Wọ sa Mrẹ Erere Vwo nẹ Ẹga Ruyota Rhe Bẹdẹ Bẹdẹ!

1. Die yen cha phia siẹrẹ avwanre de “si kẹrẹ Ọghẹnẹ”?

JIHOVA vwo ẹguọnọ kpahen ihwo ri vwẹ ẹga kẹ. Wọ da ga Jihova, ko che kuẹ ebruphiyọ ku we asaọkiephana kugbe ọke rọ cha obaro. Baibol na tare nẹ: “Si kẹrẹ Ọghẹnẹ, rere o si kẹre owẹ.”—Jems 4:8.

2. Mavọ yen avwanre se vwo sikẹrẹ Ọghẹnẹ, kẹ idjerhe vọ yen ọnana se vwo djobọte ẹrhovwo ravwanre?

² Wọ da guọnọ sikẹrẹ Ọghẹnẹ, ku wo yono Baibol na, wọ me je reyẹ obo wo yonori vwo ruiruo. Ẹrhovwo wẹn de shephiyọ ọhọre ri Jihova, kọ cha kpahen phiyọ ayen. Ọyinkọn Jọn de si: “Ọnana kọyen ẹroẹvwọsuọ rẹ avwanre vwori vwẹ evun [Ọghẹnẹ], nẹ avwanre da nọ ekpẹn rẹ emu ro shephiyọ ọhọre rọyen ko nyo kẹ avwanre. Avwanre da riẹn nẹ kemu kemu rẹ avwanre nọrọ o nyo, jẹ avwanre riẹnre nẹ kemu kemu rẹ avwanre nọrọ avwanre ke mrẹ reyọ.”—1 Jọn 5:14, 15.

3-7. Mavọ yen avwanre se vwo vwo aghwanre ro nẹ obọ rẹ Ọghẹnẹ rhe, kẹ ukẹcha vọ yen ọ sa vwọ kẹ avwanre?

³ Vwọba, wo de sikẹrẹ Ọghẹnẹ, kọ cha kẹ wẹ aghwanre wo vwo phi ebẹnbẹn rẹ akpeyeren ri kẹdẹ kẹdẹ kparobọ. Baibol na tare nẹ: “Ohwo ro rhe vwo aghwanre vwẹ usun rẹ ovwa-an, e jọ nọ vwẹ obọ rẹ Ọghẹnẹ.”—Jems 1:5.

⁴ Mavọ yẹn aghwanre ro nẹ obọ rẹ Ọghẹnẹ rhe sa vwọ chọnwuko? Ọ sa nẹrhẹ wọ riẹn erọnvwọn ri Jihova vwo utuoma kpahen. Wọ je sa riẹn oboresorọ erọnvwọn nana vwọ bra, kugbe oborẹ wọ sa vwọ kẹnoma kẹ ayen. Erianriẹn yena sa serọ wẹn vwo nẹ abọ rẹ ebẹnbẹn buebun rẹ ihwo rioja rọyen nonẹna. Kerẹ udje, irhi rẹ Ọghẹnẹ rẹ idibo rọyen muọghọ kẹ sẹro rayen vwo nẹ evun-ẹmrẹ ra guọnọre-e, ega rẹ ọfanrhiẹn ghwa cha, orọnvwe rẹ omavwerhovwẹn kanre kugbe orọnvwe ẹfan.

⁵ Die yẹn aghwanre ro nẹ obọ rẹ Ọghẹnẹ rhe ji se ru kẹ wẹ? Ọ cha nẹrhẹ nẹ wo yerin omamọ akpọ. Ọ je sa nẹrhẹ wo brorhiẹn rẹ aghwanre vwẹ akpeyeren kerẹ i ri shekpahen obo ra ghwọrọ igho wan. Kọ cha nẹrhẹ owẹ vwọ tua erọnvwọn re sa kẹ wẹ erere ri bẹdẹ.

⁶ Aghwanre ro nẹ obọ rẹ Ọghẹnẹ rhe je sa chọnwuko vwo vwo omamọ rẹ oyerinkugbe vẹ ihwo efa. Omavwerhovwẹn kọ cha dia evunrẹ orua wẹn. Ku wo vwo omamọ rẹ igbeyan. Ihwo ki che muọghọ kẹ wẹ, ji te ihwo ri jẹ Ọghẹnẹ ẹ ga dede.

⁷ Aghwanre ro nẹ obọ rẹ Ọghẹnẹ rhe cha nẹrhẹ owẹ vwẹ ẹro abavo vwo ni akpeyeren. Ọ cha chọnwuko vwo yerin ghene ebẹnbẹn vẹ ofudjevwe rẹ akpeyeren. Ọ je cha nẹrhẹ wo ni obaro na vẹ iphiẹrophiyọ. Iphiẹrophiyọ nana che toro ba omakpokpọ wẹn.—Isẹ 14:30; Aizaya 48:17.

8. Erhọ yehẹ erọnvwọn evo rẹ oshọ rayen che juwe emwo, siẹrẹ wọ da ga Ọghẹnẹ?

⁸ Wọ da ga Ọghẹnẹ ruyota na, ku wọ cha vrabọ rẹ oshọ ro muẹ ihwo ri jẹ Ọghẹnẹ ẹga. Wọ vwọ riẹn nẹ ihwo ri ghwuru rha riẹn emu vuọvo na-a, oshọ rayen rhe ji mu we-e. Fikiridie nẹ wo vwo imuẹro kpahen ive rẹ evrẹnushi rẹ Ọghẹnẹ veri na, wọ rha djoshọ rẹ ughwu-u. Wọ je vwọ riẹn nẹ Ọghẹnẹ yin me vwo ẹgba na, ọshọ rẹ eriedan vẹ orhan rhe che mu we-e.—Jọn 8:32.

Evwata Cha Dia Otọrakpọ Na

9-11. Amono yen cha dia evunrẹ Paradaisi, kẹ ihwo vọ yin che jẹ dia?

⁹ Wo de sikẹrẹ Ọghẹnẹ, oshọ rẹ obo re cha phia vwẹ ọke ọbaro rhe che mu we-e. Kirobo rẹ avwanre yonori, Baibol na mraro rẹ ebẹnbẹn buebun rẹ avwanre mrẹ nonẹna. Jihova jẹ avwanre riẹn nẹ ebẹnbẹn nana cha wanvrẹ; o rhe che kri-i, Uvie rẹ Ọghẹnẹ che ru akpọ na phiyọ paradaisi.—Luk 21:10, 11, 31; 23:43.

¹⁰ Ihwo ri sikẹrẹ Jihova re je ga yen cha dia vwẹ Paradaisi na. Baibol na da ta: “Ọmọke krẹn, oruimwemwu gbe cha dia-a; wọ da tọn ẹro vi otọ ni ẹdia rọyen a gbe cha mrẹ-ẹ. Ẹkẹvuọvo ihwo dẹndẹn ri che vwo otọ na, vwẹ evun rẹ oyovwe rode kọyen ayen da gọlọ.”—Une Rẹ Ejiro 37:10, 11.

¹¹ Ihwo re rhọnvwe yan nene irhi rẹ Ọghẹnẹ-ẹ, che vwo arhọ rẹ bẹdẹ-ẹ. (2 Tẹsalonaika 1:8, 9) A rha cha mrẹ ayen ọfa-a. A cha ghwọrọ ayen vẹ Idẹbono kugbe emekashe rọyen. (Ẹvwọphia 20:10, 14) Ẹkẹvuọvo, ihwo ri yono kpahen Jihova, re je ga, yen cha dia vwevunrẹ Paradaisi vwẹ otọrakpọ na vẹ omavwerhovwẹn.

Akpeyeren rẹ Omavwerhovwẹn rọ Cha Obaro!

12. Die yẹn Baibol na ta kpahen ọke rọ cha obaro na?

¹² Jihova vwo omamọ rẹ ọrhuẹrẹphiyotọ vwọ kẹ ihwo ri vwo ẹguọnọ rọyen! Gbe ni obo ri Baibol na ta kpahen obo rẹ akpọ na cha dia vwẹ Paradaisi:

• Emu cha vọn akpọ na: “E jẹn ọka [yẹrẹ emu] buebun dia otọ na; vwẹ enu rẹ igbenu na etiyin i de kpogho.”—Une Rẹ Ejiro 72:16.

• Iwevwin iyoyovwin: “Ayen ke bọn iwevwin kẹ ayen dia evun rayen.”—Aizaya 65:21.

• Iruo rọ kẹ ohwo omavwerhovwẹn: “Ihwo mẹ re me jẹreyọ na ke cha ghọghọ krekri vwẹ iruo rẹ ayen vwẹ abọ rayen ru. Ayen gbe wian kufia-a.”—Aizaya 65:22, 23.

• Ega rha cha dia-a: “O gbi vwo ohwo rẹ orere na ọvuọvo rọ sa tanẹ, Me mwọga-a.”—Aizaya 33:24.

• Ihwo che vwo oma ọsoso: “Etiyin ẹro rẹ orhuẹro ko rhie, erhọn rẹ odierhọn ko phẹ ghwroro; etiyin ukpono ko pho kerẹ uzo, ẹrẹnvwe ro diunu ko so ine rẹ aghọghọ.”—Aizaya 35:5, 6.

• Emiavwe, uvweri vẹ ughwu rha cha dia-a: “[Ọghẹnẹ] ko ririe ameoviẹ nẹ ẹro rayen, ughwu gbe cha dia ọfa-a, eyẹ omaemuohọ eye oviẹ eyẹ odjadja ọfa-a, kidie emu rẹ awanre na wanvrẹn nure.”—Ẹvwọphia 21:4.

• Ofovwin rha cha dia-a: “Ọ nẹrhẹ ofovwi fue re te oba rẹ akpọ na.”—Une Rẹ Ejiro 46:9.

• Arhọ rẹ bẹdẹ bẹdẹ: “Ọvwata cha re ughwẹ rẹ otọ na, kọ dia enu rọyen bẹdẹ.”—Une Rẹ Ejiro 37:29.

13. Ono yin se ru akpọ na phiyọ paradaisi, kẹ diesorọ ọ vwọ dianẹ ọyen ọvo yin se ruo?

¹³ Ihworakpọ che se ru erọnvwọn nana-a, ẹkẹvuọvo Jihova vwo ẹgba ro vwo ru kemu kemu rọ tare. O vwẹ orọnvwọn vuọvo rọ sa dobọ rọyen ji ro vwo jẹ obo rọ guọnọre e ruo-o. Baibol na tare nẹ: “O vwo emu ọvuọvo rọ bẹn kẹ Ọghẹnẹ-ẹ.”—Luk 1:37.

14. Mavọ wọ sa vwọ yan vwẹ idjerhe ro suẹn ohwo kpo arhọ rẹ bẹdẹ na?

¹⁴ Womarẹ aghwoghwo rẹ Iseri rọyen, Jihova reyọ uphẹn vwọ kẹ kohwo kohwo ayen vwọ “wan anurhoro ọhwahwa na,” je yan vwẹ idjerhe ro suẹn ohwo kpo arhọ rẹ bẹdẹ na. Rhiabọreyọ uphẹn nana, wo kuomakugbe ihwo ri Jihova rẹ oma vwerhan. Gbomavwra ẹga ruyota na rere wọ sa vwọ mrẹ ebruphiyọ ri Jihova bẹdẹ bẹdẹ!—Matiu 7:13, 14.