Mateo

13 Quel giorno, Gesù l’è ndà fora dela casa e el se ga sentà drio el mar. 2 Tanta gente la ze vegnesta intorno de lu che l’è ndato nte un barco e el se ga sentà, e tuta la gente la ze restada nela praia. 3 El ghe ga insegnà tante robe par meso de ilustrassion. Lu el ga dito: “Scolté: Un semenador l’è ndato semenar. 4 Intanto che el semenea, arquante semense le ze cascade nela banda dela strada. I osei i ze vegnesti e le ga magnà. 5 Altre le ze cascade in meso dei sassi e le ga butà suito parché ghen’era poca tera. 6 Ma quando el sol l’è vegnesto su, le se ga brusà e le ze restade fiape parché no le gavea radise. 7 Altre le ze cascade intrà i spini, e i spini i ze vegnesti su e le ga sofegade. 8 E altre le ze cascade nte una tera bona, e le ga scominsià a dar fruto, questa 100 volte de pi, quela 60 volte de pi e quel’altra 30 volte de pi. 9 Quel che el ga récie, che el scolte.” 10 Alora, i so dissìpoli i ze vegnesti fin Gesù e i ghe ga domandà: “Parché che te ghe parli par meso de ilustrassion?” 11 Lu el ghe ga rispondesto: “Dio el ve ga assà capir i sacri segreti del Regno del cielo, ma no’l ghe ga assà a lori. 12 Parché quei che i ga qualcossa i riceverà de pi e i gavarà tanto. Ma, de quei che i ga poco, ghen sarà cavà via anca quel che i ga. 13 L’è par quela che mi ghe parlo par meso de ilustrassion, parché i varda, ma no i vede, e i sente, ma no i scolta gnanca i capisse. 14 E sucede con lori quel che el profeta Isaia el gavea dito: ”‏Valtri ndaré sentir, ma no ndaré capir gnente. Valtri ndaré vardar, ma no ndaré veder gnente. 15 El cuor de queste persone no’l ghe bada a gnente. Lori i ga stropà le récie e i ga sarà i oci parché no i volea veder, scoltar, capir, ciamarse grami gnanca i volea che mi li curesse’. 16 “Ma, valtri sì felici parché i vostri oci i vede e le vostre récie le scolta. 17 Mi ve digo la verità: tanti profeti e òmini giusti i volea veder le robe che valtri sì drio veder, ma no le ga viste. Lori i volea scoltar le robe che valtri sì drio scoltar, ma no le ga scoltade. 18 ”‏Adesso ve conto la ilustrassion del omo che el ga semenà. 19 Quando qualchedun el scolta sora el Regno ma no’l capisse mia, vien el Perverso e el cava via quel che l’è stà semenà nel so cuor. Questa la ze la semensa che la ze stata semenada drio la strada. 20 Quela che la ze stata semenada in meso i sassi l’è quel che el scolta la parola e suito la aceta con alegria. 21 Ma lu no’l ga mia radise in lu stesso. Alora, el va avanti par un tempo, e quando vien le dificoltà o perseghission par causa dela parola, suito el se strabuca. 22 Quela che la ze stata semenada in meso i spini l’è quel che el scolta la parola, ma le ansietà de questo mondo e el poder de imbroiar dele richesse i sofega la parola, e lu no’l dà pi fruto. 23 Quela che la ze stata semenada nte una tera bona l’è quel che el scolta la parola e el capisse quel che la vol dir e el dà pròpio fruto e el produse, questo 100 volte de pi, quel 60 volte de pi e quel’altro 30 volte de pi.” 24 E lu el ga contà nantra ilustrassion: “El Regno de Dio l’è come quando un omo el semena bone semense nela so tera. 25 Intanto che tuti i dormia, el so nemigo el ga semenà oliessa in meso del formento e l’è ndato via. 26 Quando el formento l’è vegnesto su e ga dato fruto, se podea veder anca la oliessa. 27 Alora, i schiavi del paron dela casa i ze vegnesti fin lu e i ghe ga domandà: ‘Te gavei semenà bone semense nela to tera, mia vera? Come che ghen’è anca oliessa?’ 28 Lu el ghe ga rispondesto: ‘L’è stà un nemigo che el ga semenà oliessa.’ I schiavi i ghe ga dito: ‘Vuto che ndemo cavarla via?’ 29 Lu el ga dito: ’Nò, parché se cavé via la oliessa, pol esser che cavé via anca el formento. 30 Assé che tute due le vegna su fin la racolta, e quando riva el tempo dela racolta, mi ghe dirò a quei che i tol su: “Prima tolé su la oliessa e lighéla in faie par brusarla, dopo tolé su el formento e metélo nel me paiol.’” 31 El ga contà nantra ilustrassion: “El Regno del cielo l’è come un gran de mostarda, che un omo el ga semenà nela so tera. 32 Questa la ze pi pìcola de tute le semense, ma quando la vien su, la ze la pi granda pianta del orto. Quando la deventa una pianta granda, i oseleti i vien e i resta lì intrà i so rami.” 33 E el ghe ga contà nantra ilustrassion: “El Regno del cielo l’è come el levà che una dona la ga metesto in tre grande mesure de farina. Cossita, tuta la massa la ga levà.” 34 Gesù el ga parlà tuto questo ale persone par meso de ilustrassion. Infati, lu no’l parlea gnente sensa ilustrassion. 35 Cossita, se ga realisà quel che el profeta el ga dito: “Mi ndarò parlar par meso de ilustrassion, ndarò parlar sora le robe che le ze sconte fà tanto tempo.” 36 Alora, el ga dito ala gente de ndar via. Dopo, lu l’è ndà rento casa e i so dissìpoli i ze vegnesti fin lu e i ghe ga domandà: “Spiega par noantri la ilustrassion dela oliessa.” 37 Lu el ghe ga rispondesto: ”‏Quel che el semena la semensa bona l’è el Fiol del omo. 38 La tera la ze el mondo. La semensa bona la ze i fioi del Regno, ma la oliessa la ze i fioi del Perverso, 39 e el nemigo che el ga semenà l’è el Diaol. La racolta la ze el tempo del fin, e quei che i tol su i ze i àngeli. 40 Alora, cossita come nel tempo dela racolta i ciapa la oliessa e i la brusa nel fogo, sarà compagno nel tempo del fin. 41 El Fiol del omo el mandarà i so àngeli, e lori i cavarà via de rento el so Regno tuto quel che fà i altri pecar e quei che i desobedisse ala lege, 42 e li butarà nel fogo. Lì, lori i ndarà piander e i ndarà sgrignar i denti. 43 In quel tempo, i giusti i ndarà slusar come el sol, nel Regno de so Pare. Quel che el ga récie, che el scolte. 44 “El Regno del cielo l’è come un tesoro sconto nel campo che un omo lo ga catà e lo ga sconto nantra volta. Lu l’è restà tanto contento che l’è ndato e el ga vendesto tuto quel che el gavea e el ga comprà quel campo. 45 “Anca, el Regno del cielo l’è come un omo che compra e vende che el ndea in serca de pèrole de bona qualità. 46 Quando el ga catà una pèrola de grando valor, l’è ndato e el ga vendesto suito tuto quel che el gavea, e la ga comprada. 47 “Anca, el Regno del cielo l’è come una rede de un pescador che la ze stata butada nel mar e che la ga tolto su pessi de tuti i tipi. 48 Quando la ze restada piena, i pescadori i la ga portada nela praia, i se ga sentà e i ga metesto i pessi boni in sporte, ma quei rugni i ga butà via. 49 Sarà cossita nel tempo del fin. I àngeli i ndarà spartir i rugni dei giusti, 50 e li butarà nel fogo. Lì, lori i ndarà piander e i ndarà sgrignar i denti. 51 “Sì stati boni de capir tuto?” Lori i ga rispondesto: “Si.” 52 Alora, lu el ghe ga dito: ”‏Cossita, gavé de saver che tuti i istrutori che i ze insegnadi sora el Regno del cielo i ze come un omo, paron de casa, che el tira fora del so tesoro robe nove e robe vècie.”‏ 53 Quando Gesù el ga finio de contar queste ilustrassion, l’è ndato via de lì.