani mpapheloni-mu ni etinta. Kinnilipelela orwa weiwo, kilavule ni nyuwo niitho-nniitho, wiira otteeliwa wanyu murima okhale woomalela.

13 Anamwane a murokorinyu oothanliwa, annookhomasani.