Erhuvwu Ra Mrẹre Fikirẹ Ehwẹ!

EMETẸ ivẹ yan kuẹgbe vwẹ ekogho ra da chueki vwẹ Baguio City, Philippines. Ayen da mrẹ imikpekpa re ghorie ọvo, ẹkẹvuọvo ayen vwẹriẹre-e. Helen rọ dia oniọvo aye ro mudia kẹrẹ imikpekpa na da bẹre ehwẹ kẹ ayen. Dede nẹ ayen vwẹriẹre-e, jẹ ehwẹ ri Helen na vwerhen ayen oma.

Vwẹ ẹdẹ vuọvo na, ayen vwọ hẹ ibọsu rhivwin kpo uwevwin, ayen da mrẹ oka rẹ jw.org rode ọvo vwẹ Ọguan Ruvie ọvo. Ayen karophiyọ nẹ oka yena yen ayen je mrẹ vwẹ imikpekpa na. Ayen de wontọ nẹ ibọsu na re ni ọrhuẹrẹphiyotọ rẹ emẹvwa rẹ ikoko sansan re si phiyọ otafe rẹ Ọguan Ruvie na.

Emetẹ ivẹ na de kpo ọvo usun rẹ emẹvwa na. Ono yen ayen mrẹre ayen vwọ ro evunrẹ Ọguan na? Helen! Ugege rẹ ayen vwọ mrẹ, ayen da ghwa karophiyọ nẹ ọyehẹ ohwo rọ bẹre ehwẹ kẹ ayen na. Helen da ta: “Oshọ ke mu vwe me vwọ mrẹ nẹ ayen bru vwe cha. Ki mi roro nẹ mi ru emu ọvo chọ.” Ẹkẹvuọvo ayen da vuẹ Helen obo ri mu ayen rhe.

Ayen riavwerhen rẹ uyono vẹ oyerinkugbe rẹ iniọvo na, kọ ghwa họhọ nẹ uwevwin rayen yen ayen hepha. Ayen vwọ mrẹ iniọvo ri ruẹ Ọguan Ruvie na fuan ọke rẹ uyono na vwo kuphiyọ nu, ayen da nọ sẹ ayen se vwobọ vwọ. Ọvo usun rẹ emetẹ na rha hẹ ẹkuotọ na-a, ẹkẹvuọvo ọ ro chekọ na kpo uyono, ọ je ton uyono ri Baibol phiyọ re. Enana eje phiare fikirẹ ehwẹ!