Die Yen Uvie rẹ Ọghẹnẹ?
Jesu yono idibo rọyen ẹrhovwo nana: “Ọsẹ rẹ avwanre rọ hẹ obo odjuvwu, Jẹn avwanre vwẹ ọghọ kẹ ọde wẹn. Jẹn uvie wẹn rhe, ru ẹguọnọ wẹn vwẹ akpọ na kirobo re ruẹ vwẹ obo odjuvwu.” (Matiu 6:9, 10) Die yen Uvie rẹ Ọghẹnẹ? Die yen o che ru? Kẹ diesorọ o vwo fo nẹ a nẹrhovwo kpahọn?
Jesu Yen Ovie rẹ Uvie rẹ Ọghẹnẹ.
Luk 1:31-33: “Ku wo se odẹ rọye Jesu. Ọ cha rho, ke se Ọmọ rẹ Ọro Mekpenu; Ọrovwohwo Ọghẹnẹ kọ vwẹ ekete ri Devid ọsẹ rọye vwọ kẹ, Kọ re vwẹ enu rẹ uwevwi ri Jekọp bẹdẹ; uvie rọye gbi se vwo oba-a.”
Uvie na yen Jesu ghwoghwo kpahen.
Matiu 9:35: “Jesu da yan ro irere na, vẹ eko na ejobi, o de yono vwi Sinagọg, ọ da ta ota rẹ iyẹnrẹ esiri rẹ uvie rẹ odjuvwu, o de sivwi ihwo buebu re mwa ọga dohwo doghẹre rẹ emiavwe rọye.”
Jesu vwẹ oka vwọ kẹ idibo rọyen rere ayen vwọ riẹn ọke rẹ Uvie na cha vwọ rhe.
Matiu 24:7: “Kidie ẹgborho cha vwọ so ẹgborho, uvie cha vwọ so uvie, owẹvwe che fi, otọ che kpogho vwẹ asan buebu.”
Idibo ri Jesu ghwoghwo kpahen Uvie na vwẹ akpọneje.
Matiu 24:14: “Ka cha ta ota rẹ iyẹnrẹ esiri na wan akpọ na ejobi, rere ọ vwọ dia iseri kẹ ẹgborho na ejobi: tavwe rẹ oba na ki rhi te.”