Hanah Nẹrhovwo Vwọ kẹ Ọmọshare

Ọshare rẹ Izrẹl ọvo re se Elkanah vwo eya ivẹ, Hanah vẹ Peninah, ẹkẹvuọvo Hanah yen o me vwo ẹguọnọ rọyen. Ọkieje yen Peninah vwọ reyọ Hanah vwọ jehwẹ kidie o ji vwiẹ-ẹ, jẹ Peninah vwiẹ emọ buebun re. Kukpe kukpe, Elkanah vẹ orua rọyen kpo uwevwin ẹga rọhẹ Shiloh. Ukpe ọvo ayen vwọ hẹ oboyin, Elkanah de noso nẹ Hanah muomaphiyọ. Ọ da ta: ‘Biko wọ viẹ-ẹ, Hanah. Mi che bicha wẹ ọkieje. Mi vwo ẹguọnọ wẹn.’

Hanah da ra nẹrhovwo. Ọ da yare ukẹcha rẹ Jihova jẹ ọ viẹ gangan. O de ve nẹ, ‘Jihova, wọ da kẹ vwẹ ọmọshare, me cha reyọ vwọ kpahotọ kẹ wẹ, kọ ga wẹ vwẹ akpeyeren rọyen ejobi.’

Eli rọ dia Orherẹn Rode na vwọ mrẹ nẹ Hanah viẹ, ko rorori nẹ ọ da idi. Hanah da vuẹ nẹ, ‘Ọrovwovwe, me da udi-i. Mi vuẹ Jihova kpahen ebẹnbẹn ọvo mi vwori.’ Eli da mrẹvughe nẹ obo rọ tare na chọre, ọ da vuẹ aye na: ‘E jẹ Ọghẹnẹ kẹ wẹ obo wọ guọnọre na.’ Oma de rhi phẹn Hanah o de rhivwin kpo. O te ẹgbukpe ọvo-o, o de rhi vwiẹ ọmọshare, o de se Samuẹl. Wọ sa vwẹ ẹwẹn roro oborẹ oma cha vwerhen Hanah te?

Hanah karophiyọ ive ro ve kẹ Jihova. Ọ ghwa vwọ djẹ Samuẹl evie nu, o de muo kpo uwevwin ẹga na. Ọ da vuẹ Eli: ‘Ọnana yen ọmọshare rẹ me nẹrhovwo kpahen yen. Vwẹ akpeyeren rọyen ejobi, me vwerọ kpahotọ kẹ Jihova.’ Kukpe kukpe yen Elkanah vẹ Hanah vwọ kọn bru Samuẹl ra, ayen me vwẹ ewun kpokpọ vwo rhe. Jihova da kẹ Hanah emeshare erha vẹ emetẹ ivẹ efa.