MALAKIYA

1 Moolumo a Muluku:

Moolumo Yehova aaroihenle awe aisarayeli omurumeelaka Malakiya,* taala:

2 Yehova onihimya wiira: “Miyo kihooniherya wiira kinnoophentani”.+

Masi, nyuwo munihimya wiira: “Moonihenrye sai oniphenta?”

Yehova onihimya wiira: “Kiira Esawu munnawe Yakobe?+ Masi, miyo komphenta Yakobe, 3 ni koomunyokha Esawu.+ Kihiiriha miyaako sawe ohikhaliwa,+ nave kihaavaha alapwa a woothakoni etthu yaahiyeriwe awe”.+

4 “Edomi onihimya wiira: ‘Noopwetexiwa, masi nnootthika ni nnooteka mapuro apwexakasiwe’. Masi etthu onihimya awe Yehova a anakhotto, tiila: ‘Awo anooteka, masi miyo kinoopwexa, nave awo anrowa wiireliwaka “muttetthe wa otakhala” ni atthu Yehova aalamunle awe mahiku ootheene”.+ 5 Maitho anyu animoona eyo, nto munoohimya wiira: “Yehova ovuwihiwe muttetthe wa wIsarayeli”’”.

6 “‘Mwaana onnimuttittimiha paapa awe,+ nave murumeyi onnimuttittimiha pwiyawe. Masi akhala wiira miyo ka paapa,+ xeeni ohikittittimihaka?+ Nave akhala wiira miyo ka pwiya,* xeeni muhinikittittimiha anyu?’ Yehova a anakhotto tonookohani nyuwo anamukuttho munithanya nsina nawe.+

“‘Masi, nyuwo munikoha wiira: “Ninthanya sai nsina nanyu?”’

7 “‘Mwaha woovaha yoolya yoohiloka valtaari vaka’.

“‘Nave munnikoha wiira: “Nookhalinheni sai oohiloka?”’

“‘Mwaha woohimya wiira: “Meesa a Yehova+ toohiloka”. 8 Okathi munivaha anyu enama ehinoona ntoko mukuttho, munnihimya wiira: “Enama ela khiyiirale etthu”. Nave okathi munivaha anyu enama enituthunya aahiiso eniwereiwa, munnihimya so: “Enama ela khiyiirale etthu”’”.+

“Xontte, mweererye onvaha inama iyo kuvernatoro anyu. Niireke owo onoosiveliwa ni nyuwo, aahiiso onoowaakhelani saana?” onihimya Yehova a anakhotto.

9 “Vano, xontte, mmuxonttele Muluku wiira ooreereleni murima. Niireke owo onoowaakhelani mooreerela murima, munvahaka soovaha siiso?” onihimya Yehova a anakhotto.

10 “Ti pani a nyuwo oniphavela owala mikhora?*+ Nyuwo khamunipattiha mithuko valtaari vaka muhiliviwe.+ Miyo nkinihakalala ni nyuwo”, onihimya Yehova a anakhotto, “nave nkinisiveliwa ni itthu munivaha anyu”.+

11 “Okhuma mpantta onikhuma nsuwa mpakha mpantta onikela nsuwa, nsina naka ninrowa okhala nuulupale eriyari ya maloko.+ Mapuro ootheene, sinrowa opahiwaka mikuttho ni ovahiwa itthu ni nsina naka, ntoko soovaha sooloka, okhala wiira nsina naka ninrowa okhala nuulupale eriyari ya maloko”,+ onihimya Yehova a anakhotto.

12 “Masi nyuwo munniveeha* nsina naka,+ muhimyaka wiira: ‘Meesa a Yehova toohiloka, nave mihokorokho saya, yoolya aya, khasirina efaita’.+ 13 Nave-tho nyuwo munnihimya wiira: ‘Hiyo noovela ni itthu iya!’ Nave munnithanya itthu iyo”, onihimya Yehova a anakhotto. Munniruuha inama soowiiyiwa, sinituthunya ni siniwereiwa. Aayo, munniruuha itthu iyo ntoko soovaha! Niireke kihaana waakhela itthu iyo munivaha anyu?”+ onihimya Yehova.

14 “Ootakhaliwa ole ori mulavilavi, orina enama yoolopwana yooloka munikotoni mwawe, masi onammanela natiri ni onanvaha mukuttho Yehova enama yoohiloka. Tthiri, miyo ka mwene muulupale”,+ onihimya Yehova a anakhotto, “nave maloko animoova mwaha wa nsina naka”.+

2 “Vano, nyuwo anamukuttho, yooruma ela ti yaawinyu.+ 2 Mwakhootta owiriyana ni weemererya vamurimani vanyu ovuwiha nsina naka”, onihimya Yehova a anakhotto, “kinimootakhalihani,+ nave kinimwiiriha mareeliho anyu okhala otakhaliwa.+ Aayo, kihiiriha mareeliho okhala otakhaliwa, okhala wiira khamweemerenrye vamurimani vanyu”.

3 Moone! Mwaha wa nyuwo,+ kinoohonona epyo yaaliwe, nave kinimoorihelani owiitho wanyu mavi a inama munivaha anyu mikuttho okathi wa ifesta sanyu. Nto nyuwo munooroihiwa weiwo.* 4 Vano nyuwo munoosuwela wiira kihoovahani yooruma ela wiira nivarihano kipanke aka ni Levi nivariheliweke muteko”,+ onihimya Yehova a anakhotto.

5 Nivarihano kaapanke aka nuuwo naari nivarihano na okumi ni na murettele, seiyo kanvanhe aka wiira okittittimiheke. Tthiri, owo aanikittittimiha ni aanittittimiha nsina naka. 6 Owo aahiixuttiha nlamulo neekeekhai* ni khaatonko olavula+ moolumo ootakhala. Owo aaneetta ni miyo ni murettele ni voororomeleya,+ nave aahiwiiriha atthu anceene okhootta opaka etampi. 7 Tthiri namukuttho ohaana okhalana osuwela mwaano mwawe,+ nave atthu aroweke wa yoowo wiira yiixuttihiwe nlamulo,* okhala wiira owo namitthaka a Yehova a anakhotto.

8 “Masi nyuwo moohiya otthara ephiro. Moowiiriha atthu anceene ohiya weettela nlamulo.*+ Nyuwo moohonona nivarihano na Levi”,+ onihimya Yehova a anakhotto. 9 “Miyo kinoowiirihani othanyiwa ni wuuliwa muro ohoolo wa atthu ootheene, okhala wiira khamweettenle iphiro saka, nave khamweettenle nlamulo ni exariya.+

10 “Kiira ootheene ahu nirina paapa mmosa-ru?+ Kiira nipattuxiwe ni Muluku mmosa-ru? Nto xeeni nihinroromeleya ahu mukina ni mukhwaawe,+ niveehaka nivarihano na amuhavinre ahu? 11 Yuda khonimwiiwelela Muluku, nave oopaka etthu yoohiirya wIsarayeli ni oYerusalemu. Tthiri Yuda ooveeha waarya wa Yehova,+ weiwo Muluku oniphenta awe, nave oomuthela muthiyana onaakokhorela amuluku eethiru.+ 12 Yehova onommala-maliha mutentani* mwa Yakobe khula mutthu onipaka eyo, eyo piiyo, atthu ootheene,* hata mutthu owo onvahaka etthu Yehova a anakhotto”.+

13 “Nave yookhala etthu ekina munipaka anyu, yeeyo eniwiiriha altaari a Yehova osareya maithori, wunla ni wiikhupanyerya, mpakha owo ohinawerya oweha yoovaha anyu, nnakhala ohineemererya khula etthu muninvaha anyu.+ 14 Nyuwo munnikoha wiira: ‘Mwaha wa xeeni?’ Mwaha woowi Yehova ohookhalelani onamoona nyuwo ni mwaarinyu mmuthenle anyu okathi mwaari anyu mmiravo, yoowo muhimoonihenrye anyu ororomeleya, nnaamwi aari mpatthani anyu ni mwaarinyu mwaha wa nivarihano.+ 15 Masi aakhala atthu vakhaani eriyari anyu alakenle vamurimani vaya ohiira siiso. Awo aniphavela wiira anaaya akhaleke atthu eekeekhai a Muluku. Awo nlelo annipaka itthu yeettihiwaka ni ikuru sa Muluku. Nave-tho nyuwo, mphaveleke ni mooniheryeke ni murima anyu wootheene mweettelo wooloka. Muroromeleyeke ni muthiyana mmuthenle anyu okathi mwaari anyu mmiravo. 16 Tthiri miyo kinninyokha* omwalana”,+ onihimya Yehova Muluku a Isarayeli, “nave kinnimunyokha ole onnanariha nlaya nawe ni otakhala”,* onihimya Yehova a anakhotto. “Mwiikasoopeke ni mweettelo anyu, nave mooniheryeke ororomeleya.+

17 “Nyuwo munnimukhulumula Yehova ni moolumo anyu.+ Nto nyuwo munnikoha wiira: ‘Nimmukhulumula sai?’ Mwaha woohimya wiira: ‘Ootheene ale anipaka itthu sootakhala tooloka vamaithoni va Yehova, nave owo onnihakalala nuuwo’,+ aahiiso mwaha woohimya wiira: ‘Ori vai Muluku a xariya?’”

3 “Mwiiwe! Kinnimuruma namitthaka aka, nto owo onrowa olokiherya ephiro ohoolo waka.+ Nave mootutuxerya, Pwiya eekeekhai, yoowo munimwavya anyu onimoorwa mutemplo mwawe.+ Namitthaka a nivarihano, yoowo onoohakalalihani, onimoorwa. Mweekeekhai owo onimoorwa”, onihimya Yehova a anakhotto.

2 “Masi, ti pani onrowa owerya ovilela nihiku onrwa awe? Ti pani onrowa owerya weemela aphiya vale? Tthiri owo onrowa olikanaka ni mooro wa mulipa onireeriha itthu,+ ni onrowa olikanaka ni esapawu ya alipa-ookattha. 3 Owo onrowa okilaathi ntoko mutthu onireeriha itthu ni onireeriha eparatha,+ nave onimwaareriha anamwane a Levi. Onimwaareriha ntoko eweero ni eparatha, vano awo anrowa okhala ohoolo wa Yehova ntoko atthu aniivaha itthu mwa xariya. 4 Soovaha sa Yuda ni sa Yerusalemu, sinrowa omusivelaka Yehova, ntoko mahiku a khalai ni iyaakha sivinre.+

5 “Miyo kinimoorwa vari anyu wiira koophukeleni, nave kinookhala namoona kaavirikanyaka anahako,+ anamararuwa, ale anilapha yoothaka,+ ale animwiiyerya namuteko oniliviwa,+ naamukhweli ni mwaana ohirina apapawe,*+ nave kaavirikanyaka ale anikhootta waakhaliherya* anamurwa.+ Atthu ala khanikoova”, onihimya Yehova a anakhotto.

6 “Tthiri miyo ka Yehova, nkiniturukeya.*+ Nave nyuwo mwa anamwane a Yakobe, tivonto nlelo muhimala-malihiwe anyu. 7 Okhuma mahiku a amuhavinre anyu, nyuwo munnihiya weettela malamulo aka, ni khamuntthara malamulo awo.+ Mutthikele wa miyo, nave miyo kinootthikela wa nyuwo”,+ onihimya Yehova a anakhotto.

Masi nyuwo munnikoha wiira: “Ninrowa otthikela sai wa nyuwo?”

8 Niireke pinaatamu onniwerya omwiiyerya Muluku? Masi nyuwo munnikiiyerya”.

Ni munnikoha wiira: “Ninwiiyeryani sai?”

“Muhiruuhaka itiisimu* ni soovaha sanyu. 9 Tthiri nyuwo mootakhaliwa, mwaha wookiiyerya. Mweekeekhai, nloko nootheene ninnipaka etthu emosa-ru. 10 Muruuhe itiisimu sootheene opuro onisukiwa aya,+ wiira ekhale yoolya mpaani mwaka.+ Xontte, mukeererye ni mwaha owo”, onihimya Yehova a anakhotto, “wiira moone akhala wiira nkinrowa woohulelani mikhora sa wiirimu,+ ni woomwarexelani* mareeliho mpakha ohoothowani etthu”.+

11 “Miyo nkinrowa weemererya wiira mireerelo sanyu sa mmatta sihononiweke ni isoope, nave miri sanyu sa ewuuva sinimwiimaka mihokorokho”,+ onihimya Yehova a anakhotto.

12 “Maloko ootheene animoohimyani okhala oohakalala,+ okhala wiira elapo anyu enrowa okhala elapo eniphwanyiha ohakalala”, onihimya Yehova a anakhotto.

13 “Moolumo anyu ookivirikanya yaari oowerya”, onihimya Yehova.

Masi nyuwo munnikoha so: “Nilavunle sai eriyari ahu noovirikanyakani?”+

14 “Nyuwo munihimya wiira: ‘Ti voohiloka omurumeela Muluku.+ Nimphwanya-ni neettelaka sooruma sawe, niriipiwe ene murima ohoolo wa Yehova a anakhotto? 15 Hiyo ninnaahimya ale oowiisoona okhala oohakalala. Nave ale anipaka itthu sootakhala, itthu sinniweettela saana.+ Awo annimweehererya Muluku, nto khiivo etthu eniwiiraneela’”.

16 Okathi owo, ale yaamuttittimiha vanceene* Yehova yaanilavula mukina ni mukhwaawe, khula mmosa ni mpatthani awe, nave Yehova aanaaweha ni aanaawiriyana. Nto yaahipacerya olempwa eliivuru ohoolo wawe, yaarina masina a atthu yaarowa wuupuweleliwaka,+ yaawo yaamuttittimiha vanceene Yehova ni yuupuwelela nsina nawe.+

17 “Awo anrowa okhala awaka”,+ onihimya Yehova a anakhotto, “nihiku kinrowa aka waakhaliha muhakhu kiithanlenle aka.+ Kinimwaamorela ikharari, ntoko mulopwana onimmorela ikharari mwanawe oninvarela muteko.+ 18 Nto nyuwo munootthikela oweha ovirikana okhanle eriyari ya mutthu a xariya ni mutthu ootakhala,+ ni ovirikana okhanle eriyari ya mutthu onimurumeela Muluku ni ole ohinimurumeela”.

4 “Mwiiwe! Ninnoorwa nihiku nooviha ntoko efornu,+ okathi atthu ootheene oowiisoona ni atthu ootheene anipaka itthu sootakhala, anrowa aya okhala ntoko malaxi. Tthiri nihiku nno ninrwa nnimwaapwetexa atthu awo”, onihimya Yehova a anakhotto, “nave khaninrowa ohiya nnakhala mutathaari aahiiso iritta. 2 Masi nyuwo munttittimiha* nsina naka, nsuwa na xariya nnimwaarya para nyuwo, nto waarya waya onimoopenuxani; vano nyuwo munrowa otuphaka ntoko ipooyi saamukhaani sooneneva.

3 “Nihiku kinrowa aka okumiherya etthu ela, nyuwo munimwaanyakela atakhali, okhala wiira awo anrowa olikanaka ni ntthupi nri vathi va inawu sanyu”, onihimya Yehova a anakhotto.

4 “Muupuweleke Nlamulo na murumeyi aka Moise, sooruma ni moolumo oophukela, yaawo kaarumme aka oHorebi wiira aisarayeli ootheene yiiweleleke.+

5 “Mwiiwe! Kinimooruuhelani profeta Eliya,+ nihinatthi ophiya nihiku nuulupale ni nowoopiha na Yehova.+ 6 Owo onimwiiriha mirima sa axipaapa okhala ntoko sa anamwane,+ ni mirima sa anamwane okhala ntoko sa axipaapa, wiira miyo kihirwe ohonona elapo ela, kipwetexaka”.