Wo Se Yeren Akpọ Rẹ Omavwerhovwẹn Asaọkiephana
WO SE yerin akpọ rẹ umwemwu, ọghwo vẹ ughwu kanre! Dedena, ebẹnbẹn je vọn akpọ na nonẹna. O vwo obo re sa vwẹ ukẹcha kẹ wẹ? Baibol na sa chọn wẹ uko vwo yeren akpọ rẹ omavwerhovwẹn asaọkiephana? E jẹ a fuẹrẹn ebẹnbẹn evo vẹ oborẹ Baibol na sa vwọ chọn avwanre uko.
ẸWẸN RẸ OTEKẸVWẸ
Uchebro rẹ Baibol: “Si oma wẹn nẹ urhuru si vwe rẹ igho, jẹn obo ri wo vwori da wẹ ẹro.”—Hibru 13:5.
Nonẹna, akpọ na vọnre vẹ erọnvwọn buebun rẹ ihwo tare nẹ ofori nẹ e vwo. Dedena, Baibol na tare nẹ e “jẹn obo ri wo vwori da wẹ ẹro.” Vwẹ idjerhe vọ?
Kẹnoma kẹ “ubiupho rẹ igho.” Ihwo kpairoro vrẹ omakpokpọ, orua, igbeyan, omamọ uruemu, vẹ ọghọ rayen fikirẹ “ubiupho rẹ igho.” (1 Timoti 6:10) Ọyena brare mamọ! Ukuotọ rọyen, “ohwo rọ guọnọ igho, igho darọ-ọ.”—Aghwoghwo 5:10.
Ihwo ghanre vrẹ ekuakua. Vwọrẹ uyota, ekuakua kerẹ ifonu vẹ ikọmputa pha yoyovwin. Ẹkẹvuọvo, ekuakua che se vwo ẹguọnọ vẹ ọdavwaro kpahen avwanre-e; ihworakpọ ọvo yen se ruo. “Igbeyan” sa nẹrhẹ avwanre vwo ẹwẹn rẹ otekẹvwẹ.—Isẹ 17:17.
E SE YEREN AKPỌ RẸ OMAVWERHOVWẸN NONẸNA SIẸRẸ E DE NENE ODJEKẸ RẸ BAIBOL NA
RE VWO YERẸN GHENE ỌGA
Uchebro rẹ Baibol: “Udu sasasa yẹ omamọ rẹ uhuvwu.”—Isẹ 17:22.
Kerẹ “omamọ rẹ uhuvwu,” aghọghọ sa chọn avwanre uko vwo yerin ghene ọga. Kẹ, mavọ yen avwanre sa vwọ mrẹ aghọghọ vwẹ ẹdia rẹ ọga?
Vwo ẹwẹn rẹ akpẹvwẹ. E de roro kpahen ebẹnbẹn rẹ avwanre na ọkieje, ẹdẹ na eje ke cha dia “miomiovwi.” (Isẹ 15:15) Ukperẹ ọtiọyen, Baibol na tare nẹ a rha “kpẹvwẹ.” (Kọlose 3:15) Dje ọdavwaro phia fikirẹ emu erhuvwu wọ mrẹ vwẹ akpeyeren, otoro obo rọ hanvwe te-e. Erọnvwọn kerẹ omamọ rẹ aruọke, odju ọvwevwerhen, yẹrẹ ehwẹ ra hwẹ kẹ wẹ.
Vwẹ ukẹcha kẹ ihwo efa. Ọ da tobọ dianẹ avwanre vwo omakpokpọ-ọ, noso nẹ “ẹrhovwo herọ kẹ ọkokẹ nọ ohwo ra kẹ.” (Iruo Rẹ Iyinkọn Na 20:35) Ihwo de dje ọdavwaro phia fikirẹ ẹgbaẹdavwọn rẹ avwanre, ọ nẹrhẹ oma vwerhen avwanre, ka je kpairoro vrẹ ebẹnbẹn rẹ avwanre vwẹ ọke yena. E se ru akpeyeren rẹ avwanre yovwinphiyọ siẹrẹ a da chọn ihwo efa uko vwo ru ọrayen yovwinphiyọ.
BỌN ORỌNVWE GAN
Uchebro rẹ Baibol: “Vughe obo ri yovwiri.”—Filipae 1:10.
Aye gbe ọshare re ghwọrọ ọke kuẹgbe-e sa hra oyerinkugbe rayen. Ofori nẹ orọnvwe rayen reyọ ẹdia ọghanghanre vwẹ akpeyeren rayen.
Ru erọnvwọn kugbe. Vwo ọrhuẹrẹphiyotọ rẹ ovwan vwo ru erọnvwọn kugbe. Baibol na da ta: “Emu ivẹ yovwi nọ ọvo.” (Aghwoghwo 4:9) Ovwan se cheremu kugbe, heha kugbe, da udi kugbe, yẹrẹ riakpọ kugbe.
Dje ẹguọnọ wẹn phia. Baibol na jiro kẹ eya gbe eshare nẹ ayen vwo ẹguọnọ ji muọghọ kẹ ohwohwo. (Ẹfesọs 5:28, 33) Orọnvwọn kerẹ ehwẹ, ẹgbanọ, yẹrẹ okẹ otete sa bọn orọnvwe gan. O ji fo nẹ ọrivẹ rayen ọvo yen ayen nene heha rẹ obẹnẹvwe vẹ ọ rẹ ehware.—Hibru 13:4.