Wọ Riẹnre Jovwo?
Diesorọ ọ vwọ dia emu erere Jihova vwọ rhọnvwe nẹ a sa reyọ erurẹ yẹrẹ inekuku vwo ze izobo?
KIROBO rẹ Urhi na tare, Jihova rhọnvwere nẹ a reyọ erurẹ yẹrẹ inekuku vwo ze izobo vwọ kẹ ọyen. Ọkieje yen e vwo djunute ephran ivẹ nana vwẹ urhi ro shekpahen izobo eze, jẹ a sa reyọ ivẹ vwo ruiruo vwẹ ẹdia ohwohwo. (Liv. 1:14; 12:8; 14:30) Diesorọ ọnana vwọ dia emu erere? Iroro ọvo rọ sorọ yen, a fobọ mrẹ erurẹ-ẹ. Diesorọ ọ vwọ dia ọtiọyen?
Erurẹ
Erurẹ eyen emephran re kua nẹ asan kpo asan ra mrẹ vwẹ otọ rẹ Izrẹl vwẹ ọke uvo. Vwẹ emeranvwe rẹ October, emephran nana ke rhan nẹ ẹbẹre rẹ obọrhen ọnre na kpo asan rọ rhorha emerha vwẹ ẹkuotọ na, ayen me rha rhan rhivwin kpo Izrẹl vwẹ uvwre rẹ ọke osio vẹ ọke uvo. (Sol. 2:11, 12; Jer. 8:7) Ọnana mudiaphiyọ nẹ vwẹ Izrẹl awanre, ọ bẹn ihwo vwọ mrẹ erurẹ vwo ze izobo vwẹ ọke ekpahen.
Inekuku
Vwọ vrẹ ọyena, inekuku ghwa kua nẹ asan kpo asa-an, eriyina ọkieje yen a vwọ mrẹ ayen vwẹ Izrẹl. Emu ọfa kọna, inekuku eyen ephran re churẹ. (Ni Jọn 2:14, 16.) Vwo nene oborẹ ọbe rẹ Bible Plants and Animals tare, “eko vẹ irere rehẹ Palestine eje churu inekuku. Ihwo ri vwo uwevwin eje vwẹ etiyin vwo uwevwin rẹ emephran dia yẹrẹ umunu vwẹ igbẹhẹ rẹ uwevwin rayen rẹ emephran na dia.”—Ni Aizaya 60:8.
Inekuku rọhẹ umunu ra bọn kẹ
Jihova djerephia nẹ ọyen ohwo ro vwo ẹguọnọ kugbe erorokẹ ro vwo rhiabọreyọ izobo rẹ emephran ra mrẹ vwẹ Izrẹl ọkieje.