EPAPHELO YOOPACERYA YA YOHANI

1 Ninnoolepelani nimuhimyaka ole okhanle okhuma woopaceryani, yoowo oniruuha masu anivaha okumi,+ yoowo nimwiiwale ahu, nimoonale ahu ni maitho ahu ni ninvanre ahu ni matata ahu. 2 (Tthiri, hiyo nihooniheriwa okumi woohimala, nooweha, noovaha onamoona+ ni nihoolaleeryani okumi owo. Okumi owo woohimala,+ onikhuma wa Tiithi, nave hiyo nihooniheriwa.) 3 Ele noonale ahu ni wiiwa, ninnooleelani nyuwo,+ wiira nyuwo-tho mwaataane* ni hiyo. Nave waataana wahu nno ti weiwo onniiriha waataana ni Atiithi vamosa ni Mwanaya, Yesu Kristu.+ 4 Vano, hiyo ninnoolepelani itthu iya, wiira otteeliwa wahu murima omalele.

5 Ehapari emwiiwale ahu ni enooleelaahuni tiila: Muluku ti waarya,+ nave owo khorina epiphi nnakhala vakhaani. 6 Naahimyaka wiira: “Hiyo nihaataana ni Muluku”, nto okathi omosa-ru nneetta mweepiphini, hiyo nnimootha ni khanneettela ekeekhai.+ 7 Masi, neettaka moowaaryani ntoko Muluku ori awe moowaaryani, hiyo ninnaataana mukina ni mukhwaawe, vano ephome ya Yesu, Mwaana a Muluku, ennittipiha itampi sahu sootheene.+

8 Naahimyaka wiira: “Hiyo khanrina etampi”, nnimwiiwoka,+ nto ekeekhai khekhanle ni hiyo. 9 Nahimya itampi sahu, Muluku ononlevelela ni onoottipiha sootakhala sootheene, okhala wiira owo toororomeleya ni a xariya.+ 10 Naahimyaka wiira: “Hiyo khanitthenke”, onlikana ni ohimya wiira Muluku nawoothe, nave khaninkupali moolumo awe.

2 Anaaka oophentiwa, kinoolepelani itthu iya wiira muhipake etampi. Masi, akhala mutthu onipaka etampi, nookhalana namakhaliherya* Yesu Kristu,+ naxariya, yoowo ori ni Tiithi.+ 2 Yesu tori mukuttho+ oniliverya itampi sahu,+ wiira onaataanihe-tho ni Muluku. Ohiya paahi itampi sahu, masi-tho itampi sa atthu a olumwenku wootheene.+ 3 Naahihiye wiiwelela sooruma sa Yesu,* vanimooneyaka wiira ninnimusuwela owo. 4 Ole onihimya wiira: “Miyo kinnimusuwela owo”, masi ohinatthara sooruma sawe, mutthu owo nawoothe ni khorina ekeekhai. 5 Vano mutthu oneettela nuulumo na Kristu, onnooniherya wiira onnimphenta Muluku ni murima wootheene.+ Nave-tho niira siiso, nnimooniherya wiira nihiiraana nuuwo.+ 6 Ole onihimya wiira onikhala oowiiraana nuuwo, ohaana weetta ntoko Yesu eetta awe.+

7 Anna oophentiwa, khahiyo kinoovahani yooruma esya, masi kinihimya yooruma ya khalai, yeeyo musuwenle anyu okhuma khalai.+ Yooruma eyo ya khalai, ti nuulumo naiwale anyu. 8 Nto yooruma kinihimya aka ti ya niinaano, yeeyo Yesu otthanre awe ni nyuwo-tho munitthara anyu. Tthiri epiphi yoovira ni wookhumelela waarya weekeekhai.+

9 Ole onihimya wiira ori moowaaryani, masi onamunyokha+ munnawe, mutthu owo nlelo ori mweepiphini.+ 10 Ole onimphenta munnawe, onnikhala moowaaryani,+ nto khiivo etthu enrowa omukwattuliha. 11 Masi ole onimunyokha munnawe, mutthu owo ori mweepiphini+ ni oneetta mweepiphini, nave-tho khonisuwela onrowa awe,+ maana epiphi yoomuriipiha owiitho wawe.*

12 Anaaka oophentiwa, kinoolepelani okhala wiira itampi sanyu sooleveleliwa, mwaha wa nsina na Yesu.+ 13 Kinoolepelani nyuwo axipaapa, maana moomusuwela ole onikhala okhuma woopaceryani. Kinoolepelani nyuwo amiravo, okhala wiira monwerya Mutakhali.+ Kinoolepelani nyuwo anaaka oophentiwa, maana munnimusuwela Tiithi.+ 14 Kinoolepelani nyuwo axipaapa, maana moomusuwela ole onikhala okhuma woopaceryani. Kinoolepelani nyuwo amiravo, okhala wiira mookhalana ikuru,+ nave nuulumo na Muluku nri mwa nyuwo.+ Nyuwo monwerya Mutakhali.+

15 Muhiphenteke olumwenku ni itthu sa olumwenku.+ Akhala mutthu oniphenta olumwenku, ophenta wa Tiithi khokhanle nuuwo.+ 16 Tthiri, itthu sootheene siri moolumwenkuni, eyo piiyo, itthu erutthu ahu siniphavela aya,+ ophavela sootheene sinoona ahu+ ni ophavela wooniherya itthu mutthu orina awe,* khasinikhuma wa Tiithi, masi sinikhuma moolumwenkuni. 17 Nave-tho, olumwenku ola onoomala vamosa ni itthu sootheene siri moolumwenkuni atthu aniphavela aya.+ Masi ole oneettela ele Muluku oniphavela awe, onookhala mahiku ootheene.+

18 Anaaka oophentiwa, ola okathi wookiserya, ntoko mwiiwale anyu wiira nwanani a Kristu onnoorwa.+ Nto vano aakhumelela awanani a Kristu anceene.+ Tthiri, hiyo noosuwela wiira ola okathi wookiserya. 19 Awo akhumme eriyari ahu, masi khahiyo yaari awihu,+ maana vaakhanle wiira tawihu, yaamukhala ni hiyo. Masi awo aakhuma wiira vasuwanyeye wiira khahiyo wiira atthu ootheene tawihu.+ 20 Nto nyuwo moothanliwa* ni Muluku oowaarya,+ nave ootheene anyu moosuwela ekeekhai. 21 Kinoolepelani mwaha woowi moosuwela ekeekhai, ohiya mwaha woohisuwela.+ Nave moosuwela wiira wootha khonikhuma mweekeekhaini.+

22 Ti pani ori nawoothe? Niireke khahiyo yoole onikhootta wiira Yesu ti Kristu?+ Owo ti nwanani a Kristu,+ yoowo onimukhootta Tiithi ni Mwaana. 23 Ole onimukhootta Mwaana, khahiyo murumeyi a Muluku.+ Masi ole onimutthara Mwaana,+ ti murumeyi a Muluku.+ 24 Nto etthu mwiiwale anyu okhuma woopaceryani, ehaana okhala vamurimani vanyu.+ Akhala wiira ele yiiwale anyu okhuma woopaceryani eri vamurimani vanyu, weeso munimwiiraana ni Mwaana vamosa ni Tiithi. 25 Nave-tho, etthu onileihenrye awe tiila: Okumi woohimala.+

26 Kinoolepelani itthu iya, mwaha wa atthu ale aniphavela woohapuxani. 27 Nto okhala wiira moothanliwa* ni Muluku orumeelaka ikuru sawe soowaarya,+ nlelo mookhalana ikuru iyo. Tivo, muhiphaveleke wiixuttihiwa ni khula mutthu.+ Masi owerya wa ikuru iyo ti weekeekhai, khonootha ni onniwiixuttihani. Vano okhala wiira soowiixuttihani, mukhaleke oowiiraana ni ikuru iyo.+ 28 Tivonto, anaaka oophentiwa, mwiiraaneke vamosa nuuwo, wiira okathi onrowa awe wooniheriwa, niweryeke olavula nihoovaka etthu,+ wiira nihimutthyawe mwaha wa wuuliwa muru, okathi onitthika* awe. 29 Mwaasuwelaka wiira Yesu* naxariya, munnisuwela-tho wiira khula mutthu onipaka itthu sa xariya okhumme wa Muluku.+

3 Mooneke ophenta wuulupale Muluku, Tiithi, onoonihenrye awe,+ okhala wiira ooneemererya wiihaniwa okhala anaawe!+ Tthiri na anamwane a Muluku. Tivo, atthu a vathi-va khannisuwela,+ okhala wiira khamusuwenle Muluku.+ 2 Annaka oophentiwa, vano na anamwane a Muluku,+ masi nlelo khiyooniheriwe ele ninrowa ahu okhala muhoolo.+ Ninnisuwela wiira owo aixooniherya, ninrowa olikanaka nuuwo, maana ninrowa omoona ntoko siri awe. 3 Ootheene ale animulipelela yoowo, anniikhaliha oowaarya,+ ntoko owo ori awe oowaarya.

4 Ootheene ale animakela opaka etampi, annitthekela-tho nlamulo, nave etampi, enitaphulela otthekela nlamulo. 5 Nyuwo moosuwela-tho wiira Yesu ohooniheriwa wiira okumihe itampi sahu,+ tthiri owo khorina etampi. 6 Ootheene ale anikhala oowiiraana ni Yesu, khanimakela opaka etampi.+ Ole onimakela opaka etampi, khonimoona nnakhala khonimusuwela Yesu. 7 Anaaka oophentiwa, muhimuhiye mutthu oohapuxakani. Ole oneettela exariya, naxariya, ntoko Yesu ori awe naxariya. 8 Ole onimakela opaka etampi, onikhuma wa Diabo, okhala wiira Diabo owo, onimakela opaka etampi okhuma woopaceryani.*+ Tivo, Mwaana a Muluku ohoorwa wiira opwetexe* miteko sa Diabo.+

9 Ole ori mwaana a Muluku, khonimakela opaka etampi,+ mwaha woowi epyo* ya Muluku enikhala mwa yoowo ni khonimakela ottheka, maana owo mwaana a Muluku.+ 10 Etthu enaasuwanyeiha anamwane a Muluku ni anamwane a Diabo tiila: Ole ohineettela exariya ni ole ohinimphenta munnawe, khonikhuma wa Muluku.+ 11 Veekeekhai, ehapari yiiwale anyu okhuma woopaceryani tiila: nihaana ophentana.+ 12 Nihikhaleke ntoko Kayini yoowo aakhumme wa Mutakhali ni aamwiivale muhima awe.+ Xeeni ohalaka omwiiva? Mwaha woowi miteko sawe saari sootakhala.+ Masi miteko sa muhima awe saari sa xariya.+

13 Annaka, muhitikinihiweke atthu a vathi-va yoonyokhakani.+ 14 Hiyo naahikhwa, masi vano naakumi,+ maana ninnaaphenta axinna.+ Ole ohinaaphenta axinna, nlelo onikhala mookhwaani.+ 15 Mutthu onimunyokha munnawe, ti nawiive.+ Nave moosuwela wiira khuuvo nawiive onrowa waakhela okumi woohimala.+ 16 Hiyo noosuwela ophenta, okhala wiira Yesu Kristu oonikhwela.*+ Tivo, ni hiyo-tho nihaana oleva okumi ahu mwaha wa axinnihu.+ 17 Akhala wiira mutthu ookhalana mireerelo sa olumwenku ola, nto onamoona munnawe ohirina etthu, masi ohinamoonela othunku, oniwerya sai omphenta Muluku?+ 18 Anaaka oophentiwa, ophenta wanyu ohikhaleke ni moolumo paahi,+ masi ohaana wooneya ni miteko+ ni okhaleke weekeekhai.+

19 Ti siiso ninrowa ahu osuwela wiira ninneettela ekeekhai ni nnoosuwelexa vamurimani vahu wiira Muluku onniniphenta. 20 Nnaamwi ikwaha sikina mirima sahu siniphukelaka, nihiliyaleke wiira Muluku ti muulupalexa ovikana mirima sahu, ni onnisuwela itthu sootheene.+ 21 Annaka oophentiwa, akhala wiira mirima sahu khasinniphukela, weeso nnoowerya olavula nihoovaka etthu ohoolo wa Muluku.+ 22 Vano khula etthu eninvekela ahu, onoonivaha,+ okhala wiira ninneettela sooruma sawe, nave ninnipaka itthu sinimusivela. 23 Etthu onniruma awe Muluku tiila: Naaminiki nsina na Yesu Kristu, yoowo ori Mwanawe+ ni wiira niphentaneke+ ntoko owo* onirumale awe. 24 Nto, ole oneettela sooruma sa Muluku, onniiraana ni Muluku, vano Muluku onniiraana ni mutthu owo.+ Nave ikuru soowaarya onivahale awe, onniniiriha osuwela wiira owo ohiiraana ni hiyo.+

4 Annaka oophentiwa, muhikupaliki khula moolumo anikhala ntoko anikhuma wa Muluku,+ masi mutokoseke moolumo awo wiira moone tthiri yaakhumaka wa Muluku,+ maana maprofeta manceene oowootha ahuulaana mulaponi.+

2 Nyuwo munoosuwela wiira moolumo awo anikhuma wa Muluku, vakhala wiira annihimya wiira Yesu Kristu aahirwa mulaponi khukhala pinaatamu.+ 3 Masi vakhala wiira moolumo awo annimukhootta Yesu, weeso khanikhuma wa Muluku.+ Ohiya-vo, nyuwo muhiiwa wiira moolumo awo yaamukhumelela ni aakumiheriwa tthiri ni nwanani a Kristu,+ nto vano aamwareela mulaponi.+

4 Anaaka oophentiwa, nyuwo munikhuma wa Muluku ni muhaawerya maprofeta oowootha,+ okhala wiira Muluku onnookhaliheryani.+ Nave, owo tooweryexa onvikana Diabo. Diabo owo tonikhaliherya olumwenku ola.+ 5 Maprofeta awo oowootha, anikhuma olumwenku yoola.+ Nto annilavula itthu sinivarihana ni olumwenku ola. Tivonto olumwenku ola onaawiriyana aya.+ 6 Hiyo na atthu a Muluku. Ole onikhuma wa Muluku, onniniwiriyana hiyo.+ Masi ole ohinikhuma wa Muluku, khonniwiriyana.+ Eyo enninikhaliherya osuwela ohiyaniha moolumo eekeekhai ni moolumo oowootha.+

7 Annaka oophentiwa, nihihiye ophentana,+ okhala wiira ophenta onikhuma wa Muluku. Nave ole oniphenta, ti mwaana a Muluku ni onnimusuwela Muluku.+ 8 Ole ohinimphenta mukhwaawe, khonimusuwela Muluku, okhala wiira Muluku ti ophenta.+ 9 Moota Muluku oonihenrye awe oniphenta wawe ti nno: Owo oomuruma Mwanawe mmoseene+ orwa vathi-va, wiira niphwanye okumi mwaha wa yoowo.+ 10 Vano ophenta ti nno: Khahiyo wiira hiyo nimphentale Muluku, masi Muluku toniphentale, khimuruma Mwanawe ntoko mukuttho+ oniliverya itampi sahu, wiira onaataanihe-tho ni Muluku.+

11 Annaka oophentiwa, okhala wiira Muluku ooniphenta siisa, nto hiyo nihaana ophentana mukina ni mukhwaawe.+ 12 Khuuvo mutthu otonko onweha Muluku.+ Naahihiye ophentana, Muluku nlelo ori ni hiyo, nave ophenta wawe onikhala woomalela eriyari ahu.+ 13 Nto eyo tennisuweliha wiira nihiiraana ni Muluku ni wiira Muluku ohiiraana ni hiyo, maana oonivaha ikuru sawe. 14 Ohiya-vo, hiyo nihoona mmansihu, nave ninnikhalela onamoona wiira Tiithi oomuruma Mwanawe, wiira okhale moopoli a olumwenku.+ 15 Ole onikupali wiira Yesu ti Mwaana a Muluku,+ onniiraana ni Muluku, nave Muluku onniiraana ni mutthu owo.+ 16 Nave, hiyo ninnisuwela ni okupali wiira Muluku onniniphenta.+

Muluku ti ophenta,+ nto ole ohinihiya ophenta, onniiraana ni Muluku, nave Muluku onniiraana ni mutthu owo.+ 17 Siiso, ophenta onookhala woomalela eriyari ahu, wiira niweryeke olavula nihoovaka etthu*+ nihiku noophukela, okhala wiira makhalelo ahu vathi-va, anlikana ni makhalelo a Kristu. 18 Ole oniphenta khonoova,+ okhala wiira ophenta woomalela onnoomola woova. Tthiri woova onnimutthukwa mutthu. Mweekeekhai, ole onoova, ophenta wawe khomalenle.+ 19 Hiyo ninniphenta, okhala wiira Muluku topacenrye oniphenta.+

20 Akhala mutthu onihimya wiira: “Miyo kinnimphenta Muluku”, masi onamunyokha munnawe, mutthu owo nawoothe.+ Tthiri ole ohinimphenta munnawe,+ onimoona awe, khoniwerya omphenta Muluku, ohinimoona awe.+ 21 Tivo, yooruma onivahale awe tiila: Ole onimphenta Muluku, nave ohaana omphenta munnawe.+

5 Ootheene ale anikupali wiira Yesu ti Kristu, anamwane a Muluku.+ Nave ootheene ale animphenta Muluku, annaaphenta anamwane a Muluku. 2 Etthu ennisuweliha wiira ninnaaphenta anamwane a Muluku,+ tiila: Omphenta Muluku ni weettela sooruma sawe. 3 Omphenta Muluku onitaphulela weettela sooruma sawe.+ Tthiri sooruma sawe khasinvila weettela.+ 4 Ootheene ale ari anamwane a Muluku, annixintta olumwenku.+ Ninnixintta olumwenku mwaha wa waamini wahu.+

5 Ti pani oniwerya oxintta olumwenku?+ Kiira tuule onaamini wiira Yesu ti Mwaana a Muluku?+ 6 Yesu Kristu aahirwa ni maasi ni ephome. Owo khaarwiiye ni maasi paahi,+ aarwiiye ni maasi ni ephome.+ Nave ikuru soowaarya sinivaha onamoona,+ maana ikuru iyo tisikhanle ekeekhai. 7 Sihaavo itthu tthaaru sinooniherya wiira Yesu ti Mwaana a Muluku: 8 Ikuru,+ maasi+ ni ephome,+ nto onamoona wa itthu iya tthaaru, onnivarihana.

9 Akhala wiira ninkupali onamoona wa atthu, nto nihaana okupali onamoona wa Muluku, maana onamoona owo ti wuulupalexa. Muluku onnihimya wiira Yesu ti Mwanawe. 10 Mutthu onimwaamini Mwaana a Muluku, onnooniherya wiira ookhalana vamurimani vawe etthu Muluku omwiixuttihale awe. Mutthu ohinimwaamini Muluku, onnimuhimya okhala nawoothe,+ maana khonaamini onamoona Muluku omukhalenle awe Mwanawe. 11 Onamoona Muluku ovahale awe tuula: Muluku oonivaha okumi woohimala,+ nto okumi ola onikhuma wa Mwanawe.+ 12 Ole onimweemererya Mwaana, ookhalana okumi ola. Ole onimukhootta Mwaana, khorina okumi ola.+

13 Kinoolepelani itthu iya, kiphavelaka woosuwelihani wiira nyuwo munaamini nsina na Mwaana a Muluku,+ mookhalana okumi woohimala.+ 14 Hiyo ninniroromela* wiira Muluku onooniwiriyana wa khula etthu eninvekela ahu,+ enivarihana ni ele oniphavela awe.+ 15 Naasuwelaka wiira owo onniniwiriyana wa khula etthu eninvekela ahu, noosuwela wiira nnookhalana itthu sininvekela ahu, okhala wiira itthu iyo nninvekela yoowo.+

16 Mwanweha munninyu opakaka etampi ehinroiha wookhwaani, munvekelele. Nto Muluku ononvaha okumi mutthu owo,+ aayo, onimwaavaha okumi atthu yaale ahinipaka etampi eniroiha wookhwaani. Yookhala etampi eniroiha wookhwaani.+ Nto nkinihimya wiira munvekeleke Muluku mwaha wa etampi eyo. 17 Khula etthu yootakhala ti etampi,+ masi, yookhala etampi ehinroiha wookhwaani.

18 Noosuwela wiira ole ori mwaana a Muluku, khonimakela opaka etampi, maana Mwaana a Muluku,* onnimukhapelela. Vano Mutakhali khoniwerya omwiiriha etthu yootakhala.*+ 19 Hiyo noosuwela wiira na atthu a Muluku, masi olumwenku wootheene oneettihiwa ni Mutakhali.+ 20 Nave, noosuwela wiira Mwaana a Muluku ohoorwa,+ khunivaha ankhili wiira nimusuweleke Muluku eekeekhai.+ Vano hiyo nihiiraana ni Muluku, mwaha wa Yesu Kristu, Mwanawe. Muluku owo ti Muluku eekeekhai, ni okumi woohimala.+ 21 Anaaka oophentiwa, mwaatthyaweke amuluku eethiru.*+