ENỌ RẸ IGHENE NỌ
Die Yen Ofori nẹ Mi ru Mi de Bromaphiyame Nu?—Ẹbẹre 2: Sẹro Ọyọnregan Wẹn
Baibol na tare nẹ “O vwo emuesiri ọvuọvo rẹ Ọrovwohwo se sinu kẹ ihwo re yanre phiọphiọ-ọ.” (Une rẹ Ejiro 84:11) Die yen o mudiaphiyọ a vwọ ‘yan phiọnphiọn’ yẹrẹ sẹro ọyọnregan? O mudiaphiyọ e vwo yeren akpọ vwẹ idjerhe ro djerephia nẹ e ruẹ nene ive re ve kẹ Jihova ọke ra vwọ vwẹ oma kpahotọ kẹ. (Aghwoghwo 5:4, 5) Mavọ yen wọ sa vwọ sẹro ọyọnregan wẹn ọke wo de bromaphiyame nu?
Vwẹ uyovwinrota nana
Rhe chirakon rẹ ebẹnbẹn
Ẹkpo ri Baibol: “Avwanre che rhiẹromrẹ ukpokpogho buebun, tavwen a ke ro Uvie rẹ Ọghẹnẹ na.”—Iruo rẹ Iyinkọn Na 14:22.
Obo ro mudiaphiyọ: Ra vwọ ta uyota, Inenikristi eje che rhiẹromrẹ egbabọse vwẹ akpeyeren. Wo che hirharoku ebẹnbẹn evo, kerẹ ehwẹjẹ yẹrẹ ẹvwọsuọ kidie nẹ wẹwẹ Onenikristi. O vwo efa rẹ ihworakpọ eje rhiẹromrẹ, kerẹ ebẹnbẹn rẹ igho yẹrẹ ega.
Obo re se rhẹro rọyen: Vwẹ ọke evo, ẹdia wẹn che wene vwẹ akpeyeren, ọkiọvo vwẹ idjerhe ro che je we-e. Baibol na tare nẹ emu ọbrabra sa phia kẹ kohwo kohwo—te Inenikristi kugbe ihwo ri jẹ Inenikristi ẹdia.—Aghwoghwo 9:11.
Obo wo se ru: Rọ vwọ dianẹ wọ riẹnre nẹ wo che vwo egbabọse na, wo se muegbe wo vwo hirharoku ayen. Ni egbabọse kerẹ uphẹn wo vwo ru esegbuyota wẹn ganphiyọ je vwẹroso Jihova vrẹ obo ri jovwo. (Jems 1:2, 3) Ọke vwọ yanran na, oborẹ wo rhiẹromrẹ ko se mu we vwọ ta oka rẹ ota nana rẹ ọyinkọn Pọl tare nẹ: “Mi vwo ẹgba mi vwo ru erọnvwọn ejobi womarẹ ohwo rọ kẹ vwẹ ogangan.”—Filipae 4:13.
IKUEGBE RẸ OBO RE PHIARE. “Mi vwo bromaphiyame nu, o rhe kri-i, iniọvo mẹ emeshare de she nẹ ukoko na, ọsẹ vẹ oni mẹ de shero ọga, mẹvwẹ komobọ de ji shero ọga. Ọ rha lọhọ kẹ vwẹ mi ji vwo she yẹrẹ ọ vwọ chọrọ ovwẹ ẹro nẹ ọke me vwọ vwẹ oma mẹ kpahotọ kẹ Ọghẹnẹ, mi ve kẹ nẹ ẹga rọyen yen cha dia obo re ma ghanre vwẹ akpeyeren mẹ. Dedena omaẹvwọkpahotọ mẹ yen obo re vwẹ ukẹcha kẹ vwẹ vwo yerin ghene egbabọse yena.”—Karen.
Iroroẹjẹ: Yono kpahen Josẹf. Wo se se ikuegbe rẹ akpeyeren rọyen vwẹ Jẹnẹsis uyovwin 37 vẹ 39 re te 41. Roro: Ebẹnbẹn vọ re rhẹro rọye-en yen o rhiẹromrẹ, kẹ mavọ yen o vwo yerin ghene ayen? Idjerhe vọ yen Jihova vwọ vwẹ ukẹcha kẹ Josẹf?
Wọ guọnọ ukẹcha efa?
Se:
Danlodu:
Rha sian edavwini
Ẹkpo ri Baibol: “Urhurusivwe romobọ yen siẹ ohwo je riẹriẹ rua ọdavwini.”—Jems 1:14.
Obo ro mudiaphiyọ: Ọke evo, avwanre eje hirharokuẹ edavwini re vwo nene urhurusivwe romobọ re sa nẹrhẹ e ru obo re brare siẹrẹ e rhe sun aye-en.
Obo re se rhẹro rọyen: Wo ji che nene “ojevwe rẹ ugboma” muabọ siẹrẹ wo de bromaphiyame nu. (2 Pita 2:18) Wọ sa tobọ hirharoku ọdavwini wo vwo bru ehware tavwen wọ ke rọvwọn.
Obo wo se ru: Brorhiẹn asaọkiephana tavwen ọdavwini na ke rhe, rere wo vwo jẹ orhiẹn rọ chọre ebro fikirẹ urhurusivwe romobọ. Karophiyọ, Jesu tare nẹ: “Ohwo vuọvo cha sa dia ọviẹn vwọ kẹ inini ivẹ-ẹ.” (Matiu 6:24) Wọ sa jẹ ohwo ru wọ guọnọre nẹ ọ dia onini wẹn. Jẹ ọ dia Jihova. O vwo oborẹ urhurusivwe ọbrabra gan te-e, wọ sa jẹ ojẹ wo vwo je ruo.—Galesha 5:16.
Iroroẹjẹ: Riẹn asan ru wọ da gan kugbe asan ru wọ da vwiẹrẹ. Nene ihwo re cha nẹrhẹ omamọ uruemu ro rhe we teyenphia mu ugbeyan. Kẹnoma kẹ ihwo, asan, kugbe ẹdia re cha nẹrhẹ ọ bẹn wo vwo ru obo ri shephiyọ.—Une rẹ Ejiro 26:4, 5.
Wọ guọnọ ukẹcha efa?
Se:
““Mavọ me sa Vwọ Kẹnoma kẹ Ọdavwini?”
““Mavọ Mi se Vwo si Ẹwẹn mẹ nẹ Urhurusivwe rẹ Ehware?”
Rhe ruẹ oruru wẹn ganphiyọ
Ẹkpo ri Baibol: “Je wian gangan ọtiọyen . . . re duvwun oba, rere ovwan vwo jẹ evwiẹrẹ ẹdia.”—Hibru 6:11, 12.
Obo ro mudiaphiyọ: Ohwo ro muẹro phiyọ iruo rọye-en, oruru rọyen sa fobọ kpotọ, ọ me rhe vwiẹrẹ.
Obo re se rhẹro rọyen: Ọ sa dianẹ oma nabọ vwerhen owẹ wọ je vọn vẹ oruru ọke wo vwo bromaphiyame nu. Wo vwo ẹguọnọ ri Jihova mamọ. Jẹ ọmọke ọvo da wan nu, wọ sa mrẹ bẹnbẹn wo vwo nyẹme ri Jihova ọkieje vwẹ kemu kemu, ọyena sa nẹrhẹ ẹwẹn wẹn kuọrọn, ọ me je nẹrhẹ oruru wẹn shekpotọ.—Galesha 5:7.
Obo wo se ru: Rhe ruẹ obo ri shephiyọ, ọ da tobọ dianẹ vwẹ ọke evo wo vwo ẹwẹn wo vwo ruo-o. (1 Kọrẹnt 9:27) Jẹ asaọkiephana, sikẹrẹ Ọsẹ wẹn rọhẹ obodjuvwu womarẹ wọ vwọ nabọ riẹn phiyọ je ta ota kẹ ọkieje vwọrẹ ẹrhovwo. Vwọba, rhe nene ihwo ri vwo omavwerhovwẹn rẹ ayen vwọ ga Jihova mu ugbeyan.
Iroroẹjẹ: Karophiyọ nẹ Jihova vwo ẹguọnọ wẹn mamọ, ọ je choma rọ vwọ cha wẹ uko. Wo no nẹ ophu wẹn muo ọ da dianẹ oruru wẹn shekpotọ vwẹ uvwre ọke ọvo-o. Baibol na tare nẹ: “Ọ vwẹ ogangan kẹ ohwo rẹ oma rhọ; ọ rẹ ogangan rheri-i ọ me vwọ ba kẹ.” (Aizaya 40:29) Ọke vwọ yanran na, o che bruba ẹgbaẹdavwọn wẹn wọ vwọ rhoma vwo oruru.
Wọ guọnọ ukẹcha efa?
Ẹkpo na: Wọ da sẹro ọyọnregan wẹn, wọ cha nẹrhẹ ubiudu ri Jihova ghọghọ! (Isẹ 27:11) Oma cha vwerhọn nẹ wọ jẹ ojẹ wọ vwọ ka ẹbẹre rọyen, ọ je cha kẹ wẹ erọnvwọn eje wọ guọnọre rere wọ sa vwọ sen edavwini rẹ Eshu.