Obo ra Nẹrhovwo Wan​—Ẹrhovwo rẹ Ọrovwori na Yen me Yovwin?

Ẹkpahọnphiyọ ri Baibol Na

Ẹrhovwo rẹ Ọrovwori na yono avwanre obo ra nẹrhovwo wan vẹ obo ro fori nẹ a nẹrhovwo kpahen. Jesu reyọ ẹrhovwo nana vwọ kpahenphiyọ oyare rẹ idibo rọyen, ayen vwọ rẹ nẹ: “Ọrovwori, yono avwanre obo ra nẹrhovwo.” (Luk 11:1) Ẹkẹvuọvo, ọ dia Ẹrhovwo rẹ Ọrovwori na yẹrẹ ẹrhovwo rẹ Ọsẹ Avwanre na ọvo yen Ọghẹnẹ rhiabọreyọ-ọ.a Ukperẹ ọtiọyen, Jesu vwiro djudje rẹ oka rẹ ẹrhovwo rẹ Ọghẹnẹ rhiabọreyọ.

Vwẹ uyovwinrota nana

• Eta vọ yehẹ Ẹrhovwo rẹ Ọrovwori Na?

• Die yen otọ rẹ Ẹrhovwo rẹ Orovwori Na?

• A vwọ vwanriẹn eta rẹ Ẹrhovwo rẹ Ọrovwori na yen idjerhe vuọvo ra sa vwọ nẹrhovwo?

• Mavọ yen ofori nẹ a nẹrhovwo wan?

• Ẹrhovwo efa rehẹ Baibol na

Eta vọ yehẹ Ẹrhovwo rẹ Ọrovwori Na?

A vwẹ eta re fẹnẹ ohwohwo vwọ fan ẹrhovwo rẹ Ọrovwori na, rọhẹ Matiu 6:​9-13 vwẹ efanfan ri Baibol sansan. E jẹ a mrẹ udje ivẹ.

Efanfan rẹ Akpọ Kpokpọ: “Ọsẹ rẹ avwanre rọhẹ obodjuvwu, e jẹ e ru odẹ wẹn fon. Jẹ Uvie wẹn rhe. Jẹ e ru ọhọre wẹn vwẹ otọrakpọ na kirobo rọ hepha vwẹ obodjuvwu. Kẹ avwanre ibrẹdi rẹ ẹdẹ ri nonẹna; wọ je vwẹ osa rẹ avwanre vwo ghovwo avwanre, kirobo rẹ avwanre ji vwo ghovwo ihwo re riosa rẹ avwanre. Wọ reyọ avwanre rua evunrẹ ọdavwini-i, ẹkẹvuọvo sivwin avwanre vwo nẹ obọ rẹ ohwo umwemwu na.”

Baibol Ọfuanfon Na: “Ọsẹ rẹ avwanre rọ hẹ obo odjuvwu, Jẹn avwanre vwẹ ọghọ kẹ ọde wẹn. Jẹn uvie wẹn rhe, ru ẹguọnọ wẹn vwẹ akpọ na kirobo re ruẹ vwẹ obo odjuvwu. Emu ri kẹdẹ kẹdẹ vwẹ ọ ri nonẹ kẹ avwanre. Vwẹ imwemwu rẹ avwanre rhovwo avwanre, Kirobo me vwo rhovwo ọrivẹ rẹ avwanre. Wo suẹn avwanre ro ọdavwini-i, ẹkẹvuọvo si avwanre nẹ ukpokpogho.”b

Die yen otọ rẹ Ẹrhovwo rẹ Orovwori Na?

Iyono ri Jesu vẹ obo rehẹ ẹbẹre ichekọ rẹ Isiesi Ọfuanfon na rhọnvwephiyọ ohwohwo, ọtiọyena e se rhẹro rọyen nẹ ẹbẹre ichekọ ri Baibol na cha ta ota kpahen oborẹ Ẹrhovwo rẹ Ọrovwori na mudiaphiyọ.

“Ọsẹ rẹ avwanre rọhẹ obodjuvwu”

Ọyen obo ri fori dẹn e vwo se Ọghẹnẹ “Ọsẹ rẹ avwanre” kidie ọyen ma avwanre, ọyen je kẹ avwanre arhọ.​—Aizaya 64:8.

“E jẹ e ru odẹ wẹn fon”

Ofori nẹ e muọghọ kẹ odẹ na Jihova, rọ dia odẹ rẹ Ọghẹnẹ, e mi ji ruo fon. Ihworakpọ vwobọ vwẹ orufon rẹ odẹ na ọke rẹ ayen da vuẹ ihwo efa kpahen iruemu rọyen kugbe ọhọre rọyen.​—Une rẹ Ejiro 83:18; Aizaya 6:3.

“Jẹ Uvie wẹn rhe”

Uvie rẹ Ọghẹnẹ ọyen usuon rọhẹ odjuvwu ri Jesu dia Ovie rọyen. Jesu yono avwanre nẹ a nẹrhovwo rere uvie nana vwo sun otọrakpọ na ejobi.​—Daniẹl 2:44; Ẹvwọphia 11:15.

“Jẹ e ru ọhọre wẹn vwẹ otọrakpọ na kirobo rọ hepha vwẹ obodjuvwu”

rẹ umiovwo yẹrẹ ughwu hẹ obodjuvwu na-a, ọhọre rẹ Ọghẹnẹ vwọ kẹ otọrakpọ na, ọyen ọ rẹ ihworakpọ vwọ dia evun rọyen vwẹ ufuoma kugbe ofuvwegbe.​—Une rẹ Ejiro 37:​11, 29.

“Kẹ avwanre ibrẹdi rẹ ẹdẹ ri nonẹna”

Vwẹ ọke ri Jesu, ibrẹdi ọyen emu ọvo rọ ghanre mamọ. E jẹ a karophiyọ nẹ Ọmemama rẹ avwanre ọvo yen sa kẹ avwanre oborẹ avwanre guọnọre e se vwo yerin.​—Iruo rẹ Iyinkọn Na 17:​24, 25.

“Wọ je vwẹ osa rẹ avwanre vwo ghovwo avwanre, kirobo rẹ avwanre ji vwo ghovwo ihwo re riosa rẹ avwanre”

Vwẹ ẹkpo nana, ota na “osa” ọyen ota ọfa re vwo se umwemwu. (Luk 11:4) Ihworakpọ eje irumwemwu, ọtiọyena ayen guọnọ evwoghovwo. Ẹkẹvuọvo avwanre da guọnọ evwoghovwo rẹ Ọghẹnẹ, kẹ ofori nẹ avwanre vwo owenvwe re vwo ghovwo ihwo efa ri ru umwemwu vwọso avwanre.​—Matiu 6:​14, 15.

“Wọ reyọ avwanre rua evunrẹ ọdavwini-i, ẹkẹvuọvo sivwin avwanre vwo nẹ obọ rẹ ohwo umwemwu na”

Jihova Ọghẹnẹ vwẹ ọke vuọvo vwọ davwan avwanre nẹ e vwo ru obo re chọre-e. (Jems 1:13) Ẹkẹvuọvo “ohwo umwemwu na,” ọyen Eshu rọ dia Idẹbono​—re ji se “Ọ rọ davwan ihwo nẹ na” yen davwan avwanre nẹ. (1 Jọn 5:19; Matiu 4:​1-4) Avwanre rẹ Jihova nẹ ọ chọn avwanre uko vwo nyupho rọyen siẹrẹ e de hirharoku ọdavwini re vwo ru obo re chọre.

A vwọ vwanriẹn eta rẹ Ẹrhovwo rẹ Ọrovwori na yen idjerhe vuọvo ra sa vwọ nẹrhovwo?

Udje yen Jesu vwẹ Ẹrhovwo rẹ Ọrovwori na vwo dje. Ọ dia a cha vwanriẹn eta na nẹ ota fiota-a. Tavwen Jesu ke vwẹ Ẹrhovwo rẹ Ọrovwori na vwọphia, Ọ vwẹ orhọesio phia nẹ: “Ọke wọ da nẹrhovwo, wo dje orọnvwọn ọvuọvo ẹvwẹvwanriẹ-ẹn.” (Matiu 6:7) Ọ vwọ vwẹ ẹrhovwo rẹ udje na vwọphia vwẹ ẹdia ọfa, ọ reyọ eta re fẹnẹre vwo ruiruo.​—Luk 11:​2-4.

Idjerhe ro me yovwin ra nerhovwo wan, ọyen a vwọ vuẹ Ọghẹnẹ obo rehẹ ẹwẹn avwanre eje.​—Une rẹ Ejiro 62:8.

Mavọ yen ofori nẹ a nẹrhovwo wan?

Ẹrhovwo rẹ Ọrovwori na, ọyen omamọ rẹ udje rẹ obo ra nẹrhovwo wan vwẹ idjerhe rẹ Ọghẹnẹ de se rhiabọreyọ. Jokaphiyọ oborẹ ẹrhovwo nana vẹ awọreta efa vwẹ Baibol na vwọ rhọnvwephiyọ ohwohwo.

• Ọghẹnẹ ọvo yen a nẹrhovwo rhe

  Ẹkpo ri Baibol: “Vwẹ erọnvwọn eje, womarẹ ẹrhovwo kugbe oyare kugbe akpẹvwẹ, ovwan rha ta ọdavwẹ rẹ ovwan kẹ Ọghẹnẹ.”​—Filipae 4:6.

  Obo ro mudiaphiyọ: Ọghẹnẹ ọvo yen ofori nẹ a nẹrhovwo rhe, ọ dia Jesus, Meri, yẹrẹ ihwo efuanfon ri ghwure-e. Eta na “Ọsẹ rẹ Avwanre,” re tuẹn ẹrhovwo rẹ Ọrovwori na phiyọ na, yono avwanre nẹ Jihova Ọghẹnẹ ọvo yen a nẹrhovwo rhe.

• Nẹrhovwo kẹ erọnvwọn ri shephiyọ ọhọre rẹ Ọghẹnẹ

  Ẹkpo ri Baibol: “Kemu kemu rẹ avwanre nọre vwo nene ọhọre rọyen, o nyo avwanre.”​—1 Jọn 5:14.

  Obo ro mudiaphiyọ: A sa nẹrhovwo kpahen kemu kemu ro shephiyọ ọhọre rẹ Ọghẹnẹ. Jesu yono avwanre oborẹ ọhọre rẹ Ọghẹnẹ ghanre te rọ vwọ ta vwẹ Ẹrhovwo rẹ Ọrovwori na nẹ “jẹ e ru ọhọre wẹn.” Avwanre sa riẹn ọhọre rẹ Ọghẹnẹ vwọ kẹ otọrakpọ na vẹ ihworakpọ siẹrẹ e de yono Baibol na.

• Nẹrhovwo kpahen ọdavwẹ romobọ

  Ẹkpo ri Baibol: “Mu oghwa wẹn nyẹ Ọrovwohwo, kọ sẹro wẹ.”​—Une rẹ Ejiro 55:22.

  Obo ro mudiaphiyọ: Ọghẹnẹ nẹ ọdavwẹ rẹ avwanre sua. Ọtiobo rẹ Jesu djunute oyare romobọ sansan vwẹ Ẹrhovwo rẹ Ọrovwori na, avwanre je sa nẹrhovwo kpahen ọdavwẹ rẹ avwanre ri kẹdi kẹdẹ, odjekẹ siẹrẹ a da guọnọ brorhiẹn eghanghanre, obicha vwẹ ọke rẹ ebẹnbẹn, kugbe evwoghovwo rẹ imwemwu rẹ avwanre.c