“Urhi Ẹchọ vẹ Ẹguọnọ rẹ Igho Ghwẹ Emiamiavwe Buebun Rhe Vwe”

AKPỌ MI YERIN JOVWO

E vwiẹ vwẹ vwẹ Tiranë otọ orere rẹ Albania. Orua mẹ ghwe vwo igho ọtiọye-en. Ọsẹ mẹ wian gangan je ghwọrọ inọke buebun rere ọ sa vwọ vwẹrote avwanre. Dedena akpọ je gan kẹ avwanre. Ọke me vwọ hẹ omotete ọ ghene da vwẹ mamọ nẹ avwanre ivwiogbere. Vwẹ ọke buebun na, ọ dia ọkieje me vwọ mrẹ emu ria-a, mi tobọ vwo isabatu mi se vwo heri-i.

Ke me re ton uji echo phiyọ ọke me vwọ hẹ omotete. Ẹkẹvuọvo mi ru ọnana rere me sa vwọ chọn orua mẹ uko. Ọke vwọ yanran na elọkpa de mu vwe. Vwẹ 1988, me vwọ hẹ ẹgbukpe 14, ọsẹ mẹ de phi vwe yen isikuru re de yono emọ ri gbozighi. Me ghwọrọ ẹgbukpe ivẹ vwẹ etiyin ji yono iruo rẹ obo ra ruo ogba koko. Mi vwo vrẹn nẹ etiyin me ghene guọnọ yerin omamọ rẹ akpọ; ẹkẹvuọvo me mrẹ iruo-o. Iruo bẹn ẹmrẹ vwẹ Albania fikirẹ ebẹnbẹn rẹ oseghe rẹ usuon rọhẹ ẹkuotọ na. Ọnana da nẹrhẹ ofu dje vwe, igbeyan mẹ rẹ awanre keyen me vẹ ayen gba ghwọrọ ọke kuẹgbe, ki mi rhoma re ton uji echo phiyọ. Ukuotọ rọyen e de mu vwe vẹ igbeyan mẹ phiyọ uwodi ẹgbukpe erha.

Mi vwo nẹ uwodi rhe nu me da rhoma muomaphiyọ uji echo. Ugogo igho gbe hẹ Albania kirobo ri jovwo-o, ekuakua da re yanghan ku. Vwẹ uvwre rẹ ọke nana eje na me je nabọ mrẹ igho rọbọrọbọ vwo nẹ irueru re vwọso urhi ri mi vwobọ vwọ. Ọke rẹ avwanre vwo kpo uji echo re vwo mu igbeyan mẹ ivẹ yen me vwọ djẹ nẹ ẹkuotọ na rere e vwo ju vwe emuo kpo uwodi je dia oboyin ikpe buebun. Vwẹ ọke yena je me rọvwọn aye mẹ Julinda re, avwanre ji vwo ọmọshare.

Avwanre de ri shotọ vwẹ England. Me nabọ vwo owenvwe mi vwo ru ewene vwẹ akpeyeren mẹ vẹ orua mẹ, ẹkẹvuọvo me mrẹrẹ bẹnbẹn mi vwo wene iruemu mẹ. Me da rhoma ri vwobọ vwẹ uruemu rẹ urhi ẹchọ, udje nana ihuvwun egangan kọyen me shẹ. Me nabọ mrẹ igho vwẹ owian nana.

Ẹro vọ yen Julinda vwo ni owian nana? Jẹ ọyen ọvo vuẹ owan: “Albania me dia ghwanre, me vwọ hẹ omotete me choma mi vwo ru kemu kemu mi se vwo yeren uvi rẹ akpọ. Mi rorori nẹ igho yen cha nẹrhẹ avwanre vwo omavwerhovwẹn vwẹ akpeyeren, ọtiọyena ki mi nabọ bicha oborẹ Artan ruẹ na ro churobọ si efian eguon, uji echo, kugbe ihuvwun egangan rọ shẹ na, kemu kemu rọ sa nẹrhẹ avwanre vwo igho.”

Vwẹ 2002, ekuakua de ri wene igho da karẹ avwanre, avwanre gbi se yeren uvi rẹ akpọ rẹ avwanre guọnọ na-a. Obọ de te vwe ọke mi vwo muẹ ẹko rẹ ihuvwun egangan ra shẹ, a da rhoma mu vwe phiyọ uwodi.

OBORẸ BAIBOL NA WENE AKPEYEREN MẸ WAN

Ememerha yen Baibol na wene akpeyeren mẹ je me riẹnre-e. Ọtonphiyọ rẹ ukpe ri 2000, aye gbẹ ọshare ọvo re dia Iseri ri Jihova da ton uyono ri Baibol phiyọ vẹ Julinda. Mi ghwe vwo owenvwe mi vwo yono Baibol na-a, kidie mi no nẹ me cha mrẹ omavwerhovwẹn vwọ-ọ. Ẹkẹvuọvo Julinda vwo ẹguọnọ rẹ uyono na mamọ. Ọ da ta: “Orua mẹ vwo ẹguọnọ rẹ ẹga ọtiọyena mi muọghọ kẹ Baibol na mi ji vwo ẹguọnọ rọyen. Me ghene guọnọ riẹn obo ri Baibol na yonori, oma vwerhen ovwẹ nẹ mi nene Iseri na yono kugbe. Uyono buebun vwẹ Baibol na je vwe mamọ. Obo mi yonori chọn vwẹ uko vwo ru ewene evo vwẹ akpeyeren mẹ. Dedena ẹro mi vwo ni igho ji ri wene-e, asan ra gba ẹghwẹre phiyọ ọyen ọ je hepha, ẹwẹn nana re vwe ri te ọke re vwo mu Artan phiyọ uwodi. Obo re phiare na de ri wene iroro mẹ kare kare. Me da re mrẹvughe nẹ oborẹ Baibol na ta kpahen igho ghini uyota. Avwanre vwọ tua igho kerẹ asan ra da mrẹ nẹ avwanre che mu oni igho, dedena oma je vwerhen avwanre-e. Ke me re riẹn nẹ ofori nẹ me yan nene odjekẹ rẹ Ọghẹnẹ kare kare.”

Vwẹ 2004 mi de nẹ uwodi rhe, ọmọke vwọ wan nu me da rhoma davwen me vwọ rhoma ton ihuvwun egangan ẹshẹ phiyọ. Julinda rhe vwo omavwerhovwẹn kpahen oka rẹ eki yena ọfa-a, o vwo ota ọvo rọ tare rọ nẹrhẹ mi brevun kpiroro. Ọ da ta: “Me rha guọnọ igho wẹn ọfa-a, me guọnọ ọshare mẹ, me je guọnọ ọsẹ re emọ mẹ vwevunrẹ orua na.” Obo rọ tare na gbevwunu, jẹ ota rọyen na gbare. Me yanjẹ orua mẹ vwo ikpe buebun. Mi ji roro kpahen oja sansan re me rere fikirẹ igho re me vwọ tua vwẹ idjerhe rẹ ọghware. Mi de brorhiẹn me vwọ dobọ rẹ eki na ji, je kẹnoma kẹ erharhe rẹ igbeyan mẹ na.

Obo ri me djobọte akpeyeren mẹ yen ọke mi vwo nene aye mẹ vẹ emọ mẹ ivẹ kpo Ọguan Ruvie rẹ Iseri ri Jihova. Oma vwerhen ovwẹ kpahen ihwo re me mrẹre vwẹ etiyin, ayen nabọ vwo ọdavwẹ rẹ ihwo efa. Ọke vwọ yanran na, me da ton uyono ri Baibol phiyọ.

Mi yono vwẹ Baibol na nẹ, “ubiupho rẹ igho ọye ghwa okpetu na ejobi cha urhuru sivwe nana ọye sorọ rẹ ihwo buebu [vwọ] . . . vwẹ edada vẹ obi vwọ sa udu rayen.” (1  Timoti 6:​9, 10) Oborẹ ẹkpo ri Baibol na tare na ghini uyota, kidie ọ phia kẹ vwẹ komobọ re! Mi viẹ diekpọvwẹ kpahen oka rẹ akpọ ri mi yerin jovwo na, kidie o ghini djobọte vwe vẹ orua mẹ mamọ. (Galesha 6:⁠7) Mi vwo yono kpahen ẹguọnọ rẹ Jihova vẹ Ọmọ rọyen Jesu Kristi vwo kpahen avwanre, mi de ri ru ewene vwẹ akpeyeren mẹ. Ke me vwẹ ọdavwẹ rẹ ihwo efa kobaro vwọ kẹ ọmẹ, ọnana ji churobọ si me vwọ ghwọrọ ọke kuẹgbe vẹ orua mẹ.

ERERE RO TE VWE OBỌ

Me ghene mrẹ erere kidie me yan nene uchebro ri Baibol nana: “Si oma wẹn nẹ urhuru si vwe rẹ igho jẹn obo ri wo vwori da wẹ ẹro.” (Hibru 13:⁠5) Enẹna ẹwẹn mẹ te otọ re, mi ji vwo ẹwẹn rẹ obrorhiẹn rọ fonron. Ọnana kẹ vwẹ aghọghọ ri mi vwori jovwo-o. Oyerinkugbe mẹ vẹ aye mẹ rhoma re ganphiyọ, avwanre ji sikẹre emọ rẹ avwanre vrẹ obo ri jovwo.

Mi ke roro jovwo nẹ avwanre de vwo igho buebun kẹ avwanre che vwo omavwerhovwẹn. Enẹna me re mrẹ oborẹ urhi ẹchọ vẹ ẹguọnọ rẹ igho vwọ ghwẹ emiamiavwe buebun rhe vwe. Avwanre ghwe vwo igho buebun ọtiọye-en, jẹ avwanre vwo obo re ma ghanre vwẹ akpeyeren, ọyen oyerinkugbe rẹ avwanre vẹ Jihova. Ra vwọ ga Jihova kuẹgbe kerẹ orua kẹ avwanre uvi rẹ omavwerhovwẹn.