Obo ra sa Vwọ Họnre Vwọso Erharhe Urhurusivwe

1. Uyota vọ yen a riẹn kpahen ihworakpọ eje re gbaree?

WO VWO urhurusivwe ọgangan wo vwo ru oborẹ Jihova rhọnvwephiyọọ? Ọ da dia ọtiọyen, wo no nẹ ọdavwini wẹn gan vrẹ ọ rẹ ihwo efaa. Baibol na tare nẹ: ‘O vwo ọdavwini vuọvo rẹ ovwan rhiẹromrẹ ro ji rhi te ihwo efa omaa.’ (1 Kọr. 10:13) Ọnana mudiaphiyọ nẹ korharhe korharhe rẹ urhurusivwe ru wo nene muabọ, ihwo efa ji hirharokuo re. Wo se phi ohọnre tiọyena kparobọ womarẹ ukẹcha ri Jihova kidie ọ dia wẹwẹ ọvo yen herọọ.

2. Erhọ yen edavwini evo rẹ Inenikristi kugbe ihwo ra vwẹ Baibol yono nene muabọ? (Ni ihoho na.)

² Baibol na da je ta: “Urhurusivwe romobọ yen siẹ ohwo je riẹriẹ rua ọdavwini.” (Jems 1:14) Obo ri si ohwo ọvo urhuru sa fẹnẹ obo ri si ohwo ọfa urhuru. Kerẹ udje, Inenikristi evo se hirharoku ọdavwini ri vwo nene ohwo ọfa gbe ọfanrhiẹn; efa mi rhe nene ọshare vẹ ọshare vwerhẹn yẹrẹ aye vẹ aye vwerhẹn. Evo re tobọ dobọ rẹ eno rẹ ihoho rẹ ihwo re banphiyọ ji, sa rhoma vwo urhurusivwe ọgangan rẹ ayen vwọ rhoma no. Ihwo buebun re dobọ rẹ ihuvwun egangan yẹrẹ idi-ẹda ji, ji hirharokuẹ egbabọse tiọyena. Enana urhurusivwe evo rẹ Inenikristi kugbe ihwo ra vwẹ Baibol yono nene muabọ. Vwẹ ọkievo, oma se ru avwanre kirobo ro ruẹ ọyinkọn Pọl, ro siri nẹ: “Ọke me da guọnọ ruẹ obo ri yovwirin, obo re brare kọyen ro ẹwẹn mẹ.”​—Rom 7:21.

3. Die yen orharhe urhurusivwe re nene muabọ ọke grongron re se ru vwẹ oma rẹ ohwo?

³ Ọ da dianẹ wo nene orharhe urhurusivwe muabọ ọke grongron re, wo se no nẹ wo rhe vwo ẹgba ru wọ cha vwọ họnre vwọso ọdavwini ọfaa. Wo ji se no nẹ iphiẹrophiyọ rha herọ kẹ wẹ ọfaa, kerẹsiẹ a da mrẹ nẹ Jihova kpairoro vrẹ wẹ fikirẹ orharhe urhurusivwe na. Jẹ o muwẹro nẹ iroro tiọyena dia uyotaa! Re vwo dje oboresorọ fiotọ, a cha kpahenphiyọ enọ ivẹ vwẹ uyono nana: (1) Tivọ yen iroro rẹ jẹ ẹgba vẹ iphiẹrophiyọ evwo nurhe? (2) Mavọ yen wo se vwo phi ohọnre rẹ erharhe rẹ urhurusivwe kparobọ?

ẸRO RẸ “OHWO UMWEMWU NA” GUỌNỌRE NẸ E VWO NI OMA AVWANRE

4. (a) Diesorọ Eshu vwọ guọnọ nẹ e no nẹ e vwo ẹgbaa? (b) Diesorọ a sa vwọ tanẹ ẹgba ra vwọ họnre vwọso ọdavwini kanre avwanree?

⁴ Eshu guọnọre nẹ e no nẹ avwanre vwo ẹgba a da davwen avwanre nii. Jesu riẹn ọnana ọke ro vwo yono idibo rọyen obo ra nẹrhovwo nẹ: ‘Wọ reyọ avwanre rua evunrẹ ọdavwinii, ẹkẹvuọvo sivwin avwanre vwo nẹ obọ rẹ ohwo umwemwu na.’ (Mat. 6:13) Eshu roro nẹ ohworakpọ vuọvo che se nyẹme ri Jihova o de hirharoku ọdavwinii. (Job 2:4, 5) Diesorọ Eshu vwo roro ọtiọyen? Kidie urhurusivwe romobọ rẹ Eshu yen siro je riẹriẹ ro ọdavwini rọ nẹrhẹ nẹ ọ rha fuevun kẹ Jihovaa. O phẹnre dẹn nẹ, o roro nẹ avwanre pha kerẹ ọyen, nẹ a cha kpairoro vrẹ Jihova siẹrẹ a da davwen avwanre ni. Eshu tobọ roro nẹ Ọmọ rẹ Ọghẹnẹ rọ dia ohwo rọ gbare se ru obo re chọre ọ dahẹ ọdavwini! (Mat. 4:8, 9) Di roro: Ẹgba ra vwọ họnre vwọso erharhe rẹ urhurusivwe ghene kanre avwanre? Kakaka! Avwanre rhọnvwephiyọ eta rẹ ọyinkọn Pọl siri nẹ: “Mi vwo ẹgba mi vwo ru erọnvwọn ejobi womarẹ ohwo rọ kẹ vwẹ ogangan.”​—Fil. 4:13.

5. Mavọ yen e ru riẹn nẹ Jihova vwo imuẹro nẹ avwanre sa họnre vwọso erharhe urhurusivwe?

⁵ Vwọ fẹnẹ Eshu, Jihova vwo imuẹro nẹ a sa họnre vwọso erharhe rẹ urhurusivwe. Mavọ yen e ru riẹn ọnana? Kidie Jihova mraro rọyen phiyotọ nẹ otu gbidigbidi re fuevun che sivwinrhọ vwẹ ukpokpogho rode na. Roro kpahen oborẹ ọyena mudiaphiyọ. Jihova rọ dia ohwo ro gun efiaan, yen tare nẹ ihwo buebun, ọ dia imihwo krẹẹn re “fọnrhọn iwun igrongron rayen ji ru ayen fon vwevunrẹ ọbara rẹ Omogodẹ na” cha ro akpọ ọkpokpọ vẹ ẹwẹn obrorhiẹn rọ fonro. (Ẹvwọ. 7:9, 13, 14) O phẹnre dẹn nẹ, Jihova ni avwanre kerẹ ihwo ri jẹ ẹgba evwo re cha sa họnre vwọso erharhe rẹ urhurusivwee.

6-7. Diesorọ Eshu vwọ guọnọ nẹ e no nẹ e vwo ẹgba ra vwọ họnre vwọso ọdavwinii?

⁶ Ọ dia Eshu de guọnọ nẹ e no nẹ ẹgba kanre avwanre ọvoo, ẹkẹvuọvo ọ je guọnọ nẹ e vwo iphiẹrophiyọọ​—kerẹsiẹ a da mrẹ nẹ Jihova kpairoro vrẹ avwanre fikirẹ erharhe urhurusivwe. Diesorọ Eshu vwo roro ọtiọyen? Kidie ọyen yen Jihova brorhiẹn hwe nẹ o muwan rẹ arhọ ri bẹdẹẹ, ọtiọyena Eshu rhe vwo iphiẹrophiyọ vuọvoo. (Jẹn. 3:15; Ẹvwọ. 20:10) Aphro herọọ nẹ, Eshu je guọnọ nẹ avwanre vwo iphiẹrophiyọ vuọvoo​—ma rho rọ vwọ dianẹ avwanre rhẹro ebruphiyọ ro se te obọọ na. Ẹkẹvuọvo, iphiẹrophiyọ kanre avwanree. Vwọrẹ uyota, Baibol na vwẹ imuẹro kẹ avwanre nẹ Jihova cha kpairoro vrẹ avwanree, nẹ ọ cha cha avwanre uko. Ọ ‘guọnọre nẹ ohwo vuọvo ghwọrọọ, ukperẹ ọtiọyen ọ guọnọre nẹ ihwo eje kurhẹriẹ.’​—2 Pita 3:9.

⁷ Vwọrẹ uyota, e de vwo imuẹro nẹ iphiẹrophiyọ vẹ ẹgba ra vwọ họnre vwọso erharhe urhurusivwe kanre avwanre, kọyen oborẹ Eshu guọnọre nẹ avwanre roro yen e roro. E de vwo ọnana vwẹ ẹwẹn, ọ sa nẹrhẹ owenvwe re vwo mudiagan hirharokuo ganphiyọ.​—1 Pita 5:8, 9.

OBORẸ OMA RUẸ AVWANRE FIKIRẸ ẸDIA RẸ UMWEMWU RẸ AVWANRE HEPHA

8. Vwọ vrẹ erharhe iruemu, die yen umwemwu churobọ si? (Une rẹ Ejiro 51:5) (Ni “Oborẹ Ota Nana Mudiaphiyọ.”)

⁸ Vwọ vrẹ Eshu, o ji vwo orọnvwọn ọfa rọ sa nẹrhẹ e roro ne ẹgba vẹ iphiẹrophiyọ ra vwọ họnre vwọso erharhe urhurusivwe rhe avwanree. Ọyen die? Jẹgba ra riuku rọyen mie ọsẹ vẹ oni rẹ avwanre rẹsosuọ.a​—Job 14:4; se Une rẹ Ejiro 51:5.

9-10. (a) Die yen ẹdia rẹ umwemwu rẹ Adam vẹ Ivi hepha ru vwẹ oma rayen? (Ni uhoho na.) (b) Die yen jẹgba ru vwẹ oma rẹ avwanre?

⁹ Roro kpahen oborẹ jẹgba ru vwẹ oma rẹ Adam vẹ Ivi. Ayen vwo gbevwọso Jihova nu, ayen de siomanu je davwẹngba vwo rhurhu oma rayen. Vwọ kpahen oborẹ ayen ruru na, Insight on the Scriptures da ta: “Umwemwu da sọ abe, ẹnwan, oshọ kugbe omavovwẹ kẹ ayen.” Kọ ghwa họhọ nẹ a kanre Adam vẹ Ivi phiyọ uwevwin rẹ ivun ẹne ọvo hẹ evunrẹ rọyen. Adam vẹ Ivi sa yan nẹ uvun ọvo kpo ọfa jẹ ayen cha sa yan nẹ uwevwin na ruẹ otafee. Ayen sa vrabọ rẹ ẹdia rẹ jẹgba rẹ ayen hepha naa.

¹⁰ Vwọrẹ uyota, ẹdia rẹ avwanre vẹ ọ rẹ Adam vẹ Ivi hepha dia ọvoo. Ọsẹ vẹ oni rẹ avwanre rẹsosuọ cha sa mrẹ erere nẹ ọtanhirhe na rhee, jẹ ọtanhirhe na se ru avwanre fon vwo nẹ abọ rẹ umwemwu je kẹ avwanre ẹwẹn obrorhiẹn rọ fonro. (1 Kọr. 6:11) Dedena, avwanre riuku rẹ umwewmu vẹ jẹgba. Ọtiọyena, o rhe gbe avwanre unu siẹrẹ e de vwo ẹwẹn rẹ abe, ẹnwan, oshọ vẹ omavovwẹẹ. Vwọrẹ uyota, Baibol na tare nẹ ọkieje yen umwemwu vwo vwo ẹgba vwẹ oma rẹ ihworakpọ. Ọ tobọ ru ọtiọyen ‘vwẹ enu rẹ ihwo ri [ji rhi] ru umwemwu kerẹ Adamuu.’ (Rom 5:14) Dede nẹ ọyena ghwa dia obo re vwerhen omaa, ofori e vwo roro nẹ ẹgba vẹ iphiẹrophiyọ kanre avwanree. A sa sen erharhe iroro tiọyena. Vwẹ idjerhe vọ?

11. Die yen ofori nẹ e ru e de no nẹ ẹgba kanre avwanre, kẹ diesorọ? (Rom 6:12)

¹¹ Siẹrẹ e de no nẹ ẹgba rhe rhe avwanree, nẹ a cha sa họnre vwọso erharhe rẹ urhurusivwee​—e se no nẹ jẹgba rọhẹ oma rẹ avwanre ọyen “ta ota na,” ofori a vwọ kerhọ kẹẹ. Diesorọ? Kidie Baibol na yonori nẹ ẹ jẹ a vwẹ uphẹn kẹ umwemwu o ‘sun kerẹ ovie’ vwẹ enu rẹ avwanree. (Se Rom 6:12.) Ọnana mudiaphiyọ nẹ a sa jẹ ojẹ nẹ e che gbe nene erharhe rẹ urhurusivwee. (Gal. 5:16) Jihova vwo imuẹro nẹ avwanre sa sen edavwini; ọ rha dia ọtiọyeen, ọ cha vuẹ avwanre nẹ a siọọn. (Urhi 30:11-14; Rom 6:6; 1 Tẹsa. 4:3) O phẹnre dẹn nẹ, ẹgba ra vwọ họnre vwọso erharhe urhurusivwe kanre avwanree.

12. Die yen o fori nẹ e ru e rhe vwo iphiẹrophiyọ vuọvoo, kẹ diesorọ?

¹² Ọtiọyen ọ je hepha nẹ, e de roro nẹ Jihova cha kpairoro vrẹ avwanre fikirẹ erharhe urhurusivwe re vwori, nẹ iphiẹrophiyọ vuọvo rha herọ vwọ kẹ avwanree​—e jẹ e noso nẹ jẹgba rọhẹ oma rẹ avwanre ọyen “ta ota na,” e jẹ a kerhọ kẹẹ. Diesorọ? Kidie Baibol na yonori nẹ Jihova vwo ẹruọ rẹ ẹdia umwemwu rẹ avwanre hepha. (Une 103:13, 14) Ọ “riẹn erọnvwọn eje” kpahen avwanre, ọtiọyen ji te erọnvwọn ebrabra rẹ avwanre ruẹ fikirẹ umwemwu ra riuku rọyen. (1 Jọn 3:19, 20) Avwanre da davwẹngba rẹ avwanre eje, e rhe she ro ufi rẹ umwemwu womarẹ e vwo ruẹ nene erharhe urhurusivwe ro rhe avwanree, ke se vwo ẹwẹn obrorhiẹn rọ fonro vwẹ obaro ri Jihova. Diesorọ e vwo vwo imuẹro yena?

13-14. E de ghwe vwo erharhe urhurusivwe kọyen o vwo mudiaphiyọ nẹ Jihova rhe che rhiabọreyọ avwanree? Djekpahọn.

¹³ Baibol na phi ofẹnẹ phiyọ re vwo ru obo re brare (rọ dia obo re se suẹn) kugbe re vwo vwo urhurusivwe rẹ obo re brare (rọ dia obo re kọn ruẹ ohwo ẹwẹn). Kerẹ udje, Inenikristi evo vwẹ ukoko ri Kọrẹnt vwẹ ẹgbukpe ujorin rẹsosuọ ke vwobọ vwẹ uruemu rẹ eshare vwo nene eshare vwerhẹn. Pọl de si: “Ọtiọyen evo vwẹ usun rẹ ovwan na hepha jovwo.” Kẹ, ọnana mudiaphiyọ nẹ ayen rhe che vwo urhurusivwe rẹ ayen vwo nene eshare vwerhẹn ọfa? Ọyena dia uyotaa, kidie urhurusivwe tiọyena vwẹ awọ muotọ re. Ẹkẹvuọvo, Jihova de rhiabọreyọ Inenikristi ri sun oma rayen ri ji gbe nene urhurusivwe rayen naa. O nẹ ayen kerẹ ihwo ra ‘hworhẹ fon.’ (1 Kọr. 6:9-11) A je sa vwẹ ẹro tiọyen vwo ni we.

¹⁴ O toro erharhe urhurusivwe ru wo nene muabọọ, wo se phi ayen kparobọ efẹrọvo. Ọ da tobọ dianẹ wo che se si ayen noo, wo se sun oma wẹn wo vwo jẹ ‘ọhọre robọ kugbe iroro [wẹn] e nene.’ (Ẹfe. 2:3) Mavọ yen wo se vwo ru ọtiọyen ji phi ohọnre rẹ erharhe urhurusivwe kparobọ?

OBO RE SE VWO PHI KPAROBỌ

15. Diesorọ o vwo fo e vwo vughe ovwiẹrẹ rẹ avwanre a da guọnọ phi ohọnre rẹ erharhe urhurusivwe kparobọ?

¹⁵ E se vwo phi ohọnre rẹ erharhe urhurusivwe kparobọ, o fori wo vwo vughe ovwiẹrẹ ro rhe we. Jomaotọ wo vwo jẹ “iroro rẹ efian” ẹ vwọ phiẹn oma wẹn. (Jems 1:22) Wọ da vwẹ ẹro okueku vwo ni obẹnbẹn na vẹ ẹwẹn nẹ, ‘Ihwo efa da idi vrẹ vwẹ,’ yẹrẹ reyọ ihwo efa vwo guẹdjọ nẹ, ‘Ọ da dianẹ aye mẹ dje ẹguọnọ kẹ vwẹ, mi rhe she ro ọdavwini re vwo nẹ ihoho rẹ ihwo re banphiyọọ’​—ọ rha cha bẹn wo ki she ro ọdavwinii. Ọtiọyena, wọ nama davwẹngba wo vwo guomariase vwẹ iroro wẹn yẹrẹ orharhe uruemu ru wo ruru naa. Rhọnvwephiyọ oruchọ wẹn.​—Gal. 6:7.

16. Mavọ yen wo se vwo ru owenvwe ru wo vwo ru obo ri yovwirin ganphiyọ?

¹⁶ Vwọ vrẹ wo vwo vughe ovwiẹrẹ rọhẹ oma wẹn, o ji fo nẹ wọ davwẹngba wo jẹ ayen e she ruọ. (1 Kọr. 9:26, 27; 1 Tẹsa. 4:4; 1 Pita 1:15, 16) Vwo oniso rẹ ọke kugbe obo re nẹrhẹ wo she rua ayen. Ọ sa dia oka rẹ ọdavwini ọvo yẹrẹ unọke rẹ ẹdẹ ọvo yen ọdavwini na vwọ cha. Kerẹ udje, vwẹ ukperivwin ason rẹ ovwiẹrẹ dahẹ oma wẹn yẹrẹ oma wẹn de bruku re yen wọ da mrẹ bẹnbẹn wọ vwọ họnre vwosuọ? Rhẹro rẹ ọdavwini na, ji muegbe rẹ obo ru wo che ru vwẹ afọnrhe wẹn. O fori nẹ wo ru ọtiọyen tavwen ọdavwini na ke rhe.​—Isẹ 22:3.

17. Die yen e se yono nẹ udje ri Josẹf rhe? (Jẹnẹsis 39:7-9) (Ni ihoho na.)

¹⁷ Roro kpahen oborẹ Josẹf ruru ọke rẹ aye ri Pọtifa vwọ davwẹngba rọ vwọ riẹriẹ. Ugugege yena, yen ọ vwọ sen. (Se Jẹnẹsis 39:7-9.) Die yen ọnana djephia? Josẹf nabọ riẹn obo ro mudiaphiyọ ra vwọ reyọ aye rẹ ohwo ọfa tavwen aye ri Pọtifa ke davwẹngba vwọ riẹriẹ. Ọtiọyen ọ je hepha nẹ, wo se ru owenvwe ru wo vwo ru obo ri yovwirin ganphiyọ tavwen ẹdia rọ sa so ọdavwini kẹ wẹ ke vwomaphia. Vwẹ idjerhe tiọyena, siẹrẹ a da davwẹn owẹ ni, ku wo se ru nene obo ru wo vwori vwẹ ẹwẹn ru wọ guọnọ ru jovwo.

‘RHA DAVWAN OMA NẸ’

18. Mavọ yen wo se vwo phi ohọnre rẹ erharhe urhurusivwe kparobọ? (2 Kọrẹnt 13:5)

¹⁸ Wo se vwo phi ohọnre rẹ erharhe urhurusivwe kparobọ, o fori wọ “rha davwan” oma nẹ​—kọyen wọ vwọ fuẹrẹn oma wẹn ọkieje wọ vwọ riẹn obo ru wo ruẹ wan. (Se 2 Kọrẹnt 13:5.) Nọke ra ruọke, fuẹrẹn iroro wẹn kugbe obo ru wo ruẹ wo ji ru ewene ri fori. Kerẹ udje, ọ da tobọ dianẹ wọ sen ọdavwini dede, wọ sa nọ oma wẹn: ‘Bru ọke ọ reyọ ovwẹ me ke sa sen?’ Ọ da dianẹ ọ reyọ ọke wọ ke sen, wo jẹ ivun miovwo uwee. Ukperẹ ọtiọyen, jowọ wo vwo ru ekpọfia wẹn gan. Nọ oma wẹn enọ kerẹ: ‘Me sa davwẹngba me vwọ fobọ si erharhe iroro tiọyena nẹ ẹwẹn? Erọnvwọn ra vwọ diotọ nẹrhẹ ọ bẹn kẹ vwẹ me vwo sen ọdavwini? Me fobọ kuẹrofia kẹ ihoho ri forii? Mi vwo ẹruọ rẹ oboresorọ iwan ri Jihova me vwo yovwin ọ da tobọ dianẹ a guọnọre nẹ me riẹn oma sun?’​—Une 101:3.

19. Mavọ yen erhiẹn ri fiemu ọvoo sa nẹrhẹ ọ bẹn a vwọ họnre vwọso erharhe urhurusivwe?

¹⁹ Kẹnoma kẹ uruemu re vwo guomariase. Baibol na tare nẹ: “Udu rẹ ohwo ọ vọnre vẹ ophiẹvwe gangan o miovwiri gangan; ono se vughe.” (Jer. 17:9) Jesu je tanẹ evunrẹ rọyen yen “iroro rẹ umwemwu” nẹcha. (Mat. 15:19) Kerẹ udje, ọke vwọ yanran na, ohwo rọ dobọ rẹ eno rẹ ihoho rẹ ihwo banphiyọ ji re, se roro nẹ ọ “chọre” ro vwo ni ifoto re kpare urhurusivwe rẹ ehwaree kidie a mrẹ ẹban rẹ ihwo rehẹ evunrẹ ifoto naa. Yẹrẹ o se roro nẹ, ‘Urhurusivwe re vwo ru obo re chọre da kọn ro ọyen ẹwẹn jẹ o ruroo, ọ dia obo re braree.’ Kọyen ohwo tiọyena, ohwo rẹ ophiẹnvwe, rọ je ‘jiroro phiyotọ kpahen eruo rẹ ojevwe rẹ ugboma.’ (Rom 13:14) Mavọ wọ sa vwọ vrabọ rẹ uruemu ọtiọyena? Vwo oniso wọ je kẹnoma kẹ erhiẹn ri fiemu ọvoo re sa nẹrhẹ wo bru erhiẹn ẹkpa, e me nẹrhẹ wo she ro umwemwu.b Je sen koka koka rẹ iroro, yẹrẹ “iroro rẹ umwemwu,” rọ sa nẹrhẹ wo guomariase.

20. Die yen e rhẹro rọyen vwẹ obaro na, kẹ ukẹcha vọ yen e vwori enẹna?

²⁰ Kirobo re yonore, avwanre sa sen ọdavwini womarẹ ukẹcha ri Jihova. Vwọba, avwanre kpẹvwerẹ fikirẹ arodọnvwe rọyen rọ nẹrhẹ e vwo iphiẹrophiyọ rẹ arhọ ri bẹdẹ vwẹ akpọ ọkpokpọ na. Mavọ yen ọ cha vwerhoma te ra vwọ vwẹ ẹga kẹ Jihova vẹ ubiudu kugbe ẹwẹn rọ fonro! Bẹsiẹ ọke yena vwo te, imuẹro herọ nẹ iphiẹrophiyọ vẹ ẹgba ra vwọ họnre vwosọ erharhe rẹ urhurusivwe kanrẹ avwanree. E se phikparobọ siẹrẹ Jihova de ku ebruphiyọ rọyen ku ẹgbaẹdavwọn rẹ avwanre!