Enọ rẹ Ihwo ri se Ẹbe Avwanre Nọre
Tivọ yen idibo 70 ri Jesu ji ji kpo iruo aghwoghwo na vwẹ obuko re hepha, ọke rọ vwọ reyọ Emu Ovwọnvwọn rẹ Ọrovwori Na vwo mu? Ayen gbobọnyẹ Jesu?
Ọ chọre re vwo roro nẹ kidie nẹ idibo 70 na hẹ etiyiin ọke ri Jesu vwọ vwẹ Emu Ovwọnvwọn rẹ Ọrovwori Na vwo muu na, ọ dia ọyen o vwo mudiaphiyọ nẹ o rhiabọreyọ ayeen yẹrẹ ayen gbobọnyẹ Jesuu. Iyinkọn 12 na ọvo yen Jesu guọnọre nẹ e dia etiyin ọke rọ vwọ reyọ Emu Ovwọnvwọn na vwo mu.
O rhiabọreyọ iyinkọn 12 kugbe idibo 70 na. Eshare 12 ri Jesu seri iyinkọn na, yen ọ ka sane vwo nẹ ohri rẹ idibo rọyen re pha buebun na. (Lu 6:12-16) Galili yen ọ hepha “o de se Ihwivẹ na” ji “ji ayen yanran re ghwoghwo Uvie rẹ Ọghẹnẹ na, ji sivwin ihwo.” (Lu 9:1-6) Ọke vwọ yanran na, rọ vwọ hẹ Judia, Jesu da je “sane 70 efa, o de ji ayen ivivẹ.” (Lu 9:51; 10:1) Ọtiọyena, Jesu vwo idibo efa vwẹ asan sansan re de ghwoghwo iyẹnrẹn esiri na.
Ihwo ri Ju re dia idibo ri Jesu ji se nene orua rayen re Orẹ rẹ Ọwanvrẹ re ruẹ kukpe kukpe. (Ey 12:6-11, 17-20) Ọke rẹ ughwu rọyen vwo siẹkẹrẹ re, Jesu vẹ iyinkọn rọyen de kpo Jerusalẹm. Ẹkẹvuọvo, o se idibo rọyen rehẹ Judia, Galili kugbe Perea nẹ ayen rhi koko nene ọyen re Orẹ rẹ Ọwanvrẹ naa. O phẹnre dẹn nẹ, Jesu guọnọre nẹ ọyen vẹ iyinkọn na ọvo ru Orẹ na. Ọ da vuẹ ayen: “Mi vwo owenvwe ọgangan re me vẹ ovwan vwọ re Orẹ rẹ Ọwanvrẹ nana tavwen me ke rioja.”—Lu 22:15.
O vwo oboresorọ ro vwo ru ọtiọyen. Jesu che ghwu kẹrẹkpẹ kerẹ “Omogodẹ rẹ Ọghẹnẹ ro siẹ umwemwu rẹ akpọ na no.” (Jọ 1:29) Ọnana cha phia vwẹ Jerusalẹm, rọ dia asan re de ze izobo kẹ Ọghẹnẹ ọke grongron rhire na. Ugbomọphẹ rẹ ughwu ri Jesu cha ghwa rhe, yovwin vrẹ ugbomọphẹ ro te ihwo rẹ Izrẹl obọ womarẹ omogodẹ rẹ ayen re re vwẹ ason rẹ ayen vrẹn nẹ Ijipt na. (1Kọ 5:7, 8) Obo ri Jesu ruru na cha nẹrhẹ Ihwivẹ na dia usun rẹ uchivwo rẹ ukoko rẹ Inenikristi na. (Ẹf 2:20-22) Ọ vwerhoma nẹ Jerusalẹm, orere ọfuanfọn na vwo “ichivwo rẹ ikuta 12” re si “edẹ 12 rẹ iyinkọn 12 rẹ Omogodẹ na” phiyọ. (Ẹvw 21:10-14) Ọtiọyena, iyinkọn re fuevun na vwo ẹdia ro te ayen vwẹ orugba rẹ ọhọre rẹ Ọghẹnẹ. Eriyina avwanre vwo ẹruọ rẹ oboresorọ rẹ Jesu vwọ guọnọ nẹ ayen nene ọyen re Orẹ rẹ Ọwanvrẹ rọ koba na kugbe Emu Ovwọnvwọn rẹ Ọrovwori ro vwo mu na.
Idibo 70 kugbe i ri chekọ na nene Jesu re Orẹ nanaa. Jẹ, idibo rọyen eje re fuevun cha mrẹ erere vwo nẹ Emu Ovwọnvwọn rẹ Ọrovwori ri Jesu vwo mu na. Inenikristi eje re rhe dia ihwo ra jẹreyọ na, cha re ọphọ rẹ uvie ri Jesu ta ota kpahen vwọ kẹ iyinkọn na vwẹ ason yena.—Lu 22:29, 30.