Die Yen Iseri ri Jihova Reyọ Itetoro Vwo Ruẹ?
Avwanre reyọ itetoro na vwo ruẹ ọdavwẹ rẹ ẹga avwanre je reyọ vwọ vwẹ ukẹcha kẹ ihwo rẹ oghwọrọ teri oma. Enana eje usun rẹ iruọ re ma karo kẹ avwanre, rọ dia a vwọ vwẹ ukẹcha kẹ ihwo vwọ dia idibo ri Jesu Kristi.—Matiu 28:19, 20.
Ohwo vuọvo womarẹ itetoro avwanre fee. Avwanre vwo ilori rẹ ẹga vuọvo ra hwosa kẹẹ, a je hwosa kẹ Iseri ri Jihova ri ghwoghwota nẹ uwevwin kpo uwevwiin. Vwọba, a je hwosa kẹ ihwo re ga vwẹ eghọn ukoko kugbe esiri ukoko rẹ avwanree, ọtiọyen ji te iniọvo re ga vwẹ Ẹko Rọvwẹrote na.
Iruo Evo rẹ Avwanre Ruẹ
Ẹbe Ẹteyọn: Avwanre fan Baibol na vẹ ẹbe avwanre efa, teyan ayen, mu ayen je ghara ayen kẹ iduduru rẹ ihwo kukpe kukpe ọphẹ. Ọtiọyen ọ je hepha nẹ, ẹbe vẹ ividio avwanre rehẹ wẹbsaiti ri jw.org kugbe aplikeshọni ri JW Library na ọphẹ, a vwẹ ayen chuekii.
Ebanbọn vẹ Ẹroevwote: Avwanre bọn emamọ uwevwin ra da ga ẹga vwẹ akpọ na eje je vwẹrote ayen rọ nẹrhẹ ikoko sansan vwo asan ro fori ayen de siomakoko vwo jiri Ọghẹnẹ. Ọtiọyen avwanre bọn je vwẹrote eghọn ukoko vẹ asan re de ruiruo rẹ efanfan. Buebun rẹ ewian nana ihwo re vwomakpahotọ yen ruẹ ayen, ọnana kọ nẹrhẹ igho ra ghwọrọ kpotọ.
Ẹroevwote rẹ Iruo: Womarẹ itetoro re vwo biẹcha iruo rẹ akpọeje na yen a vwọ vwẹrote iruo re ruẹ vwẹ esiri ukoko avwanre, eghọn ukoko kugbe asan re de ruẹ iruo rẹ efanfan ji te iruo rẹ ihwo re ga kerẹ iniruo ri kiẹn ruẹ.
Iruo rẹ Aghwoghwo: A hwosa kẹ Iseri ri ghwoghwo iyẹnrẹn esiri na yẹrẹ ri yono ihwo ‘ota rẹ Ọghẹnẹẹ.’ (2 Kọrẹnt 2:17) Kirobo rẹ Inenikristi ẹgbukpe ujorin rẹsosuọ ruru, a vwẹ erọnvwọn kiriguo ra guọnọre vwẹ akpeyeren kẹ ihwo evo ra nabọ yono re je ghwọrọ ọke buebun vwẹ iruo rẹ aghwoghwo na, a je kẹ ayen asan rẹ ayen cha dia.—Filipae 4:16, 17; 1 Timoti 5:17, 18.
Eyono: Igho re torori yen a vwọ vwẹrote eghwẹkoko vẹ osikoko rẹ avwanre. Vwọba, avwanre ji ruẹ uhworo vẹ ividio re mu kpahen Baibol na. Avwanre ji vwo isikuru re de yono ekpako vẹ ighwoghwota rehẹ ẹga ọkieje rere ayen sa vwọ tẹn ona rẹ iruo rayen ji ru ayen fiotọ.
Ukẹcha Vwọ kẹ Ihwo rẹ Emu Phia Kẹ: Avwanre vwẹ emu, ame, kugbe uwevwin vwọ kẹ ihwo re rioja rẹ oghwọrọ ri kregede vẹ e rẹ ihworakpọ soro. Ọ dia “ihwo rẹ avwanre vẹ ayen gba hẹ esegbuyota na” ọvo yen iruo nana fierere kẹẹ, o ji fierere kẹ ihwo re dia Iserii.—Galesha 6:10.