22 Atthu ootheene yaathanliwe wiira akhale makwarta a vamukhora yaari 212. Yaahimaka mittetthe saya saamukhaani moovarihana ni moota yaalempwale aya masina aya.+ Awo yaathanliwe ni Davidi vamosa ni Samuweli mulipa onisuwela otaphulela itthu ooniheriwe awe ni Muluku,+ wiira avareke muteko owo yaaroromeliwe aya. 23 Awo ni anaaya ti yaarina muritti wooweherya mikhora sa empa ya Yehova,+ ni etenta.* 24 Makwarta a vamukhora yaakhala ipantta xexe: Mpantta onikhuma nsuwa, mpantta onikela nsuwa, onorti ni osuuli.+ 25 Okathi ti okathi axinnaya yaanirwa akhumaka mittetthe saya saamukhaani wiira yakhale vamosa naawo mahiku 7. 26 Nave yaahithanleliwa maxeefi* maxexe a makwarta a vamukhora, yaawo yaavahiwe miteko suulupale. Maxeefi awo yaari alevi, nave yaahithanleliwa oweherya isaala ni mihakhu sa empa ya Muluku eekeekhai.+ 27 Awo yaaniviriha ohiyu ari ene mapuro aya erukurenrye ene empa ya Muluku eekeekhai, okhala wiira muteko aya waari owehaweha, okhapelela ixaavi ni ohula mikhora sa empa eyo khula voosiisu.