Enọ rẹ Ihwo ri Se Ẹbe Avwanre Nọre

Diesorọ ivwighrẹn rẹ Jesu vwo siufi rẹ abọ ẹhworhẹ?

Ọnana usun rẹ erọnvwọn evo rẹ ivwighrẹn rẹ Jesu guọnọ vwọ yọnrọn vẹ idibo rọyen. Urhi rẹ Mosis na ji urhi sansan kpahen orufon rẹ ugboma vwẹ ẹdia kerẹ ame oma yẹrẹ afe, ọga rẹ oti vẹ orivwin rẹ ohworakpọ kugbe ọ rẹ eranvwe. Ọ je vwẹ odjekẹ phia kpahen obo re ru orufon na wan. Ọ sa dianẹ womarẹ izobo, ẹhworhẹ, yẹrẹ ẹfẹnrẹn rẹ ame.—Liv., iyovwin 11-15; Ukeri, uyovwin 19.

Iyono rẹ Ju na fuẹrẹn ibieta rẹ irhi na eje. Iyẹnrẹn ọvo djerephia nẹ kemu kemu ro se gbe oma rẹ ohwo ẹgua yen ayen nọ enọ kpahan, “enọ ri shekpahen orọnvwọn ro te oma rẹ ohwo na, obo ro se vwo te ihwo efa oma vẹ obo rọ sa hrabọ te, erọnvwọn rehẹ uwevwin na ro se gbe ẹgua vẹ e re sa vrabọ rẹ ẹgua, kugbe obo re ru orufon na wan vẹ erọnvwọn ra guọnọre.”

Ivwighrẹn rẹ Jesu da nọ nẹ, “Die idibo wẹn gbe yọnre iruemu re ekpako na-a, rẹ ayen gbe hworhẹ abọ tavwẹ rẹ ayen ke ria emu-u?” (Mak 7:5) Ọ diẹ ọghanrovwẹ ra vwọ hworhẹ abọ tavwen a ke riemu yen ayen ta ota kpahan na-a. Kerẹ ẹkuruemu, iyono nana guọnọre nẹ e ku ame phiyọ obọ rayen tavwen ayen ke riemu. Iyẹnrẹn re djunute nanayen da je ta: “Ayen ji siufi rẹ oka rẹ omoze ra hworhẹ abọ na phiyọ, oka rẹ ame ra vwọ hworhẹ abọ na, ohwo ro ku ame na, vẹ asan rẹ ame na te vwẹ abọ na.”

Jesu kpokpo oma rọyen kpahen irhi rẹ ihworakpọ nana-a. Ọ da vuẹ iyono rẹ Ju rẹ ẹgbukpe uriorin ẹsosuọ na: “Uyota Aizaya ghine mraro kpahe ovwan imeru na, kirobo re siro nẹ, Ihwo nana vwẹ unu mu ọghọ kẹ vwẹ, ẹkẹvuọvo yẹ udu rayen sheri ke vwẹ [Jihova]. Ẹkẹvuọvo ayen de ga vwẹ ghevweghẹ. Ayen yono uyono kugbe uruemu rẹ ihwo. Ovwan gbobọnyẹ urhi rẹ Ọghẹnẹ, wa yọnre uruemu rẹ ihwo gan.”—Mak 7:6-8.