“Ọsuere Kọyen mi de Ghoro”

AKPỌ MI YERIN JOVWO

Ọ reyọ ọke ihwo evo ki se yono vwo nẹ oja rẹ ayen rere fikirẹ echobọ rayen. Ọyena ghwa obo re phia kẹ vwẹ. Barcelona rọ dia orere rivẹ rọ ma rho kparobọ vwẹ Spain yen e de vwiẹ vwẹ. Orua mẹ dia Somorrostro rọ dia ekogho rọ reyọ asan rhuarho vwẹ orhoma rẹ urhie rẹ orere na. Buebun rẹ ihwo rehẹ ekogho yena vwobọ vwẹ urhiẹchọ, ayen je shẹ ihuvwun egangan.

Mẹvwẹ yen ọmọkpako rẹ emọ irhirin rẹ ọsẹ vẹ oni mẹ vwiẹre. Kidie nẹ avwanre ivwiogbere, ọsẹ mẹ da vuẹ vwẹ nẹ me ra wian kerẹ ohwo rọ tọrọ ibọrọ rẹ tẹnisi vwọ kẹ ihwo re fa vwẹ iklọbu ọvo. Ẹgbukpe ihwe yen me hepha ọke yena. Inọke ihwe yen me wian kẹdẹ kẹdẹ. Ọtiọyena, me rhe se kpo isikuru kerẹ emọ efa-a. Mi vwo te ẹgbukpe 14, me da ton iruo phiyọ vwẹ asan re de ruẹ oka rẹ ogba sansan rẹ ijini vwọ wian.

Vwẹ 1975, vwo nene urhi rẹ Spain, e de se vwe nẹ me rhe vwomaba isodje. Kidie nẹ me guọnọ ru erọnvwọn kpokpọ vwẹ akpeyeren mẹ, me da vwomaba ẹko rẹ isodje re se Spanish Foreign Legion vwẹ Melilla rọ dia orere rọ hẹre ro urhie rẹ North Africa. Ọke yena kọyen mi rhi vwo vwo ẹkuruemu me vwọ da udi vroma je reyọ ihuvwun egangan.

Mi vwo nẹ iruo rẹ isodje nu, mi de rhivwin kpo Barcelona ra ton ẹko ọvo phiyọ ro gbe ozighi. Korọnvwọn korọnvwọn rẹ avwanre mrẹre yen avwanre cho. Avwanre de cho ekuakua ra shẹ nu, kẹ avwanre vwẹ igho na vwọ da ihuvwun egangan. Me da ton ẹreyọ rẹ ihuvwun egangan re se LSD vẹ amphetamines phiyọ, mi de ji muomaphiyọ ọfanrhiẹn egbe, udi ẹda vroma, kugbe idjogba ephio. Orharhe akpọ mi yerẹn na da nẹrhẹ ozighi-egbe mẹ rhoma ganphiyọ. Ke me muẹ aphia, ushurhe, vẹ oda yan, me je vwẹ ayen vwọ họnra odedede.

Ẹdẹ ọvo, mẹ vẹ igbeyan mẹ vwo cho imoto ọvo nu, elọkpa ke vwọ tua avwanre. Kọ ghwa họhọ ifimu. Avwanre vwọ djẹ imoto na te omarẹ iroko 30 nu, elọkpa na ke sa avwanre. Siẹvuọvo na, ohwo rọ dje imoto na da djẹ kanre asan, kpakpata avwanre ihwo eje da djẹ. Ọsẹ mẹ vwo nyo kpahọn, ọ da djẹ vwẹ nẹ uwevwin.

Ọsuere kọyen mi de ghoro vwẹ uvwre rẹ ẹgbukpe iyorin. Kasan kasan me mrẹre kọyen mi sherhẹn, owenẹ ọ dia anurhuroro rẹ ihwo, imoto ride, egbara, yẹrẹ tobọ asan re shi ihwo phiyọ. Mi ji tobọ dia evunrẹ unu vwẹ uvwre ọke evo. Akpeyeren mẹ da yanghan ku, arhọ mẹ rhe fiemu vuọvo kẹ vwẹ-ẹ. Me karophiyọ nẹ mi vwẹ aphia vwo bru abọ vẹ ẹghrobọ mẹ ọke ọvo rẹ ihuvwun egangan mi reyọre vwo mu vwe mamọ. Upe na je herọ te ọke na.

OBORẸ BAIBOL NA WENE UVWE WAN

Mi vwo te ẹgbukpe 28, oni mẹ da guọnọ owẹ mrẹ, ọ da vuẹ vwẹ nẹ mi rhivwin rhe uwevwin. Me da rhọnvwe ji ve kẹ nẹ mi che ru ewene vwẹ akpeyeren mẹ. Jẹ, ọ reyọ ọke tavwen mi ki se ru ive mẹ na gba.

Vwẹ oghẹruvo rẹ ẹdẹ ọvo, Iseri rẹ Jihova ivẹ da rhe uwevwin rẹ avwanre. Me vwọ kerhọ rayen, ọsẹ mẹ da van kẹ vwẹ nẹ evunrẹ uwevwin rhe nẹ mi bi ẹchẹ na gbe. Rọ vwọ dianẹ mi nyota rẹ ohwo-o na, me da vwẹ abọ fa erhọ kẹ obo rọ tare. Ayen kẹ vwẹ ẹbe itete erha, me da reyọ ayen vẹ omavwerhovwẹn. Me da nọ ayen kpahen asan rẹ ayen de ruẹ uyono. Ẹdẹ ibro vwọ wan nu, mi de kpo Ọguan Ruvie rayen.

Orọnvwọn rẹsosuọ mi niso yen omamọ rẹ osẹnvwe rayen. Me fẹnẹ ayen mamọ kidie mi mu ẹto ogrongron, ẹtuegban jọkọ, ji ku erharhe iwun phiyọ. Mi vwo no nẹ me họhọ ayen kakaka-a, mi de mudia otafe. Jẹ o gbe vwe unu mamọ me vwọ mrẹ Juan rọ dia ọvo usun rẹ ihwo rẹ me vẹ ọyen gbe gbozighi jovwo, ro ku ikotu phiyọ. Me da mrẹvughe nẹ ọ vwomaba Iseri rẹ Jihova ẹgbukpe ọvo rọ wanre. Me vwọ mrẹ, mi de fiudugberi ro evunrẹ Ọguan na. Etiyin kọyen akpeyeren mẹ da ton ewene phiyọ.

Me da rhiabọreyọ uyono rẹ Baibol ji mrẹvughe nẹ me da guọnọ vwo ẹroesiri rẹ Ọghẹnẹ, kọ fori nẹ mi siobọnu uruemu rẹ ozighi vẹ ọfanrhiẹn egbe mẹ na. Ọ lọhore mi vwo ru ewene nana-a. Jẹ me mrẹvughe nẹ me da guọnọ ru ọhọre rẹ Jihova, ko fori nẹ mi “wene iroro rẹ udu [mẹ] phihọ ọkpokpọ.” (Rom 12:2) Arodọnvwe rẹ Jihova te vwe ẹwẹn mamọ. Dede nẹ me vwobọ vwẹ ogbiru nana eje, ọ je kẹ vwẹ uphẹn mi vwo kurhẹriẹ. Oborẹ mi yono kpahen Jihova ro vwẹ oma chidia. Ko rhi phẹn kẹ vwẹ nẹ Ọmemama ọvo herọ ro vwo ẹguọnọ mẹ.—1 Pita 5:6, 7.

Enana eje da nẹrhẹ mi ru ewene. Kerẹ udje, avwanre vwo yono te asan rọ ta ota kpahen itaba ese, me da vuẹ oma mẹ, ‘Jihova da guọnọ nẹ me dia fuanfon vwẹ kẹdia kẹdia eje, kọyen me cha dobọ rẹ isigati ephopho ji!’ (2 Kọrẹnt 7:1) Mi de ku isigati na eje kufia!

O ji fo nẹ mi kẹnoma kẹ ẹshẹ vẹ ẹreyọ rẹ ihuvwun egangan. Jẹ ọ reyọ ọke vẹ ẹgbaẹdavwọn ọgangan mi ki se ruo. Me riẹnre nẹ ofori nẹ me kẹnoma kẹ igbeyan mẹ ri jovwo na, kidie ayen cha sa nẹrhẹ me yan obaro vwevunrẹ ukoko na-a. Ọke vwọ yanran na, ẹroẹvwọsuọ mẹ kpahen Jihova vẹ ukẹcha rẹ igbeyan kpokpọ mi rhi vwo vwevunrẹ ukoko na kọ rhe ganphiyọ. A mrẹ vwo dje ẹguọnọ vẹ ọdavwẹ rẹ ayen vwo kpahen ovwẹ-ẹ. Ọke vwọ yanran na, mi de siobọnu ihuvwun egangan ẹreyọ ji “ku ohwo ọkpokpọ na phihọ oma,” rọ dia obo re cha chọn vwẹ uko vwo vwo ẹroesiri rẹ Jihova. (Ẹfesọs 4:24) Mi de bromaphiyame kerẹ Oseri rẹ Jihova vwẹ August 1985.

ERERE RE ME MRẸRE

Baibol na wene akpeyeren mẹ. O si vwe nẹ erharhe iruemu ri joma guọghọ ugboma mẹ, ji si ọghọ nu vwe oma. Vwọrẹ uyota, igbeyan mẹ ri jovwo rẹ ọga rẹ AIDS yẹrẹ ega efa ri churubọ si ihuvwun egangan hweri vrẹ 30 re. Oma vwerhen ovwẹ nẹ me vrabọ rẹ imuoshọ tiọyena kidie mi nene irhi rẹ Baibol.

Enẹna, mi rhe mu aphia vẹ ushurhe ọfa-a. Me nama roro jovwo nẹ Baibol kọyen mi che mu, siẹvo ke reyọ vwọ vwẹ ukẹcha kẹ ihwo-o. Asaọkiephana, mẹ vẹ aye mẹ hẹ iruo rẹ ẹga ọkieje.

Ọsẹ vẹ oni mẹ rhọnvwe dia Iseri rẹ Jihova-a, ẹkẹvuọvo oma vwerhen ayen kpahen erere mi mrẹre kidie mi yono Baibol. Ọsẹ mẹ tobọ chochọn rẹ Iseri na vwẹ irharo rẹ ihwo re vẹ ọyen gba wian. Ọ nabọ mrẹvughe nẹ esegbuyota kpokpọ mẹ na ghwa erhuvwu rode vwo rhe vwe. Kọke kọke yen oni mẹ vwọ vuẹ vwẹ nẹ ọ darọ nẹ me fobọ ton uyono rẹ Baibol phiyọ-ọ. Obo rọ tare na gbare dẹn!

Obo me rhiẹromrẹ na yono uvwe nẹ ọyen emu rẹ ẹkpa ra vwọ guọnọ omavwerhovwẹn womarẹ ihuvwun egangan vẹ erọnvwọn ebrabra efa. Mi rhi vwo uvi omavwerhovwẹn asaọkiephana me vwọ vuẹ ihwo kpahen uyota rẹ Baibol ro sivwin arhọ mẹ.