Oborẹ Odẹ ri Jihova Ghanre te Vwọ kẹ Jesu

1-2. (a) Die yen Jesu ruru vwẹ ason tavwen e ki hwe? (b) Enọ vọ yen a cha kpahenphiyọ vwẹ uyono nana?

VWẸ ovwọnvwọn ri Thursday, Nisan 14, 33 C.E., Jesu vẹ idibo rọyen da re Emu Ovwọnvwọn rẹ Ọrovwori na, kidie ọ riẹnre nẹ o rhe che kri a ke shẹ, reyọ vwo guẹdjọ, brorhiẹn hwe, gboja kẹ re ji hwe ghwuu. Ayen vwọ riemu na nu, Jesu da ta eta rẹ ọbọngan re koba vwọ kẹ idibo rọyen. Jẹ, tavwen ayen eje ki vrẹn nẹ ubruwevwin rọhẹ obenu na, Jesu da fọ ji nene ayen nẹrhovwo roghẹresan kugbe. Ọyinkọn Jọn si ẹrhovwo yena phiyotọ; ọ hẹ Jọn uyovwin 17.

² Die yen ẹrhovwo ri Jesu djephia kẹ avwanre kpahen ọdavwẹ rọyen vwẹ ọke yena? Idjerhe vọ yen ẹrhovwo yena vwo dje obo re ma ghanre kẹ vwẹ iruo aghwoghwo rọyen vwẹ otorakpọ na? E jẹ a mrẹ ẹkpahọnphiyọ rẹ enọ nana.

“MI DJE ODẸ WẸN KẸ AYEN RE”

3. Die yen Jesu ta kpahen odẹ ri Jihova, kẹ die yen o mudiaphiyọ? (Jọn 17:6, 26)

³ Vwẹ ẹrhovwo rọyen, Jesu da ta: “Mi dje odẹ wẹn kẹ ayen re.” Vwọrẹ uyota, abọ ivẹ yen ọ tare nẹ ọyen dje odẹ ri Jihova vwọ kẹ idibo rọyen re. (Se Jọn 17:6, 26.) Die yen eta rọyen na mudiaphiyọ? Odẹ rẹ idibo na riẹnree ọyen o dje vwọ kẹ ayen? Idibo ri Jesu ihwo ri Ju, ọtiọyena ayen riẹn odẹ rẹ Ọghẹnẹ Jihova jovwo re. Odẹ na vwomaphia abọ buebun vwẹ ẹbẹre ra vwẹ Hibru si vwẹ Baibol na. Ọtiọyena, ọ dia oderhi rẹ Ọghẹnẹ yen Jesu ta ota kpahaan; ẹkẹvuọvo oborẹ odẹ na mudiaphiyọ yen ọ ta ota kpahan. Jesu dje oka rẹ Ohwo ri Jihova hepha phia phephẹn, ọtiọyen ji te ọhọre, irueru vẹ iruemu Rọyen, vwọ vrẹ oborẹ kohwo kohwo se ru.

4-5. (a) Idjerhe vọ yen e se vwo djudje rẹ obo ro mudiaphiyọ a vwọ riẹn odẹ rẹ ohwo? (b) Idjerhe vọ yen idibo ri Jesu vwọ riẹn odẹ ri Jihova?

⁴ Kerẹ udje, vwẹ ẹwẹn roro nẹ ọkpako ọvo hẹ ukoko wẹn re se David, jẹ idọktọ rọ tẹn ona rẹ oma ẹbẹrẹ. Wo vughe oniọvo yena ikpe buebun re. Jẹ, ẹdẹ ọvo vwo te arhọ wẹn vwọ hẹ ẹdia rẹ imuoshọ, e de mu we kpo họsipito oniọvo na da wian, ọ da reyọ ona ro rhe re kerẹ idọktọ vwo sivwin urhuarhọ wẹn. Vwọrẹ uyota, ọ sa dianẹ ẹro wo vwo nẹ oniọvo na rhi wene re! David dia ọkpako ghevweghe wo vugheri jovwo naa, ẹkẹvuọvo ọyen idọktọ rọ tẹn ona rẹ oma ẹbẹrẹ ro ji sivwin urhuarhọ wẹn.

⁵ Vwẹ idjerhe vuọvo na, idibo ri Jesu riẹn odẹ ri Jihova jovwo re. Ẹkẹvuọvo womarẹ iruo aghwoghwo ri Jesu ayen da nabọ rhi vwo ẹruọ rẹ oborẹ odẹ na mudiaphiyọ. Diesorọ a vwọ ta ọtiọyen? Kidie Jesu vwẹrokere uruemu rẹ Ọsẹ rọyen vwẹ kemu kemu ro ruru kugbe obo rọ tare. Ọtiọyena idibo na vwọ kerhọ oborẹ Jesu yono ihwo wan je mrẹ obo ro nene ihwo yerin wan nu, ayen da nabọ rhe “riẹn” Jihova phiyọ.—Jọn 14:9; 17:3.

“ODẸ ROBỌ WẸN RU WỌ VWỌ KẸ VWẸ”

6. Die yen o mudiaphiyọ Jesu vwọ tanẹ Jihova vwẹ odẹ Rọyen vwọ kẹ ọyen? (Jọn 17:11, 12)

⁶ Ọke rẹ Jesu vwọ nẹrhovwo vwọ kpahen idibo rọyen, ọ da ta: “Rhẹrẹ ayen fikirẹ odẹ robọ wẹn ru wọ vwọ kẹ vwẹ.” (Se Jọn 17:11, 12.) Kẹ ọnana mudiaphiyọ nẹ e ji se se Jesu Jihova? Ẹjo kakaka. Noso nẹ Jesu vwọ ta ota kpahen odẹ na Jihova vwẹ ẹrhovwo rọyen, ọ tare nẹ “odẹ robọ wẹn.” Ọtiọyena odẹ ri Jihova dia oderhi ri Jesuu. Kẹ, die yen otọ rẹ ota ri Jesu na nẹ a vwẹ odẹ rẹ Ọghẹnẹ vwọ kẹ ọyen? Ẹsosuọ, Jesu ọyen ohwo ro mudia kẹ Ọghẹnẹ, ọ ke rha dia Ọtota rọyen. Ọ rhe re vwẹ odẹ rẹ Ọsẹ rọyen ji ruiruo rẹ igbevwunu buebun vwẹ odẹ yena. (Jọn 5:43; 10:25) Vwọba, otọ rẹ odẹ na Jesu yen “Jihova yen Osivwin.” Vwọrẹ uyota, odẹ ri Jihova vẹ odẹ ri Jesu churobọ si ohwohwo.

7. Djudje rẹ oborẹ Jesu sa vwọ reyọ odẹ ri Jihova vwọ ta ota.

⁷ Re vwo djudje rọyen, kidie nẹ ọyinkọn se mudia vwọ kẹ osun, kọ sa vwẹ odẹ rẹ osun na vwọ ta ota. Ọtiọyena, eta rẹ ọyinkọn na vwo ẹgba kerẹ eta rẹ osun na. Eriyen ọ je hepha nẹ, Jesu mudia vwọ kẹ Jihova je ta ota vwọ kẹ ihwo vwẹ odẹ Rọyen.—Mat. 21:9; Luk 13:35.

8. Idjerhe vọ yen odẹ ri Jihova vwọ hẹ ‘evunrẹ’ Jesu tavwen ọ ke rhe otọrakpọ na? (Eyanno 23:20, 21)

⁸ Vwẹ ẹdia rọyen kerẹ Ota na, Jesu reyọ ovuẹ kugbe odjekẹ vwọ kẹ emekashe rẹ Ọghẹnẹ ji te ihworakpọ kerẹ Ọtota ri Jihova. (Jọn 1:1-3) Ọ sa dianẹ Jesu yen amakashe rẹ Jihova ji ri nẹ ọ ra vwẹrote ihwo rẹ Izrẹl ọke rẹ ayen vwo vrẹn nẹ Ijipt. Rọ vwọ vuẹ ayen nẹ ayen nyupho rẹ amakashe yena, Jihova da tanẹ: “Kidie odẹ mẹ evun rọye.”a (Se Eyanno 23:20, 21.) Odẹ ri Jihova hẹ ‘evunrẹ’ Jesu kidie ọyen ohwo ro mudia kẹ Jihova kugbe ohwo rẹsosuọ ro titi odẹ rẹ Ọsẹ rọyen ji ruo fon.

“ỌSẸ, VWẸ URINRIN KẸ ODẸ WẸN”

9. Mavọ yen odẹ ri Jihova ghanre te vwọ kẹ Jesu? Djekpahọn.

⁹ Kirobo rẹ a ghwa ta ota kpahen na, tavwen Jesu ke tobọ rhe otọrakpọ na, odẹ ri Jihova yen orọnvwọn rọ ma ghanre vwọ kẹ. A gbe taa, odẹ ri Jihova vwo churobọ si erọnvwọn eje rẹ Jesu ruru ọke rọ vwọ hẹ otọrakpọ na! Ọke rẹ iruo aghwoghwo rọyen vwo kuẹphiyọ re, Jesu da rẹ Jihova nẹ: “Ọsẹ, vwẹ urinrin kẹ odẹ wẹn.” Ugege yena, Ọsẹ rọyen da kpahen kẹ vẹ urhuru ọgangan ro nẹ odjuvwu rhe: “Me vwẹ urinrin kẹ nure, me je cha rhoma vwẹ urinrin kẹ.”—Jọn 12:28.

10-11. (a) Idjerhe vọ yen Jesu vwọ vwẹ urinrin kẹ odẹ ri Jihova? (Ni uhoho na.) (b) Diesorọ odẹ ri Jihova vwọ guọnọ orufon kugbe e tito?

¹⁰ Jesu je vwẹ urinrin kẹ odẹ rẹ Ọsẹ rọyen. Vwẹ idjerhe vọ? Ọyen ọ vwọ vuẹ ihwo efa kpahen omamọ rẹ iruemu rẹ Ọsẹ rọyen kugbe obo ro ruru. Jẹ, o ji vwo erọnvwọn efa ro ruru vwọ vwẹ urinrin kẹ odẹ na. Odẹ ri Jihova guọnọ orufon, a je guọnọ nẹ e phoro ekan re mu banre odẹ rọyen no.b Jesu dje oborẹ ọnana ghanre te ọke ro vwo yono idibo rọyen ẹrhovwo rẹ udje na. Ọ da ta: “Ọsẹ rẹ avwanre rọhẹ obodjuvwu, e jẹ e ru odẹ wẹn fon.”—Mat. 6:9.

¹¹ Diesorọ odẹ ri Jihova vwọ guọnọ orufon kugbe etito? Kidie vwẹ ogba rẹ Idẹn vwẹ obuko re, Eshu rọ dia Idẹbono na miovwo odẹ ri Jihova Ọghẹnẹ je phọphọ. Eshu tare nẹ Jihova ọvwọrofian, nẹ o ji si obo ri yovwinrin nu kẹ Adam vẹ Ivi. (Jẹn. 3:1-5) Eshu je tanẹ oborẹ Jihova ruẹ erọnvwọn wan shephiyọọ. Efian rẹ Eshu mu bare odẹ rọyen na sa nẹrhẹ ihwo no nẹ Jihova orharhe ohwo. Vwẹ ọke ri Job, Eshu je tanẹ ihwo re vwẹ ẹga kẹ Jihova ruẹ ọtiọyen fikirẹ oborẹ ayen sa mrẹ vwo mie. Ọvwọrofian yena je tanẹ o vwo ohworakpọ vuọvo rọ ghini vwo ẹguọnọ ri Jihova te ẹdia rọ da vwẹ ẹga Kẹ siẹrẹ ọ dahẹ ọdavwinii. (Job 1:9-11; 2:4) A guọnọ ọke rere e se vwo dje ọvwọrofian na phia, sẹ Jihova yẹrẹ Eshu.

“ME VWẸ ARHỌ MẸ VWỌ KPAHOTỌ”

12. Die Jesu vwo owenvwe ro vwo ru fikirẹ ẹguọnọ ro vwo kpahen odẹ ri Jihova?

¹² Jesu guọnọ ru obo ro se ru eje vwo titi odẹ ri Jihova ji ruo fon, kidie o vwo ẹguọnọ rọyen. Jesu da ta: “Me vwẹ arhọ mẹ vwọ kpahotọ.” (Jọn 10:17, 18) Vwọrẹ uyota, o vwo owenvwe ro vwo ghwu fikirẹ odẹ ri Jihova.c Ihworakpọ rẹsosuọ, Adam vẹ Ivi chukoku Jihova ji nene Eshu. Vwọ fẹnẹ ayen, Jesu vwo owenvwe rọ vwọ rhe otorakpọ na ji dje ẹguọnọ rọyen kẹ Jihova. Jesu ru ọnana womarẹ rọ vwọ fuevun vwẹ akpeyeren rọyen eje. (Hib. 4:15; 5:7-10) Ọ serọ ọyọnregan rọyen vwẹ akpeyeren rọyen eje, rhi te ọke ro vwo ghwu vwẹ enu urhe rẹ oja na. (Hib. 12:2) Vwẹ idjerhe ọtiọna, o de djephia nẹ ọyen vwo ẹguọnọ ri Jihova kugbe odẹ Rọyen.

13. Diesorọ Jesu me vwo fo ohwo ro dje Eshu phiyọ ọvwọrofian? (Ni uhoho na.)

¹³ Aphro herọọ ne, Jesu reyọ akpeyeren rọyen vwo dje Eshu phiyọ ọvwọrofian, ukperẹ Jihova! (Jọn 8:44) Jesu nabọ vughe Jihova vrẹ kohwo kohwo ro yerin re. Ọ da dianẹ umuyota evunrẹ oborẹ Eshu ta kpahen Jihova na, Jesu rha riẹn kpahọn. Ẹkẹvuọvo Jesu fiudugberi chochọn rẹ odẹ ri Jihova kugbe oka rẹ ohwo rọ hepha. Ọke rọ tobọ vwọ họhọ nẹ Jihova kpairoro vrẹ dede, Jesu vwo owenvwe ro vwo ghwu ukpe ro vwo chukoku Ọsẹ rọyen ro vwo ẹguọnọ na.—Mat. 27:46.d

“MI . . . RUIRUO RU WỌ VWỌ KẸ VWẸ NA RE”

14. Idjerhe vọ yen Jihova vwọ hwosa kẹ Jesu fikirẹ evun-ẹfuọn rọyen?

¹⁴ Vwẹ ẹrhovwo rọ nẹre vwẹ ason tavwen o ki ghwu, Jesu da ta: “Mi . . . ruiruo ru wọ vwọ kẹ vwẹ na re.” O vwo imuẹro nẹ Jihova cha hwosa kẹ fikirẹ evun-ẹfuọn rọyen. (Jọn 17:4, 5) Ọsẹ rọyen kurophiyotọọ. Jihova vwẹ uphẹn kẹ nẹ ọ dia evunrẹ ushii. (Iruo 2:23, 24) Ọ kpare Jesu nushi je kẹ ẹdia rode vwẹ obodjuvwu. (Fil. 2:8, 9) Ukuotọ rọyen, Jesu ko suẹn kerẹ Ovie rẹ Uvie rẹ Ọghẹnẹ. Die yen Uvie yena cha ghwa rhe? Jesu kpahenphiyọ onọ yena ọke rọ vwọ vuẹ idibo rọyen nẹ ayen nẹrhovwo kpahen ẹbẹre rivẹ rẹ ẹrhovwo rẹ udje na nẹ: “Jẹ Uvie wẹn rhe. Jẹ e ru ọhọre wẹn [Jihova] vwẹ otọrakpọ na kirobo rọ hepha vwẹ obodjuvwu.”—Mat. 6:10.

15. Die ọfa yen Jesu che ru?

¹⁵ Vwẹ obaro na, Jesu che nene ivwighrẹn rẹ Ọghẹnẹ họnre je ghwọrọ irumwemwu vwẹ ofovwin rẹ Amagidọn. (Ẹvwọ. 16:14, 16; 19:11-16) Ọmọke da wan nu, ko che do Eshu phiyọ “ukpotọ ro jẹ oba evwo,” asan re de se ruiruo vuọvoo. (Ẹvwọ. 20:1-3) Jesu cha ghwa ufuoma rhe ihworakpọ ji ru ayen phiyọ ihwo re gbare vwẹ uvwre rẹ Usuon Ẹgbukpe Uriorin rọyen na. Ọ cha kpare ihwo ri ghwuru nushi. O che ru otọrakpọ na eje phiyọ iparadaisi. Ọhọre ri Jihova che ru gba!—Ẹvwọ. 21:1-4.

16. Mavọ yen akpọ na cha dia vwẹ oba rẹ Usuon Ẹgbukpe Uriorin na?

¹⁶ Die yen e se rhẹro rọyen nẹ ọ cha phia vwẹ oba rẹ Usuon Ẹgbukpe Uriorin na? Umwemwu kugbe jẹgba rẹ ihworakpọ eje che no. Ihworakpọ gbe cha rẹ womarẹ ọtanhirhe na nẹ a reyọ imwemwu rayen vwo ghovwo ayeen; ayen rha je cha guọnọ ohwo yẹrẹ orherẹn rọ je cha rẹ kẹ ayeen. ‘Ughwu [rẹ Adam soro] rọ dia ọvweghrẹn rọ koba na, [je] siro no re.’ Ishi na eje cha dia ifefe. Ọke yena ihwo ri ghwuru eje rhoma rhe akpọ re. Kohwo kohwo rọhẹ akpọ na eje kọ cha dia ohwo rọ gbare.—1 Kọr. 15:25, 26.

17-18. (a) Die yen cha phia vwẹ oba re Usuon Ẹgbukpe Uriorin na? (b) Die yen Jesu che ru ọke ra vwọ kẹ nẹ o vwo sun de vwoba nu? (1 Kọrẹnt 15:24, 28) (Ni uhoho na.)

¹⁷ Die ọfa yen je cha vwomaphia vwẹ oba rẹ Usuon Ẹgbukpe Uriorin na? Orọnvwọn ọghanghanre ọvo cha phia. Aphro ro shekpahen odẹ ri Jihova che vwoba. Vwẹ idjerhe vọ? Vwẹ ogba rẹ Idẹn, Eshu tare nẹ Jihova ọvwọrofian nẹ o sun ihworakpọ vwẹ idjerhe rẹ ẹguọnọọ. Nọke yena rhe, abọ buebun yen ihwo ri muọghọ vwọ kẹ vwo ru odẹ rọyen fon. Otiọyena, vwẹ oba rẹ Usuon Ẹgbukpe Uriorin na, jẹ a nabọ titi odẹ ri Jihova re. Aphro herọọ, vwẹ ọke yena jẹ o djephia kẹ ihwo eje nẹ ọyen Ọsẹ ro vwo ẹguọnọ re.

¹⁸ Vwẹ oba re Usuon Ẹgbukpe Uriorin na, kohwo kohwo cha rhe riẹn nẹ eta rẹ Eshu ta kpahen Jihova na efian. Ọke ra vwọ kẹ Jesu nẹ o vwo sun na de vwoba nu, die kọyen o che ru? Ọ cha vwẹrokere udje rẹ Eshu ji gbevwọso Jihova? Ẹjo! (Se 1 Kọrẹnt 15:24, 28.) Jesu kọ cha vwẹ Uvie na rhoma vwọ kẹ Ọsẹ rọyen. Ọ cha vwomakpotọ vwọ kẹ usuon ri Jihova. Vwọ fẹnẹ Eshu, Jesu vwo owenvwe ro vwo siobọnẹ kemu kemu fikirẹ ẹguọnọ ro vwo kpahen Jihova.

19. Mavọ yen odẹ ri Jihova ghanre te vwọ kẹ Jesu?

¹⁹ Ọke ra da ghwọrọ Eshu no nu, ka cha nabọ ru odẹ ri Jihova fon ji tito. A gbe ta, Jihova vwọ guọnọ vwẹ odẹ rọyen kẹ Jesu! Jesu nabọ djephia nẹ ọyen vwẹrokere Ọsẹ rọyen gbagba. Kẹ, mavọ yen odẹ ri Jihova ghanre te vwọ kẹ Jesu? Ọ ghanre kẹ vrẹ kemu kemu. O vwo owenvwe ro vwo ghwu fikirẹ odẹ yena, o ji muegbe rọ vwọ rhoma vwẹ kemu kemu eje vwọ kẹ Jihova vwẹ oba Usuon Ẹgbukpe Uriorin na. Mavọ yen a sa vwọ vwẹrokere udje ri Jesu? Uyono rọ vwọ kpahen ọnana cha kpahenphiyọ onọ yena.