Yoothanla etokweene mutthu ori poothe ontthuneyaawe opaka, yoothanla yoowiivaherera wa Yehova ni weerela eparte emusi awe emmukokhorela. Yehova ontthuna weera ootheene epake yoothanla eyo. Mwaha wa heeni? Owo ontthuna weera ekhaleno onthamwene nuuwo ni ekhaleno ekumi yoohimala. (Ola. 30:19, 20; Agal. 6:7, 8) Mene Yehova khammukhanyerera mutthu weera anvareleke. Owo onnamuhiya mutthu ori poothe othanla etthu onrowaawe opaka. Nankha wakhala weera mukristu oopatisiwa khantthara malamulo a Muluku apakaka yoottheka etokweene? Wakhala weera mutthu owo khanttharuwa, ontthuneya okumihiwa mmulokoni. (1 Akor. 5:13) Mene naari vareene hiiho, Yehova onnaweherera moopixa murima weera namattheka atthikele wa yoowo. Ohima ekhaikhai eyo etthu emweerinhe Yehova ovaha yoowoopola weera owereyeke anamattheka oleveleliwa soottheka saya. Muluku ahu ansivelo onnaaleela mwa nsivelo ale ampaka soottheka, ni onnawooperera weera ettharuwe. — Zak. 1:3; Arom. 2:4; Yak. 4:8. w24.08 epaax. 14 eparag. 1-2

Vaavo murummwa Yohani aalempaawe ekaarta awe ya naararu, atthu akina yannamwara-mwara sooxuttiha soowootha seiyo saakumihera okawanyeya. Menento akristu akina yaavirelela ‘weetta mweekhaikhaini.’ Awo yannamwiiwelela Yehova ni ‘yanneetta mwa mukhalelo onamusiveliha Muluku.’ (2 Yoh. 4, 6) Akristu ala oororomeleya, ohiya paahi yaamuhakalalinhe Yohani, nave-tho yaamuhakalaliha Yehova. (Mir. 27:11) Etthu heeni ninxutteraahu? Wiiwelela onnakumihera ohakalala. (1 Yoh. 5:3) Mwa ntakihero, ninnahakalala vaavo ninsuwelaahu weera ninnamuhakalaliha Yehova. Owo onnahakala vaavo onnoonaawe niwinaka sooweerera sa elapo ela ni naakhulelaka ekhaikhai. Nave-tho malaika wiirimu ennahakalala. (Luka 15:10) Hiyo-tho ninnahakalala vaavo nnaawehaahu asinna akina evirelelaka okhala oororomeleya. (2 Ates. 1:4) Vaavo elapo ela enrowaaya omala, nnoohakalala osuwela weera nohoonihera ororomeleya wahu wa Yehova nnaamweera naareene elapo yeeyo yaalamuleliwa ni Satana. w24.11 epaax. 12 eparag. 17-18

Munrowa oviriha itempu ikavi muhinaaye omoonihera mutthu owo weera moosiveliwa? Wakhala weera mohaakuva wuuluma ni mutthu owo, pooti woonihera weera munnatthimaka ephome. (Mir. 29:20) Mene-tho wakhala weera munoopisa vantxipale, pooti woonihera weera khimwaano ntthuno, otepaxa wene wakhala weera mutthu mukina ohoonelela weera moosiveliwa. (Koh. 11:4) Muupuwele weera muhinaaye wuulumano mutthu owo, khontthuneya ororomela weera munoothelana ni mutthu owo. Mene nyuwo muntthuneya ororomela weera muri oolikaneene weera muthele naari mutheliwe ni weera mutthu mukina toophwanelela wa nyuwo. Vanonto, nankha nyuwo moonelela weera mutthu mukina onnoosivelani? Wakhala weera nyuwo khamummusivela, moonihere eyo ni miteko sanyu. Khiwaarowa okhala wa xariya omweeriha mutthu mukina wuupuwela weera munnamutthuna, mene muhimutthunaka. — Aef. 4:25. w24.05 epaax. 22-23 eparag. 9-10