Omakpokpọ​—Oborẹ Uvie rẹ Ọghẹnẹ Che Ru

“Ọ vwọ dianẹ COVID-19 rha dia ọga rọ guọnọ omaesivwon rẹ okpakpa vwẹ akpọneje-e na, e jẹ e roro nẹ o rhe che se mu ihwo vwẹ akpọ na-a. Avwanre se vwo imuẹro nẹ ọga rẹ akpọeje ọfa je cha vwomaphia vwẹ obaro na, ọtiọyena, ofori nẹ e muegbe hẹrhẹ.”​—Dr. Tedros Adhanom Ghebreyesus, director-general rẹ World Health Organization, May 22, 2023.

Ihwo buebun je rioja enẹna fikirẹ oborẹ ọga ri COVID-19 na soro. Igọmẹti vẹ ikoko re vwẹrote ẹdia rẹ omakpokpọ rẹ ihwo che muegbe hẹrhẹ ọga rẹ akpọeje ọfa rọ cha rhe na, ayen je sa vwẹ ukẹcha phia vwo si ebẹnbẹn ri jẹ omakpokpọ evwo rẹ avwanre hirharokuẹ enẹna no karekare?

Baibol na ta ota kpahen igọmẹti rọ cha nẹrhẹ avwanre vwo omakpokpọ. Ọ tare nẹ “Ọghẹnẹ rẹ odjuvwu na cha vwẹ uvie ọvo,” yẹrẹ igọmẹti ọvo vwo mu. (Daniẹl 2:44) Vwẹ otọ rẹ igọmẹti yena, o vwo “ohwo rẹ orere na ọvuọvo rọ sa tanẹ, Me mwọga-a.” (Aizaya 33:24) Ihwoeje che vwo omakpokpọ je sasa kerẹ eghene.​—Job 33:25.