Enọ Rẹ Ihwo Ri Se Ẹbe Avwanre Nọre

Vwẹ Izrẹl awanre, e churu urhiẹ rẹ Mesaya na che nurhe si ọmọ ọkpako?

O vwo ọke ọvo rẹ avwanre vwọ ta ọtiọyen. Ọyena dino rhọnvwephiyọ obo re si phiyọ Hibru 12:16. Ẹkpo rẹ Baibol yena vwẹ orhọ-esio phia kpahen jẹ “ẹgha ẹriẹn” rẹ Isọ, “rọ vwi fiki rẹ ame rẹ ukodo shẹ ọkpako rọye [kẹ Jekọp].” Ọnana sa nẹrhẹ e roro nẹ ẹdia rẹ “ọkpako” rẹ Jekọp dẹre na, yen nẹrhẹ ọ dia ohwo rẹ Mesaya na cha wan urhiẹ rọyen rhe.​—Mat. 1:2, 16; Luk 3:23, 34.

Ẹkẹvuọvo, ikuegbe rẹ Baibol ra rhoma fuẹrẹn, djerephia nẹ ọ dia urhiẹ rẹ emekpako ọvo yen Mesaya na nurhe-e. E jẹ a fuẹrẹn ikuegbe evo ri dje ọnana phia:

Ọmọ rẹ Leah re se Rubẹn, yen ọmọkpako rẹ Jekọp (re ji se Izrẹl). Ukuko na, Rachel rọ dia avwebọ rẹ Jekọp de vwiẹ Josẹf. Rubẹn rhi vwo gbe ehwa rẹ ọsẹ rọyen ẹgua, Josẹf da rhe dia ọmọkpako rẹ Jekọp. (Jẹn. 29:31-35; 30:22-25; 35:22-26; 49:22-26; 1 Ikun 5:1, 2) Dedena, Mesaya na nẹ urhiẹ rẹ Rubẹn yẹrẹ Josẹf rhe-e. Urhiẹ rẹ Juda rọ dia ọmọshare rẹne rẹ Leah, yen Mesaya na nurhe.​—Jẹn. 49:10.

E kere ihwo iyorin vwẹ Luk 3:32 rẹ Mesaya na wan oma rayen rhe. Ọ họhọre nẹ ayen ihwo iyorin na emekpako. Boaz vwiẹ Obẹd, Obẹd de rhe vwiẹ Jẹse.​—Rutu 4:17, 20-22; 1 Ikun 2:10-12.

Ẹkẹvuọvo, ọ dia Devid yen ọmọkpako rẹ Jẹse-e. Ukperẹ ọtiọyen, Devid yen ọ rẹ otete eje usun rẹ emeshare ẹrenren rẹ Jẹse vwiẹre. Dedena, urhiẹ rẹ Devid yen Mesaya na nurhe. (1 Sam. 16:10, 11; 17:12; Mat. 1:5, 6) Vwọba, ohwo rọ vwọ kpahen Devid vwẹ urhiẹ na yen Solomọn, jẹ ọ dia ọyen yen ọmọkpako rọye-en.​—2 Sam. 3:2-5.

Ọ dia ọnana ko mudiaphiyọ nẹ ẹdia rẹ ọmọkpako na rhe fiemu-u. Vwọrẹ uyota, e muọghọ kẹ ọmọkpako rẹ orua na, kidie ọyen cha dia ọgbuyovwin rẹ orua na ọke rẹ ọsẹ na de ghwu nu. Ọyen je cha riuku rẹ ọhwọhwọ ivẹ rẹ ekuakua rẹ ọsẹ na ghwu jovwo.​—Jẹn. 43:33; Urhi 21:17; Jos. 17:1.

Ẹkẹvuọvo, a sa reyọ ẹdia rẹ ọmọkpako na mie ọmọ ọvo, a me vwọ kẹ ọmọ ọfa. Ebraham siobọnu Ishmẹl, ọ da reyọ ẹdia rẹ ọmọkpako rọyen kẹ Aizik. (Jẹn. 21:14-21; 22:2) Kirobo ra je ta jovwo, a reyọ ẹdia rẹ ọmọkpako rẹ Rubẹn, a da vwọ kẹ Josẹf.

E jẹ a rhoma fuẹrẹn Hibru 12:16, o de se: “E jẹn ohwo ọvuọvo dia ọvwọfanrhiẹ-ẹ eyẹ ro jẹn ẹgha ẹriẹn kerẹ Isọ, rọ vwi fiki rẹ ame rẹ ukodo shẹ ọkpako rọye.” Ẹkpo vọ yen a vwọphia vwẹ owọrota nana?

Ọ dia urhiẹ rẹ Mesaya na nurhe yen ọyinkọn Pọl ta kpahan na-a. Ọ vwẹ uchebro kẹ Inenikristi nẹ, ayen ‘gbẹn idjerhe ọphiọnphiọn kẹ awọ rayen.’ Ọ guọnọre nẹ ayen kẹnoma kẹ ọfanrhiẹn, kidie ọ sa nẹrhẹ ayen ‘fiabọ rẹ ẹserọphẹ rẹ Ọghẹnẹ na.’ (Hib. 12:12-16) Ayen rha kẹnoma kẹ ọfanrhiẹ-ẹn, kẹ ayen cha họhọ Isọ “ro jẹn ẹgha ẹriẹn,” o de ru emu rẹ ẹgua.

Iso diarọ ọke rẹ igbuyovwin rẹ orua vwọ dia ekobaro rẹ ẹga vwevunrẹ orua, ọ sa tobọ dianẹ o vwo uphẹn ro vwo ze izobo ọkiọvo. (Jẹn. 8:20, 21; 12:7, 8; Job 1:4, 5) Ẹkẹvuọvo, urhurusivwe rẹ ugboma da nẹrhẹ Isọ shẹ ẹdia rẹ ọkpako rọyen fikirẹ emuọre. Ọkiọvo, ọ je sa dianẹ ọ guọnọ kẹnoma kẹ ojaẹriọ ra mraro rọyen nẹ o che te emọ rẹ Ebraham oma. (Jẹn. 15:13) Vwọba, Iso ji ru emu rẹ ẹgua ọfa. Ọ rọvwọn eya ivẹ re dia egedjọ, ọyen da so uvweri rode vwọ kẹ ọsẹ vẹ oni rọyen. (Jẹn. 26:34, 35) Uruemu rẹ Jekọp fẹnẹ ọ rẹ Iso dibidibi; aye rọ ga Jihova yen ọ rọvwọnre.​—Jẹn. 28:6, 7; 29:10-12, 18.

Die kọyen a sa ta kpahen urhiẹ rẹ Mesaya na nurhe? Ọ dia emekpako ọvo yehẹ urhiẹ rẹ Mesaya na nurhe-e. Ihwo rẹ Ju riẹn ọnana, ayen je rhọnvwephiyọ. Kọyensorọ ayen vwọ tanẹ urhiẹ rẹ Devid rọ dia ọmọshare otete eje rẹ Jẹse, yen Mesaya na che nurhe.​—Mat. 22:42.