Vuẹ Ayen nẹ Wo Vwo Ẹguọnọ Rayen

Ong-Li ọyen ọvo usun rẹ Iseri ri Jihova re dia Bulgaria. Ọ reyọ Baibol vwo yono eghene aye ọvo re se Zlatka, ọshare rọyen vwobọ vwẹ uyono na-a. Ong-Li da ta: “Avwanre vwo yono kpahen akpeyeren rẹ orua, me da kanrunumu obo rọ ghanre te ra vwọ vuẹ emọ vẹ ọshare yẹrẹ aye rẹ ohwo nẹ e vwo ẹguọnọ rayen. Ko ni vwe vẹ omaemuophiyọ, ọ da tanẹ ọyen je vuẹ ọshare rọyen yẹrẹ ọmọtẹ rayen rọhẹ egbukpe irhirin nẹ ọyen vwo ẹguọnọ rayen devo-o!”

Zlatka ta da: “Mi se ru kemu kemu vwọ kẹ ayen, ẹkẹvuọvo ọ bẹnre mamọ me vwọ ta oka rẹ ota tiọyena.” Ọ da je ta: “Oni ro vwiẹ vwẹ je rhe vuẹ vwẹ dẹvo nẹ ọyen vwo ẹguọnọ mẹ-ẹ, oni mẹ rode je vwẹ ọke vuọvo vwọ vuẹ oni mẹ nẹ ọyen vwo ẹguọnọ rọye-en.” Ong-Li de dje kẹ Zlatka nẹ Jihova komobọ vwẹ unu rọyen vwọ tanẹ ọyen vwo ẹguọnọ ri Jesu. (Matiu 3:17) O de jiro kẹ Zlatka nẹ ọ nẹrhovwo kẹ Jihova kpahọn je davwẹngba vwọ vuẹ ọshare vẹ ọmọtẹ rọyen nẹ ọyen vwo ẹguọnọ rayen.

Ong-Li da ta: “Ẹdẹ ivẹ vwọ wan nu, Zlatka da rhe vuẹ vwẹ vẹ aghọghọ nẹ ọyen nẹrhovwo rhe Jihova vwọ kẹ ukẹcha re. Ọshare rọyen vwo te uwevwin, ọ da vuẹ nẹ Baibol na yono ọyen obo rọ ghanre te rẹ aye vwo vwo ẹguọnọ rẹ ọshare rọyen ji muọghọ kẹ. O vwo fotovwin vwẹ ọmọke nu, ọ da vuẹ nẹ ọyen vwo ẹguọnọ rọyen mamọ! Ọmọtẹ rọyen ji vwo te uwevwin, Zlatka da gbanọ boma je vuẹ nẹ ọyen vwo ẹguọnọ rọyen! Zlatka da ta kẹ vwẹ: ‘Asaọkiephana ẹwẹn mẹ totọ re. Vwẹ uvwre rẹ ikpe nana eje re mẹ vẹ orua mẹ vwọ herọ na, me je vwẹ ọke vuọvo vwọ vuẹ ayen nẹ mi vwo ẹguọnọ raye-en, jẹ enẹna womarẹ ukẹcha ri Jihova, me sa vuẹ ayen gorigori nẹ mi vwo ẹguọnọ rayen.’

Ong-Li da je ta: “Udughwrẹn ọvo vwọ wan nu, me vwọ mrẹ ọshare ri Zlatka, ọ da ta kẹ vwẹ: ‘Ihwo buebun vuẹ vwẹ nẹ me vwẹ uphẹn kẹ Zlatka nẹ o nene ovwan yono Baibo-ol, ẹkẹvuọvo aphro herọ-ọ, uyono ri Baibol na chọn orua rẹ avwanre uko mamọ re. Enẹna orua avwanre rhi vwo uvi rẹ oyerinkugbe vrẹ obo ri jovwo.’”