Wọ Riẹnre Jovwo?

Mavọ ihwehworo ghanre te vwẹ Izrẹl rẹ awanre?

IHWEHWORO pha ghanghanre vwẹ ẹkuruemu rẹ ihwo rẹ Izrẹl awanre. Baibol na djunute ihwehworo ra reyọ obọ vwo hworo kugbe e ra vwẹ ugbunu vwọ so. Vwọrẹ uyota, a da ghanre Baibol na phiyọ ẹkẹn ihwe, ẹkẹn ọvo rọyen ine, kerẹ udje: ẹbẹ ri Une rẹ Ejiro, Une ri Solomọn vẹ Uvwerhe eyen evo usun rayen. Kọyensorọ ọbe na Music in Biblical Life vwọ tanẹ Baibol na djere phephẹn nẹ ihwo rẹ Izrẹl vwẹ ihwehworo vwo ruiruo vwẹ irueru buebun vwẹ akpeyeren rayen.

Ihwehworo vwẹ akpeyeren ri kẹdi kẹdẹ. Ihwo rẹ Izrẹl hworo ihwehworo vwo dje oborẹ oma ru ayen. (Aiz 30:29) Eya hworo isorogun, so ine vẹ aghọghọ ji gbeha ọke ra vwọ vwẹ ivie vwo mu, rẹ ayen vwo re erẹ kugbe ọke rẹ ayen de phi ifovwin kparobọ. (Igu 11:34; 1Sa 18:6, 7) Ihwo rẹ Izrẹl je so ine rẹ uvweri vwẹ ọke rẹ omaemuophiyọ. (2Ik 35:25) Aphro herọọ nẹ “ihwo rẹ Izrẹl vwo ẹguọnọ rẹ ihwehworo mamọ,” ọtiọyen Cyclopedia ri McClintock vẹ Strong tare.

Ihwehworo vwẹ ọguan rẹ ovie. Ivie rẹ Izrẹl vwo omavwerhovwẹn kpahen ihwehworo. Ovie Sọl se Devid rhe egodo rọyen nẹ o rhi hworo ihwehworo vwọ kẹ ọyen. (1Sa 16:18, 23) Ọke rẹ Devid rhe vwọ dia ovie re, o de ru ekuakua re vwo hworo ihwehworo, so ine evwevwerhen, ji ru ọrhuẹrẹphiyotọ rẹ ibuine ri che hworo ihwehworo vwẹ uwevwin rẹ ẹga na. (2Ik 7:6; Emọ 6:5) Ovie Solomọn vwo ibuine rẹ eya vẹ eshare re so ine vwẹ ọguan rọyen.​—Agh 2:8.

Ihwehworo vwẹ ega ri Jihova. Obo re ma ghanre kparobọ, ihwo rẹ Izrẹl reyo ihwehworo vwọ ga Jihova. Vwọre uyota, ibuine 4,000 yen hworo ihwehworo vwẹ uwevwin rẹ ẹga rọhẹ Jerusalẹm. (1Ik 23:5) Ayen hworo igogo, ekpata, isorogun vẹ ewanre. (2Ik 5:12) Ẹkẹvuọvo, ọ dia ihwo nana re ten ona rẹ ihwehworo na ọvo yen reyọ ihwehworo vwo jiri Jihovaa. O muẹro nẹ ihwo rẹ Izrẹl buebun so Ine re se Ascents ọke rẹ ayen vwo kpo Jerusalẹm ra re orẹ kukpe kukpe. (Un 120-134) Vwo nene isiesi rẹ ihwo ri Ju, ihwo ri Izrẹl so Une rẹ Ejiro ri Hallela ọke rẹ ayen da re Orẹ rẹ Ọwanvrẹ na.

Nonẹna, ihwehworo je pha ghanghanre vwọ kẹ ihwo rẹ Ọghẹnẹ. (Jem 5:13) Avwanre so ine kerẹ ẹbẹre ọvo rẹ ẹga rẹ avwanre vwọ kẹ Jihova. (Ẹf 5:19) Une ẹsuọ nẹrhẹ avwanre siẹkẹrẹ ohwohwo. (Kọl 3:16) Ọ je vwẹ ọbọngan vwọ kẹ avwanre vwo chirakon rẹ ebẹnbẹn. (Iru 16:25) Ihwehworo ọyen idjerhe oyoyovwin ọvo re vwo dje esegbuyota vẹ ẹguọnọ rẹ avwanre vwo kpahen Jihova phia.