Jesu Yono Idibo Rọyen Oborẹ Ayen Nẹrhovwo Wan

Kemu kemu rẹ ihwo rẹ Farisi na ruẹ, ayen ruo ihwo vwo ni ayen so. Ayen de ruẹse kẹ ohwo, ayen ruo rere ihwo vwọ mrẹ ayen. Ayen nẹrhovwo vwẹ azagba rere ihwo eje vwọ mrẹ ayen. Ihwo rẹ Farisi se ẹrhovwo igrongron ku uyovwin, ayen me vwanriẹn ayen vwẹ uwevwin rẹ ẹga na kugbe irhuvwu rere ihwo vwo nyo ayen. Ọtiọyena, o gbe ihwo na unu Jesu vwọ vuẹ ayen nẹ, ‘Ovwan nẹrhovwo kerẹ ihwo rẹ Farisi na-a. Ayen roro nẹ Ọghẹnẹ che nyo ẹrhovwo rayen siẹrẹ ayen da ta eta buebun, ẹkẹvuọvo ọ dia ọtiọyen ọ hepha-a. Ofori nẹ ẹrhovwo dia uvwre wẹn vẹ Jihova ọvo. Wọ vwanriẹn ota ọvo abọ buebu-un. Jihova guọnọre nẹ wọ vuẹ ọdavwẹ wẹn.

‘Enẹ yen wọ nẹrhovwo wan: “Ọsẹ rẹ avwanre rọ hẹ obo odjuvwu, Jẹn avwanre vwẹ ọghọ kẹ odẹ wẹn. Jẹn uvie wẹn rhe, ru ẹguọnọ wẹn vwẹ akpọ na kirobo re ruẹ vwẹ obo odjuvwu.”’ Jesu je vuẹ ayen nẹ ayen nẹrhovwo vwọ kẹ emu rẹ kẹdẹ kẹdẹ, evwoghovwo rẹ imwemwu rayen, kugbe erọnvwọn efa.

Jesu da ta: ‘Nẹrhovwo ọkieje. Nokpẹn rẹ omamọ erọnvwọn mie Jihova ọkieje. Emiọvwọn eje guọnọ vwẹ erọnvwọn iyoyovwin vwọ kẹ emọ rayen. Ọmọ wẹn da nokpẹn rẹ ibrẹdi mie we, wọ cha vwẹ ukpokpo vwọ kẹ? Ọ da nokpẹn rẹ erin mie we, wọ cha vwẹ ọrọdekọ vwọ kẹ?’

Jesu da vuẹ avwanre uyono na: ‘Wọ da riẹn obo ra vwẹ erọnvwọn iyoyovwin vwọ kẹ emọ wẹn, Jihova Ọghẹnẹ rha sa vwẹ ẹwẹn ọfuanfon vwọ kẹ wẹ? Ovwan nokpẹn rọyen mie.’ Wo nene uchebro rẹ Jesu nana? Erọnvwọn vọ yen wọ nẹrhovwo kpahan?